Rómà ŋa 4

Àbàràhámì gba Ɔ̀ɖáyé gbɔ́

Àbàràhámì† fe, kò tsi gbágbóǹgbàgbò-àwa ɔma-Ìyúɖà† ŋa ní ó dzɛ́#ɛ́ɛ̀? Ká tse ìsérè nára‐ɛ̀ káyí. Bí iŋɛ́ ŋa#á lɔ fúu fáà ni? 2 Ó má dzɛ́ àtsùgbée iŋɛ́ yèé ŋa Àbàràhámì tse#ɛ́ ní tse tsí Ɔ̀ɖáyé gbàá nɔ́ɔ̀nyà-atsòtítɔ́ nódzú-ara‐ɛ̀#ɛ́, ó má rí ɔ̀nà-kã̀, tsí wà ń nya akpá. Ó ɖi, ɔ̀nà-kã̀ kpókpó kò wà fúu, tsí kó ń nya akpá nódzú-Ɔ̀ɖáyé. 3 À kɔ si ńǸwé-Ɔ̀ɖáyé† ti nára‐ɛ̀ ní: “Àbàràhámì gba Ɔ̀ɖáyé gbɔ́, tsí náàtsùgbée bɛ́ɛ̀#ɛ́, Ɔ̀ɖáyé gbàá nɔ́ɔ̀nyà-atsòtítɔ́ nódzú-ara‐ɛ̀.”^* 4 Àa mà ní bí ɔ̀nyà-kã̀ tsitsɛ́, tsí à sã owó-itsɛ́#ɛ́ fúu#ɛ́, kò tsi iŋɛ́-ɔ̀fɛ́ ní ó gbà bɛ́ɛ̀#ɛ́. Owó yèé wà ní kó gbà fú itsɛ́#ɛ́ ní à sã fúu#ɛ́. 5 Ó ɖi, bí ɔ̀nyà-kã̀ òŋu kò tsitsɛ́-kã̀ kpókpó, tsí ó mú àkaralé‐ɛ̀ si ńǹtá-Ɔ̀ɖáyé, ɛnɛ yèé nákó nyáa gba adzàbi nɔ́ɔ̀nyà-atsòtítɔ́ nódzú-ara‐ɛ̀#ɛ́, kíbí ó tse bɛ́ɛ̀#ɛ́, Ɔ̀ɖáyé nákó gbàá nɔ́ɔ̀nyà-atsòtítɔ́ nódzú-ara‐ɛ̀, iŋɛ́ yèé tse#ɛ́, ó mú àkaralé‐ɛ̀ si ńǹtá‐ɛ̀. 6 Ɖàfíɖì† gbo wíìnyɛ̀-ìrɔ́-bɛ́ɛ̀-kã̀ si. Ó wíìnyɛ̀ ti nára-ɛnɛ yèé ŋa wɛ éwo-ire#ɛ́, ɛnɛ yèé ŋa Ɔ̀ɖáyé kà tse àtsùgbé-itsɛ́ yèé à tse ŋa#á, tã́ná náa gbà ŋá nɔ́ɔ̀nyà-atsòtítɔ́ nódzú-ara‐ɛ̀#ɛ́. 7 Ó ní: “Ɛnɛ yèé ŋa Ɔ̀ɖáyé nɔ àbi-ŋa ǹɖe, tsí kò wà rí íbàɖí-kã̀ kpókpó nára-ŋa ró#ɛ́, à wɛ éwo-ire.” 8 “Ɛnɛ yèé Ɔlɔ́dzɔ́ kò wà tɔ́ àbi‐ɛ̀ ŋa si fúu ró#ɛ́, ó wɛ éwo-ire.”^*

