2 Kòríntì ŋa 7

Àrínódzú-mi ŋa, àlé ŋa#á ní Ɔ̀ɖáyé ta si fú wa yí. Ti nára-bɛ́ɛ̀#ɛ́, iŋɛ́ ɔ̀kã̀lɔ́ɔ̀kã̀ kpó yèé nákó gbɛ̃ɛ̃́rĩ́ wa#á, àa kó máa tseé. Àa kó wà nɛ́ àrísá fú Ɔ̀ɖáyé, àa kó tsikpá, tsí àa kó mú ara-wa gbo, tsí ń bɔwɔ́‐ɛ̀ akpá akpá, ɛsɛ̀ ɛsɛ̀.

2 È tsí inɔ́ fú wa. Ǹ ní fòò, àa tse íbàɖí nára-ɔ̀nyà-kã̀ã̀? Nàmí àa mú iŋɛ́-kã̀, tsí ń ki arũ fú ɔ̀nyà-kã̀? Àa tɛ ɔ̀nyà-kã̀ gbo dzɛɛ̀? 3 Tsí bí ǹ wà fɔ̀ bɛ́ɛ̀#ɛ́, kò tsi ní ǹ wà kpɛdzɔ́ bá ŋɛ́ ni. Iŋɛ́ yèé tse#ɛ́, ǹ ti fɔ̀ɔ́ wáa lɔ ní ńkú gbo, nɔ́là gbo, àa nɛ́ àmúɖɔ̃̀ lákṹ-kã̀ si fú ŋɛ́. 4 Fee, ǹ nɛ́ àkaralé lákṹ-kã̀ si ńǹtá-ŋɛ́, tsí ǹ wà mú ŋɛ́, tsí wà ń nya akpá gbo gìɖì tó bɛ́ɛ̀ ni. Ńnɔ́-ìréré yèé ŋa àa wà si#ɛ́, ara kò tì wà kú mi gìɖì bɛ́ ɖã́wò, kà kàa bɛ́ɛ̀, ayè wà tɛ́ mi kadzá ni.

Ɛnɛ-Kòríntì ŋa kpaɖa ìlò, tsí ayè wà tɛ́ Kpɔ́lù

5 Nóòtítɔ́#ɛ́, kíbí àa wɔ̀ ńlɛ̀-Màkɛ̀ɖónìyà#á bɛ́#ɛ́, àa kò tì míra gìɖì bɛ́. Kà kàa bɛ́ɛ̀, ìréré ŋa ńǹrɔ́ǹrɔ́ ní bá wa#á. Ìdzà gbé náàŋírĩ-àwa-ɔ̀nyà kã̀ŋa, tsí asá gbo wà nɛ́ɛ̀ɖɔ̃̀-wa si. 6 Ó ɖi, Ɔ̀ɖáyé yèé náa ɖáàmí le ɛnɛ yèé ara kú si ŋa#á, ó ɖáàmí le wá gbà ńǹtá-wíwá-Títò. 7 Tsí kò tsi wíwá‐ɛ̀ sɔ̃́ŋú gé ní ɖáàmí le wá#á. Kíbí è ɖáàmí le òŋu ká‐ɛ̀ gbo gbà#á, àa gbɔ́, tsí nyɛ̀ŋɛ̀ gbo ɖáàmí le wá. Ó fɔ̀ fú wa ní àmì-mi kò tì wà kpa ŋɛ́ bɔ̀, tsí è wà náànyínɔ́ gbo si tó bɛ́ɛ̀. Ó fɔ̀ fú wa gbo ró ní è wà tsikpá gìɖì héŋú ní ɛ̀ŋɛ kó dzà náànyì-mi. Ńnɛ̀ ní ayè lákṹ-kã̀ tɔ́ wà tɛ́ mi máa ró báàyí#ɛ́.

