2 Kòríntì ŋa 5

Ara-wa wà kíbí awúrɛ́ bɛ́, tsí àa wà ńnɛ̀ ńǹtalɛ̀ bí si ni. À nákó wáa gbóo ǹɖe nɔ́dzɔ́-kã̀. Ó ɖi fee, àa mà si ní Ɔ̀ɖáyé tɔ́tse ìɖìgbé-kã̀ si fú wa si. Ìɖìgbé#ɛ́, ilé-kã̀ ni. Kò tsi ɔ̀nyà ní mú ɔwɔ́-ara‐ɛ̀, tsí ń tseé#ɛ́. Ó wà nɔ́ɔ̀rɔ̃ si ni, tsí ó wà gbo si títí lɔ náàrìtã́. 2 Ó ɖi, nɔ́mbɛ́ báàyí#ɛ́, àa mú enyí kã̀ si ni, iŋɛ́ yèé tse#ɛ́, àa nɛ́ awù lákṹ-kã̀ si. Òŋu ní wà dzɛ́ ní àa wà wò ní àa kó kɛ́ ilé-wa yèé wà nɔ́ɔ̀rɔ̃ si#ɛ́, tsí ń wɔ̀ kíbí à náa wɔ àwù bɛ́#ɛ́ si ńǹtá-yèé bɛ́. 3 Àtsùgbée kó dzɛ́ gé ní à rí ní àa wɔ àwù si, tsí àa kò wà néèwò. 4 Kíbí ó dzɛ́ ní àa tɔ́ wà náwúrɛ́-ìtalɛ̀#ɛ́ bí si ró#ɛ́, ó wɔ̀ wá si, tsí àa wà náàlàárò sísa si. Ó ɖi, kò tsi òkpì‐ɛ̀ ní sì dzɛ́ ní àa wà wò ní àa kó bɔ́ ara ti ìtalɛ̀ bí ǹɖe kíbí à náa bɔ́ àwù ǹɖe bɛ́#ɛ́ ni. Òò, kò tsi bɛ́ɛ̀ ni. Kà kàa bɛ́ɛ̀, àa wà wò ní àa kó kɛ́ ara ti ɔ̀rɔ̃#ɛ́, tsí ń wɔ̀, àtsùgbée iŋɛ́ yèé náa kú#ɛ́, àyɛ̀-àrìtã́ kó bòó kpó bútúbútú. 5 Tsí Ɔ̀ɖáyé òŋu ká‐ɛ̀ ní kpaɖí fú wa si fú kpíkpàrɔ̀ nyɛ̀ŋɛ̀#ɛ́. Òŋu ká‐ɛ̀ ké ní tse tsí Mímí‐ɛ̀ tì wɔ̀ ńǹtá-wa#á. Mímí‐ɛ̀#ɛ́, akpálà-àtsɛ̃̀tsɛ̃̀-iŋɛ́-ire yèé ŋa ó kpaɖí si fú wa#á ni.

6 Ńbɛ̀ɛ́, àa módzú gbó si tó bɛ́ɛ̀ si ni. Àa mà si ní bí ó dzɛ́ ní ara-wa wà kíbí ilé bɛ́, tsí àa wà ńnɛ̀ si#ɛ́, àa wà ńǹɖì dzídzɛ̃̀ fú ńbí-Ɔlá-wa wà#á ni. 7 Fee, àkaralé ní àa wà ń gbɛ̃́ ara-wa#á, kò tsi iŋɛ́ yèé àa wà rí òŋu odzú#ɛ́ ni. 8 Ɛ̃ɛ̃, àa módzú gbó si tó bɛ́ɛ̀ ni. Àa kó kpɔ̀ fùɖá ńnɔ́-ara ti ìtalɛ̀ bí, tsí ǹɖe lɔ káà kí ńɖi-Ɔlá-wa#á, ó sã̀ fú wa lárè. 9 Ńnɛ̀ ní náa le wá si gé ní àa kó tse tsí iŋɛ́-wa kó dzì ńǹtá‐ɛ̀ fúu#ɛ́. Àa wà ńnɔ́-ara#á si niì, àa kpɔ̀ fùɖá ńnɛ̀ niì, àa kó tse tsí iŋɛ́-wa kó dzì ńǹtá‐ɛ̀ fúu. 10 Fee, ɔdzɔ́-kã̀ bàa, tsí ó wà ní àwa kpó, àa kó lɔ káà ɖóro ńwádzú-Kírísítò, tsí kó kpɛdzɔ́ fú wa. Nákó lɔ bɛ́ɛ̀, àtsùgbée kṹnukṹ kó gba èrè-iŋɛ́ yèé ó tse náàsòkò yèé ó gbé ńǹtalɛ̀ bí#ɛ́. Bí ìwɔ-kã̀, ò tse ire, nàa gba èrè‐ɛ̀, bí ìwɔ-kã̀ gbo, ò tse íbàɖí, nàa gba èrè‐ɛ̀.

