Rómà ŋa 11

Ɔ̀ɖáyé kò kɔ ɔma-Ìsàràyɛ́lì ŋa

Ǹ bòkó tɔ́ bere afɔ̀-kã̀ ró. Kíbí iŋɛ́ ŋa#á wà bɛ́ɛ̀#ɛ́ fee, ó wà dzɛ́ ní Ɔ̀ɖáyé kɔ ɔma-Ìsàràyɛ́lì† ŋa ńnɛ̀ɛ́ɛ̀? Láyé! Kò kɔ̀ ŋá. Ǹ fɔ̀ bɛ́ɛ̀, iŋɛ́ yèé tse#ɛ́, ɔma-ìlú-Ìsàràyɛ́lì bíbí ké ní èmi gbo, ǹ dzɛ́#ɛ́, tsí ǹ dzɛ́ ɔmalɔ́ma-Àbàràhámì†, tsí ǹ ti náro-Bɛ̃̀dzàmɛ́nì†. 2 Ɔ̀ɖáyé kò kɔ̀ ŋá. Ó ti tsã̀ ŋá si tsúwádzú ní ká dzɛ́ tòŋu. È kè tédzú afɔ̀ yèé à kɔ si ńǸwé-Ɔ̀ɖáyé† ti nára-Èlíyà† agbáfɔ̀-Ɔ̀ɖáyé fɔ̀†#ɛ́ niì? À ní Èlíyà wà bá ɔma-Ìsàràyɛ́lì ŋa fɔ̀ fú Ɔ̀ɖáyé ní: 3 “Ɔlɔ́dzɔ́, rí kíbí à kpa agbáfɔ̀-ɛ̀ɛ fɔ̀ ŋa nóòkú, tsí fɔ́ ìdzɛ̀bɔ-ɛ̀ɛ ŋa gbo gé. Èmi níìkã̀ntso gé ní bɔ̀ si báàyí#ɛ́. Tsí à wà wo ká kpa èmi gbo nóòkú.”^* 4 Ó ɖi, è gbɔ́ kíbí Ɔ̀ɖáyé dzɔ́ŋù fúu gbà#á nɔ̀. Ó ní: “Ɔnɔkɛ̃̀ɛ̃ ɛgbɛ̀rú ɛgbɛ̀rú ɔ̀nà méedze (7000) ní bɔ̀ si, tsí dzɛ́ tèmi si#ɛ́. Àŋa òŋu, à kò kálɛ̀, tsí sɛ̃ Bàálì.”^* 5 Bɛ́ɛ̀ ké ní ó wà si ńǹwèrè yèé àa wà si báàyí gbo#ɛ́. Ɔ̀nyà ìmarũ-kã̀ tɔ́ bɔ̀ si náàŋírĩ-ɔma-Ìsàràyɛ́lì ŋa si ró, tsí Ɔ̀ɖáyé gbà ńǹtá-ore-ɔ̀fɛ́‐ɛ̀, tsí tsã̀ ŋá si. 6 Kíbí ó dzɛ́ ní Ɔ̀ɖáyé gbà ńǹtá-ore-ɔ̀fɛ́‐ɛ̀, tsí tsã̀ ŋá#á, ó wà nyà ɖíre ní Ɔ̀ɖáyé kò tse àtsùgbé-iŋɛ́ yèé à tse ŋa#á tã́ná ó tsã̀ ŋá. Ó ɖi, ó má dzɛ́ bɛ́ɛ̀ ní ó dzɛ́#ɛ́, ni kò tsi afɔ̀-ore-ɔ̀fɛ́-Ɔ̀ɖáyé ró ńnɛ̀ɛ́.

7 Òkpì-afɔ̀ yèé ǹ wà fɔ̀#ɛ́ fáà? Òŋu ní wà dzɛ́ ní fee, iŋɛ́ yèé ɔma-ìlú-Ìsàràyɛ́lì ŋa wà wò#ɛ́, à kò ríi. Ó ɖi, ɔ̀nyà ìmarũ-kã̀ yèé Ɔ̀ɖáyé tsã̀ náàŋírĩ-ŋa si#ɛ́, àŋa òŋu, à ríi. Ɛnɛ-àtíbɔ̀ ŋa#á, Ɔ̀ɖáyé tse tsí ɛ̀ɖɔ̃̀ kã̀ ŋá si gé ni. 8 À ti kɔɔ́ si ńǸwé-Ɔ̀ɖáyé si ní:

“Títí wáa fú nɔ́mbɛ́ báàyí#ɛ́,

Ɔ̀ɖáyé tse tsí ifɛ̀ɛ́nɔ́ tã́ ɖí ŋa kpó.

