16
Han nakhaˈ-ila an takhala
1 Inalin Hesus hachi disipolo na hi, “Gwacha han ohan achangjan an nangpapfantay chin enachangjana han takhala na. Inchiklamu cha ay hija chin khun aton chin takhala na an agkhuy na empa-ennongan hichuy tamu na. 2 Hotti empapfokha na hichuy takhala na ja inali na hi, ‘Ngachah nuy inali cha an im enat? Ijalim an amin hana lehtaan an gwa ay he-a, ti tan aanuˈ he-a ad ugwani.’ 3 Nunnomnom hitay an takhala ja inali na hi, ‘Ngachah chi atoˈ? Ti tan aanunaˈ ay tay tamuˈ. Ad-adchiyaˈ an i miˈtamu hi anuˈ ja pfuma-inaˈ khu an mun-achaw. 4 Aa, anilaˈ mahpay hay atoˈ, ta gway aton chi tatakhu an mangeˈ-op ay ha-in nu aanunaˈ ay tay tamuˈ.’ 5 Ja enohha-ohha na an enajakhan hana gway utang na ay chuy apo na. Inali na chin oha hi, ‘Atanay utang mu ay ni apoˈ?’ 6 Tempfar na ja inali na hi, ‘Hingkhahot an angang hi mantika.’ Ja inalin khu chin takhala hi, ‘Tayya hitay lihhipfum hotti alaom ta hukatam gwot hitay nitulaˈ hi un lemay polo hini utang mu.’ 7 Ja inali na khu chin oha hi, ‘Atanay utang mu ay ni apoˈ?’ Tempfar na ja inali na hi, ‘Hingkhahot an pfajon hi trigo.’ Ja inalin chin takhala hi, ‘Tayya hitay lihhipfum ta hukatam hitay nitulaˈ hi un gwaloy polo hini utang mu.’ 8 Unot inannilan chin apo na hitay enat na ja inali na hi, ‘Mu agkhu niˈ an tayya kan kaykhu an nakhaˈ-ila hitay an takhala. Ti anila na hini aphochan ni piˈtakhuwana.’” Ja inalin khu Hesus hi, “Tikhan ju an munnaˈnaud an nakhaˈ-ila hana agkhuy namati mu hana namati, ti anila cha an meˈkadwa hi papadchung cha an agkhuy namati. 9 Hotti tayya han alloˈ ay chaˈju. Hay maphod ja khahtuwon ju hini enachangjan ju heto lota ay ni ap-aphochan chi tatakhu, ta umali ayya hini apogpokhan chi piˈtakhuwan an ma-id mahpay pungkhahtuwan, ja mun-an-anla hana tinulungan ju an tatakhu an manittum ay chaˈju ad langit an agwachaan chi piˈtakhuwan an ma-id chi pogpog na.
10 Hini takhu an mapagtarkan an mangpapaptoˈ an mangat hi it-ittang an tamu ja epapaptoˈ na khu an tamuwan hay ot-ottong. Muti hini munloko hi it-ittang an tamu ja om-omod an lukuwana hini ot-ottong. 11 Hotti mahapor an anila ju an mangpaptoˈ hana enachangjan heto lota nu podhon ju an michatan hi nahamad an enachangjan ad langit. 12 Ja mahapor khu an anila ju an manalimun hay hana enachangjan chi uchumna nu podhon ju an michatan. 13 Hini takhala ja achi mapfalin an munchehhan an miˈtamu ay ni chugwa an ap-apo, ti hay atona ja podhona hini oha ja chin-ug na hini oha. Unuchona hini oha ja pinahiw na hini oha. Amat hina khu ay chaˈju an achi mapfalin an punchehhanon ju an munserbi ay Apo Jos ja hay enachangjan.”
