2 Kòríntì ŋa 11

Kpɔ́lù ní atsìké-adzítsɛ́-Yèésù ŋa, à kò láre òŋu ńŋɛ́-kã̀

Àà! Ó má dzɛ́ ní è nákó nyáa gbódzú, tsí n sṹrṹ oɖé fee, ó má sã̀. Ó ɖi, è nákó sì gbódzú gé ní ó dzɛ́#ɛ́. 2 Iŋɛ́ yèé tse#ɛ́, ǹ wà dzowú nóòkpì-ŋɛ́, tsí ìrɔ́-owú dzídzɛ nyɛ̀ŋɛ̀#ɛ́, ó ti ńɖi-Ɔ̀ɖáyé ni. Fee, è wà kíbí èkíɖã yèé kò ma ɔkɔ, tsí wà nɔ́wɔ́ nɔ́wɔ́ si bɛ́#ɛ́ ni, tsí ǹ mú ŋɛ́, tsí ń fú ɔkɔ ɔ̀kã̀ntso. Ɔkɔ#ɛ́, Kírísítò ni. 3 Ó ɖi, ǹ wà sá ní ńǹrɔ́-kíbí edzò yèé à náa kpè ní Ètsù†#ɛ́, ó ɖá ɔgbɔ̃́, tsí ń rú Àyɛ̀wà#á, ɔ̀nyà-kã̀ kó máa wáa bàdzɛ́ etí fú ɛ̀ŋɛ gbo, tsí e wáa kɔ̀ ní àŋa kàkó tɛ̀ náànyì-Kírísítò òŋu òtítɔ́, tsí inɔ́-ŋɛ́ gbo kó máa má ró. 4 Ǹ wà fɔ̀ bɛ́ɛ̀, iŋɛ́ yèé tse#ɛ́, àa dzíkɔ̀ ti nára-Yèésù fú ŋɛ́ tã́, tsí bí ó dzɛ́ ní ɔ̀nyà-kã̀ wá, tsí wáa dzíkɔ̀ ti nára-Yèésù-òmírɛ̃̀ fú ŋɛ́#ɛ́, è náa nyáa gbódzú, tsí gba ikɔ̀‐ɛ̀. È gba Mímí-Ɔ̀ɖáyé† òŋu ikɔ̀ ɖíɖɔ̃̀ yèé àa dzɛ́ fú ŋɛ́#ɛ́ gbo tã́, tsí è nyáa gbódzú ró, tsí gba mímí òmírɛ̃̀-kã̀ òŋu ikɔ̀ ɖíɖɔ̃̀ òmírɛ̃̀-kã̀ gbo ró.

5 Ó ɖi èmi òŋu, ǹ mà ní adzítsɛ́-Yèésù† lákṹ-ŋɛ́ nyɛ̀ŋɛ̀ ŋa#á, à kò lárè mí ńŋɛ́-kã̀ kpókpó. 6 Bóyá, ǹ kò ma afɔ̀ tó ńǹɖì‐ɛ̀. Ó ɖi, ká fɔ̀ ní ń ti Ɔ̀ɖáyé mímà òŋu, ǹ tó òkè. Tsí àa nyàá ɖíre fú ŋɛ́ ńŋɛ́ ɔ̀kã̀lɔ́ɔ̀kã̀ kpó òŋu nɔ́ɔ̀nà ɔ̀kã̀lɔ́ɔ̀kã̀ gbo kpó.

