Rómà ŋa 5

Bí Ɔ̀ɖáyé gbà wá nɔ́ɔ̀nyà-atsòtítɔ́ nódzú-ara‐ɛ̀, èrè wà ńnɛ̀

Báàyí#ɛ́, Ɔ̀ɖáyé gbà wá nɔ́ɔ̀nyà-atsòtítɔ́ nódzú-ara‐ɛ̀, iŋɛ́ yèé tse#ɛ́, àa mú àkaralé-wa si ńǹtá‐ɛ̀. Kíbí ó dzɛ́ bɛ́ɛ̀#ɛ́, àwa‐ɛ̀ méèdzì, àa wà ɖɔ̃̀ náàtsùgbé-iŋɛ́ yèé Yèésù Kírísítò Ɔlá-wa tse#ɛ́. 2 Ó tse tsí ɔ̀nà tsí, tsí Ɔ̀ɖáyé tse ore-ɔ̀fɛ́‐ɛ̀ fú wa, iŋɛ́ yèé tse#ɛ́, àa nɛ́ àkaralé si ńǹtá‐ɛ̀. Nóre-ɔ̀fɛ́#ɛ́ ní àa dzokó rìgírìgí si báàyí#ɛ́. Tsí àa wà náyè títɛ́ si, iŋɛ́ yèé tse#ɛ́, àa módzú si nɔ́ɔ̀nà si fú Ɔ̀ɖáyé ní nákó mú iyì‐ɛ̀ bɔwɔ́-àwa gbo. 3 Tsí kò tsi iŋɛ́ nyɛ̀ŋɛ̀ sɔ̃́ŋú gé ní náa wà mú ayè tɛ́ wa#á. Bí ó dzɛ́ gìɖì ní àa wà ńǹréré gbo si#ɛ́, ayè náa wà tɛ́ wa, iŋɛ́ yèé tse#ɛ́, àa mà ní ìréré#ɛ́ náa mɔ́wɔ́ gbè fú wa, tsí àa náa gbódzú si. 4 Tsí kíbí àa náa gbódzú si bɛ́ɛ̀#ɛ́, náa tse tsí àkaralé-wa gbo náa ta ogùgù múlɛ̀ kpãŋu. Tsí bí àkaralé-wa ta ogùgù múlɛ̀ bɛ́ɛ̀, òŋu gbo náa tse tsí odzú-wa náa wà nɔ́ɔ̀nà si fú Ɔ̀ɖáyé gé ni. 5 Tsí kíbí odzú-wa gbo náa wà nɔ́ɔ̀nà si fúu bɛ́ɛ̀#ɛ́, kà dzɛ́ iŋɛ́ rírá láyé, iŋɛ́ yèé tse#ɛ́, Ɔ̀ɖáyé nyà ɖíre ní òŋu nɛ́ àmúɖɔ̃̀ fú wa tó bɛ́ɛ̀. Ó tse bɛ́ɛ̀ gbà ńǹtá-Mímí‐ɛ̀ yèé wà ńǹtá-wa si#ɛ́ ni.

6 Dzɔ̀ɔ́ dzɔ̀ɔ́#ɛ́, ikpá-kã̀ kpókpó kò wà nɔ́wɔ́-wa. Ó ɖi, ńǹwèrè yèé Ɔ̀ɖáyé ɖá si tútútú#ɛ́ ní Yèésù Kírísítò wáa kú si nárũ-àwa adzàbi ŋa#á. 7 Ó le héŋú ní ɔ̀nyà-kã̀ kó dzɛ́, tsí kú si nárũ-ɔ̀nyà-atsòtítɔ́-kã̀. Bóyá ɔ̀nyà-kã̀ òŋu wà, tsí nákó nyáa gbódzú, tsí kú si nárũ-ɔ̀nyà-kã̀ yèé náa tsɔ̀nyà#á. 8 Ó ɖi fee, è rí kíbí Ɔ̀ɖáyé nya àmúɖɔ̃̀‐ɛ̀, tsí ń ɖíre fú wa#á gé. Àmúɖɔ̃̀‐ɛ̀#ɛ́ ní dzɛ́ ní Kírísítò kú si nárũ-wa ńǹwèrè yèé àa dzɛ́ adzàbi ŋa si#ɛ́. 9 Kíbí Kírísítò mú ara‐ɛ̀ tsɛbɔ si nárũ-wa, tsí ó tse tsí Ɔ̀ɖáyé gbà wá nɔ́ɔ̀nyà-atsòtítɔ́ nódzú-ara‐ɛ̀#ɛ́, àa nɛ́ àkaralé ní nákó wáa gbà wá nɔ́wɔ́-inɔ́ bíbí-Ɔ̀ɖáyé gbo kpoŋu gé ni. 10 Dzɔ̀ɔ́ dzɔ̀ɔ́ gbo#ɛ́, àa dzɛ́ ɔ̀tɛ̀-Ɔ̀ɖáyé si. Ó ɖi, Ɔ̀ɖáyé gbà ńǹtá-ikú-Ɔma bíbí‐ɛ̀, tsí wáa tɔ́tse àŋírĩ-àwa‐ɛ̀ méèdzì. Kíbí ó tɔ́tse àŋírĩ-àwa‐ɛ̀ méèdzì bɛ́ɛ̀#ɛ́, àa nɛ́ àkaralé ní nákó wáa gbà wá là gbo kpoŋu gé ni. Iŋɛ́ yèé tse#ɛ́, Ɔma bíbí‐ɛ̀#ɛ́ wà náàyɛ̀ si. 11 Tsí kò tã́ bɛ̀ fòò. Yèé tɛ̀ɛ́ ró#ɛ́ ní dzɛ́ ní Ɔ̀ɖáyé tse tsí àa wà táyè gbà ńǹtá-Yèésù Kírísítò Ɔlá-wa. Iŋɛ́ yèé tse#ɛ́, Yèésù Kírísítò#ɛ́ ní tɔ́tse àŋírĩ-àwa-Ɔ̀ɖáyé méèdzì báàyí, tsí àa ɖɔ̃̀ si#ɛ́.

