Rómà ŋa 2

Ɔ̀ɖáyé kà kpɛdzɔ́-òkṹnù bánɛ

Ǹ ní fòò, ìwɔ òŋu, ò wà kpɛdzɔ́ bá ɛnɛ nyɛ̀ŋɛ̀ ŋa, tsí wà ɖáàbi fú ŋáà? Báàyí#ɛ́, ò sã̀ dzálɛ̀ kpó nódzú-Ɔ̀ɖáyé ńnɛ̀ɛ́ nɔ̀! Kí ìwɔ òŋu ò dzɛ́ gìɖì ná? Ò kò mà ní kíbí ò wà kpɛdzɔ́ bánɛ, tsí wà ɖáàbi fúnɛ#ɛ́, ara-ɛ̀ɛ gìɖì ní ò wà ɖáàbi fú bɛ́ɛ̀#ɛ́ɛ̀? Iŋɛ́ yèé tse#ɛ́, íbàɖí yèé ɛnɛ yèé ò wà kpɛdzɔ́ bá ŋa#á wà tse#ɛ́, òŋu ké ní ìwɔ gbo ò wà tse#ɛ́ fe. 2 Àwa kpó àa mà ní ɛnɛ yèé wà tse iŋɛ́-ìtserú-bɛ́ɛ̀ ŋa#á, Ɔ̀ɖáyé náa kpɛdzɔ́ bá ŋa si nɛ́kpa-òtítɔ́. 3 Tsí ìwɔ, ò wà kpɛdzɔ́ bánɛ, tsí wà ɖáàbi fúnɛ. Íbàɖí yèé ɛnɛ yèé ò wà kpɛdzɔ́ bá ŋa#á wà tse#ɛ́, òŋu ké ní ìwɔ gbo ò sì wà tse#ɛ́. Ɛnɛ̀-mi, kíbí ò wà tse bɛ́ɛ̀#ɛ́ fe, ò wà tse ìsérè ní òŋu nákó nyáa bɔ́ nɛ́dzɔ́ kpíkpè-Ɔ̀ɖáyé niì? Láyé! Ò kàkó nyáa bɔ́ ńnɛ̀. 4 Ɔ̀ɖáyé fee, olóore ní ó dzɛ́#ɛ́. Náa nɛ́ àtɛ̀si, tsí náa fɛ̀ɖɔ̃̀ tù gbo. Kíbí Ɔ̀ɖáyé wà bɛ́ɛ̀#ɛ́ fe, ò kò wà ń kpe iŋɛ́-kã̀ kpókpóò? Ó wà ní kó yéɛ ní kíbí Ɔ̀ɖáyé dzɛ́ olóore#ɛ́, àtsùgbée o dzɛ́, tsí o nyíìlò kpaɖà ni. 5 Tsí ìwɔ òŋu, ɛ̀ɖɔ̃̀ kã̀ɛ́ si tó bɛ́ɛ̀, tsí ò kò wà wò ní òŋu kó nyíìlò kpaɖà. Kíbí ò wà tse bɛ́ɛ̀#ɛ́, ò wà bèrè fú ara-ɛ̀ɛ, tsí wà fa inɔ́-bíbí-Ɔ̀ɖáyé wá ńǹtá-ara-ɛ̀ɛ nɔ́dzɔ́ yèé bàa#á ńnɛ̀. Ɔdzɔ́ nyɛ̀ŋɛ̀#ɛ́, ɔdzɔ́-inɔ́ bíbí-Ɔ̀ɖáyé ni, tsí nákó kpɛdzɔ́ bánɛ si nɛ́kpa-òtítɔ́, 6 tsí nákó sã ɛŋɛ̀ fú ɛnɛ kṹnukṹ ti nára-iŋɛ́ yèé ó tse#ɛ́. 7 Tsí ɛnɛ yèé ŋa náa wà gbódzú, tsí wà tse ire, tsí wà wò ní Ɔ̀ɖáyé kó tse tsí àŋa kó nɛ́ iyì, tsí kó wà nyɛ àŋa, tsí àyɛ̀-àŋa kó máa ra láyé#ɛ́, Ɔ̀ɖáyé nákó fú ɛnɛ nyɛ̀ŋɛ̀ ŋa náàyɛ̀-àrìtã́. 