7 Kíbí ǹ wáa dzíkɔ̀ ɖíɖɔ̃̀-Ɔ̀ɖáyé fú ŋɛ́#ɛ́, ǹ kò gba iŋɛ́-kã̀ nɔ́wɔ́-ŋɛ́. Kíbí ǹ tse bɛ́ɛ̀#ɛ́, ǹ tɛ ara-mi bɔlɛ̀ ni, àtsùgbée ɛ̀ŋɛ òŋu, e gba nyínyɛ̀. Bí ǹ tse bɛ́ɛ̀ ni mà ɖɔ́ɔ̀núù? 8 Ǹ kó ɛgbɛ́-Kírísítò òmírɛ̃̀ ŋa dzɛ, tsí ń tsitsɛ́ fú ŋɛ́ ni, iŋɛ́ yèé tse#ɛ́, àŋa ní wà sã owó fú mi ńǹwèrè nyɛ̀ŋɛ̀#ɛ́. 9 Ńǹwèrè yèé ǹ gbé ńɖi-ŋɛ́#ɛ́, iŋɛ́ ŋa náa hã́ mi. Ó ɖi, ǹ kò sì dzɛ́ arù, tsí kpa ɔ̀nyà-kã̀, iŋɛ́ yèé tse#ɛ́, ìnàbí-wa ŋa yèé ti ńlɛ̀-Màkɛ̀ɖónìyà wá#á, à fú mi ńŋɛ́ ɔ̀kã̀lɔ́ɔ̀kã̀ kpó yèé kò wà fú mi#ɛ́. Ǹ kò wò ní n dzɛ́ arù, tsí kpa ɔ̀nyà-kã̀ kpókpó, tsí ǹ kàkó dzɛ́ arù, tsí kpa ŋɛ́ nɔ́dzɔ́-kã̀ gbo. 10 Nóòtítɔ́-Kírísítò yèé wà ńnɔ́-mi si#ɛ́, ǹ wà fɔ̀ɔ́ òŋu yá. Afɔ̀ nyɛ̀ŋɛ̀ yèé ǹ wà ń nya akpá#á, ǹ kò rí ɛnɛ yèé nákó nyáa kũṹ si nárũ fú mi nérè-Àkáyà#á bɛ̀ kpó#ɛ́. 11 Tsí kí tse tsí ǹ kɔ̀ ní ǹ kàkó dzɛ́ arù, tsí kpa ŋɛ́? Iŋɛ́ yèé tse#ɛ́, ǹ kò nɛ́ àmúɖɔ̃̀ fú ŋɛ́ nàmí? Fee, Ɔ̀ɖáyé mà ní èmi òŋu, ǹ nɛ́ àmúɖɔ̃̀ fú ŋɛ́.

12 Ó ɖi, iŋɛ́ yèé ǹ wà tse#ɛ́, òŋu gé ní màa wà tsítse si làkóò#ɛ́, àtsùgbée ɔ̀nyà nyɛ̀ŋɛ̀ ŋa kó máa nyáa ɖá ɖáŋgá-kã̀ kpókpó. À wà wo ká rí ɔ̀nà-kã̀, tsí ká wà ń nya akpá, tsí wà fɔ̀ ní àŋa wà tsitsɛ́#ɛ́ ńǹrɔ́-kíbí àwa gbo, àa wà tseé#ɛ́ ni. 13 Ɔ̀nyà nyɛ̀ŋɛ̀ ŋa#á, atsìké-adzítsɛ́-Yèésù ŋa ní à dzɛ́#ɛ́. Òtítɔ́ ɔ̀kã̀ntso bɛ́ kò wà ńtsɛ́ yèé à wà tse#ɛ́. À sɔ ara-ŋa ɖi adzítsɛ́-Yèésù Kírísítò ŋa si ni. 14 Tsí iŋɛ́ nyɛ̀ŋɛ̀ òŋu kò wà ní kó munɛ. Ètsù òŋu ká‐ɛ̀ fe, kò sɔ ara‐ɛ̀ ɖi adzítsɛ́-ɔ̀rɔ̃† yèé wà má yòɖòɖòò#ɛ́ɛ̀? 15 Ńbɛ̀ɛ́, bí àtsìtsɛ́‐ɛ̀ ŋa gbo sɔ ara-ŋa ɖi àtsìtsɛ́ yèé ŋa wà tse òtítɔ́#ɛ́, kò wà ní kó mù wá. Ó ɖi, ńǹrɔ́-kíbí à tsitsɛ́#ɛ́ gbà#á, bɛ́ɛ̀ ké ní ìtã̀ntã́-ayé-ŋa gbo nákó wáa lɔ gbà#á ńnɛ̀ɛ́.