8 Fee, bí ó dzɛ́ gìɖì ní ìwé yèé ǹ tse wá fú ŋɛ́ nyɛ̀ŋɛ̀#ɛ́, ó mú ara kú ŋɛ́#ɛ́, kò ɖi àbámà fú èmi òŋu. Ǹ rí ní ìwé#ɛ́ mú ara kú ŋɛ́ fú ìwèrè oɖé-kã̀ gé ni. Tsí bí ǹ ɖɔ̃́ àbámà gìɖì#ɛ́, 9 nɔ́mbɛ́ báàyí#ɛ́, ayè wà tɛ́ mi. Tsí kò sì tsi ara yèé kú ŋɛ́#ɛ́ ní wà mú ayè tɛ́ mi#ɛ́. Ó ɖi, ayè wà tɛ́ mi, iŋɛ́ yèé tse#ɛ́, ara yèé kú ŋɛ́#ɛ́ tse tsí è nyíìlò kpaɖà. Nóòtítɔ́#ɛ́, ara yèé kú ŋɛ́#ɛ́, ó dzɛ́ iŋɛ́-ire-kã̀ nódzú-Ɔ̀ɖáyé, tsí ó tse tsí àa kò tse íbàɖí-kã̀ kpókpó bá ŋɛ́. 10 Fee, ara yèé náa kúnɛ, tsí náa ti ńɖi-Ɔ̀ɖáyé#ɛ́ náa tse tsí à náa nyíìlò kpaɖà, tsí rí ɔlà, tsí à kà ɖɔ̃́ àbámà. Ó ɖi, ara yèé náa kúnɛ, tsí náa ti ńɖi-ayé gbaŋgba#á náa fa ikú wá fúnɛ. 11 Fee, è rí gé! Ara yèé kú ŋɛ́ nyɛ̀ŋɛ̀, tsí dzɛ́ iŋɛ́-ire nódzú-Ɔ̀ɖáyé#ɛ́, ɛ̀ŋɛ ká-ŋɛ́ è rí iŋɛ́ yèé ó tse fú ŋɛ́ ŋa#á gé. Báàyí#ɛ́, è wà mú ɔ̀kã̀ ńnɔ́-iŋɛ́ ŋa#á tó bɛ́ɛ̀, tsí è wà dzà gbè fú ara-ŋɛ́ gbo héŋú. È wà nyà ɖíre gbo ní iŋɛ́ yèé à tse#ɛ́ kò tì ɖɔ̃̀ fú ŋɛ́ gìɖì, tsí asá gbo wà nɛ́ɛ̀ɖɔ̃̀-ŋɛ́ tó bɛ́ɛ̀. Àmì-mi gbo wà kpa ŋɛ́ kpíkpɔ̀, tsí è dziná gbo si tó bɛ́ɛ̀. È wà ɖìgírí gbo ní ká fɛtí fú ɛnɛ yèé tse íbàɖí#ɛ́. È gbà nɔ́ɔ̀nà ɔ̀kã̀lɔ́ɔ̀kã̀ gbo kpó, tsí nyà ɖíre ní ti nára-afɔ̀ nyɛ̀ŋɛ̀#ɛ́, tiŋɛ́ ni òkṹnù ni.

12 Ńbɛ̀ɛ́, bí ó dzɛ́ ní ǹ tse ìwé nyɛ̀ŋɛ̀ wá fú ŋɛ́#ɛ́, kò tsi àtsùgbé-ɛnɛ yèé tse íbàɖí#ɛ́ nàmí ɛnɛ yèé à tse íbàɖí nára‐ɛ̀#ɛ́ ni. Ǹ tseé wá fú ŋɛ́, àtsùgbée kíbí ara wà yá ŋɛ́ nára-wa gbà#á, e rírã ríi ńǹtsodzú-Ɔ̀ɖáyé ni. 13 Ńnɛ̀ ní kíbí è tse gbà#á, ó dzɛ́ iŋɛ́-kã̀ yèé ɖáàmí le wá#á.

Ɛ̃ɛ̃, ó ɖáàmí le wá. Ó ɖi, kíbí àa rí Títò, tsí ayè wà tɛ́ɛ tó#ɛ́, ayè lákṹ-kã̀ gbo tɛ́ wa máa ró. Ayè wà tɛ́ Títò, iŋɛ́ yèé tse#ɛ́, ɛ̀ŋɛ kpó è tse tsí ɛ̀ɖɔ̃̀‐ɛ̀ dzilɛ̀. 14 Ǹ mú ŋɛ́, tsí ń nya akpá oɖé fú Títò. Tsí è kè sì ɖánɔ́ mú mi. Òtítɔ́ gé ní àa náa wà fɔ̀ fú ŋɛ́#ɛ́, tsí akpá yèé àa mú ŋɛ́, tsí ń nyà fú Títò#ɛ́, òŋu gbo dzɛ́ òtítɔ́. 15 Ɛ̀ŋɛ kpó è dzɛ́, tsí gbɔ́ɔ̀lú fúu, tsí è gbàá gbo náàledzò òŋu àrísá lákṹ kpàtàkìì-kã̀. Ńbɛ̀ɛ́, bí ó dzɛ́ ní ó wà tédzú‐ɛ̀ gé#ɛ́, kà tì ma bí kó dzɛ́ afɔ̀-ŋɛ́ tó gbà gìɖì ró#ɛ́. 16 Ayè lákṹ-kã̀ wà tɛ́ mi, iŋɛ́ yèé tse#ɛ́, màa nyáa nɛ́ àkaralé lákṹ-kã̀ si ńǹtá-ŋɛ́ ńŋɛ́ ɔ̀kã̀lɔ́ɔ̀kã̀ kpó.