Rómà ŋa 8

Mímí-Ɔ̀ɖáyé wà tsitsɛ́ náyé-olí-Yèésù

Ńbɛ̀ɛ́, Ɔ̀ɖáyé kàkó kpɛdzɔ́, tsí ɖáàbi fú ɛnɛ yèé ŋa Yèésù Kírísítò tse ɔ̀kã̀ntso bá si#ɛ́ ró. 2 Iŋɛ́ yèé tse#ɛ́, ikpá-kã̀ wà nɔ́wɔ́-Mímí-Ɔ̀ɖáyé†, tsí ɔ̀nyà kã̀kã̀ yèé Yèésù Kírísítò tse ɔ̀kã̀ntso bá si#ɛ́, ikpá#á náa wà fúu náàyɛ̀. Ikpá-Mímí-Ɔ̀ɖáyé#ɛ́ gbà wá dzɔ̀ɔ́ nɔ́wɔ́-ikpá-íbàɖí tsítse òŋu ikú. 3 Ɛkpa-Mɔ̀ɔ́sè† kà nyáa tse iŋɛ́-ìrɔ́ nyɛ̀ŋɛ̀, iŋɛ́ yèé tse#ɛ́, awù-kíbí ɔ̀nyà yà gbà#á kò nɛ́ àmí, tsí kó fúu ńkpá. Ó ɖi, Ɔ̀ɖáyé òŋu tseé. Òŋu ní wà dzɛ́ ní ó bɛ Ɔma bíbí‐ɛ̀ wá nɔ́ɔ̀nyà kíbí à bí ɔ̀nyà kpó yèé dzɛ́ adzàbi#ɛ́ bɛ́, tsí kó wáa tɔ́tse afɔ̀-àbi dzídzɛ gbà ńǹtá-ɛbɔ yèé Ɔma bíbí‐ɛ̀ mú ara‐ɛ̀ tse#ɛ́. Kíbí ó tse bɛ́ɛ̀#ɛ́, ó nyà ɖíre ní òŋu nya àbi dzídzɛ kãdzú. 4 Ɔ̀ɖáyé tse bɛ́ɛ̀ fú wa, àtsùgbée àa kó nyáa tse òtítɔ́ yèé ŋa ɛkpa-Mɔ̀ɔ́sè wà fɔ̀ ní ká tse#ɛ́ ni. Àwa ní dzɛ́ ɛnɛ yèé ŋa awù-kíbí ɔ̀nyà yà gbà#á kò wà gbɛ̃́ ró#ɛ́. Ó ɖi, Mímí-Ɔ̀ɖáyé ní wà gbɛ̃́ wa báàyí#ɛ́.

5 Ɛnɛ yèé ŋa náa kɔ ara-ŋa dzɔ̀ɔ́ fú awù-kíbí ɔ̀nyà yà gbà#á, tsí náa wà gbɛ̃́ ŋa#á, awù-kíbí ɔ̀nyà yà gbà#á gé ní náa gba ìsérè-ŋa si#ɛ́. Ó ɖi, ɛnɛ yèé ŋa náa kɔ ara-ŋa dzɔ̀ɔ́ fú Mímí-Ɔ̀ɖáyé, tsí náa wà gbɛ̃́ ŋa#á, awù-Mímí-Ɔ̀ɖáyé gé ní náa gba ìsérè tiŋa gbo si#ɛ́. 6 Awù-kíbí ɔ̀nyà yà gbà#á kó gba ìsérè si fúnɛ#ɛ́, ikú ní náa bí#ɛ́. Ó ɖi, awù-Mímí-Ɔ̀ɖáyé kó gba ìsérè si fúnɛ#ɛ́, náa fúnɛ náàyɛ̀, tsí fúnɛ ńtútùúrɔ̀ gbo. 7 Ó ɖi, ɛnɛ yèé ŋa náa kɔ ara-ŋa dzɔ̀ɔ́ fú awù-kíbí ɔ̀nyà yà gbà#á, tsí náa wà gbɛ̃́ ŋa#á, à dzɛ́ ɔ̀tɛ̀-Ɔ̀ɖáyé. À kà dzɛ́, tsí ká rɛ̃̀ si nɛ́kpa-Ɔ̀ɖáyé. À kàkó tì nyáa rɛ̃̀ si nɛ́kpa#á gìɖì. 8 Ɛnɛ yèé wà, tsí awù-kíbí ɔ̀nyà yà gbà#á gé ní náa gba ìsérè si fúu#ɛ́, iŋɛ́‐ɛ̀ kàkó nyáa dzɔdzú-Ɔ̀ɖáyé.