Kírísítò yà níìkã̀ fú Áɖàmì

12 Ɔ̀nyà ɔ̀kã̀ntso dzàbi-Ɔ̀ɖáyé, tsí àbi dzídzɛ wɔ̀ náyé gbaŋgba#á kpó. Ɛnɛ#ɛ́, Áɖàmì† ni. Tsí náàtsùgbé-àbi yèé ó dzɛ bɛ́ɛ̀#ɛ́, ó fa ikú wá ńǹtá-ɔ̀nyà ŋa. Tsí ikú#ɛ́ wà kpa ɔ̀nyà ɔ̀kã̀lɔ́ɔ̀kã̀ kpó náyé#ɛ́, iŋɛ́ yèé tse#ɛ́, ɔ̀nyà kpó dzàbi-Ɔ̀ɖáyé. 13 Fee, àbi dzídzɛ ti wà náyé#ɛ́ si tã́ná Ɔ̀ɖáyé kó wáa mú ɛkpa‐ɛ̀, tsí ń bɔwɔ́-Mɔ̀ɔ́sè†. Ńbí ɛkpa-kã̀ kpókpó kò wà#á, à kàkó nyáa fɔ̀ ní ɔ̀nyà-kã̀ lò sé ɛkpa, tsí dzàbi. 14 Ó ɖi, ti ńǹwèrè yèé Áɖàmì gbé#ɛ́ títí wáa tó ńǹwèrè yèé Mɔ̀ɔ́sè gbo gbé#ɛ́, ikú òŋu wà kpa ɔ̀nyà ŋa gé ni. Ó kpa ɛnɛ yèé ŋa gìɖì gbo kò dzàbi kíbí Áɖàmì, ɛnɛ yèé tsɛ̃̀tsɛ̃̀ dzàbi#ɛ́. Áɖàmì#ɛ́ dzɔ ɛnɛ yèé nákó wáa wá náànyìwà#á ńǹrɔ́-kã̀.

