2 Kòríntì ŋa 10

Kpɔ́lù wà ɖù fú itsɛ́‐ɛ̀

Èmi, Kpɔ́lù, èmi yèé bí ǹ wà ńɖi-ŋɛ́, tsí odzú tse mɛ́ɛrɛ̃ ni mà ɖi mùnù, tsí bí ǹ kò wà ńɖi-ŋɛ́ ná ni mà wà gbó, tsí wà ya fú ŋɛ́#ɛ́, èmi#ɛ́ ní bàkó fɔ afɔ̀ yèé fú ŋɛ́#ɛ́. Èmi ká-èmi, ǹ wà mú ɔ̀nyà tútù yèé Kírísítò dzɛ́ fú ara‐ɛ̀ gé#ɛ́ òŋu ore tsítse‐ɛ̀, tsí wà ń tsìkálɛ̀ fú ŋɛ́ ní: 2 È máa tse mí, tsí n wáa tó ńɖi-ŋɛ́, tsí n waà wíìnyɛ̀, tsí wà gbó, tsí wà ya fú ŋɛ́. Ɛnɛ yèé ŋa dzokó si, tsí wà fɔ̀ ní awù-kíbí ɔ̀nyà yà gbà#á ní àa wà ń gbɛ̃́ ara-wa#á, ǹ lérí‐ɛ̀ si ní màa wà wíìnyɛ̀, tsí wà gbó, tsí wà ya fú ŋa. Bɛ́ɛ̀ ní ǹ bàkó tse fú ŋa#á ńnɛ̀ɛ́. 3 Ìɖéǹɖè ni, ɔ̀nyà ní àa dzɛ́ ɛ́. Ó ɖi, àa kò wà dzogu ńǹrɔ́-kíbí ɔ̀nyà náa dzogu gbà#á. 4 Iŋɛ́-ìdzògu yèé ŋa àa wà ń dzogu#ɛ́, à gbà níìkã̀ fú yèé ɔ̀nyà ŋa náa lò ńǹtalɛ̀ bí#ɛ́. Ɔ̀ɖáyé ní náa fú wa ńnɛ̀#ɛ́, tsí ńbí-ɔ̀tɛ̀-Ɔ̀ɖáyé ŋa ɖúkù si#ɛ́, àa nákó nyáa lò ŋá, tsí ń fɔ́ɔ málɛ̀ mɛ́rɛ̃́mɛ́rɛ̃́. Àa wà kũ arũ-òɖòbò ŋa tsítse, 5 tsí ìrɔ́-ara-nɛ kíkɛ́ ɔ̀kã̀lɔ́ɔ̀kã̀ kpó yèé náa ɖí ɔ̀nà fú ɔ̀nyà ní kó máa gba Ɔ̀ɖáyé gbɔ́#ɛ́, àa wà kũ-arũ òŋu gbo. Ìsérè-ɔ̀nyà ŋa wà kíbí ɔ̀tɛ̀-wa ŋa bɛ́, tsí àa wà mú ŋa si nɛ́ɛ̀ŋà, tsí wà tse tsí ká gbɔ́ɔ̀lú fú Kírísítò. 6 Tsí bí ó dzɛ́ ní è nyáa gbɔ́ɔ̀lú fú Kírísítò dzálɛ̀ kpó#ɛ́, àwa òŋu, àa kpaɖí si, tsí àa kó fɛtí fú ɔ̀nyà kpó yèé kàkó tse bɛ́ɛ̀#ɛ́.

7 Fee, è máa kpodzú-afɔ̀ ɖélɛ̀. Bí ɔ̀nyà-kã̀ mà nɛ́ɛ̀ɖɔ̃̀-ara‐ɛ̀ ní òŋu dzɛ́ ti Kírísítò#ɛ́, ɛnɛ nyɛ̀ŋɛ̀ kó lɔ ńǹsérè-ara‐ɛ̀ rere, tsí kó mà ní kíbí òŋu dzɛ́ ti Kírísítò#ɛ́, bɛ́ɛ̀ ké ní àwa gbo, àa dzɛ́ ti Kírísítò#ɛ́. 8 Ɔlá-wa mú ikpá bɔwɔ́-wa. Ikpá#á, ó ní àa kó ń mú ɛgbɛ́-ŋɛ́ lɔ ńwádzú ni. Kò fú wa ńnɛ̀ ní àa kó ń fɔ́ ɛgbɛ́-ŋɛ́. Ó ɖi, bí ó sì lɔ káà dzɛ́ gìɖì ní ǹ wà mú ikpá#á, tsí wà ń nya akpá oɖé oo, nyɛ̀ŋɛ̀ òŋu kàkó nyáa dzɛ́ anɔ́, tsí mú mi wòná. 9 Ǹ kò wà wò ní n mú ara-mi tse kíbí ɛnɛ yèé fɔ̀ ní ǹ wà wò ní n kɛ́ ìwé-mi ŋa, tsí ń ɖódzo tse ŋɛ́ bɛ́ yí. 10 Iŋɛ́ yèé tse#ɛ́, ɔ̀nyà ŋa dzokó si, tsí wà fɔ̀ ní fòò: Afɔ̀ yèé Kpɔ́lù wà fɔ̀ si ńǹwé‐ɛ̀ ŋa#á, afɔ̀ ŋa#á náa le héŋú, tsí oŋù yèé náa ń fɔ̀ɔ́ gbo#ɛ́ dzɛ́ oŋù-akɔ. Ó ɖi, bí ó dzɛ́ ní òŋu ká‐ɛ̀ wá#á, kà nɛ́ àmí-kã̀, tsí afɔ̀ yèé náa fɔ̀ ŋa gbo#ɛ́ kà nɛ́ éwo. 11 Ó ɖi fee, ɛnɛ yèé wà fɔ̀ bɛ́ɛ̀#ɛ́, ɛnɛ nyɛ̀ŋɛ̀ kó mà si rere ní afɔ̀ yèé àa fɔ̀ si ńǹwé-wa ŋa náàsòkò yèé àa kò wà ńɖi-ŋɛ́#ɛ́, bí àa wáa tó ńɖi-ŋɛ́ gbo, iŋɛ́#ɛ́ ké ní àa bàkó tse#ɛ́.

