Rómà ŋa 3

Kíbí iŋɛ́ ŋa#á wà bɛ́ɛ̀#ɛ́ fee, kí gìɖì wà nɔ́ma-Ìyúɖà† dzídzɛ́ ná? Tsí okó ɖíɖá† gbo kíbí ó wà nórò-ɔma-Ìyúɖà ŋa#á fe, èrè mɛ̀ɛ́ wà ńnɛ̀? 2 Màa fɔ̀ ní èrè kpíkpɔ̀ wà ńnɛ̀ gìɖì héŋú ni. Náàtsɛ̃̀tsɛ̃̀#ɛ́, ɔma-Ìyúɖà ŋa ní Ɔ̀ɖáyé mú afɔ̀‐ɛ̀ ŋa, tsí ń bɔwɔ́#ɛ́. 3 Ó ɖi, ɔ̀nyà kã̀ŋa náàŋírĩ-ŋa#á, àkaralé kò wà ńǹtá-ŋa. Tsí kíbí àkaralé kò wà ńǹtá-ŋa bɛ́ɛ̀#ɛ́ fee, òŋu ní nákó tse tsí àkaralé kàkó wà ńǹtá-Ɔ̀ɖáyé òŋu#ɛ́ɛ̀? 4 Láyé! Kò tsi bɛ́ɛ̀ ni. Bí ɔ̀nyà ŋa kpó dzɛ́ olí-òɖòbò gìɖì#ɛ́, Ɔ̀ɖáyé òŋu, òtítɔ́ gé ní náa wà wí#ɛ́. Kà tsòɖòbò láyé. À kɔ si ńǸwé-Ɔ̀ɖáyé† ní: “Ɔ̀ɖáyé, bí ò wà wíìnyɛ̀, ɔ̀nyà kpó náa mà ní òtítɔ́ gé ní ò wà wí#ɛ́. Tsí bí à wà kpɛdzɔ́ báɛ gìɖì#ɛ́, ò kà kí nɛ́dzɔ́ láyé. Tɛ̀ɛ gé ní náa dzàre#ɛ́.”^*

5 Bóyá ɔ̀nyà kã̀ŋa nákó wà fɔ̀ ní òkṹnù-wa ŋa tsítse ní náa tse tsí à náa rí mà ní Ɔ̀ɖáyé dzɛ́ atsòtítɔ́#ɛ́. Bí ó dzɛ́ bɛ́ɛ̀ fe, bí àa nákó nya òkpì‐ɛ̀ fáà? Ni kíbí Ɔ̀ɖáyé náa bínɔ́, tsí fɛtí fú wa#á, ó wà tsòkṹnù bá wa ńnɛ̀ɛ́ nɔ̀. (Afɔ̀ yèé ŋa ǹ wà fɔ̀ ńbíbɛ́#ɛ́ òŋu#ɛ́, ó dzɛ́ oŋù-afɔ̀ gé, tsí ǹ wà fɔ̀ ni.) 6 Ó ɖi, láyé! Kò tsi bɛ́ɛ̀ ni. Ɔ̀ɖáyé kà tsòkṹnù. Ó má dzɛ́ ní ó wà tsòkṹnù#ɛ́, kàkó nyáa kpɛdzɔ́ fú ɔ̀nyà ŋa náyé gbaŋgba#á. 7 Ɔ̀nyà òŋu fee, ó ti yà nóòɖòbò tsítse ni. Báàyí#ɛ́, màa nyáa fɔ̀ ní òɖòbò yèé ǹ wà tse#ɛ́ ní wà mɔ́wɔ́ gbè fúnɛ, tsí à náa rí mà ní Ɔ̀ɖáyé òŋu àkaralé wà ńǹtá‐ɛ̀, tsí à náa wà nyɛ̀ɛ́#ɛ́. Bí ó dzɛ́ bɛ́ɛ̀ fe, kí tse tsí à wà kpɛdzɔ́ bá mi ní èmi dzɛ́ adzàbi? 8 Ɔ̀nyà kã̀ŋa gbo wà kpe ɛ́kɔ-wa, tsí wà fɔ̀ ní àa wà wí fú ɔ̀nyà ŋa ní ká wà tse íbàɖí, tsí kó wà fa ire wá. Ɛnɛ yèé wà fɔ̀ bɛ́ɛ̀ ŋa#á, Ɔ̀ɖáyé nákó kpɛdzɔ́ bá ŋa, tsí ɖáàbi fú ŋa dzì ńǹɖì‐ɛ̀.

