2 Kòríntì ŋa 12

Kírísítò nya iŋɛ́ ŋa, tsí ń ŋa Kpɔ́lù

Ká wà mú iŋɛ́-kã̀, tsí ń nya akpá#á, èrè-kã̀ kò wà ńnɛ̀. Ó ɖi, màa ɖì wíìnyɛ̀ ti nára-iŋɛ́ kã̀ŋa òŋu yá. Iŋɛ́ ŋa#á, Ɔlá-wa ní nyà ŋá, tsí ń ŋà mí#ɛ́, tsí ó mú ɔ̀kã̀ ŋa gbo, tsí ń ɖíre fú mi. 2 Ǹ ma ɔ̀nyà-kã̀, olí-Yèésù ni,^* tsí Ɔ̀ɖáyé kɛ́ɛ lɔ títí ńkpàkũkpàkũ-ɔ̀rɔ̃, tsí ó bɔ̀ wá báàyí ɔɖɔ̃́ máàmɛ́ɛrɛ̃ ní. Ó lɔ nɔ́ɔ̀nyà bɛ́#ɛ̀, kò lɔ nɔ́ɔ̀nyà bɛ́#ɛ̀, ǹ kò mà. Ó ɖi, Ɔ̀ɖáyé òŋu mà. 3-4 Nóòtítɔ́#ɛ́, Ɔ̀ɖáyé kɛ́ɛ lɔ ńɖi-ara‐ɛ̀.^* Ó ɖi, ó lɔ nɔ́ɔ̀nyà bɛ́#ɛ̀, kò lɔ nɔ́ɔ̀nyà bɛ́#ɛ̀, ǹ kò mà. Ó ɖi, Ɔ̀ɖáyé òŋu mà. Tsí kíbí ó káà tó ńbɛ̀#ɛ́, ó gbɔ́ afɔ̀ kã̀ŋa. Afɔ̀ ŋa#á, oŋù yèé ká ń fɔ̀ ŋá#á kò wà, tsí ɔ̀nà kò wà fú ɔ̀nyà-kã̀ gbo, tsí kó fɔ̀ ŋá. 5 Màa mú ɔmɔ̀tsɔ́#ɛ́ òŋu, tsí ń nya akpá. Ó ɖi, ǹ kàkó mú ara-mi, tsí ń nya akpá. Ni ó ɖi àmí yèé kò wà nɔ́wɔ́-mi#ɛ́ ni. 6 Ǹ má wò ní n nyɛ ara-mi, kàá sì dzɛ́ gbo ní ǹ wà sṹrṹ, iŋɛ́ yèé tse#ɛ́, òtítɔ́ ní ǹ má fɔ̀#ɛ́ fe. Ó ɖi, ǹ kɔ̀ ní ǹ kàkó nyɛ ara-mi, iŋɛ́ yèé tse#ɛ́, ǹ wà sá ní ɔ̀nyà-kã̀ kó máa waà bu ìɖì si fú mi láre iŋɛ́ yèé ǹ wà tse, tsí ó wà rí#ɛ́ òŋu iŋɛ́ yèé ǹ wà fɔ̀, tsí ó wà gbɔ́#ɛ́.