Kpɔ́lù wà kpɛ̀rɔ́-ìréré‐ɛ̀ ŋa

16 Ǹ tɔ́ wà fɔ̀ɔ́ ró ní ɔ̀nyà-kã̀ kpókpó kó máa kpè mí ní asṹrṹ. Nàmí bí è sì wà kpè mí ní asṹrṹ ná oo, ni è tɔ́wɔ́ gbà mí kíbí asṹrṹ bɛ́, àtsùgbée èmi gbo, n nyáa mú iŋɛ́-kã̀, tsí ń nya akpá oɖé. 17 Iŋɛ́ yèé ǹ wà fɔ̀#ɛ́, kò tsi kíbí Ɔlɔ́dzɔ́ wò ní n fɔ̀ɔ́ gbà#á ní ǹ wà fɔ̀ɔ́#ɛ́. Ǹ wà wíìnyɛ̀ kíbí ǹ wà sṹrṹ bɛ́ yí ni, iŋɛ́ yèé tse#ɛ́, iŋɛ́ yèé màa ń nya akpá#á ti tɔwɔ́-mi ná. 18 Kíbí ó dzɛ́ ní ɔ̀nyà kpíkpɔ̀ wà mú ìsérè ti ɔ̀nyà, tsí wà ń nya akpá ná#á, èmi gbo, màa mú iŋɛ́-kã̀, tsí ń nya akpá ńnɛ̀ɛ́. 19 Kpɔ̀ɔ́ dza! Olí-ifɛ̀ɛ́nɔ́ ŋa, ɛ̀ŋɛ gbo, è nyáa gbódzú, tsí wà tɔ́wɔ́ gba asṹrṹ ŋaà? 20 À wà gu éwo-ŋɛ́ tsu, tsí wà mɔ ŋɛ́ fefefe, tsí wà kó ŋɛ́ dzɛ gbo, tsí è nyáa tsikó si náàrì wíìnyɛ̀-kã̀. À kò tì wà kpè ŋɛ́ ní ɔ̀nyà gìɖì gbo, tsí à kpa ìgbètí gbo fú ŋɛ́ kpáyì, tsí è nyáa tsikó si náàrì-wíìnyɛ̀-kã̀ gìɖì. 21 Ó wà tsanɔ́ fú mi fífɔ̀ ní ó wà kíbí àa tù gbegbé bɛ́ yí.

