2 Kòríntì ŋa 6

Àa wà tsitsɛ́ fú Ɔ̀ɖáyé ni. Ńbɛ̀ɛ́, àa wà fɔ̀ fú ŋɛ́ ní kó máa dzɛ́ ní è gba ore-ɔ̀fɛ́-Ɔ̀ɖáyé#ɛ́ rá gé oo. 2 Fee, Ɔ̀ɖáyé fɔ̀ si ńǹwé‐ɛ̀ ní:

“Àsòkò rere#ɛ́ tó, tsí ǹ gba ìre wúwú-ɛ̀ɛ fɛ́ɛ.

Ɔdzɔ́ yèé n gbàɛ́ là#á tó, tsí ǹ gbà fɛ́ɛ.”^*

È rí gé! Àsòkò rere#ɛ́ ní àa wà si báàyí#ɛ́. Ɔdzɔ́-ɔlà#á ní tó si báàyí#ɛ́.

3 Àa kò wà wò ní ɔ̀nyà-kã̀ kó furu itsɛ́-wa. Ńnɛ̀ ní àa wà tsikpá ní àa kó máa dzɛ́ òkúta-àkɔ̀sɛ̀ nɔ́ɔ̀nà-kã̀ kpókpó fú ɔ̀nyà-kã̀#á. 4 Kà kàa bɛ́ɛ̀, àa náa tsikpá, tsí nyà ɖíre ńŋɛ́ ɔ̀kã̀lɔ́ɔ̀kã̀ kpó yèé àa náa tse#ɛ́ ní àa dzɛ́ àtsìtsɛ́-Ɔ̀ɖáyé ŋa. Bí ìréré bá wa niì, àa wà kpotsèéré niì nàmí odzo-ayé gbaŋgba#á wà tse wá niì, àa náa gbódzú si kã̀nyìì si. 5 À kpa wá, tsí mú wa si nɛ́ɛ̀ŋà gbo. À sɔ́ ɔ̀nyà ŋa, tsí à ǹɖe kpó nyàgã̀ã̀ ní àŋa kɔ̀ wá, tsí àa tsitsɛ́ líle líle ŋa gbo, tsí ó ká wa kpó. Àa kà rí odzú sɔ̃rũ, tsí ebi-inɔ́ gbo náa kpa wá. 6 Ó ɖi, àa náa nyà ɖíre ní àa dzɛ́ àtsìtsɛ́-Ɔ̀ɖáyé ŋa ni. Àa náa lìlò mímá, tsí àa náa lo iŋɛ́ mímà gbo, tsí àa náa nɛ́ àtɛ̀si gbo. Àa náa tsɔ̀nyà gbo, tsí Mímí-Ɔ̀ɖáyé† gbo náa wà náànyì-wa si. Àa kà nɛ́ àmúɖɔ̃̀-ìmìyɛ̀ fúnɛ. 7 Àa náa dzíkɔ̀-òtítɔ́#ɛ́ gbo, tsí wà tse iŋɛ́ ɔ̀kã̀lɔ́ɔ̀kã̀ gbo gbà ńǹtá-ikpá-Ɔ̀ɖáyé. Àa náa wà lo òtítɔ́ tsítse gbo kíbí iŋɛ́-ìdzògu bɛ́, tsí wà ń dzà, tsí wà ń tsɛ́wé bo ara-wa gbo. 8 À náa bu irɔ̃ si néwo fú wa, tsí ɖánɔ́ mú wa gbo. À náa fɔ íbàɖí nára-wa, tsí fɔ ire gbo nára-wa. À náa módzú-olóòɖòbò gbo wò wá. Ó ɖi, òtítɔ́ ní àa náa sì fɔ̀#ɛ́. 9 À náa tse gbo kíbí à kò mà wá bɛ́ yí. Ò ɖi, à sì mà wá rere. À náa fɔ̀ gbo ní àa wà nɔ́ɔ̀nà-ilé-ikú si. Ó ɖi, è rí gé, àa sì wà náàyɛ̀ si. À náa tsoró bá wa gbo. Ó ɖi, à kà sì kpa wá nóòkú. 10 À náa tse gbo ní ara kó kú wa. Ó ɖi, ayè náa sì wà tɛ́ wa làkóò gé ni. Àa náa dzɔ adzìyàkú ŋa gbo nódzú-ɔ̀nyà ŋa si. Ó ɖi, àwa#á ní sì wà sɔ ɔ̀nyà kpíkpɔ̀ ɖi olówó#ɛ́. À náa ɖédzú iŋɛ́-kã̀ kò wà nɔ́wɔ́-wa gbo ni. Ó ɖi, iŋɛ́ ŋa#á kpó sì wà nɔ́wɔ́-wa si.

