2 Kòríntì ŋa 13

Kpɔ́lù wà fú olí-Yèésù-ìlú-Kòríntì ŋa ńfɛ̀ɛ́nɔ́-ìtã̀ntã́ ŋa

Ó ɖi oláànkɛ́ɛta‐ɛ̀ ní ǹ bàkó wá ńɖi-ŋɛ́#ɛ́. Tsí kíbí à kɔɔ́ si ńǸwé-Ɔ̀ɖáyé† gbà#á, à ní: “Bí à sɛ́rí ɔ̀nyà-kã̀#á, ó wà ní ɔ̀nyà méèdzì mɛ́ɛta kó nyà si nódzú fú ɛnɛ nyɛ̀ŋɛ̀ ní òtítɔ́ ni tã́ná.”^* 2 Kíbí ǹ wá ńɖi-ŋɛ́ nóláànkéèdzì‐ɛ̀#ɛ́, ǹ ti kã́rã́ ɛnɛ yèé dzàbi wáa lɔ ŋa#á òŋu ɛnɛ-àtíbɔ̀ ŋa gbo si ní nɔ́dzɔ́ yèé màa wá ńɖi-ŋɛ́ ró#ɛ́, ǹ kàkó tì ń tu ɔ̀nyà-kã̀ kpókpó. Tsí nɔ́mbɛ́ yèé ǹ kò wà ńɖi-ŋɛ́ gbo si báàyí#ɛ́, ǹ tɔ́ wà fɔ̀ɔ́ fú ŋɛ́ ró, tsí e mà si bɛ́ɛ̀. 3 Ǹ fɔ̀ bɛ́ɛ̀, iŋɛ́ yèé tse#ɛ́, odzú-ŋɛ́ wà si gé ní àŋa kó rí iŋɛ́-kã̀ yèé nákó nyà ɖíre ní Kírísítò wà gbà ńǹtá-mi, tsí wà wíìnyɛ̀ ìɖéǹɖè#ɛ́. Kírísítò#ɛ́, àmí kò tã́ ɖíi ńŋɛ́ yèé ó tse fú ŋɛ́ ŋa#á. Kà kàa bɛ́ɛ̀, ó wà nya ikpá‐ɛ̀ ɖíre náàŋírĩ-ŋɛ́ ni. 4 Nóòtítɔ́#ɛ́, ńǹwèrè yèé à kã̀ã́ si ńǹtá-egi-ìɖáàgàlàdzà†#á, kò lo àmí‐ɛ̀. Ó ɖi, ikpá-Ɔ̀ɖáyé tse tsí ó wà náàyɛ̀ si. Tsí kíbí ó tse ɔ̀kã̀ntso bá wa si#ɛ́, àmí kò wà fú àwa gbo. Ó ɖi, ikpá-Ɔ̀ɖáyé nákó tse tsí àa nákó gbé náàyɛ̀ báa, tsí à nákó nyàá ɖíre fú ŋɛ́.

5 È kpa inɔ́-ara-ŋɛ́ wò, tsí e rí ká yí ní fee, ìgbèngbé-àŋa fa ɛkpa-iŋɛ́ yèé àŋa gbà gbɔ́#ɛ́ si làkóò yáà? Fee, è tse àɖã́wò fú ara-ŋɛ́, tsí è rí mà ní Yèésù Kírísítò wà náàŋírĩ-ŋɛ́ si nɔ̀? Ni ó ɖi è tse àɖã́wò fú ara-ŋɛ́, tsí è kè dzàdzàbɔ́ géɖé ni. 6 Ó ɖi, ǹ karalé ní è nákó rí mà ní àwa òŋu, àa tse àɖã́wò fú ara-wa, tsí àa dzàdzàbɔ́. 7 Àa wà wúùre fú Ɔ̀ɖáyé ní e máa tse íbàɖí-kã̀ kpókpó. Tsí bí àa wà wúùre bɛ́ɛ̀#ɛ́, kò tsi ní àa wà wò ní àa kó nyà ɖíre ní àwa òŋu, àa tse àɖã́wò fú ara-wa, tsí àa dzàdzàbɔ́ ni. Kà kàa bɛ́ɛ̀, àa wà wò ní e wà tse ire ni. Bí ó lɔ káà dzɛ́ gìɖì ní àa tse àɖã́wò fú ara-wa, tsí àa kò dzàdzàbɔ́ oo, àa wà wò ní e wà tse ire. 8 Fee, àa kò nɛ́kpá-kã̀ kpókpó, tsí àa kó nyáa ń ɖí ɔ̀nà fú òtítɔ́-ikɔ̀ ɖíɖɔ̃̀#ɛ́. Iŋɛ́ yèé àa nákó nyáa tse gé#ɛ́ ní dzɛ́ ní àa kó ɖù fúu#ɛ́. 9 Bí ó dzɛ́ ní àmí kò wà fú wa, tsí ó wà fú ɛ̀ŋɛ òŋu, ayè títɛ́ gé ní náa dzɛ́ si fú wa#á. Fee, àa náa wà wúùre gbo ní e sɛ̃̀ si nɔ́ɔ̀nà sísɛ̃́#ɛ́ ni. 10 Ńnɛ̀ ní kíbí ó dzɛ́ ní ǹ kò wà ńɖi-ŋɛ́ si báàyí#ɛ́, ǹ wà tse ìwé yèé bɛ́ wá fú ŋɛ́, àtsùgbée bí ǹ wáa wá ńɖi-ŋɛ́, ni n máa lo ɛ̀tsɛ yèé Ɔlá-wa fú mi#ɛ́, tsí ń dzára fú ŋɛ́. Ɛ̀tsɛ#ɛ́, Ɔlá-wa fú mi ńnɛ̀ ní èmi kó lòó, tsí ń mɔ́wɔ́ gbè fú ŋɛ́, tsí ɛgbɛ́-ŋɛ́ kó lɔ ńwádzú ni. Kò fú mi ńnɛ̀ ní èmi kó ń fɔ́ɔ.

Okũ-ìtã̀ntã́ ŋa

11 Ìnàbí-mi ŋa, báàyí#ɛ́, ayè kó wà tɛ́ ŋɛ́. È tsikpá, tsí e sɛ̃̀ si nɔ́ɔ̀nà sísɛ̃́#ɛ́ gbo. È náa wà ɖáàmí le ara-ŋɛ́ ŋa gbo, tsí arũ-ŋɛ́ gbo kó ɖé. È náa ɖɔ̃̀ bá ara-ŋɛ́ ŋa gbo. Bí è tse bɛ́ɛ̀, Ɔ̀ɖáyé, ɛnɛ yèé dzɛ́ olí-àmúɖɔ̃̀, tsí dzɛ́ olí-tútùúrɔ̀ gbo#ɛ́ nákó wà náànyì-ŋɛ́ si. 12 È náa kí ara-ŋɛ́ ŋa nɛ́kpa nɛ́kpa kpó nókũ-àmúɖɔ̃̀. Ɛnɛ yèé ŋa kpó dzɛ́ ti Ɔ̀ɖáyé#ɛ́ wà kí ŋɛ́. 13 Yèésù Kírísítò Ɔlá-wa kó tse ore-ɔ̀fɛ́ fú ɛ̀ŋɛ kpó. Ɔ̀ɖáyé gbo kó wà nɛ́ àmúɖɔ̃̀ fú ɛ̀ŋɛ kpó. Tsí Mímí-Ɔ̀ɖáyé† gbo kó tse tsí ɛ̀ŋɛ kpó e wà tsobí.