Rómà ŋa 6

Yèésù Kírísítò tse ɔ̀kã̀ntso bá wa, tsí àa wà náàyɛ̀ báa si

Bí ó dzɛ́ bɛ́ɛ̀ fe, bí àa kó fɔ̀ fáà ńǹkɛ̀ɛ́? Àa kó wà náàbi dzídzɛ si, tsí ore-ɔ̀fɛ́-Ɔ̀ɖáyé kó wà kpɔ̀ máa fú waà? 2 Láyé! Kò tsi bɛ́ɛ̀ ni. Àa ti kú ńǹrɔ́-kã̀ ti nára-àbi dzídzɛ, tsí kí tse tsí àa kó tɔ́ wà ńbàɖí tsítse si làkóò ró? 3 È gbàgbé niì? È kè mà ní kíbí à wìwɛ̀-Yèésù† fú wa#á, ni àa tse ɔ̀kã̀ntso bá Yèésù Kírísítò si, tsí àa kú báa gbo ńǹrɔ́-kã̀ bɛ́ ńnɛ̀ɛ́ɛ̀? 4 Ńǹwèrè yèé à wìwɛ̀-Yèésù fú wa#á, àa kú bá Kírísítò, tsí à rì wá gbo báa ńǹrɔ́-kã̀ ni. Ɔ̀ɖáyé Boba-wa tse bɛ́ɛ̀, àtsùgbée àa kó gbé náyé titɔ̃ ńǹrɔ́-kíbí ó dzí Kírísítò ti náàŋírĩ-òkú ŋa wá náyé#ɛ́ òŋu ikpá lákṹ#ɛ́ ni. 5 Kíbí ó dzɛ́ ní àa tse ɔ̀kã̀ntso báa dzálɛ̀ kpó ńǹrɔ́-kíbí ó kú gbà#á, bɛ́ɛ̀ ké ní àa nákó wáa tse ɔ̀kã̀ntso gbo báa ńǹrɔ́-kíbí Ɔ̀ɖáyé dzíi ti náàŋírĩ-òkú ŋa wá náyé#ɛ́.

6 Àa kó gbɔ́ òkpì-afɔ̀#ɛ́ rere. Òŋu ní wà dzɛ́ ní ɔ̀nyà-ìrɔ́ yèé àa dzɛ́ dzɔ̀ɔ́ dzɔ̀ɔ́#ɛ́, àa kã̀ã́ si ńǹtá-egi-ìɖáàgàlàdzà† bá Kírísítò, àtsùgbée kíbí ɔ̀nyà yà ńbàɖí tsítse tó#ɛ́, kó máa nɛ́kpá ró, tsí àa kó máa dzɛ́ arú fú íbàɖí tsítse gbo ró. 7 Ǹ wà fɔ̀ bɛ́ɛ̀, iŋɛ́ yèé tse#ɛ́, bí ɔ̀nyà-kã̀ kú#ɛ́, ɛnɛ nyɛ̀ŋɛ̀ bɔ́ nɔ́wɔ́-íbàɖí tsítse ńnɛ̀ɛ́. 8 Ó ɖi, kíbí ó dzɛ́ ní àa tse ɔ̀kã̀ntso bá Kírísítò ńǹrɔ́-kíbí ó kú gbà#á, àa nɛ́ àkaralé ní àa nákó gbé náàyɛ̀ gbo báa. 9 Àa mà si ní Ɔ̀ɖáyé dzí Kírísítò ti náàŋírĩ-òkú ŋa wá náyé, tsí kàkó tɔ́ kú láyé ró. Ikú kò nɛ́kpá si ńǹtá‐ɛ̀ ró. 10 Kíbí ó kú#ɛ́, ó kú àrìkã̀ntso gé ni, àtsùgbé-àbi-wa ŋa, tsí kàkó kú láyé ró. Tsí báàyí#ɛ́, ó wà náàyɛ̀ si, tsí àyɛ̀#ɛ́ tse tsí Ɔ̀ɖáyé wà gba nyínyɛ̀. 11 Bɛ́ɛ̀ ké ní ó wà fú ɛ̀ŋɛ gbo#ɛ́. Ó wà ní e wà rí ara-ŋɛ́ ní è kú ti nára-íbàɖí tsítse, tsí e wà náàyɛ̀ si, tsí àyɛ̀#ɛ́ kó tse tsí Ɔ̀ɖáyé kó wà gba nyínyɛ̀, iŋɛ́ yèé tse#ɛ́, Yèésù Kírísítò tse ɔ̀kã̀ntso bá ŋɛ́ si.

