Rómà ŋa 14

È máa wà kpɛdzɔ́ bánɛ gé

Báàyí#ɛ́, bí àkaralé-ɔ̀nyà-kã̀ kò ta ogùgù múlɛ̀ rere fee, è náa tɔ́wɔ́ gba òŋu gbo. È máa wà kpɛdzɔ́ báa ti nára-kíbí òŋu náa módzú kpurã iŋɛ́ ŋa gbà#á. 2 Bóyá ɔ̀nyà-kã̀ òŋu wà karalé ní ɔ̀nà wà fú òŋu, tsí òŋu kó nyáa dzɛ iŋɛ́ ɔ̀kã̀lɔ́ɔ̀kã̀ kpó. Ó ɖi, olòmírɛ̃̀ yèé àkaralé tɛ̀ɛ̀ òŋu kò wɔlɛ̀ rere#ɛ́, ɛrã dzɛ́ ɛ̀wɔ̀ fúu. 3 Ńbɛ̀ɛ́, ɛnɛ yèé wà karalé ní ɔ̀nà wà fú òŋu, tsí òŋu kó nyáa dzɛ iŋɛ́ ɔ̀kã̀lɔ́ɔ̀kã̀ kpó#ɛ́, kó máa wà rí ɛnɛ yèé kà dzɛ iŋɛ́ ìkùbɔ̀ ŋa#á ní òŋu kò dzɛ́ iŋɛ́-kã̀. Tsí ɛnɛ yèé kà dzɛ iŋɛ́ ìkùbɔ̀ ŋa gbo#ɛ́, òŋu gbo kó máa wà kpɛdzɔ́ bá ɛnɛ yèé náa dzɛ́ iŋɛ́ ɔ̀kã̀lɔ́ɔ̀kã̀ kpó#ɛ́. Iŋɛ́ yèé tse#ɛ́, Ɔ̀ɖáyé gba ɛnɛ nyɛ̀ŋɛ̀ gbo. 4 Ǹ ní fòò, ìwɔ yèé wà kpɛdzɔ́ bá àtsìtsɛ́-olòmírɛ̃̀#ɛ́ fee, kí ìwɔ òŋu ò dzɛ́ ná? Bí àtsìtsɛ́#ɛ́ wà tsitsɛ́‐ɛ̀ rere gbo, bí kò wà tseé rere gbo, yèésí tsɛdzɔ́-ɛ̀ɛ? Afɔ̀ nyɛ̀ŋɛ̀ afɔ̀-ɔ̀gá tòŋu ká‐ɛ̀ ni. Tsí nákó sì tsitsɛ́#ɛ́ rere gbo gé ní ó dzɛ́#ɛ́. Iŋɛ́ yèé tse#ɛ́, Ɔlá-wa nɛ́kpá, tsí kó nyáa tse tsí àkaralé‐ɛ̀ kó máa kí nɔ́ɔ̀nà.

5 Ɔ̀nyà kã̀ŋa gbo wà, tsí à náa tsèsérè ní ɔdzɔ́ kã̀ŋa wà, tsí kpã́dzú láre ɔdzɔ́-àtíbɔ̀ ŋa nódzú-Ɔ̀ɖáyé. Tsí olòmírɛ̃̀ kã̀ŋa gbo náa tsèsérè ní ɔdzɔ́ ŋa#á kpó#ɛ́, ɔ̀kã̀ kò kpã́dzú láre èkéèdzì‐ɛ̀ nódzú-Ɔ̀ɖáyé. Ńbɛ̀ɛ́, ó wà ní kṹnukṹ kó karalé si ńǹtá-iŋɛ́ yèé ó wà sérè ńnɔ́-ara‐ɛ̀#ɛ́. 6 Ó ɖi, ɛnɛ yèé wà tse ìsérè ní ɔdzɔ́ kã̀ŋa kpã́dzú láre ɔdzɔ́-àtíbɔ̀ ŋa#á, àtsùgbée kó ń nyɛ Ɔlá-wa ní ó wà tsèsérè bɛ́ɛ̀#ɛ́. Ɛnɛ yèé gbo wà fɔ̀ ní ɔ̀nà wà fú òŋu, tsí òŋu kó nyáa dzɛ iŋɛ́ ɔ̀kã̀lɔ́ɔ̀kã̀ kpó#ɛ́, àtsùgbée òŋu gbo kó ń nyɛ Ɔlá-wa ké ni. Iŋɛ́ yèé tse#ɛ́, náa ɖɔ́kpɛ́ fú Ɔ̀ɖáyé fú dzídzɛ#ɛ́. Ɛnɛ yèé gbo kà sì dzɛ iŋɛ́ ìkùbɔ̀ ŋa#á, àtsùgbée òŋu gbo kó ń nyɛ Ɔlá-wa#á ké ni. Iŋɛ́ yèé tse#ɛ́, òŋu gbo náa ɖɔ́kpɛ́ fú Ɔ̀ɖáyé fú dzídzɛ#ɛ́.