Ɔ̀ɖáyé gbà ńǹtá-Kírísítò, tsí tɔ́tse àŋírĩ-àwa‐ɛ̀ méèdzì

11 Ńbɛ̀ɛ́, ká rí Ɔlá-wa sá#á, àa ma iŋɛ́ yèé ó dzɛ́#ɛ́. Ńnɛ̀ ní àa náa wà tse tsí ɔ̀nyà ŋa kó máa wà dzèrèbe ró#ɛ́. Ɔ̀ɖáyé ma inɔ́-wa, tsí ǹ karalé ní ɛ̀ŋɛ gbo è ma inɔ́-wa, tsí ó wà ńnɔ́-ŋɛ́ si bɛ̀. 12 Kò tsi ní àwa ká-wa ní sɛ̃̀ wà bɛ ara-wa wá ńɖi-ŋɛ́ ró#ɛ́. Kà kàa bɛ́ɛ̀, àa wà wò ní e gbà nɔ́ɔ̀nà yèé bɛ́, tsí e mú wa, tsí ń nya akpá, àtsùgbée e nyáa rí afɔ̀ yèé è nákó nyáa ń dzɔ́ŋù fú ɔ̀nyà kã̀ŋa#á ni. Ɛnɛ nyɛ̀ŋɛ̀ ŋa#á, ɔ̀nyà ŋa kó rí ŋa nódzú bɛ́ gé ní à náa ń nya akpá#á. Kò tsi iŋɛ́ yèé wà ńnɔ́-ŋa#á ni. 13 Fee, bí ó dzɛ́ ní éwo kò sí fú àwa òŋu oo, àtsùgbé-Ɔ̀ɖáyé ni. Bí àa sì wà rere gbo oo, àtsùgbée kó sã̀ fú ŋɛ́ ni. 14 Àwa òŋu, àa rí mà ní ɔ̀nyà ɔ̀kã̀ntso kú si nárũ-ɔ̀nyà kpó, tsí ɔ̀nyà kpó wà kíbí ó kú si bɛ́ yí. Àwa yèé ŋa rí mà bɛ́ɛ̀#ɛ́, àmúɖɔ̃̀-Kírísítò#ɛ́ náa wà télè wá gé ni. 15 Kírísítò kú si nárũ-ɔ̀nyà kpó, àtsùgbée bí ɔ̀nyà-kã̀ wà náàyɛ̀ si#ɛ́, kó máa wà fú ara‐ɛ̀ ró. Kó wà si fú ɛnɛ yèé kú si nárũ‐ɛ̀, tsí dzí ti náàŋírĩ-òkú ŋa wá náyé#ɛ́ ni. 16 Báàyí#ɛ́, àa kò wà módzú yèé ɔ̀nyà-ayé yèé ŋa náa ń wonɛ#ɛ́, tsí wà ń wo ɔ̀nyà-kã̀ ró. Bí ó dzɛ́ gìɖì ní dzɔ̀ɔ́ dzɔ̀ɔ́#ɛ́, àa módzú yèé ɔ̀nyà-ayé yèé ŋa náa ń wonɛ#ɛ́, tsí ń wo Kírísítò#ɛ́, báàyí òŋu#ɛ́, àa kò wà módzú-ìrɔ́ nyɛ̀ŋɛ̀, tsí wà ń wòó ró. 17 Tsí bí Kírísítò tse ɔ̀kã̀ntso bá ɔ̀nyà-kã̀ gbo#ɛ́, ɛnɛ nyɛ̀ŋɛ̀ ɖi ɔ̀nyà titɔ̃. Iŋɛ́-dzɔ̀ɔ́ dzɔ̀ɔ́ ŋa wáa lɔ, iŋɛ́ titɔ̃ ní wà báàyí#ɛ́. 18 Tsí iŋɛ́ nyɛ̀ŋɛ̀ kpó náa ti ńɖi-Ɔ̀ɖáyé ni. Ó gbà ńǹtá-Kírísítò, tsí tɔ́tse àŋírĩ-àwa‐ɛ̀ méèdzì, tsí ó mú itsɛ́-kã̀ gbo bɔwɔ́-wa. Itsɛ́#ɛ́ ní wà dzɛ́ ní àa kó gbɛ̃́ ɛnɛ-àtíbɔ̀ ŋa wá ńɖɔ̀-òŋu, tsí òŋu kó tɔ́tse àŋírĩ-òŋu-ŋa méèdzì. 19 Nóòtítɔ́#ɛ́, Ɔ̀ɖáyé gbà ńǹtá-Kírísítò, tsí wà tɔ́tse àŋírĩ-òŋu ayé gbaŋgba#á méèdzì. Ó tse bɛ́ɛ̀ náàrì tɔ́ àbi yèé ŋa ɔ̀nyà ŋa dzɛ#ɛ́ si fú ŋa si. Tsí ó mú itsɛ́ bɔwɔ́-wa ní àa kó dzíkɔ̀ fú ɛnɛ-àtíbɔ̀ ŋa ní òŋu tɔ́tse àŋírĩ-òŋu ɔ̀nyà-ayé yèé ŋa méèdzì. 20 Ńbɛ̀ɛ́, Kírísítò mú wa, tsí ń kparɔ arũ-ara‐ɛ̀ ni. Ɔ̀ɖáyé òŋu ká‐ɛ̀ ní wà gbà ńǹtá-wa, tsí wà kpe ɔ̀nyà ŋa#á. Ó ɖi, àa wà mú Kírísítò, tsí wà ń tsìkálɛ̀ fú ŋa ní ká dzɛ́, tsí Ɔ̀ɖáyé kó tɔ́tse àŋírĩ-òŋu-ŋa méèdzì. 21 Kírísítò kò dzàbi-kã̀ kpókpó. Ó ɖi, Ɔ̀ɖáyé mú àbi-wa ŋa, tsí ń rù ńǹtá‐ɛ̀, àtsùgbée kó gbà ńǹtá‐ɛ̀, tsí gbà wá nɔ́ɔ̀nyà-atsòtítɔ́ nódzú-ara‐ɛ̀.