15
Chin pangngarig han na-utaw an karnero
1 Gwa han namenghan an cho-or chi tatakhu an i nunchongor ay Hesus an nidchuman hana khun munhenger hi pakha ja hana uchumna an allon cha hi napfahulan an tatakhu. 2 Ja mungngulongor hachi Farisee ja memehtolon chi urchin Moses ja inali cha hi, “Anagkha mah hi Hesus ta hanguwona hay hachi nun-apfahulan an tatakhu ja neˈ-orpfong khu ay chicha?” 3 Amat hichi ja inalin Hesus ay chicha hitay an pangngarig. 4 “Nu khulat ta gway oha ay chaˈju hi hingkhahot chi karnero na, ja na-utaw chi oha. Ngay tugwali atona? Taynana hini hijam chi polo ta han hijam an karnero hichi pahto ta i na hingiton hini oha an na-utaw ingkhanah chakngana. 5 Ja chinakngana ayya hot mun-an-anla an mami-ug 6 an mang-anamut. Hot ajakhana hana khakhayyum na ja hahakhokhong na hot allona hi, ‘Mun-an-anla ta-o, ti toja an chinakngaˈ hitay karnero an na-utaw.’ 7 Alloˈ ay chaˈju hi amat hina khu an munnaˈnaud chi pun-an-anlaan cha ad langit khapo ay ni ohan takhu an nan-ug hi pfahor na mu ay ni hijam chi polo ta han hijam an tatakhu an mangali hi ma-id pfahor cha hotti achi cha mahapor an muntutuju.”
Chin pangngarig han na-utaw an pihu
8 Ja entoloy Hesus an nangali hi, “Amat hina khu han pfupfai an gway himpolo hi pelaˈ na an napfalor ja na-utaw chin oha. Ngay tugwali atona? Torkhana hini panor ta gway panikhana, ja munhikhid ta ep-ephod na an hingiton ingkhana hi chakngana. 9 Chinakngana ayya hot ajakhana hana khakhayyum na ja hana hahakhokhong na hot allona ay chicha hi, ‘Mun-an-anla ta-o, ti toja an chinakngaˈ hitay na-utaw an pelaˈ u.’ 10 Alloˈ ay chaˈju hi amat hina khu an mun-an-anla hi Apo Jos ja hana angher na khapo ay ni oha an takhu an nan-ug hi pfahor na.”
Chin pangngarig han na-utaw an empfalay
11 Ja entoloy Hesus an nangali hi, “Gwacha han ohan lala-e an chugway empfalay na an linala-e. 12 Inalin chin uchichiyan ay ama na hi, ‘Ama, ichat mu gwot an amin hini epfanoh mu ay ha-in.’ Amat hichi ja eneˈchan ama cha chin epfanoh na chin chugwa an empfalay na.
13 Immuy chi at hichi hi arkhaw ja nun-inginan tay uchichiyan hichin pfanoh na ja enala na chin nungnginaana ja empacheh na. Immuy hichi achawwi an pfuglay ja khinahto na an amin hi ma-id chi poot na. 14 Napoh chin pelaˈ na ja netongor ja ulat ay chuy an pfuglay ja ma-id hi i na pangalan hi mahapor na. 15 Amat hichi ja i neˈ-op han ohan takhu ay chuy an pfuglay. Ja hay tamu na ja i khun munchukhan. 16 Munnaud an munhenaang ja podhona an i meˈ-an chin anun chi pfapfuy, muti ma-id mangchat hi anuna. 17 Amat hichi ja nunnomnom ja inali na hi, ‘An akamoh hini khun anun hana takhalan ama ja gwachaaˈ heto an matoy hi henaang na. 18 Hotti una-ot mumpfangngad ay ama ta alloˈ ay hija hi, numpfaholaˈ ay Apo Jos ja ay he-a. 19 Ja achiyaˈ ma-ipfilang hi empfalay mu. Muti ipfilangaˈ ad niˈ hi oha an takhalam.’
20 Amat hichi ja empacheh na an mumpfangngad ay ama na. Achawwi pay chin agwachaana ja immatunan ama na ja narmu chin otong an nignikha na. Amat hichi ja temmagtag an i nanittum ja len-om na hija. 21 Ja inalin chin unga hi, ‘Ama, numpfaholaˈ ay Apo Jos ja ay he-a. Ja achiyaˈ ma-ipfilang hi empfalay mu.’ 22 Muti inalin gwot ama na hay hachi takhala na hi, ‘Ekhalakhar ju ta i ju alan hini mapmaphochan an lopfong ta epelopfong ju ay hija. Hinghingan ju ja hinapatuwan ju. 23 Ja i ju alaon hini matapfa an pfakah ta partiyon ju ta mumpfehta ta-o. 24 Ti khenong atag chi un natoy hitay empfalay u ja un tumakhu, i nun-utaw ja tayya an immanamut.’ Amat hichi ja numpfehta cha.
25 Hichin panguluwan ja narpu an i nuntamu. Unagkhu gwan me-atam hi pfalay cha ja chengngor na chin hingalangala. 26 Ja enajakhana chin ohan takhala ja empfokha na hi, ‘Ngachah chuy khun cha aton?’ 27 Tempfar chin takhala ja inali na hi, ‘Immanamut hi ibpfam hotti impartiyan amam ay ni empatapfa na an pfakah, ti immanamut an mamattakhu.’ 28 Pfimmungot chin panguluwan ja achi na podhon an miˈhikhop. Amat hichi ja pfimmutay hi ama na ja inar-aloˈ na. 29 Muti inali na hi, ‘Tikham akay niˈ, Ama. Atanay tagwon hi nanganuhaˈ an nangatan hana impatamum ja inunud u an amin hana inalim ay ha-in. Ja ma-id mah niˈ oha hi khancheng hi inchat mu ta partiyon mi hay hana khakhayyum u. 30 Ja unagkhu immanamut hitay empfalay mu an nangahto an amin hana empfanoh mu ay hija hi ma-id chi poot na ja i na pay empfabpfapfai, ja impartiyam agkhu niˈ ay ni empatapfam an pfakah.’ 31 Ja inalin ama na hi, ‘Amat heto, ton empfalay u. Ay tay a-arkha-arkhaw ja gawwacha a ay ha-in ja an amin hato khina-uˈ ja khina-um. 32 Hotti un ta-o chah achi mun-an-anla ja impartiyan ta-o? Ti tayya an khenong atag chi un natoy hi ibpfam ja un tumakhu, i nun-utaw ja tayya an immanamut.’”