7 Fee, bí ɔ̀nyà-kã̀ wà náàyɛ̀ si, kò wà fú ara‐ɛ̀ gé. Tsí bí ɔ̀nyà-kã̀ gbo sì kú#ɛ́, òŋu gbo kò kú fú ara‐ɛ̀ gé. 8 Bí àa wà náàyɛ̀ si, àa wà si fú Ɔlá-wa ni. Bí àa kú gbo, àa kú fú Ɔlá-wa#á ké ni. Àa wà náàyɛ̀ siì, àa kúù, ti Ɔlá-wa#á gé ní àa dzɛ́ si#ɛ́. 9 Náàtsùgbée bɛ́ɛ̀ ní Kírísítò kú, tsí ó dzí ti náàŋírĩ-òkú ŋa wá náyé#ɛ́, tsí kó dzɛ́ Ɔlá-ɔ̀nyà-àwáàyɛ̀ ŋa òŋu òkú ŋa#á. 10 Kíbí ó dzɛ́ bɛ́ɛ̀#ɛ́ fe, kí tse tsí ìwɔ òŋu ò wà kpɛdzɔ́ bá enìkéèdzì-ɛ̀ɛ ńǹkɛ̀ɛ́? Tsí ìwɔ gbo fe, kí tse tsí ò kò wà mú enìkéèdzì-ɛ̀ɛ kpe iŋɛ́-kã̀ kpókpó? Àwa kpó, Ɔ̀ɖáyé bòkó wáa kpè wá nɛ́dzɔ́ nɔ́dzɔ́-kã̀. 11 À ti kɔɔ́ si ńǸwé-Ɔ̀ɖáyé† si bɛ́ɛ̀ ní:

“Èmi, Ɔlɔ́dzɔ́ Oláàyɛ̀, ǹ wà fɔ̀ɔ́.

Ɔ̀nyà ɔ̀kã̀lɔ́ɔ̀kã̀ kpó nákó wáa kálɛ̀ nábɛ́-mi,

tsí àŋa kpó, à nákó tsí arũ, tsí wà nyɛ̀ mí.”^*

12 Ńbɛ̀ɛ́, ɔ̀nyà kpó bòkó wáa dzɛ́ àbɔ̀ fú Ɔ̀ɖáyé, kṹnukṹ òŋu tɛ̀ɛ̀, ti nára-iŋɛ́ yèé òŋu ká‐ɛ̀ tse#ɛ́.

Máa mú enìkéèdzì-ɛ̀ɛ dzàbi-Ɔ̀ɖáyé

13 Kíbí ó dzɛ́ bɛ́ɛ̀#ɛ́, kò wà ní àa kó wà kpɛdzɔ́, tsí wà ɖáàbi fú ara-wa ŋa ró. Kà kàa bɛ́ɛ̀, iŋɛ́ yèé àa kó tse#ɛ́ ní dzɛ́ ní ìlò-wa ŋa kó máa dzɛ́ òkúta-àkɔ̀sɛ̀ fú enìkéèdzì-wa ŋa, tsí mú ŋa dzàbi-Ɔ̀ɖáyé. 14 Yèésù Ɔlá-wa tse tsí ó tã́ ńnɔ́-mi si kpó, tsí ǹ mà si ní iŋɛ́-kã̀ kpókpó kò wà, tsí dzɛ́ ɛ̀wɔ̀. Ó ɖi, bí ɔ̀nyà-kã̀ sì wà tsèsérè ní iŋɛ́-kã̀ dzɛ́ ɛ̀wɔ̀ fú òŋu#ɛ́, iŋɛ́#ɛ́ dzɛ́ ɛ̀wɔ̀ fú ɛnɛ nyɛ̀ŋɛ̀ òŋu ká‐ɛ̀ ńnɛ̀ɛ́. 15 Ó ɖi, bí ó dzɛ́ ní dzídzɛ yèé ìwɔ-kã̀ nàa dzɛ#ɛ́ ní nákó tse tsí ìsérè-enìkéèdzì-ɛ̀ɛ nákó ròmá si#ɛ́, ni ò kò nɛ́ àmúɖɔ̃̀ fúu ró ńnɛ̀ɛ́. Enìkéèdzì-ɛ̀ɛ nyɛ̀ŋɛ̀#ɛ́, Kírísítò tse àtsùgbé-tɛ̀ɛ̀ gbo, tsí kú ni. Máa tse tsí sɔ́ɔ si nɛ́ɛ̀rá náàtsùgbé-dzídzɛ yèé ìwɔ nàa dzɛ#ɛ́. 16 Kó máa dzɛ́ ní iŋɛ́ yèé dzɛ́ iŋɛ́-ire fú ŋɛ́#ɛ́, kó wáa tse tsí ɔ̀nyà ŋa ká rí ɔ̀nà, tsí wà ń bánɛ fɔ̀. 17 Ó ɖi, afɔ̀-oyè-Ɔ̀ɖáyé† òŋu#ɛ́, kò tsi afɔ̀-iŋɛ́ yèé à náa dzɛ#ɛ́ ní nàmí iŋɛ́ yèé à kà dzɛ#ɛ́ ní. Kò tsi afɔ̀-iŋɛ́ yèé à náa mɔ#ɛ́ gbo ní nàmí iŋɛ́ yèé à kà mɔ#ɛ́ gbo ní. Kà kàa bɛ́ɛ̀, afɔ̀-ká wà tse òtítɔ́-Ɔ̀ɖáyé, tsí àa kó wà ɖɔ̃̀ bá ɔ̀nyà ŋa, tsí Mímí-Ɔ̀ɖáyé† gbo kó tse tsí àa kó wà náyè títɛ́ si ni. 18 Bí ɔ̀nyà-kã̀ wà tsitsɛ́ fú Kírísítò, tsí wà tse iŋɛ́-ìrɔ́ yèé ŋa nyí#ɛ́, iŋɛ́-ɛnɛ nyɛ̀ŋɛ̀ náa dzɔdzú-Ɔ̀ɖáyé, tsí ɔ̀nyà ŋa gbo náa wà bu ìɖì si fúu.