Odzú wà fú ŋa. Ó ɖi, à kò wà rírã.

Etí gbo wà fú ŋa. Ó ɖi, à kò wà gbɔ̃́ɔ̃̀rã̀.”^*

9 Ɖàfíɖì† gbo ti wíìnyɛ̀-kã̀ si bɛ́ɛ̀ ní:

“Dzídzɛ-ɔɖɔ̃́ yèé ŋa à náa wà dzɛ#ɛ́ kó ɖi fɛ́tsa,

tsí ré kpa ŋá, tsí ɖi iwúrɛ́, tsí mú ŋa.

Dzídzɛ#ɛ́ kó ɖi òkúta-àkɔ̀sɛ̀ gbo, tsí mú ŋa tsubú,

tsí Ɔ̀ɖáyé kó fɛtí fú ŋa dzì ńǹɖì‐ɛ̀.

10 Ɔ̀ɖáyé kó sirì bo odzú-ŋa, tsí ká máa nyáa rírã ró.

Kó tse tsí ìréré gbo kó bá ŋa, tsí tó ŋa si ńǹwèrè ɔ̀kã̀lɔ́ɔ̀kã̀.”^*

11 N tɔ́ bere afɔ̀-kã̀ ró. Kíbí ɔma-Ìsàràyɛ́lì ŋa kɔ ɛsɛ̀#ɛ́ fee, à kɔ ɛsɛ̀, tsí tsubú, tsí ká máa ǹɖe ró niì? Láyé! Kò tsi bɛ́ɛ̀ ni. Ó ɖi, kíbí à dzàbi-Ɔ̀ɖáyé#ɛ́ ní tse tsí ɔ̀nà tsí, tsí Ɔ̀ɖáyé gba ɛnɛ yèé kò dzɛ́ ɔma-Ìsàràyɛ́lì ŋa#á là, àtsùgbée kó ɖi owú dzídzɛ fú ɔma-Ìsàràyɛ́lì ŋa ńǹkɛ̀ɛ́#ɛ́. 12 Ɔma-Ìsàràyɛ́lì ŋa#á dzàbi-Ɔ̀ɖáyé, tsí ó fa kùsɛ̀ɛ̀ wá fú ayé gbaŋgba#á. À kí ńnɛ̀, tsí ó fa kùsɛ̀ɛ̀ wá fú ɛnɛ yèé kò dzɛ́ ɔma-Ìsàràyɛ́lì ŋa#á. Bí à ɖáàwɔ́ nyí sɛ̃̀ wá ńɖi-Ɔ̀ɖáyé ńǹkɛ̀ɛ́#ɛ́, nákó tu kùsɛ̀ɛ̀ kpíkpɔ̀ kpíkpɔ̀ fú ɔ̀nyà kpó lárè ró.

Ɔ̀ɖáyé wáa gba ɛnɛ yèé kò dzɛ́ ɔma-Ìsàràyɛ́lì ŋa#á gbo là

13 Báàyí#ɛ́, ɛ̀ŋɛ yèé kò dzɛ́ ɔma-Ìsàràyɛ́lì† ŋa#á, è rɛ̃tígbè. Adzítsɛ́-Yèésù† ní ǹ dzɛ́#ɛ́, tsí ɛ̀ŋɛ ní Ɔ̀ɖáyé bɛ̀ mí ńtsɛ́ fú#ɛ́. Ńbɛ̀ɛ́, ayè wà tɛ́ mi tó bɛ́ɛ̀ fú itsɛ́ yèé Ɔ̀ɖáyé ɖá fú mi#ɛ́. 14 Ǹ wà tsitsɛ́#ɛ́ làkóò, tsí ǹ módzú si ní nákó tse tsí ɛnɛ yèé ŋa àa dzɔ́ ti náàmbara ɔ̀kã̀ntso#ɛ́, ká dzowú, tsí Ɔ̀ɖáyé kó gba ɔ̀nyà kã̀ŋa là náàŋírĩ-ŋa. 15 Ó ɖi fee, ńǹwèrè yèé Ɔ̀ɖáyé kɛ́ ŋa sɔ nákpálà-kã̀ si#ɛ́, ní ó tɔ́tse àŋírĩ-òŋu ɔ̀nyà ŋa náyé gbaŋgba#á. Tsí bí ó ɖáàwɔ́ sɛ̃̀ wáa gbà ŋá#á, nákó wà kíbí à náa dzínɛ ti náàŋírĩ-òkú ŋa wá náyé#ɛ́ bɛ́ ni. 16 Ó ɖi, bí èkèlè-àtsɛ̃̀tsɛ̃̀-dzídzɛ-kã̀ dzɛ́ ti Ɔ̀ɖáyé#ɛ́, dzídzɛ#ɛ́ kpó, dzɛ́ tɛ̀ɛ̀ ké ni. Bí ogùgù-egi-kã̀ gbo dzɛ́ ti Ɔ̀ɖáyé#ɛ́, akpá‐ɛ̀ ŋa gbo dzɛ́ tɛ̀ɛ̀ ké ni.

