Iŋɛ́-ɛ̀fɛ́-kã̀ wà náàwò-amà ŋa si
4
Ɔ̀ɖáyé rí ànyínɔ́ fú wa, tsí mú itsɛ́ yèé bɛ́, tsí ń bɔwɔ́-wa ni. Ńnɛ̀ ní ara kò wà kú wa gìɖì#ɛ́. 2 Àwa òŋu, àa kò tse aréma-iŋɛ́-ìɖúkù ŋa òŋu iŋɛ́-anɔ́ ŋa tsítse. Àa kò wà rìrɛ̃̀-òɖòbò, tsí àa kò wà tsomi tɔ́ afɔ̀-Ɔ̀ɖáyé gbo. Kà kàa bɛ́ɛ̀, àa wà tsí atsɔ nódzú-òtítɔ́#ɛ́ ni. Àa wà tse bɛ́ɛ̀, tsí ɔ̀nyà kpó kó mà ńnɔ́-ara‐ɛ̀ ní àa dzɔ ní ká karalé si ńǹtá-wa nódzú-Ɔ̀ɖáyé. 3 Ó ɖi, bí ó dzɛ́ ní inɔ́-ikɔ̀ ɖíɖɔ̃̀ yèé àa wà dzɛ́#ɛ́ kò tɔ́ má si ró#ɛ́, ni ɛnɛ yèé ŋa wà nɔ́ɔ̀nà-ɛ̀rá làkóò si#ɛ́ ní kò má fú#ɛ́. 4 Ètsù†, ikpá-íbàɖí yèé dzɛ́ ólú-ayé yèé bɛ́#ɛ́, ó kpa ìsérè-ɛnɛ yèé ŋa kò gba Ɔ̀ɖáyé gbɔ́#ɛ́. Ó tse bɛ́ɛ̀, àtsùgbée ká máa rí mímá#á. Mímá#á, ikɔ̀ ɖíɖɔ̃̀#ɛ́ wà nyàá kã́ làkóò, tsí wà nya iyì-Kírísítò gbo ɖíre. Bí ò rí Kírísítò gé ni ò wà rí kíbí Ɔ̀ɖáyé wà gbà#á ńnɛ̀ɛ́. 5 Fee, kò tsi ikɔ̀-àwa ká-wa ní àa wà dzɛ́#ɛ́. Ikɔ̀ yèé àa wà dzɛ́#ɛ́ ní dzɛ́ ní Yèésù Kírísítò ní dzɛ́ Ɔlá-ɔ̀nyà kpó#ɛ́. Ó ɖi, àa náa wà fɔ̀ ní àwa ká-wa òŋu àa dzɛ́ àtsìtsɛ́-ŋɛ́ ŋa náàtsùgbé-Yèésù. 6 Ɔ̀ɖáyé fɔ̀ ní: “Mímá kó bɔ́ ti ńnɔ́-òkùkù!”* Tsí òŋu#ɛ́ ké ní tse tsí mímá‐ɛ̀ tsí ìsérè fú wa#á, àtsùgbée bí àa wà rí àtɛ̀dzú-Kírísítò, ni àa kó rí iyì‐ɛ̀ yèé wà yòɖòɖòò kpó#ɛ́ mà.
7 Ó ɖi, àa gba iŋɛ́-ɛ̀fɛ́ yèé bɛ́ ɖà náàwò-amà ŋa, àtsùgbée ɔ̀nyà ŋa ká rí mà rere ní ikpá yèé bɛ́ yèé kpàtà lé ńǹtá-ikpá ɔ̀kã̀lɔ́ɔ̀kã̀ kpó#ɛ́, ó ti ńɖi-Ɔ̀ɖáyé ni, kò ti ńɖi-wa. 8 Ìréré ŋa ńǹrɔ́ǹrɔ́ náa tú bò wá. Ó ɖi, à kà sì kpa wá. Ńǹwèrè kã̀ŋa àa náa lɔ káà kã̀. Ó ɖi, odzú-wa ká sì nyà. 9 À náa tsoró bá wa. Ó ɖi, Ɔ̀ɖáyé òŋu kà kɔ̀ wá dzɔ̀ɔ́. À náa mú wa tsã́lɛ̀. Ó ɖi, à kà sì nyáa kpa wá nóòkú. 10 Ilɛ̀ kã̀kã̀ yèé wà má#á, àa náa wà gbɔ́ ɖíɖɔ̃̀-ara-wa títí ní àa kó kú kíbí Yèésù gbo bɛ́, àtsùgbée ɔ̀nyà ŋa ká rí àyɛ̀-Yèésù nára-wa. 11 Fee, àwa yèé wà náàyɛ̀ si ŋa#á, à mú wa bɔwɔ́-ikú nɔ́dzɔ́ kɔ́dzɔ́ si gé ni, náàtsùgbée kíbí àa wà tɛ̀ náànyì-Kírísítò#ɛ́. Ó wà lɔ fú wa bɛ́ɛ̀, àtsùgbée ɔ̀nyà ŋa kó rí àyɛ̀-Yèésù nára-wa, ara-wa yèé dzɛ́ iŋɛ́ kúkú#ɛ́. 12 Ńbɛ̀ɛ́, àa dzɛ́ ní àa kó le ɛ̀ɖɔ̃̀ gbe ikú, àtsùgbée ɛ̀ŋɛ òŋu e nyáa rí àyɛ̀.
