Luke 17

Hini omaˈ-atan chi mamakawan hi ibpfa

¹ Ja inalin Hesus hay hachi disipolo na hi, “Umannung an umali hana khumapo hi pfumahulan chi tatakhu, ti khangayna. Muti munnaˈnaud an ka-ahi hini takhu an chumalat hi pfumahulan. ² Toˈ-onot hi un ekho-od hay machamot an pfato ay ni pfokhang na ja intuud hichi baybay ta marteng, mu hini un hijay chumalat hi pfumahulan chi oha an paˈ-amati ay ha-in, anong un hay oha an nababa. ³ Hotti pa-ennongan ju hini peˈ-at ju. Ihingar mu hini ibpfam nu pfumahor, ja pakawanom nu umali an mumpakawan ay he-a. ⁴ Anong un mumpapeto an pfumahor ay he-a hi hen-arkhaw hon immali an mumpakawan ja mahapor an pakawanom hija.”

Hay pfi-ah chi pammati

⁵ Inalin hachi apostol ay Hesus hi, “Ipapfiˈpfi-ah mu hitay pammati mi!” ⁶ Tempfar Hesus ja inali na hi, “Nu gwa koma hay pammati ju hi mipadchung ay ni it-ittang an pfugwan chi lakotta, ja mapfalin an allon ju ay tay otong an ajiw hi, ‘Mapfaˈkhut a ta i a mitanum hichi baybay!’ hot ma-at.”

Hay tamun chi takhala

⁷ Inalin khu Hesus hi, “Nu khulat ta gwacha ay chaˈju chi gway takhala na an i nun-alachu wenno nun-enchog hi karnero ja immanamut, ja un mu chah allon hi, ‘Umali a gwot ta umpfun a ta mangan a’? ⁸ Achim an hay allom ja, ‘I a munhukat ja enhakhanam ta mahhunaˈ an mangan ja un a meˈ-an.’ ⁹ Achi khahin un a munyaman ay ni takhalam. Atona tugwali hana inalin ni apo na ti tamu na. ¹⁰ Amat hina khu ay chaˈju. Napfalin an enat ju an amin chi inalin Apo Jos an peˈ-at ju ja hay gwahna koma ay ni nomnom ju ja, ‘Un ami tugwali takhala, hotti enat mi hitay tamu mi.’”

Chin nangpatengngan Hesus han himpolo an nun-a-unit

¹¹ Entoloy Hesus chin omajana ad Jerusalem ja eneˈgwa na ay nuy numpfattanan chi Samaria ja Galilee. ¹² Ja unagkhu gwa an me-atam cha han oha an pfarju ja gwa han himpolo an linala-e an nun-a-unit an alagwona. Tinnig cha chuy an linala-e hi Hesus ja intaˈchug cha ta achi cha mehnot. ¹³ Ja hi-u-ugwap cha an mangali hi, “Apo Hesus, ka-ahiyan chaˈmi adniˈ!” ¹⁴ Tinnig Hesus chicha ja inali na hi, “Umuy aju mumpatikhaw hay hana papachi.” Ja gwa an khun cha umuy ja temmenong cha an amin. ¹⁵ Tinikhaw chin oha an na-aan chin unit na ja numpfangngad ja khuna pun-iˈgwap an mundayaw ay Apo Jos. ¹⁶ Temmagtag an i nunheppe ay Hesus ja nunyaman. Ja un pay Samaritan hitay an lala-e. ¹⁷ Ja inalin Hesus hi, “Un chah achi himpolo chi temmenong? Chaadma mah hini hijam? ¹⁸ Anagkha ta un oha hitay Hentil chi numpfangngad an nunyaman ay Apo Jos?” ¹⁹ Amat hichi ja inalin Hesus ay hija hi, “Tumaˈchug a ta umuy a ay ni omajam, ti tan temmenong a khapo ay ni pammatim.”