12 Kíbí ó dzɛ́ bɛ́ɛ̀#ɛ́, ɛ̀ŋɛ yèé bàkó wáa kú#ɛ́, è máa dzɛ́, tsí íbàɖí tsítse kó nɛ́kpá si ńǹtá-ŋɛ́ ró. È máa dzɛ́, tsí awù-kíbí ɔ̀nyà yà gbà#á gbo kó gba ìsérè si fú ŋɛ́ ró. 13 È máa dzɛ́ fú akpá-ŋɛ́ nàmí ɛsɛ̀-ŋɛ́ nàmí ìɖì-kã̀-ara-ŋɛ́-kã̀ kpókpó, tsí kó ɖi iŋɛ́-itsɛ́, tsí e wà lò ŋá, tsí wà ń tse íbàɖí. Kà kàa bɛ́ɛ̀, kíbí ɛnɛ yèé fɔ̀ ní ɛnɛ yèé ŋa à dzí ti náàŋírĩ-òkú ŋa wá náyé#ɛ́ bɛ́#ɛ́, è mú ara-ŋɛ́ ŋa bɔwɔ́-Ɔ̀ɖáyé bɛ́ɛ̀, tsí kó ɖi iŋɛ́-itsɛ́, tsí e wà ń tse òtítɔ́. 14 Ńbɛ̀ɛ́, awù-íbàɖí tsítse kàkó nɛ́kpá si ńǹtá-ŋɛ́ ró, iŋɛ́ yèé tse#ɛ́, kò tsi ɛkpa-Mɔ̀ɔ́sè† ní wà gbɛ̃́ ŋɛ́ báàyí#ɛ́. Ńǹwèrè-ore-ɔ̀fɛ́-Ɔ̀ɖáyé ní àa wà si#ɛ́.