14 Unot chengngor hachi Farisee an mammamhod hi pelaˈ chin inalin Hesus ja piniwpigwitan cha ja pinahiw cha hija. 15 Ja inalin Hesus ay chicha hi, “Chaˈju hana tatakhu an mangpatpatikhaw an magpong aju muti anilan Apo Jos hini nun-u-uttor ay ni nomnom ju. Gwa hana khun aton chi tatakhu an khemhon chay maphod muti unagkhu ipapfubpfungot hi Apo Jos.
16 Chin urchin Moses ja chin intulaˈ chin profetan Apo Jos ja hijay nangtuchu hi aton chin tatakhu ingkhanah immaliyan John Bautista. Nete-a ay chuy ja khun mekasaba hini Ebanghelyo an mangpa-innila ay ni umali an Pun-ap-apugwan Apo Jos. Ja cho-or cha an mungkhikhihhu an mamhod an midchum. 17 Muti anong un ma-upfah hitay lota ja ad uchu muti achi ma-utaw hini urchin Moses, an anong un hay it-ittang hi nikhulit.
18 Hini lala-e an manghijan hi ahagwa na ta i pumiggwa ja hihiya an immilugtap chamchama. Ja hihiya an immilugtap khu hini lala-e an mangahagwa ay ni pfupfai an nihijan.”
Han achangjan ja hi Lazarus
19 Ja inalin Hesus hitay an pangngarig. “Gwacha han ohan pfaˈnang an nun-angingina an amin chi lopfong na, ja a-arkha-arkhaw hon maphod hini khuna anun. 20 Ja gwacha khu han napubli an hay ngachana ja hi Lazarus an napoghaan an amin chi achor na. Ja i cha empapekheng hichin pantaw ni pfalay chuy pfaˈnang. 21 Penhod Lazarus an anun hay makhah ay ni lamehaan ni pfaˈnang muti achi cha podhon an ichat. Meˈchagkha khu ja i khun chirchilan hachi aho hay hachi pogha na.
22 Nachakngan chin natajan Lazarus ja in-uy hana angher chin lennagwa na an i nidchum ay Abraham. Natoy khu chin pfaˈnang ja nilupfuˈ 23 ja immuy hichi ad chalom, ja munnaud an malikhatan. Tenangad na ja tinnig na cha Abraham ay Lazarus an ni-a-achawwi. 24 Ja nun-ugwap ay hi Abraham ja inali na hi, ‘Apo Abraham, ka-ahiyanaˈ adniˈ ta allom ay Lazarus ta tod-ona hay chanum ta ijali na an itidtid ay tay himot u. Ti tan munnauchaˈ an malikhatan ay tay apoy.’ 25 Tempfar Abraham ja inali na hi, ‘Nomnomnomom an chin achaam hichi lota ja maphod an amin chi niˈtakhuwam. Hi Lazarus ayya ja ma-id pohodna hi niˈtakhuwana. Ad ugwani ja gwa heto hi Lazarus an mun-an-anla ja gwa a hina an malikhatan hi munnaud. 26 Ja meˈchagkha khu ja tayya han enephod Apo Jos an numpfattanan ta, hotti achi mapfalin an gway marpu heto an umali hina. Ja ma-id khu marpu hina hi umali heto.’ 27 Tempfar chin pfaˈnang ja inali na hi, ‘Ti kan un ayya amat hina ja honakhom adniˈ hi Lazarus ta umuy hichi pfalay cha ama. 28 Ti gwacha han lema an a-akhiˈ, ta i na tukhunon chicha ta achi cha miˈjali heto achaan chi likhat.’ 29 Muti inalin Abraham hi, ‘Gwa hichi hana impatulaˈ Apo Jos an intuchun Moses ja hachi profeta an pfahaon cha.’ 30 Ja inalin chin pfaˈnang hi, ‘Achi omanay hinuy, Apo Abraham, ti nu gwachay natoy an mummahu an umuy ay chicha hot muntutuju cha.’ 31 Muti inalin Abraham hi, ‘Nu achi cha pattiyon chin impatulaˈ Apo Jos an intuchun Moses ja hachi profeta, ja anong un gway mummahu ja achi cha chamchama mamati.’”