Rómà ŋa 13

Ká wà balɛ éwo fú ɔ̀nyà-ìdzɔba ŋa

Ó wà ní ɔ̀nyà ɔ̀kã̀lɔ́ɔ̀kã̀ kpó kó wà balɛ éwo fú ɔ̀nyà-ìdzɔba ŋa. Iŋɛ́ yèé tse#ɛ́, onùgbó-ìlú ŋa kpó#ɛ́, Ɔ̀ɖáyé ní fú ŋa nɛ́ɛ̀tsɛ ní ká ń gbɛ̃́ ìlú#ɛ́. Tsí onùgbó-ìlú yèé ŋa wà si kpó#ɛ́, Ɔ̀ɖáyé ní mú ŋa dzɛ onùgbó#ɛ́. 2 Ti nára-bɛ́ɛ̀#ɛ́, bí ɔ̀nyà-kã̀ kɔ̀ ní òŋu kàkó balɛ éwo fú onùgbó-ìlú ŋa#á, ɛnɛ nyɛ̀ŋɛ̀ wà kɔ ètò yèé Ɔ̀ɖáyé tse si#ɛ́ ńnɛ̀ɛ́. Tsí ɛnɛ yèé nákó kɔ̀ bɛ́ɛ̀ ŋa#á, à wà bere etí fífà fú ara-ŋa, tsí à nákó ɖáàbi fú ŋa. 3 Ó ɖi, ɛnɛ yèé dzɛ́ ɔ̀nyà-ìdzɔba ŋa, tsí wà gbɛ̃́ wa ŋa#á, bí ò wà tse ire, ò kà sá fú ŋa. Ó ɖi, bí ó dzɛ́ ní íbàɖí ní ò wà tse#ɛ́ ní nàa wà sá fú ŋa#á. Bí ìwɔ-kã̀ ò sì wà wò ní òŋu kó máa wà sá fú onùgbó-ìlú ŋa#á ná, ni wà tse ire, tsí à nákó sì wà nyɛ̀ɛ́. 4 Iŋɛ́ yèé tse#ɛ́, Ɔ̀ɖáyé ní onùgbó-ìlú ŋa#á wà tsitsɛ́ fú#ɛ́, àtsùgbée o wà tse ire#ɛ́. Ó ɖi, bí ó dzɛ́ ní íbàɖí ní ò wà tse#ɛ́, ó wà ní ɛ̀ɖɔ̃̀ kó ti wà ɖáɛ si. Iŋɛ́ yèé tse#ɛ́, à nɛ́kpá ìɖéǹɖè ní ká wà fɛtí fúnɛ. Itsɛ́-Ɔ̀ɖáyé ní à wà tse bɛ́ɛ̀#ɛ́, àtsùgbée ká nya inɔ́ bíbí-Ɔ̀ɖáyé ɖíre fú ɛnɛ yèé ŋa wà tse íbàɖí#ɛ́. 5 Ti nára-bɛ́ɛ̀#ɛ́, ó kpã́dzú ní ká balɛ éwo fú onùgbó-ìlú ŋa. Kó máa dzɛ́ náàtsùgbé-Ɔ̀ɖáyé kó máa nya inɔ́ bíbí‐ɛ̀ ɖíre fú ŋɛ́ gé ní nákó tse tsí è nákó wà balɛ éwo fú ŋa#á. Ó ɖi, è tse bɛ́ɛ̀, iŋɛ́ yèé tse#ɛ́, inɔ́-ŋɛ́ gbo mà si ní iŋɛ́ yèé sã̀ ní ká tse#ɛ́ ńnɛ̀ɛ́.

6 Náàtsùgbée bɛ́ɛ̀ ké ní è wà sã owó-lómbà gbo#ɛ́. Ɔ̀nyà-ìdzɔba ŋa#á, itsɛ́-ìrɔ́ yèé à wà tse bɛ́ɛ̀#ɛ́, Ɔ̀ɖáyé ní ń bɔwɔ́-ŋa ní ká wà tse rere#ɛ́. 7 Ńbɛ̀ɛ́, iŋɛ́ yèé dzɔ ní ká ń fú ɔ̀nyà-kã̀ gé#ɛ́, è ń fú ɛnɛ nyɛ̀ŋɛ̀. Bí ó wà ní e sã owó-lómbà-ìrɔ́-kã̀ kpókpó fú ɔ̀nyà-kã̀ gé, è sãã́ fúu. Bí ɔ̀nyà-kã̀ gbo dzɔ ní e nɛ́ àrísá fúu, è nɛ́ àrísá fúu. Bí ɔ̀nyà-kã̀ gbo dzɔ ní e wà bu ìɖì si fúu, è bùú si fúu.