Ɔ̀nyà-kã̀ kpókpó kò dzɛ́ atsòtítɔ́ nódzú-Ɔ̀ɖáyé

9 Báàyí#ɛ́ fe, kí àwa ɔma-Ìyúɖà† ŋa àa ń láre ɛnɛ yèé kò dzɛ́ ɔma-Ìyúɖà ŋa#á nódzú-Ɔ̀ɖáyé ná? Àa kò lárè ŋá ńŋɛ́-kã̀ kpókpó nɛ́. Ǹ ti nya òkpì‐ɛ̀ wáa lɔ ní ɔma-Ìyúɖà ŋa òŋu ɛnɛ yèé kò dzɛ́ ɔma-Ìyúɖà ŋa#á gbo, àŋa kpó, à kí nɔ́wɔ́-ikpá-íbàɖí tsítse si. 10 Ó ɖi, à ti kɔɔ́ si ńǸwé-Ɔ̀ɖáyé† ní:

“Ɔ̀nyà-kã̀ kpókpó kò wà, tsí dzɛ́ atsòtítɔ́ nódzú-Ɔ̀ɖáyé.

Ɔ̀nyà ɔ̀kã̀ntso gìɖì kò wà, tsí dzɛ́ atsòtítɔ́.^*

11 Ɔ̀nyà-kã̀ kò wà,

tsí wà gbɔ́ òkpì-iŋɛ́ yèé sã̀ ní ká tse#ɛ́-kã̀ kpókpó.

Ɔ̀nyà-kã̀ kpókpó kò wà wo ɔ̀nà yèé à náa gbà,

tsí rí Ɔ̀ɖáyé#ɛ́ gìɖì.

12 Ɔ̀nyà ɔ̀kã̀lɔ́ɔ̀kã̀ kpó, à kɔ ɔ̀nà-Ɔ̀ɖáyé dzɔ̀ɔ́, tsí yagbo.

Ɔ̀nyà-kã̀ kò wà, tsí wà tse iŋɛ́-ire.

Ɔ̀nyà ɔ̀kã̀ntso gìɖì kò wà, tsí wà tse iŋɛ́-ire.^*

13 Kíbí érì náa tsí dzɔ̀ɔ́ si, tsí tse si gbà#á,

bɛ́ɛ̀ ní afɔ̀-arũ-ŋà ŋa wà#á.

Tsí òɖòbò tsítse gé ní náa dzɛ́ tiŋa si#ɛ́.^*

Tsí afɔ̀ yèé náa wà fùɖá nárũ fú ŋa#á,

náa wà kíbí oró-dzàkpàtà bɛ́.^*

14 À kà wíìnyɛ̀-kã̀ kpókpó, tsí kó máa dzɛ́ afɔ̀-èré òŋu afɔ̀-inɔ́ kíkã.

Bɛ́ɛ̀ ní à yà#á.^*

15 Ɛsɛ̀-ŋa náa yá ńré ní ká kpa ɔ̀nyà nóòkú gé ni.

16 Ńǹɖì ɔ̀kã̀lɔ́ɔ̀kã̀ kpó ńbí à náa gbà#á,

tiŋa gé ní dzɛ́ ní ká wà bàdzɛ́ iŋɛ́ fúnɛ, tsí wà múnɛ réré#ɛ́.