9 Ó ɖi, ɛ̀ŋɛ òŋu, awù-kíbí ɔ̀nyà yà gbà#á kò wà gbɛ̃́ ŋɛ́ ró. Mímí-Ɔ̀ɖáyé ní wà gbɛ̃́ ŋɛ́#ɛ́, iŋɛ́ yèé tse#ɛ́, ó wà ńǹtá-ŋɛ́ si báàyí. Bí Mímí-Kírísítò kò wà ńǹtá-ɔ̀nyà-kã̀#á, ɛnɛ nyɛ̀ŋɛ̀ kò dzɛ́ ti Kírísítò. 10 Bí Kírísítò tse ɔ̀kã̀ntso bá ŋɛ́ si fee, kíbí ó dzɛ́ gìɖì ní ara-ŋɛ́ dzɛ́ iŋɛ́ kúkú náàtsùgbé-àbi dzídzɛ#ɛ́, Mímí-Ɔ̀ɖáyé wà fú ŋɛ́ náàyɛ̀, iŋɛ́ yèé tse#ɛ́, Ɔ̀ɖáyé gbà ŋɛ́ nɔ́ɔ̀nyà-atsòtítɔ́ nódzú-ara‐ɛ̀. 11 Ɔ̀ɖáyé dzí Yèésù ti náàŋírĩ-òkú ŋa wá náyé. Bí Mímí-Ɔ̀ɖáyé#ɛ́ wà ńǹtá-ɛ̀ŋɛ gbo si, Ɔ̀ɖáyé yèé dzí Yèésù Kírísítò ti náàŋírĩ-òkú ŋa wá náyé#ɛ́, nákó tse tsí ara-ŋɛ́ yèé dzɛ́ iŋɛ́ kúkú#ɛ́, nákó gbé náàyɛ̀ gbà ńǹtá-Mímí-Ɔ̀ɖáyé yèé wà ńǹtá-ŋɛ́ si#ɛ́.

12 Ìnàbí-mi ŋa, ó wà kíbí ɛnɛ yèé fɔ̀ ní àa dzɛŋɛ̀-ìrɔ́-kã̀ si bɛ́ ni. Ɛŋɛ̀#ɛ́, àa kò dzɛɛ́ nɔ́wɔ́-awù-kíbí ɔ̀nyà yà gbà#á, tsí kó tse tsí àa kó tɔ́ kɔ ara-wa dzɔ̀ɔ́ fúu, tsí kó wà gbɛ̃́ wa ró. 13 Bí ó dzɛ́ ní è kɔ ara-ŋɛ́ dzɔ̀ɔ́ fú awù-kíbí ɔ̀nyà yà gbà#á, tsí ó wà gbɛ̃́ ŋɛ́, è nákó kú. Ó ɖi, bí è gbà ńǹtá-Mímí-Ɔ̀ɖáyé, tsí kpa ìlò-ká wo ti ara-nɛ sɔ̃́ŋú gé nóòkú#ɛ́, è nákó gbé náàyɛ̀.