12 Àa kàkó tì nyáa gbó ɛ̀ɖɔ̃̀, tsí fɔ̀ ní àwa-ɔ̀nyà kã̀ŋa, àa dzɔ́ ɖé nàmí àa kó mú ara-wa, tsí ń ɖíìɖé-ŋa. Ɛnɛ nyɛ̀ŋɛ̀ ŋa#á, àŋa ká-ŋa ní bɛ ara-ŋa#á. Àŋa ká-ŋa ké à dzɛ́ àwò, tsí à wà ń kpurã ara-ŋa, tsí à wà mú ara-ŋa gbo, tsí wà ń ɖé bá ara tàŋa ká-ŋa ké ró. Fee, à dzɛ́ àɖàlɛ̀ héŋú! 13 Ó ɖi, àwa òŋu, àa kàkó mú iŋɛ́-kã̀ nya akpá títí tã̀rã̀ lɔ ńǹɖì-kã̀. Odzú-ńbí Ɔ̀ɖáyé bù fú wa ní àa kó tsitsɛ́ gbà lɔ#ɛ́, ńbɛ̀ ní àa nákó mú iŋɛ́-kã̀, tsí ń nya akpá#á. Ńnɛ̀ ní àa wá títí ńɖi-ɛ̀ŋɛ gbo#ɛ́. 14 Fee, àa kò kadzá aradzúbara-wa lɔ ńǹɖì-kã̀. Ó má dzɛ́ ní odzú ńbí Ɔ̀ɖáyé bù fú wa ní àa kó tsitsɛ́ gbà lɔ#ɛ́ kò wá títí ńɖi-ŋɛ́ báàyí, à má fɔ̀ ní àa kadzá aradzúbara-wa. Ó ɖi, àa sì wá títí ńɖi-ŋɛ́ bɛ́ pɛ̀ɛ̀, tsí wáa dzíkɔ̀ ɖíɖɔ̃̀-Kírísítò#ɛ́ fú ŋɛ́. 15 Ńbɛ̀ɛ́, àa kò wà mú itsɛ́ yèé olòmírɛ̃̀ ŋa tse si#ɛ́, tsí wà ń nya akpá, àa kò wà tã̀rã̀ lɔ ńǹɖì-kã̀. Ó ɖi, àa módzú si nɔ́ɔ̀nà si ní àkaralé-ŋɛ́ nákó ɖonùgbó, tsí itsɛ́ yèé àa wà tse ńɖi-ŋɛ́#ɛ́ kó lákṹ máa lárè bɛ́ɛ̀ ró. Tsí odzú ńbí Ɔ̀ɖáyé bù fú wa ní àa kó tsitsɛ́ gbà lɔ#ɛ́, àa kó wà bɛ̀ si gé. 16 Tsí àa kó dzíkɔ̀ ɖíɖɔ̃̀#ɛ́ gbà lɔ nérè yèé ŋa wà kadzá ŋɛ́ lɔ bɛ̀#ɛ́. Ó ɖi, itsɛ́ yèé olòmírɛ̃̀ ŋa tse si gbà lɔ nódzú ńbí à bù si fú ŋa#á, àa kàkó mú nyɛ̀ŋɛ̀ òŋu, tsí ń nya akpá. 17 À kɔ si ńǸwé-Ɔ̀ɖáyé† ní: “Bí ɔ̀nyà-kã̀ wà wo kó mú iŋɛ́-kã̀ nya akpá#á, ɛnɛ nyɛ̀ŋɛ̀ kó mú iŋɛ́ yèé Ɔlɔ́dzɔ́ wà tse#ɛ́, tsí ń nya akpá.”^* 18 Iŋɛ́ yèé tse#ɛ́, kò tsi ɛnɛ yèé náa rí ara‐ɛ̀#ɛ́ ní iŋɛ́‐ɛ̀ náa dzì ńǹtá‐ɛ̀ fú Ɔ̀ɖáyé#ɛ́. Ɛnɛ yèé Ɔlá-wa náa fɔ afɔ̀‐ɛ̀ ire#ɛ́ ni.