7 Iŋɛ́ yèé Ɔlá-wa kɛ́, tsí ń ŋà mí ŋa#á, à láre arũ fú mi títí ǹ kàkó nyáa ń sàwé iŋɛ́-kã̀. Tsí kò wà wò ní n wà kɛ́ ara-mi gbegbé, tsí ó dzɛ́, tsí à mú iŋɛ́ si nára fú mi. Iŋɛ́#ɛ́ wà kíbí agúgú bɛ́, tsí Ètsù† bɛ̀ɛ́ wá ní kó wáa wà nára si fú mi, tsí kó wà kpa mí kɛ́rɛ́kɛ́rɛ́. 8 Ó ɖi, gbà mɛ́ɛta kpó ní ǹ sì wúùre fú Ɔlá-wa ní kó gbà mí dzɔ̀ɔ́ nɔ́wɔ́-ìréré#ɛ́. 9 Tsí ó dzɔ́ŋù fú mi ní: Ore-ɔ̀fɛ́ yèé òŋu tse fú mi#ɛ́ ti tó, iŋɛ́ yèé tse#ɛ́, ńbí àmí káà tã́ ɖí mi#ɛ́ ní òŋu náa nya ikpá-òŋu, tsí ń ɖíre dzálɛ̀ kpó#ɛ́. Ńbɛ̀ɛ́, ǹ wà fɔ̀ɔ́ ní n mú àmí yèé kò wà nɔ́wɔ́-mi#ɛ́, tsí ń nya akpá#á, ó sã̀ fú mi lárè, àtsùgbée ikpá-Kírísítò kó tsɛ́wé bò mí si. 10 Ńnɛ̀ ní bí àmí kò wà nɔ́wɔ́-mi gbo, bí à wà bú mi gbo, bí à wà tsoró bá mi gbo, bí ǹ wà kpotsèéré gbo, bí odzo-ayé wà tse mí gbo, bí iŋɛ́ nyɛ̀ŋɛ̀ ŋa kpó wà bá mi náàtsùgbée kíbí ǹ gba Kírísítò gbɔ́#ɛ́, ayè títɛ́ gé ní náa dzɛ́ si fú mi#ɛ́. È kè rí géè, náàsòkò yèé àmí tã́ ɖí mi#ɛ́, àríkɛ̀ɛ́ yèé gìɖì àmí náa kò mí si#ɛ́ ńnɛ̀ɛ́.

Kpɔ́lù wà ɖíìhã̀ŋù ti nára-olí-Yèésù-ìlú-Kòríntì ŋa

11 Ɛ̃ɛ̃, ǹ wà wíìnyɛ̀ kíbí ɛnɛ yèé fɔ̀ ní ǹ wà sṹrṹ bɛ́! Tsí ɛ̀ŋɛ ní sì sɔ́ mi si ńnɛ̀#ɛ́. Fee, ɛ̀ŋɛ gìɖì ní má dzà náànyì-mi#ɛ́, iŋɛ́ yèé tse#ɛ́, bí ó dzɛ́ gìɖì ní ǹ kò dzɛ́ iŋɛ́-kã̀#á, adzítsɛ́-Yèésù† lákṹ-ŋɛ́ ŋa#á kò lárè mí ńŋɛ́-kã̀ kpókpó gìɖì bɛ́ ɖã́wò. 12 Ńǹwèrè yèé ǹ gbé ńɖi-ŋɛ́#ɛ́, ǹ tse iŋɛ́ kã̀ŋa òŋu àtɛ̀si kpàtàkìì-kã̀. Ǹ tse iŋɛ́-àwùsì ŋa, tsí tse iŋɛ́-ikpá ikpá ŋa gbo ńǹrɔ́ǹrɔ́. Tsí iŋɛ́ nyɛ̀ŋɛ̀ ŋa kpó wà nyà ɖíre ní adzítsɛ́-Yèésù-òtítɔ́-kã̀ ní ǹ dzɛ́#ɛ́. 13 Ǹ ní fòò, kí gìɖì dzɛ́ iŋɛ́ yèé ǹ tse fú ɛgbɛ́-Kírísítò-àtíbɔ̀ ŋa lárè, tsí ǹ kò tse fú ŋɛ́ náànyì-kíbí ǹ kò dzɛ́ arù, tsí kpa ŋɛ́#ɛ́? Ãã̀, ó ɖà kíbí ǹ tsòkṹnù ńnɛ̀ɛ́. Ó ɖi, è ń tɔrɛ fú mi!

14 È rí gé! Ǹ kpaɖí si, tsí n wá ńɖi-ŋɛ́ nóláànkɛ́ɛta‐ɛ̀, tsí ǹ kàkó sì dzɛ́ arù, tsí kpa ŋɛ́. Kò tsi iŋɛ́ yèé wà nɔ́wɔ́-ŋɛ́ ŋa#á ní ǹ wà wò#ɛ́. Ɛ̀ŋɛ ká-ŋɛ́ ní ǹ wà wò#ɛ́. Fee, kò tsi ɔma ní nákó tse si fú boba òŋu ínà#á. Boba òŋu ínà ní nákó tse si fú ɔma#á. 15 Èmi òŋu, ǹ dzɛ́ inɔ́ tã̀ã́, ànyì tã̀ã́ ní èmi ká-èmi gbo, iŋɛ́ yèé wà nɔ́wɔ́-mi ŋa#á gbo, màa lo àŋa kpó nóòkpì tiŋɛ́. Tsí bí ǹ dzáfɔ̀-ŋɛ́ tó bɛ́ɛ̀ fe, ɛ̀ŋɛ òŋu, è nákó dzáfɔ̀-mi oɖé gé niì?

