2 Kòríntì ŋa 8

À wà tsɔ̀yà ní ká ń mɔ́wɔ́ gbè fú olí-Yèésù ŋa ńYèrúsàlɛ́mì

Ìnàbí-mi ŋa, Ɔ̀ɖáyé nya ore-ɔ̀fɛ́‐ɛ̀ ɖíre ńǹrɔ́-kã̀ nɛ́gbɛ́-Kírísítò yèé ŋa wà ńlɛ̀-Màkɛ̀ɖónìyà#á, tsí àa wà wò ní àa kó fɔ̀ɔ́ fú ɛ̀ŋɛ gbo, tsí e mà. 2 Fee, ɔma-ɛgbɛ́ ŋa#á, à gbà ńnɔ́-ìréré ŋa tó bɛ́ɛ̀, tsí ìréré ŋa#á dzɛ́ àɖã́wò-kã̀ fú ŋa. Ó ɖi, ayè-kã̀ sì tɛ́ ŋa kadzá títí à tsɔ̀yà-ɔ̀tɔlɔ́ɔ̀tɔ-kã̀ wá. Ò kàkó tì mà ní à wà dzìyà tó bɛ́ɛ̀. 3 Ǹ fɔ òtítɔ́ fú ŋɛ́ ní fee, ɔwɔ́ yèé òkúté nɛ́#ɛ́, òŋu ní náa ń nya ɔkà#á. Màa fɔ̀ gìɖì ní à fú láre kíbí à má fú#ɛ́. Fee, àŋa ká-ŋa, à ǹɖe gé, tsí 4 tsìkálɛ̀ fú wa tó bɛ́ɛ̀. À ní àa kó nyɔ́nɔ́-àŋa ɖé, tsí àŋa gbo, àŋa kó fú iŋɛ́-kã̀ si ńnɔ́-iŋɛ́ yèé àa bàkó ń mɔ́wɔ́ gbè fú ɛnɛ yèé ŋa dzɛ́ ti Ɔ̀ɖáyé ńYèrúsàlɛ́mì#ɛ́. 5 Iŋɛ́ yèé àa kò módzú lé ní à nákó nyáa tse#ɛ́, òŋu ní à tse#ɛ́. À tsɛ̃̀tsɛ̃̀ mú ara-ŋa, tsí ń bɔwɔ́-Ɔlá-wa tã́ná, tsí à wáa mú ara-ŋa, tsí ń bɔwɔ́-àwa gbo ńǹkɛ̀ɛ́ ńǹrɔ́-kíbí Ɔ̀ɖáyé wà wò ní ká tseé gbà#á. 6 Títò ní tse tsí è kpé ɔ̀yà#á tsítse si ńnɛ̀#ɛ́. Ńnɛ̀ ní àa tsìkálɛ̀ fúu ní kó wá ńɖi-ŋɛ́, tsí kó wáa mɔ́wɔ́ gbè fú ŋɛ́, tsí e tseé dzá#á. 7 Iŋɛ́ ɔ̀kã̀lɔ́ɔ̀kã̀ kpó tsɔ̀ ŋɛ́ kũ̀ si. Àkaralé òŋu afɔ̀ mímà, iŋɛ́ mímà gbo má nára-ara-nɛ kó gboná ńŋɛ́ kpó. Tsí è wà nɛ́ àmúɖɔ̃̀ gbo fúnɛ ńǹrɔ́-kíbí àwa gbo, àa wà nɛ́ àmúɖɔ̃̀ fú ŋɛ́#ɛ́.^* Iŋɛ́ nyɛ̀ŋɛ̀ ŋa kpó dzɔ nɔ́wɔ́-ŋɛ́. Ńbɛ̀ɛ́, àa wà wò ní e nyà ɖíre ńnɔ́-ɔ̀yà yèé bɛ́ tsítse ní è náa tse iŋɛ́ ɔ̀kã̀lɔ́ɔ̀kã̀ kpó rere héŋú.