17 Kíbí à náa tse gbà, tsí ɖíɖɔ̃̀ náa gbé náàŋírĩ-ɔ̀nyà ŋa#á,

à kò màá.^*

18 À wà gé ni. À kà nɛ́ àrísá-kã̀ kpókpó fú Ɔ̀ɖáyé.”^*

19 Bɛ́ɛ̀ ní à ti kɔɔ́ si ńǸwé-Ɔ̀ɖáyé#ɛ́. Tsí àa mà ní iŋɛ́ kpó yèé à kɔ si nɛ́kpa-Ɔ̀ɖáyé#ɛ́, à kɔɔ́ si fú ɛnɛ yèé ŋa ɛkpa#á nɛ́kpá si ńǹtá-ŋa si#ɛ́ ni. Iŋɛ́ ŋa#á wà bɛ́ɛ̀, àtsùgbée ɔ̀nyà-kã̀ kpókpó kó máa fɔ̀ fùɖá ti nárũ-ara‐ɛ̀ ní òŋu kò mà tã́ná òŋu wà tse, tsí kó má fúnɛ rere gbo ní ɔ̀nyà ŋa náyé gbaŋgba#á kpó#ɛ́, Ɔ̀ɖáyé nákó kpɛdzɔ́ bá ŋa dzì ńǹɖì‐ɛ̀. 20 Òŋu ní tse tsí bí Ɔ̀ɖáyé gba ɔ̀nyà-kã̀ nɔ́ɔ̀nyà-atsòtítɔ́ nódzú-ara‐ɛ̀#ɛ́, kò tsi náàtsùgbée kíbí ɛnɛ nyɛ̀ŋɛ̀ rɛ̃̀ si nɛ́kpa-Mɔ̀ɔ́sè†#ɛ́ ni. Ó ɖi, ɛkpa#á òŋu náa tse tsí ɔ̀nyà ŋa kó wà rí mà ní àŋa wà dzàbi gé ni.

Bí Ɔ̀ɖáyé náa gbanɛ nɔ́ɔ̀nyà-atsòtítɔ́ nódzú-ara‐ɛ̀ gbà fáà?

21 Ó ɖi báàyí#ɛ́, kíbí Ɔ̀ɖáyé náa gbanɛ nɔ́ɔ̀nyà-atsòtítɔ́ nódzú-ara‐ɛ̀ gbà#á, ó nyàá ɖíre fúnɛ. Afɔ̀ yèé bɛ́#ɛ́ kò tsɛdzɔ́-ɛkpa-Mɔ̀ɔ́sè nɔ́ɔ̀nà-kã̀ kpókpó. Ɛkpa-Mɔ̀ɔ́sè#ɛ́ òŋu ká‐ɛ̀ gìɖì òŋu iŋɛ́ yèé agbáfɔ̀-Ɔ̀ɖáyé fɔ̀† ŋa gbo kɔ si#ɛ́ ti nya àyídzá‐ɛ̀ si bɛ́ɛ̀. 22 Òŋu ní dzɛ́ ní ɔ̀nyà ɔ̀kã̀lɔ́ɔ̀kã̀ kpó yèé mú àkaralé‐ɛ̀ si ńǹtá-Yèésù Kírísítò#ɛ́, Ɔ̀ɖáyé náa gbàá nɔ́ɔ̀nyà-atsòtítɔ́ nódzú-ara‐ɛ̀, àtsùgbée kíbí ó gba Yèésù Kírísítò gbɔ́#ɛ́ ni. Èmi ní dzɛ́ bɛ́#ɛ́ kò wà ńɖi-Ɔ̀ɖáyé òŋu. 23 Ɔ̀nyà ɔ̀kã̀lɔ́ɔ̀kã̀ kpó dzàbi-Ɔ̀ɖáyé, tsí iyì‐ɛ̀ ǹɖe ńǹtá-ŋa. 24 Ó ɖi, Ɔ̀ɖáyé tse ore-ɔ̀fɛ́ fúnɛ náàrì bere iŋɛ́-kã̀ kpókpó nɔ́wɔ́-ɔ̀nyà-kã̀, tsí ó gbanɛ nɔ́ɔ̀nyà-atsòtítɔ́ nódzú-ara‐ɛ̀ gbà ńǹtá-Yèésù Kírísítò, ɛnɛ yèé wà gbanɛ nɔ́wɔ́-àbi dzídzɛ#ɛ́. 25 Ɔ̀ɖáyé ti mɔ́wɔ́ tɛ Yèésù Kírísítò#ɛ́ si ní kó gbà ńǹtá-ikú‐ɛ̀, tsí tunɔ́ fú òŋu ti nára-adzàbi ŋa bí à gbàá gbɔ́. Kíbí Ɔ̀ɖáyé tse bɛ́ɛ̀#ɛ́, ó wà nyà ɖíre ní dzɔ̀ɔ́ dzɔ̀ɔ́#ɛ́, kà tsòkṹnù ńǹwèrè yèé ɔ̀nyà ŋa wà náàbi dzídzɛ si#ɛ́. Ó fodzú ɖií si, 26 iŋɛ́ yèé tse#ɛ́, ó nɛ́ àtɛ̀si ńǹwèrè nyɛ̀ŋɛ̀. Ɔ̀ɖáyé tse bɛ́ɛ̀, tsí wà ń nyà ɖíre ní báàyí gbo#ɛ́, òŋu kà tsòkṹnù. Ó ɖi, òŋu náa tse òtítɔ́, tsí òŋu náa gba ɛnɛ yèé gba Yèésù gbɔ́#ɛ́ nɔ́ɔ̀nyà-atsòtítɔ́ nódzú-ara-òŋu.