14 Ó ɖi, ɛnɛ yèé ŋa kpó Mímí-Ɔ̀ɖáyé wà ńǹtá-ŋa si, tsí wà gbɛ̃́ ŋa#á, àŋa ní dzɛ́ ɔma-Ɔ̀ɖáyé#ɛ́. 15 Ɔ̀ɖáyé tse tsí Mímí‐ɛ̀ wà ńǹtá-ŋɛ́ si. Mímí#ɛ́ kò wà sɔ ŋɛ́ ɖi arú, tsí odzo kó tɔ́ wà tse ŋɛ́ ró. Kà kàa bɛ́ɛ̀, ó tse tsí è ɖi ɔma-Ɔ̀ɖáyé, tsí náa fú wa nɔ́ɔ̀nà, tsí àa náa nyáa wà ɖúgbe, tsí wà kpèé ní: Boba. 16 Tsí Mímí-Ɔ̀ɖáyé#ɛ́ òŋu ká‐ɛ̀ gìɖì náa wà fɔ̀ fú wa ńnɔ́-ara-wa ní àa dzɛ́ ɔma-Ɔ̀ɖáyé. 17 Kíbí ó dzɛ́ ní àa dzɛ́ ɔma-Ɔ̀ɖáyé#ɛ́, ɔ̀nà wà fú àwa gbo, tsí iŋɛ́-ire yèé ŋa Ɔ̀ɖáyé tàlé si fú ɛnɛ yèé dzɛ́ tɛ̀ɛ̀ ŋa#á, kó tɔwɔ́ tiwa gbo. Iŋɛ́-ire nyɛ̀ŋɛ̀ ŋa#á nákó tɔwɔ́-àwa Kírísítò méèdzì. Tsí kíbí àwa gbo, àa wà réré bá Kírísítò#ɛ́, àa nákó gba iyì-Ɔ̀ɖáyé gbo báa.