9 Bí ó dzɛ́ bɛ́ɛ̀ fe, nɛ̀ɛ́ dzɛ́ ɛnɛ yèé wɛ éwo-ire#ɛ́ ńǹkɛ̀ɛ́ ni? Ɛnɛ yèé ŋa ɖákó† kíbí ó wà nórò-ɔma-Ìyúɖà ŋa#á gé ní wɛ éwo-ire#ɛ́ɛ̀? Kpɛ́rɛ́! Ɛnɛ yèé kò ɖákó ŋa#á gbo wɛ éwo-ire. Àa fɔ̀ wáa lɔ ńǹsɛ̃̀ɛ̃́ ní Ɔ̀ɖáyé gba Àbàràhámì nɔ́ɔ̀nyà-atsòtítɔ́ nódzú-ara‐ɛ̀, iŋɛ́ yèé tse#ɛ́, Àbàràhámì gbàá gbɔ́. 10 Tsí ńǹwèrè yèé Ɔ̀ɖáyé gbàá bɛ́ɛ̀#ɛ́ fe, tã́ná kó ɖákó nàmí náànyìwà kíbí ó wáa ɖákó#ɛ́ ni? Tã́ná kó ɖákó ni nɔ̀. 11 Ó ɖi, ó wáa ɖákó náànyìwà, tsí lolo-okó ɖíɖá†#á ní wà dzɛ́ ìsèdzè yèé wà nyà ɖíre ní Ɔ̀ɖáyé gbàá nɔ́ɔ̀nyà-atsòtítɔ́ nódzú-ara‐ɛ̀#ɛ́, iŋɛ́ yèé tse#ɛ́, ó gbàá gbɔ́ ńǹwèrè yèé kò ɖákó#ɛ́ ni. Ńbɛ̀ɛ́, Àbàràhámì dzɛ́ gbágbóǹgbàgbò-ɔ̀nyà ɔ̀kã̀lɔ́ɔ̀kã̀ kpó yèé gba Ɔ̀ɖáyé gbɔ́, tsí kò ɖákó#ɛ́. Kíbí à gba Ɔ̀ɖáyé gbɔ́#ɛ́, Ɔ̀ɖáyé gbà ŋá nɔ́ɔ̀nyà-atsòtítɔ́ nódzú-ara‐ɛ̀. 12 Bɛ́ɛ̀ ké ní ó dzɛ́ gbágbóǹgbàgbò-ɛnɛ yèé ɖákó ŋa gbo kpó#ɛ́. Tsí kò tsi ń ti yèé ɛnɛ nyɛ̀ŋɛ̀ ŋa ɖákó sɔ̃́ŋú gé#ɛ́ ni. Ó ɖi, à kɛ́ ɔwɔ́-gbágbóǹgbàgbò-wa Àbàràhámì#ɛ́ gbo nɔ́Ɔ̀ɖáyé gbígbàgbɔ́‐ɛ̀ ńǹwèrè yèé kò ɖákó wòná#á.

Ɔ̀ɖáyé tàlé fú Àbàràhámì

13 Ɔ̀ɖáyé tàlé fú Àbàràhámì† òŋu ɔmalɔ́ma‐ɛ̀ ŋa ní òŋu nákó mú ayé gbaŋgba#á kpó, tsí ń bɔwɔ́-ŋa. Kò tsi náàtsùgbée kíbí Àbàràhámì rɛ̃̀ si nɛ́kpa-Ɔ̀ɖáyé#ɛ́ ní tse tsí Ɔ̀ɖáyé tàlé fúu bɛ́ɛ̀#ɛ́. Ó ɖi, kíbí ó gba Ɔ̀ɖáyé gbɔ́, tsí Ɔ̀ɖáyé gbàá nɔ́ɔ̀nyà-atsòtítɔ́ nódzú-ara‐ɛ̀#ɛ́ ní tse#ɛ́. 14 Bí ó dzɛ́ ní ɛnɛ yèé ŋa wà rɛ̃̀ si nɛ́kpa-Mɔ̀ɔ́sè†#ɛ́, àŋa gé ní wà gba iŋɛ́-ire yèé ŋa Ɔ̀ɖáyé tàlé si#ɛ́, ni ɛnɛ yèé ŋa mú àkaralé si ńǹtá-Ɔ̀ɖáyé#ɛ́, àkaralé-ŋa dzɛ́ iŋɛ́ rírá ńnɛ̀ɛ́. Tsí àlé yèé Ɔ̀ɖáyé ta si gbo#ɛ́ kò nɛ́ɛ̀fɛ́-kã̀ kpókpó ró. 15 Fee, ɛkpa-Mɔ̀ɔ́sè òŋu náa fa inɔ́ bíbí-Ɔ̀ɖáyé wá ńǹtá-nɛ gé ni. Ó ɖi, ńbí à kò ɖá ɛkpa-kã̀ kpókpó si#ɛ́, ɔ̀nyà-kã̀ gbo kà lò sé ɛkpa.