27 Kíbí ó dzɛ́ bɛ́ɛ̀#ɛ́ fee, ɔ̀nà-kã̀ wà fú ɔ̀nyà-kã̀, tsí kó wà ń nya akpá róò? Kpɛ́rɛ́! Ɔ̀nà-kã̀ kpókpó kò wà ró, iŋɛ́ yèé tse#ɛ́, kò tsi afɔ̀-ká wà rɛ̃̀ si nɛ́kpa-Mɔ̀ɔ́sè ró ni. Ó ɖi, iŋɛ́ yèé kpã́dzú báàyí#ɛ́ ní dzɛ́ ká nɛ́ àkaralé si ńǹtá-Yèésù Kírísítò#ɛ́. 28 Àa rí mà ní bí ɔ̀nyà-kã̀ nɛ́ àkaralé si ńǹtá-Yèésù Kírísítò#ɛ́, Ɔ̀ɖáyé náa gbàá nɔ́ɔ̀nyà-atsòtítɔ́ nódzú-ara‐ɛ̀. Kò tsi afɔ̀-ɛnɛ nyɛ̀ŋɛ̀ kó wà rɛ̃̀ si nɛ́kpa-Mɔ̀ɔ́sè ni. 29 Ɔ̀ɖáyé#ɛ́ fe, ɔma-Ìyúɖà† ŋa sɔ̃́ŋú gé ní ó dzɛ́ Ɔ̀ɖáyé fú#ɛ́ɛ̀? Ó dzɛ́ Ɔ̀ɖáyé fú ɛnɛ yèé kò dzɛ́ ɔma-Ìyúɖà ŋa#á gbo nɔ̀. Ìɖéǹɖè ni, ó dzɛ́ Ɔ̀ɖáyé fú ɛnɛ yèé kò dzɛ́ ɔma-Ìyúɖà ŋa#á gbo, 30 iŋɛ́ yèé tse#ɛ́, Ɔ̀ɖáyé ɔ̀kã̀ntso gé ní wà#á. Bí ɔma-Ìyúɖà ŋa nɛ́ àkaralé si ńǹtá-Yèésù Kírísítò, Ɔ̀ɖáyé#ɛ́ ní nákó gbà ŋá nɔ́ɔ̀nyà-atsòtítɔ́ nódzú-ara‐ɛ̀#ɛ́. Bɛ́ɛ̀ ké ní bí ɛnɛ yèé kò dzɛ́ ɔma-Ìyúɖà ŋa#á gbo nɛ́ àkaralé si ńǹtá-Yèésù Kírísítò#ɛ́, nákó gba àŋa gbo nɔ́ɔ̀nyà-atsòtítɔ́ nódzú-ara‐ɛ̀#ɛ́. 31 Kíbí ó dzɛ́ bɛ́ɛ̀#ɛ́, àa kò wà fɔ̀ ní àkaralé yèé àa nɛ́ si ńǹtá-Yèésù Kírísítò#ɛ́ tse tsí ɛkpa-Mɔ̀ɔ́sè òŋu kò dzɛ́ iŋɛ́-kã̀ kpókpó ró. Láyé! Kò tsi bɛ́ɛ̀ ni. Kà kàa bɛ́ɛ̀, àa wà nyà ɖíre ní òŋu gbo dzɛ́ iŋɛ́ kpàtàkìì-kã̀ ni.