8 Bí ǹ wà fɔ̀ bɛ́ɛ̀#ɛ́, kò tsi ní ǹ wà fɔ̀ ní ó wà ní e tseé ni. Ó ɖi, ǹ wà mú kíbí ara-ɛnɛ-àtíbɔ̀ ŋa náa gboná ńŋɛ́ gbà#á, tsí ń kã̀, tsí n rí káyí ní fee, àmúɖɔ̃̀-ŋɛ́ dzɛ́ àmúɖɔ̃̀-òtítɔ́ɔ̀? 9 Fee, è rí mà ní Yèésù Kírísítò Ɔlá-wa náa tsɔ̀nyà nɔ̀? Ɔwɔ́ wà fúu tó bɛ́ɛ̀. Ó ɖi, ó tse àtsùgbée tiŋɛ́, tsí sɔ ara‐ɛ̀ ɖi olíìyà. Ó tse bɛ́ɛ̀, àtsùgbée kó gbà ńǹtá-ìyà‐ɛ̀, tsí kó tse tsí ɛ̀ŋɛ òŋu e nɔ́wɔ́.

10 Ńbɛ̀ɛ́, èmi ǹ nɛ́ afɔ̀-kã̀, tsí n fɔ̀ si náfɔ̀#ɛ́. Òŋu ní wà dzɛ́ ní iŋɛ́ yèé è kpé tsítse néètsĩ́#ɛ́, è tseé làkóò. Iŋɛ́ yèé sã̀ ní e tse#ɛ́ ńnɛ̀ɛ́. Ɛ̀ŋɛ ní dzɛ́ ɛnɛ yèé ŋa tsɛ̃̀tsɛ̃̀ tsɔ̀yà nyɛ̀ŋɛ̀#ɛ́. Tsí ɛ̀ŋɛ#ɛ́ ké ní tsɛ̃̀tsɛ̃̀ ń ɖá si gbo#ɛ́. 11 Báàyí#ɛ́, è tseé, tsí kó dzá ńǹkɛ̀ɛ́. Ńǹrɔ́-kíbí ó wù nɛ́ɛ̀ɖɔ̃̀-ŋɛ́ tó gbà, tsí è ń ɖá si#ɛ́, è kɛ́ iŋɛ́ yèé wà nɔ́wɔ́-ŋɛ́#ɛ́, tsí e ń tseé, tsí kó dzá. 12 Fee, bí ó wù nɛ́ɛ̀ɖɔ̃̀-ìwɔ-kã̀, tsí ò tsɔ̀yà, Ɔ̀ɖáyé náa gba iŋɛ́ yèé ò fú#ɛ́, iŋɛ́ yèé tse#ɛ́, iŋɛ́ yèé wà nɔ́wɔ́-ɛ̀ɛ#ɛ́ ní Ɔ̀ɖáyé náa módzú wò#ɛ́, kà módzú wo iŋɛ́ yèé kò wà nɔ́wɔ́-ɛ̀ɛ#ɛ́. 13 Kò tsi ní ǹ wà wò ní n sɔ ŋɛ́ ɖi olíìyà, tsí n ń mɔ́wɔ́ gbè fú ɛnɛ-àtíbɔ̀ ŋa ni. Ó ɖi fee, ǹ wà wò ní ɛ̀ŋɛ ɛnɛ-àtíbɔ̀ ŋa méèdzì, è dzɔ́ ɖé. 14 Nɔ́mbɛ́ báàyí#ɛ́, iŋɛ́ ŋa tsɔ̀ ŋɛ́ kũ̀ si, tsí è nákó nyáa mɔ́wɔ́ gbè fú ɛnɛ yèé iŋɛ́-kã̀ kò sí nɔ́wɔ́ fú ŋa#á. Ńbɛ̀ɛ́, bí kò wáa wà nɔ́wɔ́ tɛ̀ŋɛ gbo nɔ́ɔla, tsí iŋɛ́ ŋa tsɔ àŋa gbo kũ̀ si#ɛ́, à nákó nyáa mɔ́wɔ́ gbè fú ŋɛ́. Bɛ́ɛ̀ ní nákó lɔ gbà tã́ná ɛ̀ŋɛ kpó, è nákó nyáa ɖé 15 ńǹrɔ́-kíbí à kɔ afɔ̀-kã̀ si ńǸwé-Ɔ̀ɖáyé†#ɛ́. À kɔ si ní:

“Ɛnɛ yèé seé kpíkpɔ̀#ɛ́, kà tsɔ̀ɔ́ kũ̀.