16 Ó sã̀! È dzɛ́ ní ǹ kò dzɛ́ arù, tsí kpa ŋɛ́ nɔ̀? Ó ɖi, ɔ̀nyà kã̀ŋa òŋu nákó sì fɔ̀ ní èmi nɛ́ ɔgbɔ̃́ ńnɔ́, tsí bu òɖòbò sɔ gé, tsí àŋa bɔ́ dzì ńnɛ̀ bɛ́ gé dzúlúm. 17 Ǹ ní fòò, náàŋírĩ-ɛnɛ yèé ǹ bɛ̀ wá ŋa#á fee, ńǹtá-nɛ̀ɛ́ ǹ gbà, tsí tɛ̀ ŋɛ́ dzɛ? 18 Ǹ tsìkálɛ̀ fú Títò ní kó wá ńɖi-ŋɛ́ ni, tsí ǹ bɛ ìnàbí-wa#á gbo tɛ̀ náànyì‐ɛ̀. Báàyí#ɛ́ fe, Títò wáa tɛ̀ ŋɛ́ dzɛɛ̀? Fee, ìsérè ɔ̀kã̀ntso ní èmi‐ɛ̀ méèdzì àa nɛ́ tã́ná tse bɛ́ɛ̀#ɛ́, tsí ɛkpa ɔ̀kã̀ntso gbo ké ní èmi‐ɛ̀ méèdzì àa fà#á. Nàmí ǹ tsàáà?

19 Ó ti ɖi dzídzɛ̃̀ báàyí ní è náa wà ɖédzú ní àa wà tɔ́tse ara-wa ńɖi-ŋɛ́ ni#ɛ́. Ó ɖi, ńǹrɔ́-kíbí Kírísítò wà wò gbà#á òŋu ńǹtsodzú-Ɔ̀ɖáyé ní àwa òŋu, àa wà wíìnyɛ̀#ɛ́. Fee, àrínódzú-mi ŋa, iŋɛ́ yèé àa wà fɔ̀ kpó#ɛ́, àtsùgbée àkaralé-ŋɛ́ kó ta ogùgù múlɛ̀ kpãŋu ni.

20 Fee, asá-kã̀ wà nɛ́ɛ̀ɖɔ̃̀-mi si. Òŋu ní wà dzɛ́ ní màa wáa tó ńɖi-ŋɛ́ tã́, tsí kíbí ǹ wà wò ní e wà gbà#á, ǹ kàkó rí ŋɛ́ bɛ́ɛ̀. Tsí kíbí ɛ̀ŋɛ gbo è nákó wà wò ní n wà gbà#á, è kàkó rí mi bɛ́ɛ̀. Kó máa wáa dzɛ́ ní è wà rã́ã̀rã̀, tsí wà dzowú-ara-ŋɛ́ ŋa gbo, tsí wà bínɔ́-ara-ŋɛ́ ŋa gbo. Kó máa wáa dzɛ́ gbo ní è wà ɖu igbã̀-ara-ŋɛ́ ŋa gbo, tsí wà kpe ɛ́kɔ-ara-ŋɛ́ ŋa, tsí wà náfɔ̀ hṹnúhṹnú ŋa gbo si. Kó máa wáa dzɛ́ gbo ró ní è wà kɛ́ ara-ŋɛ́, tsí wà náàfàdzà gbo si. 21 Tsí ǹ tɔ́ wà sá gbo ró ní n máa wáa tó ńɖi-ŋɛ́ tã́, tsí Ɔ̀ɖáyé yèé ǹ wà sɛ̃̀#ɛ́ kó tɔ́ wáa ɖánɔ́ mú mi nódzú-ŋɛ́ ró, tsí n wáa sɔkṹ gbo fú ɔ̀nyà kpíkpɔ̀ kã̀ŋa. Ɛnɛ nyɛ̀ŋɛ̀ ŋa#á, à dzàbi wáa lɔ, tsí ìlò wérewère yèé à lò òŋu àlòwá yèé à tse náàrì nɛ́ anɔ́ nódzú#ɛ́, à kɔ̀, tsí à kò kɔ̀ɔ́ dzɔ̀ɔ́.