17 Ɔma-Ìsàràyɛ́lì ŋa#á, à wà kíbí egi-òlífì†-ilé bɛ́, tsí à rɛ́ akpá‐ɛ̀ kã̀ŋa ǹɖe. Ó ɖi, ìwɔ òŋu, ò wà kíbí akpá-egi-òlífì-kóko, tsí à rɛ́ɛ ǹɖe, tsí wáa ń tamá si ńǹɖì-akpá-òlífì-ilé yèé ŋa à rɛ́ ǹɖe#ɛ́. Báàyí#ɛ́, ìwɔ gbo, ò wà gba omi-egi-òlífì-ilé#ɛ́ ti ńɖi-ogùgù‐ɛ̀ ŋa. 18 Kíbí ó dzɛ́ bɛ́ɛ̀#ɛ́, máa mú akpá-egi-òlífì-ilé yèé à rɛ́ ǹɖe ŋa#á, tsí wà ń kpe kí ŋa ńnɛ̀ɛ́. Kó yéɛ si ní fee, ìwɔ òŋu, ò dzɛ́ akpá-egi#ɛ́ gé ni. Kò tsi ìwɔ ní dzɛ́ ogùgù‐ɛ̀, tsí gbàá ɖóro si#ɛ́. Kà kàa bɛ́ɛ̀, ogùgù#ɛ́ ní gbàɛ́ ɖóro si#ɛ́.

19 Bóyá nàa wà fɔ̀ ní: Ɔ̀ɖáyé rɛ́ akpá-egi-òlífì-ilé ŋa#á ǹɖe, àtsùgbée kó mú òŋu yèé dzɛ́ akpá-egi-òlífì-kóko#ɛ́, tsí ń tamá si ńǹɖì-ŋa ni. 20 Bí ò fɔ̀ bɛ́ɛ̀, ò kò fɔ̀ sé. Ɔma-Ìsàràyɛ́lì yèé ŋa dzɛ́ akpá-egi-òlífì-ilé#ɛ́, Ɔ̀ɖáyé rɛ́ ŋa ǹɖe náàtsùgbée kíbí à kò nɛ́ àkaralé si ńǹtá-Yèésù Kírísítò#ɛ́. Ó ɖi ìwɔ òŋu, ò dzokó si rìgírìgí, àtsùgbé-àkaralé yèé ò nɛ́ si ńǹtá‐ɛ̀#ɛ́ ni. Kíbí ó dzɛ́ bɛ́ɛ̀#ɛ́, máa tse tsí ara-nɛ kíkɛ́ kó wɔ̀ ńǹsérè-ɛ̀ɛ. Kà kàa bɛ́ɛ̀, rí Ɔ̀ɖáyé sá. 21 Ǹ fɔ̀ bɛ́ɛ̀, iŋɛ́ yèé tse#ɛ́, ɔma-Ìsàràyɛ́lì ŋa, àŋa yèé gìɖì dzɛ́ akpá-egi-òlífì-ilé#ɛ́, Ɔ̀ɖáyé kò rí ànyínɔ́ fú ŋa. Ìwɔ gbo tsɔ́ éwo-ara-ɛ̀ɛ, bí kò tsi bɛ́ɛ̀, Ɔ̀ɖáyé kàkó rí ànyínɔ́ fɛ́ɛ. 22 Rí gé! Ɔ̀ɖáyé fee, abinɔ́ tútù ní ó dzɛ́#ɛ́. Ó ɖi, náa sì tseé si ńnɛ̀ fúnɛ gbo tó bɛ́ɛ̀. Ó tseé si ńnɛ̀ fú ɛnɛ yèé ŋa kɔ ɛsɛ̀, tsí tsubú#ɛ́, tsí ó dzɛ́ abinɔ́ tútù fú ìwɔ òŋu. Ó ɖi, ó wà ní o tse tsí kó dzɛ́ abinɔ́ tútù#ɛ́ si fɛ́ɛ làkóò làkóò gé. Bí kò tsi bɛ́ɛ̀, nákó rɛ́ ìwɔ gbo ǹɖe kíbí akpá-egi-òlífì-ilé#ɛ́ bɛ́ ni. 23 Ó ɖi, bí ó dzɛ́ ní ɔma-Ìsàràyɛ́lì ŋa#á gbo wáa nyí, tsí mú àkaralé-ŋa si ńǹtá-Yèésù Kírísítò nɔ́dzɔ́-kã̀, Ɔ̀ɖáyé nɛ́kpá, tsí nákó nyáa sɛ̃̀ sɛ̃̀ ŋá si ńǹɖì-ŋà ŋa. 24 Ìwɔ òŋu, ò dzɛ́ akpá yèé Ɔ̀ɖáyé rɛ́ ǹɖe nára-egi-kóko#ɛ́, tsí wáa ń tamá-egi-ilé#ɛ́ ni. Kò tsi bɛ́ɛ̀ ní náa sì lɔ#ɛ́. Ó ɖi, ɔma-Ìsàràyɛ́lì ŋa òŋu, àŋa gìɖì ní dzɛ́ akpá-egi-ilé#ɛ́. Ɔ̀ɖáyé kó kɛ́ àŋa gbo sɛ̃̀ wáa tamá si ńǹɖì-ŋà ŋa#á, kò tì le fúu gìɖì.