Tsí ɛnɛ yèé gbo seé oɖé#ɛ́, kà hã́ã.”^*

À tsã ɔ̀nyà kã̀ŋa ní ká rí ìtá-ɔ̀yà yèé à tse#ɛ́ rere

16 Ɔkpɛ́ kɔ́kpɛ́ ni ti Ɔ̀ɖáyé ni. Ó tse tsí Títò náa ɖára yá ŋɛ́ kíbí àwa gbo bɛ́. 17 Àwa òŋu, àa fɔ̀ fúu ní kó wá ńɖi-ŋɛ́, tsí ó dzɛ́. Ó ɖi, ó ti wà ńǹsérè‐ɛ̀ si bɛ́ɛ̀, tsí ara lákṹ-kã̀ yáa, tsí ó ǹɖe gé gbàrà, tsí fɔ̀ ní òŋu nákó wá ńɖi-ŋɛ́. 18 Ó ɖi, àa bɛ̀ɛ́ bàa ńɖi-ŋɛ́ òŋu ìnàbí-wa-kã̀ ni. Ìnàbí-wa#á, ɛgbɛ́-Kírísítò ŋa#á kpó wà nyɛ̀ɛ́ náàtsùgbé-kíbí ó wà tsitsɛ́-ikɔ̀ ɖíɖɔ̃̀#ɛ́ tó gbà#á. 19 Tsí yèé tɛ̀ɛ́ ró#ɛ́ ní dzɛ́ ní ɛgbɛ́-Kírísítò ŋa#á tsã̀ã́ ní kó tɛ̀ náànyì-wa, tsí àa kó kɛ́ ɔ̀yà#á lɔ ńYèrúsàlɛ́mì. Àa wà ńtsɛ́-ɔ̀yà#á tsítse si, àtsùgbée Ɔlɔ́dzɔ́ òŋu ká‐ɛ̀ kó gba nyínyɛ̀, tsí àa kó nyà ɖíre gbo ní àa wà wò ní àa kó mɔ́wɔ́ gbè fú ŋa.

20 Tsí kíbí ó dzɛ́ ní àa bàkó dzɔ́ fa ɔ̀nà#á ni#ɛ́, nákó tse tsí à kàkó nyáa bá wa fɔ̀ ti nára-ɔ̀yà-ɔ̀tɔlɔ́ɔ̀tɔ yèé à ń bɔwɔ́-wa ní àa kó rí ìtá‐ɛ̀#ɛ́. 21 Fee, náa le wá si gé ní àa kó tse ire ni, tsí kò sì tsi nódzú-Ɔlɔ́dzɔ́ òŋu níìkã̀ gé, nódzú-ɔ̀nyà ŋa gbo.

22 Àa bɛ ìnàbí-wa-kã̀ gbo tɛ̀ náànyì-Títò òŋu enìkéèdzì‐ɛ̀. Ìnàbí-wa#á, àa tse àɖã́wò fúu gba nɔ́ɔ̀nà kpíkpɔ̀, tsí àa rí ní ara‐ɛ̀ náa gboná ńŋɛ́ kpíkpɔ̀. Ó ɖi báàyí gìɖì#ɛ́, ara‐ɛ̀ tɔ́ gboná máa lárè bɛ́ɛ̀ ró, iŋɛ́ yèé tse#ɛ́, ó nɛ́ àkaralé lákṹ-kã̀ si ńǹtá-ŋɛ́. 23 Títò òŋu#ɛ́, àdzɔ́rɛ̃̀-mi ni, tsí àa dzɔ́ wà ńtsɛ́ gbo si fú ŋɛ́. Ó ɖi, ɛnɛ-àtíbɔ̀ yèé ŋa tɛ̀ náànyì‐ɛ̀#ɛ́, ɛgbɛ́-Kírísítò ŋa ní bɛ̀ ŋá#á, tsí à wà tse tsí Kírísítò kó gba nyínyɛ̀ ni. 24 Ńbɛ̀ɛ́, è náa nyà ɖíre fú ŋa nódzú-ɛgbɛ́-Kírísítò ŋa ní è nɛ́ àmúɖɔ̃̀ fú ŋa ìɖéǹɖè, tsí bí àwa gbo, àa wà mú ŋɛ́ nya akpá#á, ni afɔ̀-wa dzàre.