2 Kòríntì ŋa 9

È tsɔ̀yà inɔ́ tã̀ã́, ànyì tã̀ã́

Fee, ti nára-afɔ̀-ká mɔ́wɔ́ gbè fú ɛnɛ yèé ŋa dzɛ́ ti Ɔ̀ɖáyé, tsí wà ńYèrúsàlɛ́mì#ɛ́, kò kpã́dzú ní n wíìnyɛ̀ kpíkpɔ̀ fú ŋɛ́ ró. 2 Fee, ǹ mà ní è wà wò gìɖì héŋú ní e mɔ́wɔ́ gbè fú ŋa, tsí ǹ mú ŋɛ́, tsí ń nya akpá fú ɛnɛ-ilɛ̀-Màkɛ̀ɖónìyà ŋa. Ǹ fɔ̀ fú ŋa ní olí-Yèésù-erè-Àkáyà ŋa ti kpaɖí si títí néètsĩ́. Kíbí ara-ŋɛ́ gboná náfɔ̀#ɛ́ gbà#á, ó tse tsí ɔ̀nyà kpíkpɔ̀ wà wò ní òŋu kó fú iŋɛ́-kã̀. 3 Ó ɖi, ǹ bɛ ìnàbí yèé ŋa nyí bàa fú ŋɛ́, àtsùgbée nyínyɛ̀ yèé àa nyɛ̀ ŋɛ́ ti nára-afɔ̀ nyɛ̀ŋɛ̀#ɛ́ kó máa dzɛ́ iŋɛ́ akpotu. Ǹ wà wò gbo ní kíbí ǹ fɔ̀ɔ́#ɛ́, e kpaɖí si bɛ́ɛ̀. 4 Bí kò tsi bɛ́ɛ̀, bí èmi ɛnɛ-Màkɛ̀ɖónìyà kã̀ŋa wáa tó ńɖi-ŋɛ́, tsí ó káà dzɛ́ ní è kè kpaɖí si#ɛ́, àkaralé yèé àa nɛ́ si ńǹtá-ŋɛ́#ɛ́ nákó ɖi anɔ́ fú wa. Tsí anɔ́ tiŋɛ́ òŋu gìɖì kàkó nɛ́ fífɔ̀ ró. 5 Ńbɛ̀ɛ́, ǹ rí ní ó kpã́dzú ní n tsìkálɛ̀ fú ìnàbí-wa yèé ŋa nyí ní ká tsúwádzú-mi wá ńɖi-ŋɛ́. Ká wá bɛ́ɛ̀, àtsùgbée ɔ̀yà yèé ŋa ɛ̀ŋɛ ká-ŋɛ́ è tàlé si ní àŋa nákó tse#ɛ́ ká wá, tsí wáa kpaɖí ŋa si ńǹɖì-ɔwɔ́ si. Bí à kpaɖí ɔ̀yà ŋa#á si bɛ́ɛ̀ tã́ná àa wáa tó ńɖi-ŋɛ́#ɛ́, nákó nyà ɖíre ní è tsɔ̀yà#á òŋu inɔ́-tútù ni, ɔ̀nyà-kã̀ kò mú ŋɛ́ ńkpá ní ɛ̀ŋɛ kó tseé.

6 Ó ɖi, kó yé ŋɛ́ si ní: Ìwɔ yèé tsoko, tsí gbɛ̃́ dzídzɛ oɖé#ɛ́, dzídzɛ oɖé gbo ní nàa rí#ɛ́. Ìwɔ yèé gbo tsoko, tsí gbɛ̃́ dzídzɛ kpíkpɔ̀#ɛ́, nàa rí dzídzɛ kpíkpɔ̀. 7 Ńbɛ̀ɛ́, kṹnukṹ kó fú iŋɛ́ ńǹrɔ́-kíbí ó ɖé nɛ́ɛ̀ɖɔ̃̀‐ɛ̀ gbà#á. Ɔ̀nyà-kã̀ kó máa fú tã́, tsí ɖɔ̃̀ àbámà nàmí kó máa dzɛ́ ní à múu ńkpá. Ɔ̀ɖáyé náa nɛ́ àmúɖɔ̃̀ fú ɛnɛ yèé náa fú iŋɛ́ òŋu ayè títɛ́#ɛ́ ni. 8 Tsí ó nɛ́kpá, tsí kó nyáa tu kùsɛ̀ɛ̀ ɔ̀kã̀lɔ́ɔ̀kã̀ kpó bò ŋɛ́ bùràà. Nákó tse bɛ́ɛ̀, àtsùgbée iŋɛ́ ɔ̀kã̀lɔ́ɔ̀kã̀ kpó yèé wà nɔ́wɔ́-ŋɛ́#ɛ́ kó tó ŋɛ́ si ńǹwèrè ɔ̀kã̀lɔ́ɔ̀kã̀, tsí kó tɔ́ bɔ̀ si fú ŋɛ́, tsí e nyáa ń tse ore gbo kpíkpɔ̀. 9 Ńbɛ̀ɛ́, à kɔ si ńǸwé-Ɔ̀ɖáyé† ti nára-atsore ní:

“Ó fú adzìyàkú ńŋɛ́ náàrì nyí wò,

ore tsítse‐ɛ̀ kò nɛ́ títã́ láyé.”^*

10 “Ɔ̀ɖáyé ní náa fú àtsòko ńǹdzɛ yèé náa gbɛ̃̀#ɛ́, tsí náa fúu ńdzídzɛ yèé náa dzɛ#ɛ́ gbo.”^* Ńbɛ̀ɛ́, nákó sɔ iŋɛ́ yèé wà nɔ́wɔ́-ŋɛ́ ŋa#á ɖi kpíkpɔ̀, àtsùgbée e nyáa wà tse ore kpíkpɔ̀ máa. 11 Nákó tse tsí ɔwɔ́ nákó wà fú ŋɛ́ si náàsòkò ɔ̀kã̀lɔ́ɔ̀kã̀ kpó, àtsùgbée e nyáa wà nóre tsítse si làkóò làkóò. Tsí bí è wà tse bɛ́ɛ̀, ɔ̀nyà kpíkpɔ̀ nákó wà ɖɔ́kpɛ́ fú Ɔ̀ɖáyé náàtóoríi ɔ̀yà yèé ŋa àa nákó wà gbà lɔ fú ŋa#á. 12 Iŋɛ́ yèé tse#ɛ́, itsɛ́ yèé è wà tse yèé bɛ́#ɛ́, ó wà tse tsí iŋɛ́ yèé wà hã́ ɛnɛ yèé dzɛ́ ti Ɔ̀ɖáyé ŋa#á, ó bàkó tɔwɔ́-ŋa. Ó ɖi, ó wà tse gbo tsí ɔ̀nyà kpíkpɔ̀ wà ɖɔ́kpɛ́ fú Ɔ̀ɖáyé tó bɛ́ɛ̀. 13 Itsɛ́ yèé bɛ́ nákó nya ìrɔ́-ɔ̀nyà yèé è dzɛ́#ɛ́ ɖíre, tsí nákó tse gbo tsí ɔ̀nyà kpíkpɔ̀ nákó wà nyɛ Ɔ̀ɖáyé náàtóoríi kíbí è gba ikɔ̀ ɖíɖɔ̃̀-Kírísítò#ɛ́ gbɔ́, tsí wà tse si ńǹtá‐ɛ̀#ɛ́. À nákó wà nyɛ̀ɛ́ gbo náàtóoríi kíbí è dzɛ́, tsí kpɛ̃́ iŋɛ́-ŋɛ́ ŋa bá ŋa, tsí kpɛ̃́ ŋa bá ɛnɛ-àtíbɔ̀ ŋa gbo òŋu inɔ́ tútù#ɛ́. 14 Tsí à nákó wà wúùre gbo fú Ɔ̀ɖáyé fú ŋɛ́, tsí wà ń nyà ɖíre ní àŋa dzɛ́ afɔ̀-ŋɛ́ tó bɛ́ɛ̀. À nákó wà wúùre, iŋɛ́ yèé tse#ɛ́, Ɔ̀ɖáyé tu ore-ɔ̀fɛ́‐ɛ̀ bò ŋɛ́ si bùràà si. 15 Kùsɛ̀ɛ̀ fú Ɔ̀ɖáyé, iŋɛ́ yèé tse#ɛ́, iŋɛ́ yèé náa fúnɛ#ɛ́, náa láre arũ fúnɛ.