Ó ɖi, bí ɔ̀nyà-kã̀ nyáa gbódzú, tsí wà mú iŋɛ́-kã̀ nya akpá#á, èmi gbo, màa nyáa gbódzú, tsí tse bɛ́ɛ̀. Ǹ wà fɔ̀ bɛ́ɛ̀ kíbí ɛnɛ yèé fɔ̀ ní ǹ wà sṹrṹ bɛ́ yí. 22 Bí ɛnɛ nyɛ̀ŋɛ̀ ŋa#á wà fɔ̀ ní àŋa dzɛ́ ɔma-Hèbérù ŋa, èmi gbo, ǹ dzɛ́ ɔma-Hèbérù ŋa. Bí à wà fɔ̀ ní àŋa dzɛ́ ɔma-Ìsàràyɛ́lì† ŋa bíbí, èmi gbo, ǹ dzɛ́ ɔma-Ìsàràyɛ́lì ŋa bíbí. Bí à sì wà fɔ̀ gbo ní àŋa dzɛ́ ɔmalɔ́ma-Àbàràhámì† ŋa, èmi gbo, ǹ dzɛ́ ɔmalɔ́ma-Àbàràhámì. 23 Bí à dzɛ́ àtsìtsɛ́-Kírísítò ŋa, èmi òŋu, ǹ dzɛ́ àtsìtsɛ́-Kírísítò lárè ŋá. Fee, ǹ sṹrṹ si tã́ kpó, tsí wà fɔ̀ɔ́ ni. Iŋɛ́ yèé tse#ɛ́, bí ó dzɛ́ ń ti itsɛ́, ǹ tsitsɛ́ lárè ŋá sã́ŋú sã́ŋú. Bí ó dzɛ́ ń ti ká gbé nɛ́ɛ̀ŋà, ǹ gbé nɛ́ɛ̀ŋà kpeékpeé lárè ŋá. Bí ó sì dzɛ́ ń ti ká gba kpíkpa gbo, à kpa mí kpíkpɔ̀ lárè ŋá. Ikú sé mi kpíkpɔ̀. 24 Ɔma-Ìyúɖà† ŋa, à tsɔ̀ mí náàtàmì bɛ́ ɛnɛ́, méèdzì, mɛ́ɛta títí lɔ nɔ́ɔ̀kã̀ ɖí nógóòdzì gbà mɛ́ɛrú kpó.^* 25 Tsí gbà mɛ́ɛta kpó ní àkpɛ̀dzɔ́-ìlú ŋa gbo fɔ̀, tsí à kpa mí#ɛ́. Àrìkã̀ gbo, ɔ̀nyà ŋa ta mí nóòkúta ní ká ta mí kpa nóòkú. Tsí ɔkɔ̃̀-odzómi gbo ɖà mí ɖé gbà mɛ́ɛta kpó. Tsí ǹ gbé ńnɔ́-omi gbo bɛ́ gba ɔdzɔ́-kã̀ gbuɖu kpó. 26 Mà rɛ̃ ɔ̀nà kpeékpeé, tsí ńnɔ́-ɔ̀nà-mi rírɛ̃̀#ɛ́, ǹ kpàɖé àtsubi ŋa ńǹrɔ́ǹrɔ́. Àhũ òŋu oɖò ŋa, à bɔ oɖé ká mú mi. Olè ŋa gbo náa ɖá ɔ̀nà fú mi. Àtsubi ŋa bá mi náàŋírĩ-ìlú ŋa òŋu ńkóko ŋa gbo. Tsí ìnàbí-mi ŋa, ɔma-Ìyúɖà ŋa, ɛnɛ yèé kò dzɛ́ ɔma-Ìyúɖà ŋa#á gbo má nára-ɛnɛ yèé ŋa náa fɔ̀ ní àŋa gbo, àŋa dzɛ́ olí-Yèésù ŋa#á gbo, à wà nógùgù-mi ɖíɖɛ̃ si gé ni. 27 Ǹ tsitsɛ́ líle líle ŋa, tsí ǹ tse ìkparà ŋa gbo. Ǹ kà rí odzú bɛ́ kpeékpeé gbo, tsí sɔ̃rũ, tsí ǹ kà rí dzídzɛ gbo bɛ́ kpeékpeé, tsí dzɛ. Ebi-inɔ́ náa kpa mí, tsí àŋgbɛ̃ gbo náa gbɛ̃ mí. Otútù gbo náa wà kpa mí, tsí ǹ kà rí àwù yèé màa wɔ̀#ɛ́. 28 Màa ɖóro bɛ̀ bɛ́ɛ̀. Ó ɖi, afɔ̀-ɛgbɛ́-Kírísítò ŋa#á kpó dzɛ́ ìsérè, tsí wà kpa mí nɔ́dzɔ́ kɔ́dzɔ́. 29 Bí àmí tã́ ɖí ɔ̀nyà-kã̀#á, náa tse tsí àmí náa tã́ ɖí èmi gbo. Bí à sɔ́ ɔ̀nyà-kã̀ si náàbi, náa ɖɔ̃̀ mí fú ɛnɛ nyɛ̀ŋɛ̀ tó bɛ́ɛ̀.

30 Bí ó bèrè ní ká mú iŋɛ́-kã̀, tsí ń nya akpá báàyí, àmí yèé kò wà nɔ́wɔ́-mi#ɛ́ ní màa ń nya akpá#á. 31 Ɔ̀ɖáyé, Boba-Yèésù Ɔlá-wa, ó mà ní ǹ kò wà tsòɖòbò. Kùsɛ̀ɛ̀ fúu títí lɔ náàrìtã́. 32 Ńǹwèrè yèé ǹ gbé ńǹlú-Ɖàmásì#ɛ́, ólú Àrɛ́tà nya ɔ̀gã́-ìdzɔba-kã̀ wáa si nárũ-ìlú#ɛ́ bɛ̀. Ìlú#ɛ́, à ma oɖi wérí‐ɛ̀ kpó. Tsí ɔ̀gã́-ìdzɔba#á nya ɔ̀nyà kã̀ŋa si ní ká wà ɖe arũ-ɔ̀nà ŋa#á, àtsùgbée ká mú mi. 33 Ó ɖi, tiwa ŋa kɛ́ mi si nágbã̀, tsí mú okù soó, tsí kɛ́ mi gbà nódzúábɔ́-kã̀, tsí tì mí gbà bɛ̀ wá ńlɛ̀ nára-oɖi#ɛ́. Bɛ́ɛ̀ ní ó lɔ gbà tã́ná, tsí n bɔ́ nɔ́wɔ́‐ɛ̀ lɔ#ɛ́ ńnɛ̀ɛ́.