Rómà ŋa 15

Àa kó dzɛ́, tsí wà gba ara-wa ŋa

Fee, àwa yèé ŋa àkaralé-wa ta ogùgù múlɛ̀ kpó kpãŋu#ɛ́, àa kó wà gbódzú, tsí wà gba ɛnɛ yèé ŋa àkaralé-ŋa kò ta ogùgù múlɛ̀ rere#ɛ́. Kò wà ní àa kó wà tse iŋɛ́ yèé ŋa náa dzɔdzú-àwa ká-wa sɔ̃́ŋú#ɛ́ gé. 2 Náàŋírĩ-àwa kpó#ɛ́, ó wà ní kṹnukṹ kó wà tse iŋɛ́ yèé nákó dzɔdzú-enìkéèdzì‐ɛ̀#ɛ́, tsí kó wà mɔ́wɔ́ gbè fúu nɔ́ɔ̀nà-ire#ɛ́. Ńbɛ̀ɛ́, àkaralé‐ɛ̀ nákó wà wɔlɛ̀ rere máa. 3 Ǹ fɔ̀ bɛ́ɛ̀, iŋɛ́ yèé tse#ɛ́, Kírísítò kò wò ní òŋu kó tse iŋɛ́ yèé dzɔdzú-òŋu ká‐ɛ̀#ɛ́. Ti nára-bɛ́ɛ̀#ɛ́, à ti kɔ afɔ̀-kã̀ ti nára‐ɛ̀ si ńǸwé-Ɔ̀ɖáyé† si ní: “Ɔ̀ɖáyé, èkpè yèé ɔ̀nyà ŋa wà búɛ#ɛ́, ó kpɛ́tɛ èmi gbo.”^* 4 Ó ɖi, iŋɛ́ ɔ̀kã̀lɔ́ɔ̀kã̀ kpó yèé à ti kɔ si dzɔ̀ɔ́ dzɔ̀ɔ́ ńǸwé-Ɔ̀ɖáyé#ɛ́, à kɔ ŋá si, àtsùgbée àa kó kɔ́ iŋɛ́ ńnɔ́‐ɛ̀ ni. Afɔ̀ ŋa#á náa tse tsí àa náa gbódzú si, tsí náa wà ɖáàmí le wá gbo, tsí odzú-wa gbo náa wà nɔ́ɔ̀nà si fú Ɔ̀ɖáyé.

5 Ɔ̀ɖáyé, ɛnɛ yèé náa tse tsí ɔ̀nyà náa nyáa gbódzú si, tsí náa wà ɖáàmí leé gbo#ɛ́, kó tse tsí ìsérè-ŋɛ́ ŋa kó wà tse ɔ̀kã̀ntso, tsí e kɛ́ ɔwɔ́-Yèésù Kírísítò ńǹrɔ́-kíbí ó gbé gbà#á. 6 Bí è wà tse bɛ́ɛ̀, nákó tse tsí ìsérè-ŋɛ́ ŋa nákó tse ɔ̀kã̀ntso, tsí arũ-ŋɛ́ gbo nákó ɖé, tsí è nákó wà ń nyɛ Ɔ̀ɖáyé, ɛnɛ yèé dzɛ́ Boba-Yèésù Kírísítò Ɔlá-wa#á.

7 È náa wà gba ara-ŋɛ́ ŋa rere ńǹrɔ́-kíbí Kírísítò gbo gbà ŋɛ́ gbà#á. Òŋu ní nákó tse tsí ɔ̀nyà ŋa nákó wà nyɛ Ɔ̀ɖáyé#ɛ́. 8 Ó ɖi, ǹ wà fɔ̀ fú ŋɛ́ ní fee, Kírísítò wáa ɖi àtsìtsɛ́ fú àwa ɔma-Ìyúɖà† ŋa, tsí ó tse tsí Ɔ̀ɖáyé sã àlé yèé ŋa ó ta si fú gbágbóǹgbàgbò-wa ŋa#á. Ńbɛ̀ɛ́, ó wà nyà ɖíre ní àkaralé wà ńǹtá-Ɔ̀ɖáyé. 9 Ó tse gbo, tsí ɛnɛ yèé kò dzɛ́ ɔma-Ìyúɖà ŋa#á gbo ká wà nyɛ Ɔ̀ɖáyé, iŋɛ́ yèé tse#ɛ́, náa rí ànyínɔ́ fú ŋa. À ti kɔɔ́ si ńǸwé-Ɔ̀ɖáyé si ní:

“Náàtsùgbée bɛ́ɛ̀ ní màa wà nyɛ̀ɛ́ náàŋírĩ-ɔ̀nyà-ìlú-àledzò ŋa#á.