19 Kíbí ó dzɛ́ bɛ́ɛ̀#ɛ́, àa kó múgírí, tsí ká wà tse iŋɛ́ yèé ŋa nákó mɔ́wɔ́ gbè fú wa, tsí àa kó wà ɖɔ̃̀, tsí àa kó wà ɖáàmí le ara-wa ŋa, tsí àkaralé-wa ŋa gbo kó wà ta ogùgù múlɛ̀ máa#á. 20 Ó ɖi, máa bàdzɛ́ itsɛ́-Ɔ̀ɖáyé náàtsùgbé-dzídzɛ. Nóòtítɔ́#ɛ́, iŋɛ́-kã̀ kpókpó kò dzɛ́ ɛ̀wɔ̀ nódzú-Ɔ̀ɖáyé ní ká máa dzɛ. Ó ɖi, bí ó dzɛ́ ní dzídzɛ yèé ìwɔ-kã̀ nàa dzɛ#ɛ́ ní nákó sɔ́ ɔ̀nyà-kã̀ si náàbi-Ɔ̀ɖáyé#ɛ́, ni ò tse íbàɖí ńnɛ̀ɛ́. 21 Iŋɛ́ yèé dzɛ́ iŋɛ́-ire#ɛ́ ní wà dzɛ́ ní fee, máa tse iŋɛ́-kã̀ kpókpó, tsí kó sɔ́ enìkéèdzì-ɛ̀ɛ si náàbi-Ɔ̀ɖáyé. Bí ó dzɛ́ náfɔ̀-ɛrã dzídzɛ niì nàmí ɔtí mímɔ niì nàmí iŋɛ́ ɔ̀kã̀lɔ́ɔ̀kã̀ kpókpó gìɖì gé, máa tseé, tsí kó sɔ́ enìkéèdzì-ɛ̀ɛ si náàbi-Ɔ̀ɖáyé. 22 Ti nára-iŋɛ́ yèé ŋa nyí kpó#ɛ́, bí ìwɔ-kã̀ ò karalé ní à nákó tseé gbà ńǹrɔ́-kã̀ gé ná, kó kí náàŋírĩ-ìwɔ-Ɔ̀ɖáyé méèdzì sɔ̃́ŋú gé. Bí ɔ̀nyà-kã̀ wà tse iŋɛ́-kã̀, tsí kò wà dzèrèbe ńnɔ́-ara‐ɛ̀ ní ó sã̀ nàmí kò sã̀#á, ɛnɛ nyɛ̀ŋɛ̀ wɛ éwo-ire. 23 Ó ɖi, ɛnɛ yèé wà dzèrèbe nára-dzídzɛ yèé ó wà dzɛ#ɛ́, ó kí nɛ́dzɔ́. Iŋɛ́ yèé tse#ɛ́, ɛnɛ nyɛ̀ŋɛ̀ kò mú àkaralé tse ìtɛ̀lɛ̀ fú iŋɛ́ yèé ó tse#ɛ́. Tsí iŋɛ́ ɔ̀kã̀lɔ́ɔ̀kã̀ kpó yèé ɔ̀nyà náa tse, tsí kà dzɛ́ òŋu àkaralé#ɛ́, ó dzɛ́ àbi nódzú-Ɔ̀ɖáyé.