Hini umaliyan ni Pun-ap-apugwan Apo Jos

²⁰ Gwa hana Farisee an nangpfokha ay Hesus hi, “Aˈ-anunay umaliyan ni Pun-ap-apugwan Apo Jos ay chita-o?” Tempfar Hesus ja inali na hi, “Hini umaliyana ja ma-id pangmatunan hi mamattikhaw. ²¹ Ja achi mapfalin an allon cha hi, ‘To heto’ wenno ‘Chiya hichi’ ti tayya an gawwacha ay chaˈju ad ugwani.”

²² Amat hichi ja inalin khu Hesus hachi disipolo na hi, “Umali han arkhaw an umijahop aju hi pumpfangngachaˈ an Na-ilangitan an Takhu, muti achiyaˈ pay umali. ²³ Allon chi tatakhu ay chaˈju hi, ‘Tayya heto hini Hennag Apo Jos an Mamahhod!’ wenno ‘Chiya hichi!’ Achi ju unuchon chicha. ²⁴ Ti ha-in an Na-ilangitan an Takhu ja mumpfangngachaˈ an amat hi ilat an mepfachong ad uchu ja tikhan an amin chi tatakhu. ²⁵ Muti hay mahhun ja munlikhataˈ ja chuˈkhonaˈ hi tatakhu ad ugwani. ²⁶ Hay omaˈ-atan ni pumpfangngachaˈ an Na-ilangitan an Takhu ja amat chin na-at chin timpon Noah ²⁷ an chin tatakhu ja un cha khun mangmangan ja mangin-inum ja mumpun-ah-ahagwa ingkhanah chin arkhaw an himmikhopan cha Noah chin papor. Kheˈ-emhon cha ja immali chin lotot ja narteng cha an amin. ²⁸ Hihiya khu hini na-at chin timpon Lot an un cha khun mangmangan ja mangin-inum, ngumina ja mungngina, muntamu ja mumpakhad chin tatakhu. ²⁹ Ja unot nachakngan chin arkhaw an nakakan Lot hichi ad Sodom ja amat hi uchan chin apoy an narpu ad uchu ja nagpfu cha an amin. ³⁰ Ja amat hina khu nu mumpfangngachaˈ an Na-ilangitan an Takhu an marpu ad langit, an khemhon chi tatakhu unaˈ achi mumpfangngad.

³¹ Ay nuy an arkhaw an pumpfangngachaˈ ja hini takhu an gwa hi partug ni pfalay na ja achi agkhu i humikhop ta alaonay khina-u na, ta un atoˈtogna ja empacheh na an lomajaw. Ja hini takhu an gawwa hichi pajaw ja achi umanamut an mangala hi khina-u na ta un atoˈtogna ja lemmajaw. ³² Un ju chah agkhuy anila hichin na-at chin ahagwan Lot? ³³ Hini takhu an mangpa-ennongan ay ni piˈtakhuwana heto lota ja angkhay, ja achi miˈtakhu ay Apo Jos. Muti hini takhu an man-ug ay ni piˈtakhuwana heto lota ja miˈtakhu ay Apo Jos hi ma-id chi pogpog na. ³⁴ Alloˈ ay chaˈju hi, chin pumpfangngachaˈ ja nu gway chugwa hi takhu an nunchechelloh an nanalloˈ, ma-ala hini oha ja mataynan hini oha. ³⁵ Ja khulat na ta gwacha hay chugwa hi pfinapfai an khun mungkheleng, ma-ala hini oha, ja mataynan hini oha. ³⁶ Ja anong un hay chugwa hi linala-e an khun muntamu, ma-ala hini oha ja mataynan hini oha.” ³⁷ Ja empfokhan hachi adalan hi, “Apo, chaad chi pa-atan hato?” Ja inali na hi, “Anila ju an ay ni achaan chi natoy ja ma-amung hana hagwiti an i omman ay ni achor na.”