Ɔ̀ɖáyé nákó gba ɔma-Ìsàràyɛ́lì ŋa là

25 Ìnàbí-mi ŋa, ǹ wò ní n nya ètò yèé Ɔ̀ɖáyé tse ɖúkù si#ɛ́ ɖíre fú ŋɛ́, àtsùgbée e máa wà fɔ̀ ní ɔ̀nyà-kã̀ kò màá tó àŋa. Ètò#ɛ́ ní wà dzɛ́ ní ɔ̀nyà kã̀ŋa náàŋírĩ-ɔma-Ìsàràyɛ́lì† ŋa#á, ɛ̀ɖɔ̃̀ kã̀ ŋá si, tsí à kɔ̀ ní àŋa kàkó nɛ́ àkaralé si ńǹtá-Yèésù Kírísítò. À nákó wà bɛ́ɛ̀ si títí wáa fú ìwèrè-oɖé-kã̀. Ńǹwèrè nyɛ̀ŋɛ̀#ɛ́, ɔ̀nyà ìmarũ yèé Ɔ̀ɖáyé tsã̀ si náàŋírĩ-ɛnɛ yèé kò dzɛ́ ɔma-Ìsàràyɛ́lì ŋa#á, à nákó tó. 26 Ńbɛ̀ɛ́, Ɔ̀ɖáyé nákó gba ìlú-Ìsàràyɛ́lì#ɛ́ kpó là. À ti kɔɔ́ si ńǸwé-Ɔ̀ɖáyé si ní:

“Ɛnɛ yèé bòkó wáa gbà ŋá dzɔ̀ɔ́#ɛ́,

ńǹlú-Yèrúsàlɛ́mì^* ní nákó ti, tsí wá#á.

Nákó wáa nya ǹ tó fú ara-mi yèé wà fú

ɔmalɔ́ma-Yàkúbù† ŋa#á ǹɖe.