Ɔ̀ɖáyé nákó mú iyì‐ɛ̀ bɔwɔ́-wa

18 Nódzú tèmi òŋu fee, bí à ní ká mú ìréré yèé ŋa àa wà si nɔ́mbɛ́ báàyí#ɛ́, tsí ń ɖé bá iyì-Ɔ̀ɖáyé yèé ó bòkó wáa fú wa náànyìwà#á, ìréré ŋa#á kò tì kpankɛ́lɛ́‐ɛ̀ nɔ́ɔ̀nà-kã̀ kpókpó. 19 Iŋɛ́ ɔ̀kã̀lɔ́ɔ̀kã̀ kpó yèé Ɔ̀ɖáyé ɖá si náàdzàkáyé#ɛ́, à ɖóro si, tsí wà wo odzú‐ɛ̀. À wà wo ká rí ɔdzɔ́ yèé Ɔ̀ɖáyé nákó nya ɔma‐ɛ̀ ŋa ɖíre#ɛ́. Ɔdzɔ́#ɛ́ kò tì yáa wà tó fú ŋa gìɖì. 20 Ó ɖi, iŋɛ́ ɔ̀kã̀lɔ́ɔ̀kã̀ kpó yèé Ɔ̀ɖáyé ɖá si náàdzàkáyé#ɛ́, à kí nɔ́wɔ́-ikpá-kã̀ si, tsí ɖi iŋɛ́-akpotu. Tsí kò sì ti náwù-iŋɛ́ ŋa#á àŋa ká-ŋa gbo fòò. Ɔ̀ɖáyé òŋu ká‐ɛ̀ ní wò bɛ́ɛ̀#ɛ́. Ó ɖi, odzú-ŋa wà nɔ́ɔ̀nà si fú Ɔ̀ɖáyé ní ɔdzɔ́-kã̀ bàa, 21 tsí nákó wáa gba àŋa dzɔ̀ɔ́ nɔ́wɔ́-ikpá yèé ŋa tse tsí àŋa wà bàdzɛ́ làkóò gé#ɛ́. Tsí àŋa gbo, àŋa nákó gba iyì-Ɔ̀ɖáyé bá ɔma‐ɛ̀ ŋa. 22 Tsí àa mà rere ní ti ńǹkpìnkpìlɛ̀ títí wáa fú nɔ́mbɛ́ báàyí#ɛ́, iŋɛ́ ɔ̀kã̀lɔ́ɔ̀kã̀ kpó yèé Ɔ̀ɖáyé ɖá#á, à mú enyí kã̀ si, tsí wà gbɔ́ ɖíɖɔ̃̀ tsɛ̃̀ɛ̃̀ kíbí ɖíɖɔ̃̀-ɔma bíbí bɛ́. 23 Tsí kò sì tsi iŋɛ́ yèé ŋa Ɔ̀ɖáyé ɖá si náàdzàkáyé#ɛ́ sɔ̃́ŋú gé ní mú enyí kã̀ si, tsí wà gbɔ́ ɖíɖɔ̃̀ bɛ́ɛ̀#ɛ́. Àwa yèé ŋa gbo Mímí-Ɔ̀ɖáyé† wà ńǹtá-wa si kíbí iŋɛ́-àtsɛ̃̀tsɛ̃̀ yèé àa gbà náàŋírĩ-iŋɛ́-ire-Ɔ̀ɖáyé ŋa#á, àwa gbo, àa mú enyí kã̀ si, tsí wà gbɔ́ ɖíɖɔ̃̀-ara-wa tsɛ̃̀ɛ̃̀ bɛ́ɛ̀. Àa ɖóro si, tsí wà wo odzú-Ɔ̀ɖáyé ní nákó wáa nyà ɖíre dzálɛ̀ kpó ní àa dzɛ́ ɔma‐ɛ̀ ŋa, tsí nákó wáa gbà wá dzɔ̀ɔ́ dzálɛ̀ gbo kpó. 24 Ɔ̀ɖáyé gbà wá là, tsí odzú-wa wà nɔ́ɔ̀nà si ní nákó gbà wá dzɔ̀ɔ́ dzálɛ̀ kpó. Ó ɖi, iŋɛ́ yèé odzú ti kã̀ ná#á, à kà módzú si nɔ́ɔ̀nà si fú iŋɛ́ nyɛ̀ŋɛ̀ ró. Bí iŋɛ́ yèé odzú-ɛ̀ɛ wà nɔ́ɔ̀nà si fú#ɛ́ ti tɔwɔ́-ɛ̀ɛ ná, odzú-ɛ̀ɛ náa nyà nɔ́ɔ̀nà fú iŋɛ́ nyɛ̀ŋɛ̀. 25 Ó ɖi, iŋɛ́ yèé odzú tiwa kò kã̀ wòrí#ɛ́ ní àa módzú si nɔ́ɔ̀nà si fú#ɛ́. Náàtsùgbée bɛ́ɛ̀ ní àa ɖóro si, tsí fɛ̀ɖɔ̃̀ tù si, tsí wà wo odzú-Ɔ̀ɖáyé#ɛ́.

26 Nɔ́ɔ̀nà-ìrɔ́-bɛ́ɛ̀-kã̀ ké ní Mímí-Ɔ̀ɖáyé gbo náa wà mɔ́wɔ́ gbè fú wa#á. Náa mɔ́wɔ́ gbè fú àwa yèé ŋa àmí-kã̀ kò wà nɔ́wɔ́-wa lárè bɛ́ɛ̀ ńnɔ́-Ɔ̀ɖáyé sísɛ̃̀#ɛ́. Ó ɖi, bí àa wà wúùre fú Ɔ̀ɖáyé, àa kà ma iŋɛ́ yèé ká fɔ̀ gìɖì#ɛ́. Ńbɛ̀ɛ́, Mímí-Ɔ̀ɖáyé#ɛ́ òŋu ká‐ɛ̀ náa wáa gba afɔ̀-wa ŋa nóŋù-ìrɔ́-kã̀ yèé ɔ̀nyà kàkó nyáa fɔ̀, tsí gbɔ́ òkpì‐ɛ̀#ɛ́, tsí ń wúùre fú Ɔ̀ɖáyé si nárũ-wa. 27 Tsí Ɔ̀ɖáyé òŋu minɔ́-ɔ̀nyà ɔ̀kã̀lɔ́ɔ̀kã̀ kpó, tsí ó ma iŋɛ́ yèé Mímí‐ɛ̀ náa wò ní òŋu kó bèrè#ɛ́ gbo. Mímí-Ɔ̀ɖáyé#ɛ́ ní náa wà wúùre fú Ɔ̀ɖáyé si nárũ-ɛnɛ yèé ŋa dzɛ́ ti Ɔ̀ɖáyé#ɛ́. Náa wà wúùre fúu ńǹrɔ́-kíbí Ɔ̀ɖáyé òŋu ká‐ɛ̀ náa wò gbà#á ni.

