Rómà ŋa 12

Ìgbèngbé-olí-Yèésù ŋa nɔ́Ɔ̀ɖáyé sísɛ̃̀

Ìnàbí-mi ŋa, Ɔ̀ɖáyé rí ànyínɔ́ fú wa tó bɛ́ɛ̀ gbà nɔ́ɔ̀nà ŋa ńǹrɔ́ǹrɔ́. Kíbí ó dzɛ́ bɛ́ɛ̀#ɛ́, ǹ wà ɖáàmí le ŋɛ́ ní e mú ara-ŋɛ́ ŋa bɔwɔ́‐ɛ̀, tsí kó dzɛ́ ɛbɔ yèé è wà mú ara-ŋɛ́ náàyɛ̀ náàyɛ̀, tsí wà ń tse fúu#ɛ́. Ɛbɔ#ɛ́ nákó dzɛ́ tɛ̀ɛ̀ dzálɛ̀ kpó, tsí nákó dzɔdzú‐ɛ̀ gbo. Bí è tse bɛ́ɛ̀, nákó dzɛ́ Ɔ̀ɖáyé ní è wà sɛ̃̀ nóòtítɔ́#ɛ́. 2 È máa kɛ́ ìlò-ɔ̀nyà-ayé yèé ŋa. Kà kàa bɛ́ɛ̀, è kɔ ara-ŋɛ́ dzɔ̀ɔ́ fú Ɔ̀ɖáyé, tsí kó tɔ́tse ìsérè-ŋɛ́, tsí kó ɖi titɔ̃, tsí ìtsèntse-ŋɛ́ ŋa kó kpàrɔ̀ kpó. Ńbɛ̀ɛ́, è nákó nyáa wà rí awù-Ɔ̀ɖáyé mà. È nákó ma iŋɛ́ yèé dzɛ́ iŋɛ́-ire#ɛ́ òŋu iŋɛ́ yèé náa dzɔdzú‐ɛ̀#ɛ́ má nára-iŋɛ́ yèé sã̀ dzálɛ̀ kpó#ɛ́.

3 Ɔ̀ɖáyé tse ore-ɔ̀fɛ́‐ɛ̀ fú mi. Ti nára-bɛ́ɛ̀#ɛ́, ǹ wà wò ní ɛ̀ŋɛ kpó, ɔ̀nyà-kã̀ kpókpó kó máa wà rí ara‐ɛ̀ kadzá. Kà kàa bɛ́ɛ̀, ìsérè-ŋɛ́ ŋa tsítse kó wà ɖé bá ti ɔ̀nyà. Ó ɖi, kíbí à náa kpurã iŋɛ́ fúnɛ bɛ́#ɛ́, bɛ́ɛ̀ ní Ɔ̀ɖáyé fú kṹnukṹ òŋu tɛ̀ɛ̀ ńkpá ti nára-ká nɛ́ àkaralé si ńǹtá-Yèésù Kírísítò#ɛ́. 4 Àwa kpó, ara ɔ̀kã̀ntso ní wà fú wa#á. Ó ɖi, ara#á kpɛ̃́ ńǹɖì ńǹɖì, tsí ìɖì kã̀kã̀ yèé ŋa wà nára#á, kṹnukṹ náa wà tsitsɛ́‐ɛ̀ ńǹrɔ́ tɛ̀ɛ̀. 5 Bɛ́ɛ̀ ké ní ó wà fú àwa olí-Yèésù ŋa gbo#ɛ́. Àa kpɔ̀ gbɛ̃̀ɛ̃̀. Ó ɖi, kíbí Kírísítò tse ɔ̀kã̀ntso bá wa si#ɛ́, àwa kpó, àa wà kíbí ɔ̀nyà ɔ̀kã̀ntso bɛ́, tsí àa wɔ̀ má ara-wa ŋa si kíbí ìɖì kã̀kã̀-ara gbo náa wɔ̀ má si#ɛ́ ni. 6 Ó ɖi, Ɔ̀ɖáyé fú wa ńkpá ŋa ńǹrɔ́ǹrɔ́ ní ká ń tsitsɛ́ ńǹmarũ-ore-ɔ̀fɛ́ yèé ó fú kṹnukṹ#ɛ́. Ńbɛ̀ɛ́, bí ó fú ɔ̀nyà-kã̀ ní kó dzɛ́ agbáfɔ̀-Ɔ̀ɖáyé fɔ̀†, ɛnɛ nyɛ̀ŋɛ̀ kó tsitsɛ́#ɛ́ òŋu àkaralé ìmarũ yèé wà fúu#ɛ́. 7 Bí ó fú ɔ̀nyà-kã̀ gbo ní kó wà tsitsɛ́-ìrɔ́-kã̀, ɛnɛ nyɛ̀ŋɛ̀ gbo kó wà ńtsɛ́‐ɛ̀ tsítse si. Bí ó fú ɔ̀nyà-kã̀ gbo ní kó dzɛ́ akɔ́nɛ, òŋu gbo kó múgírí bá itsɛ́-akɔ́nɛ#ɛ́. 8 Bí ó fú ɔ̀nyà-kã̀ gbo ní kó wà ɖáàmí lenɛ, òŋu gbo kó múgírí bá itsɛ́#ɛ́. Bí ó fú ɔ̀nyà-kã̀ gbo ní kó wà tse ore fúnɛ, òŋu gbo kó múgírí, tsí wà tseé náàrìmáa nyí wò. Bí ó fú ɔ̀nyà-kã̀ gbo ní kó dzɛ́ onùgbó-ɛgbɛ́, ara kó wà yá ɛnɛ nyɛ̀ŋɛ̀ gbo ńtsɛ́#ɛ́ tsítse. Bí ó fú ɔ̀nyà-kã̀ gbo ní kó wà mɔ́wɔ́ gbè fú olákèmà ŋa, òŋu gbo kó wà tseé òŋu ayè títɛ́.