27 Tsí nákó dzɛ́ ìmɔ̀lɛ̀ náàŋírĩ-èmi-ŋa méèdzì

ńǹwèrè yèé màa wɛ àbi-ŋà ŋa ǹɖe kpó#ɛ́.”^*

28 Ó ɖi, kíbí ɔma-Ìsàràyɛ́lì ŋa kɔ̀ ní àŋa kàkó gba ikɔ̀ ɖíɖɔ̃̀ ti nára-Yèésù Kírísítò gbɔ́#ɛ́, à ɖi ɔ̀tɛ̀-Ɔ̀ɖáyé. Ó lɔ bɛ́ɛ̀, àtsùgbée ɛ̀ŋɛ yèé kò dzɛ́ ɔma-Ìsàràyɛ́lì ŋa#á, Ɔ̀ɖáyé kó gbà ŋɛ́ là ni. Ó ɖi, ti nára-kíbí Ɔ̀ɖáyé ti tsã̀ ŋá si òŋu#ɛ́, à dzɛ́ àrínódzú‐ɛ̀ ŋa si, àtsùgbé-àlé yèé ŋa ó ti ta si fú gbágbóǹgbàgbò-ŋà ŋa#á. 29 Fee, bí Ɔ̀ɖáyé fɛ́ɛ ńŋɛ́-kã̀, ó fɛ́ɛ ni. Kà sɛ̃̀ gbàá ró. Bí ó kpèɛ́ ní ìwɔ kó dzɛ́ tòŋu gbo, ó kpèɛ́ ni. Kò nɛ́ ní bɛ́ ní ró. 30 Dzɔ̀ɔ́ dzɔ̀ɔ́#ɛ́, ɛ̀ŋɛ yèé kò dzɛ́ ɔma-Ìsàràyɛ́lì ŋa#á, è kè rɛ̃tígbè-Ɔ̀ɖáyé. Ó ɖi báàyí#ɛ́, Ɔ̀ɖáyé rí ànyínɔ́ fú ŋɛ́, iŋɛ́ yèé tse#ɛ́, ɔma-Ìsàràyɛ́lì ŋa kò gbɔ̃́ɔ̃̀rã̀ fúu. 31 Bɛ́ɛ̀ ké ní ó lɔ fú ɔma-Ìsàràyɛ́lì ŋa gbo#ɛ́. Báàyí#ɛ́, àŋa gbo, à kò gbɔ̃́ɔ̃̀rã̀ fú Ɔ̀ɖáyé, tsí ó tse tsí Ɔ̀ɖáyé rí ànyínɔ́ fú ɛ̀ŋɛ òŋu. Ó ɖi, ó lɔ bɛ́ɛ̀ fú àŋa gbo, àtsùgbée Ɔ̀ɖáyé kó rí ànyínɔ́ fú ŋa bɛ́ɛ̀ ké ni. 32 Ó ɖi, Ɔ̀ɖáyé tse tsí ɔ̀nyà ŋa kpó wà kíbí abèŋà ŋa si bɛ́, iŋɛ́ yèé tse#ɛ́, à kɔ̀ ní àŋa kàkó rɛ̃tígbè‐ɛ̀. Ó sì lɔ bɛ́ɛ̀, àtsùgbée kó rí ànyínɔ́ fú ŋa kpó ni.

Ká nyɛ Ɔ̀ɖáyé

33 Ɛ̃ɛ̃! Ɔ̀ɖáyé lákṹ ìɖéǹɖè. Ifɛ̀ɛ́nɔ́‐ɛ̀ gbo, iŋɛ́ mímà-ɛ̀ gbo, à kpɔ̀ tó bɛ́ɛ̀. Iŋɛ́ yèé náa ɖé fúu, tsí náa tse#ɛ́, nɛ̀ɛ́ tútú nákó nyáa gbɔ́ òkpì‐ɛ̀? Ètò‐ɛ̀ yèé náa tse ŋa#á, ɔ̀nyà-kã̀ kpókpó kà màá. 34 À ti kɔɔ́ si ńǸwé-Ɔ̀ɖáyé si ní:

“Nɛ̀ɛ́ wà, tsí kó nyáa ma ìsérè-Ɔlɔ́dzɔ́?

Nɛ̀ɛ́ nákó nyáa fɔ̀ ní òŋu tó bɛ́ɛ̀ títí kó nyáa fúu ńfɛ̀ɛ́nɔ́?

Ɔlá‐ɛ̀ kò wà.”^*

35 “Nàmí nɛ̀ɛ́ tsɛ̃̀tsɛ̃̀ fú Ɔ̀ɖáyé ńŋɛ́-kã̀ wòrí, tsí kó ɖi ɛŋɛ̀,

tsí Ɔ̀ɖáyé kó wáa sãã́ si ńǹɖì‐ɛ̀ fúu ni?”^*

36 Iŋɛ́ yèé tse#ɛ́, òŋu ní ɖá iŋɛ́ ɔ̀kã̀lɔ́ɔ̀kã̀ kpó#ɛ́. Òŋu ké ní gba iŋɛ́ ɔ̀kã̀lɔ́ɔ̀kã̀ gbo kpó ɖóro si#ɛ́. Tsí iŋɛ́ ŋa#á gbo kpó#ɛ́, òŋu ké ní à wà si fú#ɛ́. Ká wà nyɛ̀ɛ́ títí lɔ náàrìtã́. Ɛ̀tsɛ!