Arú-Ɔ̀ɖáyé ní àa dzɛ́#ɛ́

15 Òkpì-afɔ̀ yèé ǹ fɔ̀ ńǹsɛ̃̀ɛ̃́#ɛ́ fáà? Kò tsi ní kíbí ó dzɛ́ ní ɛkpa-Mɔ̀ɔ́sè kò wà gbɛ̃́ wa ró, tsí ńǹwèrè-ore-ɔ̀fɛ́-Ɔ̀ɖáyé ní àa wà si#ɛ́, ni àa rí ayé tã́, tsí àa kó wà ńbàɖí tsítse si ni. Láyé! Kò tsi bɛ́ɛ̀ ni. 16 È mà rere ní bí è mú ara-ŋɛ́ bɔwɔ́-ɔ̀nyà-kã̀ ní àŋa kó wà dzítsɛ́ fúu, tsí wà gbɔ́ɔ̀lú fúu, ni è ɖi arú fú ɛnɛ nyɛ̀ŋɛ̀ ńnɛ̀ɛ́ nɔ̀. Bí ó dzɛ́ ní íbàɖí tsítse ní nɛ́kpá si ńǹtá-ŋɛ́ si#ɛ́, è ɖi arú‐ɛ̀ ńnɛ̀ɛ́. Tsí íbàɖí#ɛ́ nákó bí ikú fú ŋɛ́. Ó ɖi, bí è gba Ɔ̀ɖáyé kíbí olówó-ŋɛ́, tsí wà gbɔ́ɔ̀lú fúu#ɛ́, nákó tse tsí è nákó wà tse òtítɔ́. 17 Ɔkpɛ́ kɔ́kpɛ́ ni ti Ɔ̀ɖáyé ni. Dzɔ̀ɔ́ dzɔ̀ɔ́#ɛ́, è dzɛ́ arú fú íbàɖí tsítse si. Ó ɖi báàyí#ɛ́, è nyíìlò kpaɖà, tsí è dzɛ́, tsí gba ɛ̀kɔ́-òtítɔ́ yèé à tse fú ŋɛ́#ɛ́, tsí wà tse si ńǹtá‐ɛ̀ inɔ́ tã̀ã́, ànyì tã̀ã́. 18 Fee, è kè dzɛ́ arú fú íbàɖí tsítse si ró. Ɔ̀ɖáyé gbà ŋɛ́ dzɔ̀ɔ́ nɔ́wɔ́‐ɛ̀, tsí è ɖi arú fú òtítɔ́ tsítse. 19 Oŋù-afɔ̀ ní ó dzɛ́, tsí ǹ fɔ̀#ɛ́, iŋɛ́ yèé tse#ɛ́, afɔ̀ kà yáa yé ŋɛ́. Dzɔ̀ɔ́ dzɔ̀ɔ́#ɛ́, è mú ara-ŋɛ́ tse arú si fú íbàɖí tsítse òŋu ìlò wérewère ŋa, tsí è náa wà tse iŋɛ́ yèé ŋa kò ɖìirí fú odzú, tsí kò ɖìi gbɔ́ fú etí#ɛ́. Bɛ́ɛ̀ ní è wà dzɔ̀ɔ́ dzɔ̀ɔ́#ɛ́. Báàyí gbo fee, è kɔ ara-ŋɛ́ dzɔ̀ɔ́, tsí e ɖi arú fú òtítɔ́ tsítse, tsí ìgbèngbé-ŋɛ́ kó wà nyà ɖíre ní è wà nɔ́wɔ́ nɔ́wɔ́ si fú Ɔ̀ɖáyé.

20 Ńǹwèrè yèé è dzɛ́ arú fú íbàɖí tsítse si#ɛ́, afɔ̀-ká tse òtítɔ́-Ɔ̀ɖáyé-kã̀ kpókpó kò tì tsɛdzɔ́-ŋɛ́. 21 Tsí ìlò wérewère yèé è lò wáa lɔ ńǹwèrè nyɛ̀ŋɛ̀ ŋa gbo#ɛ́ fe, èrè mɛ̀ɛ́ è rí ńnɛ̀? Òŋu ní kóko ɖi anɔ́ si fú ŋɛ́ nɔ́mbɛ́ si báàyí#ɛ́. Iŋɛ́ nyɛ̀ŋɛ̀ ŋa#á, ikú ní náa tã́ã̀rã̀‐ɛ̀#ɛ́. 22 Ó ɖi báàyí òŋu#ɛ́, Ɔ̀ɖáyé gbà ŋɛ́ nɔ́wɔ́-íbàɖí tsítse#ɛ́, tsí è ɖi arú, tsí wà dzítsɛ́ fúu. Tsí èrè yèé wà ńnɛ̀, tsí è wà gbà#á ní dzɛ́ ní è mú ara-ŋɛ́ bɔwɔ́‐ɛ̀ akpá akpá, ɛsɛ̀ ɛsɛ̀, tsí ńǹtã̀ntã́‐ɛ̀#ɛ́, nákó tse tsí è nákó gbé náàyɛ̀-àrìtã́. 23 Èrè-íbàɖí tsítse ní dzɛ́ ikú#ɛ́. Ó ɖi, Ɔ̀ɖáyé òŋu wà fúnɛ ńŋɛ́-ɔ̀fɛ́-kã̀. Iŋɛ́#ɛ́ ní dzɛ́ àyɛ̀-àrìtã́ yèé ó wà gbà ńǹtá-Yèésù Kírísítò Ɔlá-wa, tsí wà fú wa#á.