13 À kɔ si ńǸwé-Ɔ̀ɖáyé† ní: “Ǹ nɛ́ àkaralé si ńǹtá-Ɔ̀ɖáyé, ńnɛ̀ ní ǹ wíìnyɛ̀#ɛ́.”* Àwa gbo, nɛ́kpa-àkaralé nyɛ̀ŋɛ̀#ɛ́ ké ní àa wà làkóò si#ɛ́. Àwa gbo, àa nɛ́ àkaralé, ńnɛ̀ ní àa wà wíìnyɛ̀#ɛ́. 14 Fee, àa mà si ní Ɔ̀ɖáyé yèé dzí Yèésù Ɔlá-wa ti náàŋírĩ-òkú ŋa wá náyé#ɛ́ nákó dzí àwa gbo ti náàŋírĩ-òkú ŋa wá náyé#ɛ́, iŋɛ́ yèé tse#ɛ́, Yèésù tse ɔ̀kã̀ntso bá wa si. Tsí nákó gbɛ̃́ àwa-ŋɛ́ méèdzì lɔ káà ɖóro ńwádzú‐ɛ̀. 15 Iŋɛ́ yèé tse#ɛ́, àtsùgbée kó sã̀ fú ŋɛ́ ní ìréré ŋa#á bá wa#á. Ńbɛ̀ɛ́, ore-ɔ̀fɛ́-Ɔ̀ɖáyé#ɛ́ wà tó ńɖi-ɔ̀nyà kpíkpɔ̀ máa, tsí ó tse tsí ɔ̀nyà ŋa wà kpɔ̀ máa tó bɛ́ɛ̀, tsí wà ɖɔ́kpɛ́ fúu gìɖì héŋú, tsí wà nyɛ̀ɛ́ gbo.
Àa kó mú àkaralé, tsí wà ń gbɛ̃́ ara-wa
16 Ńnɛ̀ ní ara kò tì wà kú wa#á. Bí ó dzɛ́ gìɖì ní ó wà ká ara-wa làkóò oɖé, oɖé oo, àyɛ̀ yèé wà ńnɔ́-wa#á òŋu wà ɖi titɔ̃ ńlɛ̀ kã̀kã̀ yèé wà má#á. 17 Fee, à nákó nyáa fɔ̀ ní ìréré yèé àa wà réré nɔ́mbɛ́ báàyí#ɛ́, à kò ti lákṹ, arũ-ŋa gbo nákó wáa mɔ. Àa nákó nyáa fɔ̀ bɛ́ɛ̀, bí ó dzɛ́ ní àa mú ìréré ŋa#á, tsí ń ɖé bá iyì yèé à wà kpaɖí si fú wa#á. Iyì#ɛ́, iyì-àrìtã́ ni, tsí ó wà kpàtàkìì, tsí lákṹ gbo tó bɛ́ɛ̀. 18 Tsí àa kò módzú ta iŋɛ́ yèé ɔ̀nyà nákó nyáa rí òŋu odzú#ɛ́ si. Iŋɛ́ yèé ɔ̀nyà kàkó nyáa rí òŋu odzú#ɛ́ ní àa módzú ta si#ɛ́. Iŋɛ́ yèé tse#ɛ́, iŋɛ́ yèé ɔ̀nyà nákó nyáa rí òŋu odzú#ɛ́ kà wà si làkóò làkóò. Ó ɖi, iŋɛ́ yèé ɔ̀nyà kàkó nyáa rí òŋu odzú#ɛ́ òŋu wà si làkóò làkóò.