È dzɛ́ ilé-Ɔ̀ɖáyé Oláàyɛ̀ ni

11 Fee, ìnàbí-wa ŋa ńKòríntì, àa wà wíìnyɛ̀ fú ŋɛ́ gãgã, tsí àa tsí inɔ́ gbo kpó fú ŋɛ́. 12 Àwa òŋu, àa kò ɖi inɔ́ fú ŋɛ́. Ɛ̀ŋɛ ní ɖi inɔ́ fú wa#á. 13 Ńbɛ̀ɛ́, àa wà wíìnyɛ̀ fú ŋɛ́ kíbí boba náa wíìnyɛ̀ fú ɔma bɛ́#ɛ́ ni. Kíbí àa wà tse fú ŋɛ́ gbà#á, ɛ̀ŋɛ gbo è tse fú wa bɛ́ɛ̀. È tsí inɔ́ fú wa kpó.

14 Ɛ̀ŋɛ-ɛnɛ yèé kò gba Kírísítò gbɔ́ ŋa#á méèdzì kó máa ɖɔ́ɔ̀há. Ǹ ní fòò, òtítɔ́ tsítse òŋu íbàɖí gbo nákó nyáa gbé má náàdzɔ́ɔ̀? Nàmí òsã́ òŋu òru méèdzì gbo náa kpàɖé? 15 Fee, afɔ̀-Kírísítò òŋu ti Ètsù† méèdzì nákó nyáa ɖéè? Nàmí kí nákó nyáa wà náàŋírĩ-ɛnɛ yèé gba Kírísítò gbɔ́#ɛ́ òŋu ɛnɛ yèé kò gbàá gbɔ́#ɛ́ méèdzì? 16 Tsí ilé-Ɔ̀ɖáyé† òŋu iŋɛ ŋa gbo méèdzì nákó nyáa dzɛ kpàɖéè? Fee, àwa ní dzɛ́ ilé-Ɔ̀ɖáyé Oláàyɛ̀#ɛ́. Ɔ̀ɖáyé ti fɔ̀ si ńǹwé‐ɛ̀ ní:

“Màa gbé náàŋírĩ-ŋa si, tsí wà lɔ, tsí wà bɔ̀.

Màa dzɛ́ Ɔ̀ɖáyé-ŋa, tsí àŋa òŋu, à nákó dzɛ́ tèmi.”^*

17 Ńnɛ̀ ní Ɔlɔ́dzɔ́ fɔ̀ si ńǹwé‐ɛ̀ ró ní:

“È kpɔ̀ fùɖá náàŋírĩ-ŋa, tsí e nya ara-ŋɛ́ si níìkã̀.

È máa mɔ́wɔ́ kã iŋɛ́ yèé nákó mú ŋɛ́ dzàbi-mi#ɛ́,

tsí èmi òŋu màa tɔ́wɔ́ méèdzì gbà ŋɛ́.”^*

18 Ɔlɔ́dzɔ́ Olíkpá tɔ́ fɔ̀ ró ní: “Màa dzɛ boba fú ŋɛ́, tsí è nákó dzɛ́ ɔma-mi ɔnɔkɛ̃̀ɛ̃ ŋa òŋu ɔma-mi ɔnɔbɛ̃̀ɛ̃ ŋa.”^*