8 Ó ɖi, ɛnɛ yèé ŋa náa wà wo ti ara-ŋa sɔ̃́ŋú gé, tsí à kà wò ní àŋa kó wà fa ɛkpa-òtítɔ́, tsí íbàɖí tsítse gé ní náa wà ńǹsérè si fú ŋa si#ɛ́, ɛnɛ nyɛ̀ŋɛ̀ ŋa òŋu, Ɔ̀ɖáyé nákó nya inɔ́ bíbí‐ɛ̀ ɖíre fú ŋa, tsí nákó kpɛdzɔ́ bá ŋa, tsí ɖáàbi kpa ŋá. 9 Ɛ̃ɛ̃! Ɔ̀nyà ɔ̀kã̀lɔ́ɔ̀kã̀ kpó yèé náa tse íbàɖí#ɛ́, àtsubi òŋu ìréré lákṹ-kã̀ nákó báa. Nákó bá ɔma-Ìyúɖà† ŋa náàtsɛ̃̀tsɛ̃̀, tsí bá ɛnɛ yèé kò dzɛ́ ɔma-Ìyúɖà ŋa#á gbo. 10 Ó ɖi, ɛnɛ yèé wà tse ire ŋa#á, Ɔ̀ɖáyé nákó mú iyì‐ɛ̀ bɔwɔ́-ŋa, tsí nákó nyɛ̀ ŋá, tsí tse tsí à nákó gbé ńtútùúrɔ̀ si. Ɔma-Ìyúɖà ŋa ní nákó tsɛ̃̀tsɛ̃̀ tseé fúu#ɛ́, tsí nákó tseé fú ɛnɛ yèé kò dzɛ́ ɔma-Ìyúɖà ŋa#á gbo. 11 Ó ɖi fee, èmi ǹ dzɛ́ bɛ́, èmi mà tse bɛ́, nyɛ̀ŋɛ̀ òŋu kò wà ńɖi-Ɔ̀ɖáyé.

12 Afɔ̀-kã̀ gbo wà. Òŋu ní wà dzɛ́ ní ɛnɛ yèé ŋa kpó kò dzɛ́ ɔma-Ìyúɖà ŋa#á, tsí à kò gba ɛkpa-Mɔ̀ɔ́sè†, tsí à náa wà dzàbi-Ɔ̀ɖáyé#ɛ́, à nákó tsɛ̀rá kpó. Kíbí ó dzɛ́ gìɖì ní à kò gba ɛkpa#á gìɖì#ɛ́, à nákó tsɛ̀rá kpó gé ni. Tsí ɛnɛ yèé ŋa gbo kpó ma ɛkpa-Mɔ̀ɔ́sè, tsí à wà dzàbi-Ɔ̀ɖáyé#ɛ́, Ɔ̀ɖáyé nákó gbà ńǹtá-ɛkpa#á, tsí kpɛdzɔ́ bá ŋa. 13 Iŋɛ́ yèé tse#ɛ́, ɛnɛ yèé ŋa náa wà rɛ̃tígbè-iŋɛ́ yèé ɛkpa-Ɔ̀ɖáyé† wà fɔ̀#ɛ́ sɔ̃́ŋú gé#ɛ́, Ɔ̀ɖáyé kàkó nyáa gbà ŋá nɔ́ɔ̀nyà-atsòtítɔ́ nódzú-ara‐ɛ̀. Ó ɖi, ɛnɛ yèé ŋa náa wà rɛ̃tígbè-iŋɛ́ yèé ɛkpa#á wà fɔ̀#ɛ́, tsí wà rɛ̃̀ si ńnɛ̀#ɛ́, àŋa ní Ɔ̀ɖáyé náa gbà nɔ́ɔ̀nyà-atsòtítɔ́ nódzú-ara‐ɛ̀#ɛ́. 14 Ó ɖi, ɛnɛ yèé kò dzɛ́ ɔma-Ìyúɖà ŋa#á, àŋa òŋu, à kò ma afɔ̀-kã̀ ti nára-ɛkpa-Mɔ̀ɔ́sè. Ó ɖi, ńǹwèrè kã̀ŋa#á, ɔ̀nyà kã̀ŋa náa wà tse si ńǹtá-iŋɛ́ yèé ɛkpa#á wà fɔ̀#ɛ́ náàrìmà. Kíbí à wà tse bɛ́ɛ̀ náàrìma afɔ̀-kã̀ ti nára-ɛkpa#á, à wà nyà ɖíre ní àŋa ká-àŋa gìɖì ní dzɛ́ ɛkpa fú ara-àŋa#á. 15 À wà nyà ɖíre gbo ní Ɔ̀ɖáyé kɔ ɛkpa‐ɛ̀#ɛ́ si ńǹsérè si fú àŋa, tsí àŋa ká-ŋa, à màá si bɛ́ɛ̀. Tsí ńǹwèrè kã̀ŋa, ìsérè tàŋa ká-ŋa náa wà bá ŋa fɔ̀ ní à tse íbàɖí, tsí ńǹwèrè kã̀ŋa gbo#ɛ́, ìsérè-ŋa náa wà fɔ̀ fú ŋa ní à tse ire. 16 Afɔ̀ yèé ŋa ǹ wà fɔ̀ ńbíbɛ́#ɛ́, ɔ̀nà‐ɛ̀ nákó wáa má fúnɛ rere nɔ́dzɔ́ yèé Ɔ̀ɖáyé nákó gbà ńǹtá-Yèésù Kírísítò, tsí kpɛdzɔ́ bá ɔ̀nyà ŋa#á. Nákó kpɛdzɔ́ bá ŋa ti nára-iŋɛ́ ɔ̀kã̀lɔ́ɔ̀kã̀ kpó yèé à wà tse ńǹɖúkù gìɖì gbo#ɛ́. Afɔ̀#ɛ́ ní mà wà fɔ̀ ńkɔ̀ ɖíɖɔ̃̀ yèé ǹ wà dzɛ́ fúnɛ#ɛ́.

Kpɔ́lù wà fɔ afɔ̀-ɔma-Ìyúɖà ŋa òŋu ɛkpa-Mɔ̀ɔ́sè

17 Bóyá báàyí#ɛ́, ìwɔ, ò wà kpe ara-ɛ̀ɛ ní òŋu dzɛ́ ɔma-Ìyúɖà†, tsí nà mú àkaralé-ɛ̀ɛ si ńǹtá-ɛkpa-Mɔ̀ɔ́sè† si. Tsí nà wà mú Ɔ̀ɖáyé nya akpá ní ìwɔ gìɖì ní dzɛ́ ɔlá‐ɛ̀#ɛ́. 18 Tsí nà wà fɔ̀ ní òŋu ma awù-Ɔ̀ɖáyé. Tsí ɛ̀kɔ́ yèé òŋu gbà ti ńnɔ́-ɛkpa-Mɔ̀ɔ́sè#ɛ́ mɔ́wɔ́ gbè fú òŋu, tsí òŋu ma ire níìkã̀ fú íbàɖí. 19 Tsí ò karalé si ní ìwɔ ní dzɛ́ afàkpá fú afɔ́dzú ŋa#á, tsí dzɛ́ kanɖé fú ɛnɛ yèé ŋa gbo wà nóòkùkù si#ɛ́. 20 Tsí ò karalé si ní òŋu dzɛ́ aɖíre ɔ̀nà fú ɛnɛ yèé ŋa kò ma iŋɛ́-kã̀ kpókpó#ɛ́, tsí dzɛ́ akɔ́nɛ fú ɛnɛ yèé ŋa gbo kò ɖonùgbó wòná#á. Tsí ò karalé si ní kíbí òŋu gba ɛkpa-Mɔ̀ɔ́sè#ɛ́, ó tse tsí òŋu ma iŋɛ́ ɔ̀kã̀lɔ́ɔ̀kã̀ kpó, tsí ma òtítɔ́-Ɔ̀ɖáyé gbo. 21 Ìwɔ#ɛ́ ní náa sì wà tsɛ̀kɔ́ fú ɔ̀nyà ŋa#á nɔ̀. Kí tse tsí ò kò wà tsɛ̀kɔ́ fú ara-ɛ̀ɛ òŋu ná? Nà wà tsɛ̀kɔ́ fú ɔ̀nyà ŋa ní ká máa tsolè. Bí ó dzɛ́ bɛ́ɛ̀ fe, kí tse tsí ìwɔ ká-ɛ̀ɛ ò wà tsolè? 