Màa kɔ̃rĩ, tsí wà ń nyɛ̀ɛ́.”^*

10 À kɔ si ńǸwé-Ɔ̀ɖáyé#ɛ́ ró ní:

“Ɛ̀ŋɛ, ɔ̀nyà-ìlú-àledzò ŋa, ayè kó wà tɛ́ ŋɛ́

bá ìlú yèé Ɔ̀ɖáyé tsã̀ ní kó dzɛ́ tòŋu#ɛ́.”^*

11 À tɔ́ kɔ si ńǸwé-Ɔ̀ɖáyé#ɛ́ ró ní:

“Ɛ̀ŋɛ, ɔ̀nyà-ìlú-àledzò ŋa kpó, è nyɛ Ɔlɔ́dzɔ́.

Ɔ̀nyà-ìlú ɔ̀kã̀lɔ́ɔ̀kã̀ kpó kó wà kɔ̃rĩ, tsí wà nyɛ̀ɛ́.”^*

12 Yèsáyà† gbo wíìnyɛ̀-kã̀ si ní:

“Ɔmalɔ́ma-Yèsé-kã̀ bòkó wáa wá,

tsí ɔmalɔ́ma#á nákó ǹɖe,

tsí wà dzoyè si ńǹtá-ɔ̀nyà-ìlú-àledzò ŋa.

Tsí à nákó mú àkaralé-ŋa si ńǹtá‐ɛ̀ si.”^*

13 Ɔ̀ɖáyé, ɛnɛ yèé náa tse tsí ɔ̀nyà náa módzú si nɔ́ɔ̀nà si fúu#ɛ́, kó tse tsí ayè kó wà tɛ́ ŋɛ́ dzálɛ̀, tsí e wà ɖɔ̃̀ gbo àtsùgbé-àkaralé yèé è nɛ́ si ńǹtá‐ɛ̀ si#ɛ́. Ńbɛ̀ɛ́, ikpá-Mímí‐ɛ̀ nákó tse tsí odzú-ŋɛ́ kó wà nɔ́ɔ̀nà si fúu làkóò làkóò gé.

Kpɔ́lù dzɛ́ adzítsɛ́-Yèésù fú ɛnɛ yèé kò dzɛ́ ɔma-Ìyúɖà ŋa#á

14 Ìnàbí-mi ŋa, èmi òŋu, ó tã́ ńnɔ́-mi si kpó, tsí ǹ mà rere ní ìsérè-ká tse iŋɛ́-ire wà fú ŋɛ́ tó bɛ́ɛ̀. Tsí è ma iŋɛ́ kpíkpɔ̀ gbo, tsí è nákó nyáa wà fú ara-ŋɛ́ ŋa gbo ńfɛ̀ɛ́nɔ́. 15 Ó ɖi, ńǹɖì kã̀ŋa ńǹwé yèé ǹ wà kɔ fú ŋɛ́#ɛ́, ǹ le oŋù si ńǹtá-ɛ̀kɔ́ ìkùbɔ̀ ŋa tó bɛ́ɛ̀. Ǹ tse bɛ́ɛ̀, tsí n sɛ̃̀ tédzú ɛ̀kɔ́ yèé è ti gbà wáa lɔ ŋa#á fú ŋɛ́ ró ni. Ǹ kɔɔ́ fú ŋɛ́ bɛ́ɛ̀, àtsùgbé-ore-ɔ̀fɛ́ yèé Ɔ̀ɖáyé tse fú mi 16 ní èmi kó ɖi àtsìtsɛ́-Yèésù Kírísítò, tsí n wà tsitsɛ́ náàŋírĩ-ɛnɛ yèé kò dzɛ́ ɔma-Ìyúɖà ŋa#á ni. Kíbí náa tsã atsɛbɔ‐ɛ̀ gbà#á, bɛ́ɛ̀ ní ó tsã̀ mí#ɛ́, ní n wà dzíkɔ̀ ɖíɖɔ̃̀ yèé wà ti ńɖɔ̀‐ɛ̀#ɛ́ fúnɛ, àtsùgbée ɛnɛ yèé kò dzɛ́ ɔma-Ìyúɖà ŋa#á ká dzɔdzú‐ɛ̀ kíbí ɛbɔ yèé à tse fúu#ɛ́ bɛ́, tsí Mímí‐ɛ̀ tse tsí ɛbɔ#ɛ́ wà nɔ́wɔ́ nɔ́wɔ́ si fúu.