9 Ó ɖi, ńǹrɔ́-kíbí è nákó wà nɛ́ àmúɖɔ̃̀ fúnɛ gbà#á, kó máa dzɛ́ ńǹyɛ̀ ńǹyɛ̀. È nya iŋɛ́-íbàɖí tsítse ɔ̀kã̀lɔ́ɔ̀kã̀ kpó kãdzú. Ó ɖi, è náa tamá-iŋɛ́-ire ɔ̀kã̀lɔ́ɔ̀kã̀ kpó òŋu tsítse si làkóò gé. 10 È náa wà nɛ́ àmúɖɔ̃̀ fú ara-ŋɛ́ ŋa gbo kíbí ìnàbí ŋa náa nɛ́ àmúɖɔ̃̀ fú ara-ŋa gbà#á. È náa wà tsúwádzú, tsí wà bu ìɖì si fú ara-ŋɛ́ ŋa gbo. 11 Ńnɔ́-itsɛ́ yèé è wà tse fú Ɔlá-wa#á, è máa tsɔ̀gɛ̃. Kà kàa bɛ́ɛ̀, è múgírí, tsí ara-ŋɛ́ kó gboná si ńtsɛ́#ɛ́ tsítse. 12 Ayè gbo kó wà tɛ́ ŋɛ́ nára-kíbí è módzú si nɔ́ɔ̀nà si fú Ɔ̀ɖáyé si#ɛ́. Bí ìkparà-kã̀ gbo wá ńǹtá-ŋɛ́, è náa gbódzú, tsí e tɔ́wɔ́ gbàá. È náa wà ńǹre wúwú gbo si fú Ɔ̀ɖáyé ńǹwèrè ɔ̀kã̀lɔ́ɔ̀kã̀. 13 Bí iŋɛ́-kã̀ gbo wà hã́ ɛnɛ yèé ŋa dzɛ́ ti Ɔ̀ɖáyé#ɛ́, è náa wà mɔ́wɔ́ gbè fú ŋa. È máa dzɛ́ ńǹɖì-àledzò gbo gbígbà.

14 Bí ɔ̀nyà ŋa wà tsoró bá ŋɛ́, ɛ̀ŋɛ òŋu, è náa bere kùsɛ̀ɛ̀-Ɔ̀ɖáyé fú ŋa. Kà kàa e ré fú ŋa#á, è náa bere kùsɛ̀ɛ̀-Ɔ̀ɖáyé fú ŋa. 15 Bí ɔ̀nyà-kã̀ wà náyè títɛ́ si, ɛ̀ŋɛ gbo, è náa wà táyè báa. Bí ɔ̀nyà-kã̀ gbo wà sɔkṹ, ɛ̀ŋɛ gbo, è náa sɔkṹ báa. 16 Ǹ ní fòò ǹ ní ɛ̃ɛ̃ kó wà náàŋírĩ-ɛ̀ŋɛ kpó. Kó máa wà nódzú-ŋɛ́ ní itsɛ́ kã̀ŋa tsítse kò dzɔ ŋɛ́. Kà kàa bɛ́ɛ̀, è dzɛ́, tsí e wà tsitsɛ́ ɔ̀kã̀lɔ́ɔ̀kã̀. Tsí kó máa wà nódzú-ŋɛ́ gbo kíbí ɛnɛ yèé fɔ̀ ní ɔ̀nyà-kã̀ kò màá tó ŋɛ́.

17 È máa tse íbàɖí si ńǹɖì-íbàɖí. Kà kàa bɛ́ɛ̀, ire tsítse kó kpã́ ŋɛ́ nódzú si nódzú-ɔ̀nyà kpó. 18 Kíbí nákó bèrè ní e tse gbà gé#ɛ́, è tsikpá ɔ̀kã̀lɔ́ɔ̀kã̀ kpó, tsí e wà ɖɔ̃̀ bá ɔ̀nyà kpó. 19 Àrínódzú-mi ŋa, ɛ̀ŋɛ ká-ŋɛ́ è máa wò ní àŋa kó wà tse àtsesã. Kà kàa bɛ́ɛ̀, è kɔ Ɔ̀ɖáyé dzɔ̀ɔ́, tsí òŋu ká‐ɛ̀ kó wà nya inɔ́ bíbí‐ɛ̀ ɖíre fúnɛ. À ti kɔɔ́ si ńǸwé-Ɔ̀ɖáyé† si ní: “Èmi ní náa tse àtsesã fúnɛ#ɛ́. Èmi ní náa sã ɛŋɛ̀ fú kṹnukṹ òŋu tɛ̀ɛ̀ fú iŋɛ́ yèé ó tse#ɛ́. Èmi, Ɔlɔ́dzɔ́ ní fɔ̀ɔ́#ɛ́.”^* 20 Ó ɖi, à ti kɔɔ́ si ní:

“Bí ebi wà kpa ɔ̀tɛ̀-ɛ̀ɛ, ìwɔ òŋu nàa fúu ńdzídzɛ, tsí kó dzɛ.

Bí àŋgbɛ̃ wà gbɛ̃ɛ̃́, nà fúu nómi, tsí kó mɔ.

Bí ò wà tse fúu bɛ́ɛ̀#ɛ́, ó wà kíbí ìyɛná kɛ̀wùù

ní ò wà kó ɖà néwo‐ɛ̀#ɛ́.”^*

21 Mú ire tsítse, tsí ń dzàdzàbɔ́-íbàɖí yèé à tse báɛ#ɛ́.