22 Tsí nà wà tsɛ̀kɔ́ fú ɔ̀nyà ŋa gbo ní ká máa gbaya. Bí ó dzɛ́ bɛ́ɛ̀ fe, kí tse tsí ìwɔ ká-ɛ̀ɛ ò wà gbaya. Ò ní òŋu wà nya iŋɛ ŋa gbo kãdzú, tsí kí tse tsí ò wà tsolè ńlé-iŋɛ ŋa#á? 23 Tsí nà wà mú ɛkpa-Mɔ̀ɔ́sè gbo nya akpá ní òŋu màá tó bɛ́ɛ̀, tsí ò kà sì rɛ̃̀ si nɛ́kpa#á. Kíbí ò wà tse bɛ́ɛ̀#ɛ́, ó tse tsí ɔ̀nyà ŋa wà wíìnyɛ̀-íbàɖí nára-Ɔ̀ɖáyé. 24 Ó ɖi, à kɔ si ńǸwé-Ɔ̀ɖáyé† ní: “Ɛnɛ-ìlú-àledzò ŋa, à wà gbɛ̃ɛ̃́rĩ́ ɛ́kɔ-Ɔ̀ɖáyé náàtsùgbé-iŋɛ́ yèé è wà tse#ɛ́.”^*

25 Afɔ̀-kã̀ gbo wà ró. Òŋu ní wà dzɛ́ ní: Bí ò wà rɛ̃̀ si nɛ́kpa-Mɔ̀ɔ́sè#ɛ́, kíbí à ɖákó fɛ́ɛ#ɛ́,^* èrè wà ńnɛ̀ fɛ́ɛ. Ó ɖi, bí ò kò wà rɛ̃̀ si nɛ́kpa#á, okó ɖíɖá† kò nɛ́ èrè-kã̀ kpókpó fɛ́ɛ. 26 Ká fɔ̀ gbo ní ɔ̀nyà-kã̀ kò dzɛ́ ɔma-Ìyúɖà, tsí kò ɖákó gbo, tsí ó sì wà rɛ̃̀ si nɛ́kpa-Ɔ̀ɖáyé#ɛ́. Bí ò sérè ní Ɔ̀ɖáyé nákó wà rí ɛnɛ nyɛ̀ŋɛ̀ gbà fáà? Nákó wà ríi kíbí ɛnɛ yèé à ɖákó fú#ɛ́ bɛ́ ni nɔ̀. 27 Ɛnɛ yèé bɛ́#ɛ́, lolo-okó ɖíɖá kò wà nára tɛ̀ɛ̀ òŋu, tsí ó sì wà rɛ̃̀ si nɛ́kpa-Ɔ̀ɖáyé#ɛ́. Tsí ìwɔ òŋu fe, Ɔ̀ɖáyé kɔ ɛkpa‐ɛ̀ ŋa si ńǹwé fɛ́ɛ, tsí okó ɖíɖá gbo ɖi orò ńlɛ̀ si fɛ́ɛ, tsí ò wà tse, tsí ò kò sì wà rɛ̃̀ si nɛ́kpa#á. Ɛnɛ yèé à kò ɖákó fú#ɛ́ nákó tse tsí ɛdzɔ́ nákó múɛ. 28 Fee! À kà dzɛ́ ɛ́kɔ gé. Ɛnɛ yèé dzɛ́ ɔma-Ìyúɖà gìɖì gìɖì#ɛ́ kò tsi ɛnɛ yèé dzɛ́ ɛ́kɔ#ɛ́ nákpotu gé#ɛ́ ni. Tsí okó ɖíɖá gìɖì gìɖì gbo#ɛ́, kò tsi lolo-okó yèé wà nára‐ɛ̀#ɛ́ ní wà nyà ɖíre ní ò ɖákó ìɖéǹɖè#ɛ́. 29 Ó ɖi, ɛnɛ yèé dzɛ́ ɔma-Ìyúɖà gìɖì gìɖì#ɛ́ fee, náa wà nyàá ɖíre ti ńnɔ́-ara‐ɛ̀ kpó ní òŋu dzɛ́ ɔma-Ìyúɖà ìɖéǹɖè ni. Tsí okó ɖíɖá† yèé gbo dzɛ́ gìɖì gìɖì#ɛ́ ní dzɛ́ ìrɔ́ yèé Mímí-Ɔ̀ɖáyé† náa tse ńnɔ́-nɛ#ɛ́. Kò tsi ɛkpa yèé à kɔ si ńǹwé#ɛ́ ní náa tseé#ɛ́. Ɔ̀nyà-ìrɔ́ yèé bɛ́#ɛ́, Ɔ̀ɖáyé ní náa wà nyɛ̀ɛ́#ɛ́, ɔ̀nyà kà nyɛ̀ɛ́.