17 Ńbɛ̀ɛ́, kíbí ó dzɛ́ ní Yèésù Kírísítò tse ɔ̀kã̀ntso bá mi si#ɛ́, màa nyáa wà ń nya akpá fú itsɛ́ yèé ǹ wà tse fú Ɔ̀ɖáyé#ɛ́. 18 Tsí bí ó bèrè ní n wíìnyɛ̀-kã̀ báàyí#ɛ́, ìnyɛ̀-itsɛ́ yèé Kírísítò gbà ńǹtá-mi, tsí tse#ɛ́ gé ní màa wí#ɛ́. Ó gbà ńǹtá-mi, tsí tse tsí ɛnɛ yèé kò dzɛ́ ɔma-Ìyúɖà ŋa#á wà rɛ̃tígbè-Ɔ̀ɖáyé. Gbà ńǹtá-afɔ̀-mi ŋa fífɔ̀ òŋu itsɛ́-mi ŋa tsítse ní ó tseé#ɛ́. 19 Ó gbà ńǹtá-mi, tsí tse iŋɛ́-àwùsì lákṹ lákṹ ŋa gbo. Ǹ nyáa tse iŋɛ́ nyɛ̀ŋɛ̀ ŋa kpó òŋu ikpá-Mímí-Ɔ̀ɖáyé† ni. Ńbɛ̀ɛ́, ti ńǹlú-Yèrúsàlɛ́mì títí wáa lɔ káà kpa nérè-Ìlìrí#ɛ́, ǹ dzíkɔ̀ ɖíɖɔ̃̀ ti nára-Kírísítò tã́ kpó fú ɔ̀nyà ŋa. 20 Ńbí ɔ̀nyà ŋa kò gbɔ́ afɔ̀-kã̀ kpókpó ti nára-Yèésù Kírísítò wòrí#ɛ́, ńbɛ̀ ŋa ní náa le mí si, tsí mà lɔ káà dzíkɔ̀ ɖíɖɔ̃̀ fúnɛ#ɛ́. Mà tse bɛ́ɛ̀, àtsùgbée kó máa dzɛ́ ní olòmírɛ̃̀-kã̀ ti kpilɛ ilé si, tsí èmi ǹ lɔ káà kpé élè míma si ńǹtá‐ɛ̀. 21 Ó ɖi fee, à ti kɔɔ́ si ńǸwé-Ɔ̀ɖáyé si bɛ́ɛ̀ ní:

“Ɛnɛ yèé ŋa à kò dzíkɔ̀-kã̀ kpókpó ti nára‐ɛ̀ fú wòrí#ɛ́,

à nákó rí òtítɔ́‐ɛ̀,

tsí ɛnɛ yèé ŋa gbo kò gbɔ́ afɔ̀-kã̀ kpókpó ti nára‐ɛ̀ wòrí#ɛ́,

àŋa gbo, à nákó gbɔ́ òkpì-ikɔ̀#ɛ́.”^*

Kpɔ́lù wà tse ètò ní òŋu kó lɔ ńǹlú-Rómà

22 Ǹ tòó ní n wá ńɖi-ŋɛ́. Ó ɖi, iŋɛ́ yèé ŋa nyí kpó ní tse tsí ǹ kò nyáa wá tònítòní#ɛ́. 23 Ó ɖi báàyí#ɛ́, ǹ tsitsɛ́-mi tã́ nérè nyɛ̀ŋɛ̀ ŋa. Tsí ǹ ti wò lɛ́lɛ́ǹlɛ̀lɛ̀ gbo ní n wáa rí ŋɛ́. Àmì-ŋɛ́ kò tì wà kpa mí bɔ̀. 24 Ǹ módzú si nɔ́ɔ̀nà si ní ńǹwèrè yèé màa wáa làkóò ńlɛ̀-Sèkpàníyà#á, ni n yà ńɖi-ŋɛ́, tsí e mɔ́wɔ́ gbè fú mi gbo, tsí n nyáa lɔ bɛ̀ ńǹkɛ̀ɛ́. Ó ɖi, màa gbé ńɖi-ŋɛ́, tsí kpa àmì-ŋɛ́ fú ìwèrè-kã̀ oɖé tã́ná n lɔ.