Àa kó wà nɛ́ àmúɖɔ̃̀ fú ara-wa ŋa

8 È máa dzɛŋɛ̀-iŋɛ́-kã̀ kpókpó nɔ́wɔ́-ɔ̀nyà-kã̀. Ɛŋɛ̀ yèé è nákó dzɛ gé#ɛ́ ní dzɛ́ ní è nákó wà nɛ́ àmúɖɔ̃̀ fú ara-ŋɛ́ ŋa#á. Iŋɛ́ yèé tse#ɛ́, bí ɔ̀nyà-kã̀ wà nɛ́ àmúɖɔ̃̀ fú enìkéèdzì‐ɛ̀ ŋa, ɛnɛ nyɛ̀ŋɛ̀ wà rɛ̃̀ si nɛ́kpa-Ɔ̀ɖáyé dzálɛ̀ kpó ńnɛ̀ɛ́. 9 Ó ɖi, ɛ̀wɔ̀ yèé ŋa Ɔ̀ɖáyé ɖá si nɛ́kpa‐ɛ̀#ɛ́ wà fɔ̀ ní: “Máa gbaya. Máa kpa ɔ̀nyà nóòkú. Máa tsolè. Iŋɛ́-enìkéèdzì‐ɛ̀ɛ kó máa kí nódzú fɛ́ɛ.”^* Fee, ɛ̀wɔ̀ yèé ŋa kpó òŋu ɛ̀wɔ̀ ɔ̀kã̀lɔ́ɔ̀kã̀ kpó#ɛ́, à kpérí ŋa si ńnɔ́-oŋù-afɔ̀ ɔ̀kã̀ntso ni. Oŋù-afɔ̀#ɛ́ ní wà dzɛ́ ní: “Ó wà ní o nɛ́ àmúɖɔ̃̀ fú enìkéèdzì-ɛ̀ɛ kíbí nà nɛ́ fú ara-ɛ̀ɛ#ɛ́.”^* 10 Bí ɔ̀nyà-kã̀ náa wà nɛ́ àmúɖɔ̃̀ fúnɛ, kà tse íbàɖí bá enìkéèdzì‐ɛ̀. Tsí ɛnɛ yèé wà nɛ́ àmúɖɔ̃̀ fúnɛ#ɛ́, ɛnɛ nyɛ̀ŋɛ̀ wà rɛ̃̀ si nɛ́kpa-Ɔ̀ɖáyé#ɛ́ dzálɛ̀ kpó ńnɛ̀ɛ́.

11 Ó wà ní e wà tse iŋɛ́ yèé ŋa kpó, iŋɛ́ yèé tse#ɛ́, è ma ìwèrè yèé àa wà si#ɛ́. Ìwèrè#ɛ́, ìwèrè-e dzí nórũ yèé è sũ̀ si#ɛ́ ni. Iŋɛ́ yèé tse#ɛ́, ɔdzɔ́ yèé Ɔ̀ɖáyé bòkó wáa gbà wá là dzálɛ̀ kpó#ɛ́, ɔdzɔ́#ɛ́ ti kpɛ́kɛ́ wa si báàyí láre dzɔ̀ɔ́ dzɔ̀ɔ́ ńǹwèrè yèé àa gba Yèésù Kírísítò gbɔ́#ɛ́. 12 Òru òŋu ti tã́ làkóò ń tɛ̀ɛ̀, tsí ilɛ̀ bòkó má. Ńbɛ̀ɛ́, àa kó kɔ iŋɛ́-íbàɖí yèé ŋa à náa tse nóòkùkù#ɛ́ dzɔ̀ɔ́, tsí ká kɛ́ iŋɛ́-ìdzògu yèé ŋa à náa ń dzogu nóòsã́ gãgã#á, tsí ń kɔ́. 13 Ó ɖi, ìlò-wa ŋa kó wà má kíbí ilɛ̀ náa má, tsí ìɖì kíìɖì gbo náa má si kpó#ɛ́. Àa kó máa wà dzɛ̀kũ nàmí ká wà mɔtí ŋɔ́ gbo. Àa kó máa wà tse àlòwá gbo. Àa kó máa dzɛ́ alìlò wérewère ŋa náàrì nɛ́ anɔ́ nódzú gbo. Àa kó máa wà rã́ã̀rã̀ nàmí ká wà dzowú-nɛ gbo. 14 Kà kàa bɛ́ɛ̀, è kɛ́ Yèésù Kírísítò Ɔlá-wa, tsí e ń tse àwù wɔ̀. Tsí kíbí ɔ̀nyà yà gbà#á gbo kó máa gba ìsérè-ŋɛ́ si, tsí e tɔ́ wà tse awù‐ɛ̀ ŋa ró.