28 Tsí àa mà ní iŋɛ́ ɔ̀kã̀lɔ́ɔ̀kã̀ kpó yèé Ɔ̀ɖáyé náa tse#ɛ́, náa tseé, tsí kó dzɛ́ iŋɛ́-ire fú ɛnɛ yèé ŋa náa nɛ́ àmúɖɔ̃̀ fúu#ɛ́ ni.^* Ó ti tsã ɛnɛ nyɛ̀ŋɛ̀ ŋa si tsúwádzú kíbí ó wà néètò‐ɛ̀ si gbà#á. 29 Ó ɖi, ɛnɛ yèé ŋa ó ti tsã̀ si tsúwádzú bɛ́ɛ̀#ɛ́, ó ti fɔ̀ si ti nára-ŋa gbo si tsúwádzú ní òŋu nákó tse tsí à nákó wà kíbí Ɔma bíbí tòŋu ká-òŋu bɛ́. Òŋu nákó tse bɛ́ɛ̀, àtsùgbée Ɔma bíbí tòŋu ká-òŋu#ɛ́ kó wáa dzɛ́ àtsɛ̀rɛ̀bí yèé gba iwádzú fú ɔmànàá ɛ̀gbɛ̀lɛ́ɛ̀gbɛ̀#ɛ́. 30 Tsí ɛnɛ yèé ŋa ó fɔ̀ si ti nára-ŋa si tsúwádzú bɛ́ɛ̀#ɛ́, ó kpè ŋá ní ká dzɛ́ tòŋu, tsí ɛnɛ yèé ŋa gbo ó kpè bɛ́ɛ̀#ɛ́, ó gbà ŋá nɔ́ɔ̀nyà-atsòtítɔ́ nódzú-ara‐ɛ̀. Tsí ɛnɛ yèé ŋa gbo ó gbà nɔ́ɔ̀nyà-atsòtítɔ́ nódzú-ara‐ɛ̀ bɛ́ɛ̀#ɛ́, ó mú iyì‐ɛ̀ bɔwɔ́-ŋa.