15 Ó ɖi, àbi yèé Áɖàmì dzɛ#ɛ́ fee, kò nɛ́ ká ń ɖé bá iŋɛ́-ɔ̀fɛ́ yèé Ɔ̀ɖáyé wà fúnɛ#ɛ́ nɔ́ɔ̀nà-kã̀ kpókpó. Àa mà ní ɔ̀nyà ɛ̀gbɛ̀lɛ́ɛ̀gbɛ̀ kú náàtsùgbé-àbi yèé ɔ̀nyà ɔ̀kã̀ntso dzɛ#ɛ́. Ó ɖi, ore-ɔ̀fɛ́ yèé Ɔ̀ɖáyé wà tse fúnɛ#ɛ́ lárè sã́ŋú sã́ŋú. Tsí iŋɛ́-ɔ̀fɛ́ yèé gbo ó wà fú ɔ̀nyà ɛ̀gbɛ̀lɛ́ɛ̀gbɛ̀ gbà ńǹtá-ɔ̀nyà ɔ̀kã̀ntso, ɛnɛ yèé dzɛ́ Yèésù Kírísítò#ɛ́, òŋu gbo tɔ́ lárè ró. 16 Tsí iŋɛ́-ɔ̀fɛ́ yèé Ɔ̀ɖáyé wà fúnɛ#ɛ́, iŋɛ́ yèé náa bí#ɛ́ gbà níìkã̀ fú iŋɛ́ yèé àbi dzídzɛ-ɔ̀nyà ɔ̀kã̀ntso bí#ɛ́. Ɔ̀nyà ɔ̀kã̀ntso dzàbi, tsí ó bá ɛdzɔ́ kpíkpè-Ɔ̀ɖáyé wá ńǹtá-ɔ̀nyà kpó. À dzàbi-Ɔ̀ɖáyé kpíkpɔ̀. Ó ɖi, Ɔ̀ɖáyé òŋu, ɔ̀yà yèé ó tse fú ɔ̀nyà ŋa#á ní dzɛ́ ní ó gbà ŋá dzɔ̀ɔ́ nárũ-ɛdzɔ́ kpíkpè#ɛ́. 17 Àtsùgbé-àbi yèé ɔ̀nyà ɔ̀kã̀ntso dzɛ#ɛ́, ikú wà kpa ɔ̀nyà kpó. Ó ɖi, ɔ̀nyà ɔ̀kã̀ntso ní sì dzàbi#ɛ́. Ó ɖi, iŋɛ́ yèé àa wà gbà ti ńɖi-Yèésù Kírísítò òŋu níìkã̀ntso sɔ̃́ŋú#ɛ́ lárè. Ɔ̀ɖáyé wà tse ore-ɔ̀fɛ́ kpíkpɔ̀ fú wa tó bɛ́ɛ̀, tsí wà gbà wá nɔ́ɔ̀nyà-atsòtítɔ́ nódzú-ara‐ɛ̀ gbo. Yèé lárè ró#ɛ́ ní wà dzɛ́ ní ɔ̀nyà ɔ̀kã̀lɔ́ɔ̀kã̀ kpó yèé ŋa ó wà fú ńŋɛ́-ɔ̀fɛ́ yèé#ɛ́, à nákó gbé náàyɛ̀-àrìtã́, tsí dzoyè gbo àtsùgbé-Yèésù Kírísítò òŋu níìkã̀ntso.

18 Ńbɛ̀ɛ́, kíbí ó dzɛ́ ní ɔ̀nyà ɔ̀kã̀ntso dzàbi, tsí àbi-òŋu níìkã̀ntso#ɛ́ fa ɛdzɔ́ kpíkpè-Ɔ̀ɖáyé wá ńǹtá-ɔ̀nyà kpó#ɛ́, ńǹrɔ́-kã̀ bɛ́ɛ̀ ké ní itsɛ́-òtítɔ́ yèé ɔ̀nyà ɔ̀kã̀ntso gbo tse#ɛ́, ó gba ɔ̀nyà kpó dzɔ̀ɔ́ nárũ-ɛdzɔ́ kpíkpè-Ɔ̀ɖáyé, tsí tse tsí à wà náàyɛ̀ si#ɛ́. 19 Dzɔ̀ɔ́ dzɔ̀ɔ́#ɛ́, ɔ̀nyà ɔ̀kã̀ntso kò rɛ̃tígbè-Ɔ̀ɖáyé, tsí ó tse tsí ɔ̀nyà ɛ̀gbɛ̀lɛ́ɛ̀gbɛ̀ ɖi adzàbi. Ńǹrɔ́-kã̀ bɛ́ɛ̀ ké ní ɔ̀nyà ɔ̀kã̀ntso gbo rɛ̃tígbè Ɔ̀ɖáyé, tsí ó tse tsí Ɔ̀ɖáyé nákó gba ɔ̀nyà ɛ̀gbɛ̀lɛ́ɛ̀gbɛ̀ nɔ́ɔ̀nyà-atsòtítɔ́ nódzú-ara‐ɛ̀#ɛ́.

20 Ká fɔ̀ gìɖì#ɛ́, Ɔ̀ɖáyé mú ɛkpa‐ɛ̀ bɔwɔ́-Mɔ̀ɔ́sè, tsí ɛkpa#á tse tsí àbi dzídzɛ kpɔ̀ máa ni. Ó ɖi, ńbí àbi dzídzɛ kpɔ̀#ɛ́, ore-ɔ̀fɛ́-Ɔ̀ɖáyé gbo tɔ́ kpɔ̀ lárè sã́ŋú sã́ŋú ró. 21 Ńbɛ̀ɛ́, kíbí ɔ̀nyà ŋa kàkó nyáa kɔ àrìmáa dzàbi, tsí ó bá ikú wá fú ŋa#á, bɛ́ɛ̀ ké ní Ɔ̀ɖáyé tse ore-ɔ̀fɛ́‐ɛ̀ gbo fúnɛ òŋu ikpá, àtsùgbée kó gbanɛ nɔ́ɔ̀nyà-atsòtítɔ́ nódzú-ara‐ɛ̀, tsí kó gbà ńǹtá-Yèésù Kírísítò Ɔlá-wa, tsí fú wa náàyɛ̀-àrìtã́#á.