16 Náàtsùgbée bɛ́ɛ̀#ɛ́, ɛnɛ yèé ŋa mú àkaralé-ŋa si ńǹtá-Ɔ̀ɖáyé#ɛ́, àŋa ní náa gba àlé yèé Ɔ̀ɖáyé ta si#ɛ́. Àlé#ɛ́, ore-ɔ̀fɛ́ ní ó dzɛ́#ɛ́, tsí ɛnɛ yèé ŋa gbo kpó dzɛ́ ɔmalɔ́ma-Àbàràhámì ńǹbìmbí ńǹrènrè‐ɛ̀#ɛ́, àlé#ɛ́ dzɛ́ tàŋa gbo. Kò dzɛ́ ti ɛnɛ yèé ŋa wà rɛ̃̀ si nɛ́kpa-Mɔ̀ɔ́sè sɔ̃́ŋú#ɛ́ gé. Ó ɖi, ó dzɛ́ ti ɛnɛ yèé ŋa gbo kpó gba Ɔ̀ɖáyé gbɔ́#ɛ́. Àbàràhámì#ɛ́ dzɛ́ gbágbóǹgbàgbò-àwa kpó ni. 17 À kɔ afɔ̀ si ńǸwé-Ɔ̀ɖáyé† ti nára‐ɛ̀ ní: “Ǹ sɔɛ́ ɖi gbágbóǹgbàgbò fú ìlú kpíkpɔ̀ kpíkpɔ̀.”^* Àbàràhámì dzɛ́ gbágbóǹgbàgbò-àwa kpó nódzú-Ɔ̀ɖáyé, ɛnɛ yèé ó gbà gbɔ́#ɛ́. Ɔ̀ɖáyé#ɛ́ ní náa sɔ ɔ̀nyà kúkú ɖi ɔ̀nyà-àwáàyɛ̀#ɛ́. Òŋu ké ní náa fɔ̀, tsí iŋɛ́ yèé kò wà wòrí#ɛ́ náa wá gbòkã́#á. 18 Àbàràhámì#ɛ́, ńǹwèrè yèé ɔ̀nyà-kã̀ kpókpó kò módzú si ró ní Ɔ̀ɖáyé nákó nyáa tse iŋɛ́ yèé ó fɔ̀ si#ɛ́, òŋu módzú si nɔ́ɔ̀nà si fúu gé ni. Ó mú àkaralé‐ɛ̀ si ńǹtá-Ɔ̀ɖáyé si, tsí ó ɖi gbágbóǹgbàgbò fú ìlú kpíkpɔ̀ kpíkpɔ̀. Bɛ́ ní Ɔ̀ɖáyé fɔ̀ fúu#ɛ́. Ó ní: “Màa tse tsí ɔmalɔ́ma-ɛ̀ɛ ŋa nákó kpɔ̀ bɛ́ gbɛ̃̀ɛ̃̀.”^* 19 Àbàràhámì ti nɛ́ kíbí ɔɖɔ̃́ ɔgɔ́ɔrú (100) bɛ́ɛ̀. Tsí ó wà rí ní ogbó ti ɖɛ ara-òŋu kpó, tsí Sàrá† aya-òŋu gbo kí náàgbàrèbí. Kíbí ó rí bɛ́ɛ̀ gìɖì#ɛ́, àkaralé‐ɛ̀ kò tì mì dzígí. 20 Kò dzèrèbe-kã̀ kpókpó ńnɔ́-ara‐ɛ̀ ti nára-àlé#ɛ́. Kà kàa bɛ́ɛ̀, ó mú àkaralé‐ɛ̀ si ńǹtá-Ɔ̀ɖáyé, tsí àmí kòó si, tsí náa wà nyɛ̀ɛ́. 21 Ó tã́ ńnɔ́‐ɛ̀ si kpó ní àlé yèé Ɔ̀ɖáyé ta si fú òŋu#ɛ́, ó nɛ́kpá, tsí kó nyáa sãã́ fúu òŋu. 22 Náàtsùgbée bɛ́ɛ̀ ní Ɔ̀ɖáyé gbàá nɔ́ɔ̀nyà-atsòtítɔ́ nódzú-ara‐ɛ̀#ɛ́. 23 Kíbí à kɔ si ńǸwé-Ɔ̀ɖáyé si ní: “Ɔ̀ɖáyé gbàá nɔ́ɔ̀nyà-atsòtítɔ́ nódzú-ara‐ɛ̀#ɛ́”,^* kò tsi ti nára-Àbàràhámì sɔ̃́ŋú gé ní à kɔɔ́ si#ɛ́. 24 Ó ɖi, àwa gbo, àa wà ńnɛ̀. Kíbí ó tseé fú Àbàràhámì#ɛ́, ó gba àwa gbo nɔ́ɔ̀nyà-atsòtítɔ́ nódzú-ara‐ɛ̀, iŋɛ́ yèé tse#ɛ́, àa mú àkaralé si ńǹtá-Ɔ̀ɖáyé, ɛnɛ yèé dzí Ɔlá-wa Yèésù ti náàŋírĩ-òkú ŋa wá náyé#ɛ́. 25 Yèésù#ɛ́ ní Ɔ̀ɖáyé múu bɔwɔ́-ɔ̀nyà ŋa, tsí ó kú àtsùgbé-àbi-wa ŋa#á. Ó ɖi, ó dzíi ti náàŋírĩ-òkú ŋa wá náyé, tsí kó ń gbà wá nɔ́ɔ̀nyà-atsòtítɔ́ nódzú-ara‐ɛ̀.