Iŋɛ́-kã̀ kpókpó kàkó nyáa ɖí ɔ̀nà fú àmúɖɔ̃̀-Ɔ̀ɖáyé

31 Afɔ̀ mɛ̀ɛ́ àa kó fɔ̀ ti nára-iŋɛ́ yèé ŋa nyí kpó ni? Bí Ɔ̀ɖáyé wà náànyì-wa si fee, nɛ̀ɛ́ nákó nyáa kɔ̀ wá ná? Ɔ̀nyà-kã̀ kò wà. 32 Ɔ̀ɖáyé má nyáa kɔ̀ ní Ɔma bíbí tòŋu ká-òŋu kó máa réré. Ó ɖi, kò tse bɛ́ɛ̀. Kà kàa bɛ́ɛ̀, ó kɛ́ɛ, tsí ń bɔwɔ́-ɔ̀nyà ŋa, tsí ó kú si nárũ-àwa kpó. Tsí kíbí ó tse bɛ́ɛ̀#ɛ́, nákó mú iŋɛ́ ɔ̀kã̀lɔ́ɔ̀kã̀ gbo kpó, tsí ń máa fú wa kpoŋu gé ní ó dzɛ́#ɛ́. 33 Ǹ ní fòò, nɛ̀ɛ́ wà, tsí kó nyáa mú afɔ̀ bá ɛnɛ yèé ŋa Ɔ̀ɖáyé tsã̀, tsí à dzɛ́ tɛ̀ɛ̀ si#ɛ́ ná? Ɔlá‐ɛ̀ kò wà. Ɔ̀ɖáyé ní dzɛ́ ɛnɛ yèé náa gbanɛ nɔ́ɔ̀nyà-atsòtítɔ́ nódzú-ara‐ɛ̀#ɛ́. 34 Nɛ̀ɛ́ nákó nyáa kpɛdzɔ́ mú wa, tsí ɖáàbi fú wa ńǹkɛ̀ɛ́? Yèésù Kírísítò kú si nárũ-wa, tsí yèé tɛ̀ɛ́ ró#ɛ́, Ɔ̀ɖáyé dzíi ti náàŋírĩ-òkú ŋa wá náyé, tsí ó wà nóòtã́-Ɔ̀ɖáyé#ɛ́ si, tsí wà wúùre fúu fú wa. Yèésí bɔ̀. 35 Kí gìɖì tútú wà, tsí kó nyáa ya wá níìkã̀ nára-àmúɖɔ̃̀ yèé Yèésù Kírísítò nyà ɖíre fú wa#á ná? Ìréréè nàmí odzo-ayé? Oró tsítse bánɛɛ̀ nàmí ebi-inɔ́ kó kpanɛ? Ìyà dzídzɛɛ̀ nàmí àtsubi-kã̀ kó bánɛ? Ká gúnɛ ńtàsú kpaà nàmí kí? Láyé! Iŋɛ́-kã̀ kò wà. 36 À ti kɔɔ́ si ńǸwé-Ɔ̀ɖáyé† si ní:

“Ɔlɔ́dzɔ́, àtsùgbée kíbí àa wà tɛ̀ náànyì‐ɛ̀ɛ#ɛ́,

iŋɛ́-àtsubi yèé kó bí ikú fú wa#á gé

ní náa wà bá wa nɔ́dzɔ́ kɔ́dzɔ́#ɛ́.

Àa ɖà kíbí àgùɖã̀ yèé ŋa à mú làkóò,

tsí ká lɔ káà kpa ŋá bɛ́#ɛ́ ni.”^*

37 Ó ɖi, ńnɔ́-iŋɛ́ yèé ŋa kpó náa bá wa bɛ́ɛ̀#ɛ́ fee, Yèésù Kírísítò, ɛnɛ yèé nɛ́ àmúɖɔ̃̀ fú wa#á, náa tse tsí àa náa dzàdzàbɔ́ dzálɛ̀ kpó kpãŋu. 38 Ɛ̃ɛ̃! Ǹ mà rere si ńnɔ́-ara-mi si ní iŋɛ́-kã̀ kpókpó kò wà, tsí kó nyáa ya wá níìkã̀ nára-àmúɖɔ̃̀-Ɔ̀ɖáyé. Kí nákó nyáa dzɛ́ iŋɛ́ nyɛ̀ŋɛ̀? Àyɛ̀ɛ̀ nàmí ikú? Ikpá-íbàɖí ŋaà nàmí adzítsɛ́-ɔ̀rɔ̃† ŋa? Iŋɛ́ yèé ŋa wà si báàyí#ɛ́ɛ̀ nàmí yèé ŋa bòkó wáa wá náànyìwà#á? 39 Ikpá yèé ŋa wà nɔ́ɔ̀rɔ̃#ɛ́ɛ̀ nàmí yèé ŋa wà ńǹtalɛ̀ bí#ɛ́? Iŋɛ́ ɔ̀kã̀lɔ́ɔ̀kã̀ kpó yèé ŋa Ɔ̀ɖáyé ɖá#á, ɔ̀kã̀ kpókpó kò wà náàŋírĩ-ŋa, tsí kó nyáa ya wá níìkã̀ nára-àmúɖɔ̃̀ yèé Ɔ̀ɖáyé gbà ńǹtá-Yèésù Kírísítò Ɔlá-wa, tsí nyà ɖíre fú wa#á láyé.