25 Báàyí#ɛ́, ǹ bòkó lɔ ńǹlú-Yèrúsàlɛ́mì tã́ná, tsí n káà mɔ́wɔ́ gbè fú ɛnɛ yèé ŋa dzɛ́ ti Kírísítò ńǹlú#ɛ́ bɛ̀#ɛ́. 26 Iŋɛ́ yèé tse#ɛ́, olí-Yèésù yèé ŋa wà ńlɛ̀-Màkɛ̀ɖónìyà òŋu erè-Àkáyà#á, ó ɖé fú ŋa, tsí à kɛ́ owó-ŋà ŋa, tsí ń tsɔ̀yà ní ká kɛ́ɛ lɔ káà mɔ́wɔ́ gbè fú olákèmà yèé ŋa wà náàŋírĩ-ɛnɛ yèé ŋa dzɛ́ ti Kírísítò ńYèrúsàlɛ́mì#ɛ́. 27 Ó ɖé fú ŋa, tsí à tsɔ̀yà#á ni. Ó ɖi, nóòtítɔ́#ɛ́, ó wà kíbí ɛŋɛ̀-ìrɔ́-kã̀ ní à wà sã bɛ́ɛ̀#ɛ́. Iŋɛ́ yèé tse#ɛ́, àŋa òŋu, à kò dzɛ́ ɔma-Ìyúɖà ŋa, tsí à sì gba iŋɛ́-ire yèé ŋa Mímí-Ɔ̀ɖáyé† náa fúnɛ#ɛ́ ti ńɖi-olí-Yèésù yèé ŋa dzɛ́ ɔma-Ìyúɖà†#á. Kíbí ó lɔ bɛ́ɛ̀#ɛ́, ó wà ní àŋa gbo ká kpɛ̃́ iŋɛ́-ire ti ìtalɛ̀ bí ŋa bá ŋa, tsí kó mɔ́wɔ́ gbè fú ŋa. 28 Ńbɛ̀ɛ́, bí ǹ rĩ̀rɛ̃̀ yèé ŋa nyí tã́, tsí ǹ kɛ́ ɔ̀yà yèé ŋa à tse#ɛ́ kpó, tsí lɔ káà ń fú ŋa#á, bí ǹ wáa làkóò ńlɛ̀-Sèkpàníyà#á, màa yà ńɖi-ŋɛ́ ńǹlú-Rómà† ńǹkɛ̀ɛ́. 29 Tsí ǹ mà si ní bí ǹ wáa tó ńɖi-ŋɛ́, Kírísítò nákó tse àtsùgbée kíbí ǹ wáa rí ŋɛ́#ɛ́, tsí tu kùsɛ̀ɛ̀ kpíkpɔ̀ kpíkpɔ̀ fú èmi-ŋɛ́ méèdzì.

30 Ìnàbí-mi ŋa, àa dzɛ́ ti Yèésù Kírísítò Ɔlá-wa si, tsí Mímí-Ɔ̀ɖáyé gbo tse tsí àa wà nɛ́ àmúɖɔ̃̀ fú ara-wa ŋa. Náàtsùgbée bɛ́ɛ̀#ɛ́, ǹ wà wò ní e múgírí, tsí wúùre kũkũ bá mi ɖé. 31 È wúùre, àtsùgbée Ɔ̀ɖáyé kó gbà mí nɔ́wɔ́-ɛnɛ yèé ŋa kɔ̀ ní àŋa kàkó gba Yèésù Kírísítò gbɔ́, tsí wà nérè-Yùɖéyà si#ɛ́. È wúùre, àtsùgbée ɔ̀yà yèé ǹ kɛ́ làkóò fú ɛnɛ yèé ŋa dzɛ́ ti Ɔ̀ɖáyé ńYèrúsàlɛ́mì#ɛ́, àŋa gbo, ká tɔ́wɔ́ gbàá. 32 Ńbɛ̀ɛ́, bí Ɔ̀ɖáyé dzɛ́, màa wá ńɖi-ŋɛ́ òŋu ayè títɛ́, tsí màa wáa míra gbo oɖé ńɖi-ŋɛ́.

33 Ɔ̀ɖáyé olí-tútùúrɔ̀ kó wà náànyì-ɛ̀ŋɛ kpó si. Ɛ̀tsɛ!