Rómà ŋa 1

Ìwé fú ɛnɛ-Rómà ŋa

Èmi Kpɔ́lù, àtsìtsɛ́-Yèésù† Kírísítò† ní wà tse ìwé yèé bɛ́ fú ŋɛ́#ɛ́. Ɔ̀ɖáyé tsã̀ mí ní èmi kó dzɛ́ adzítsɛ́-Yèésù†, tsí nyà mí si níìkã̀ gbo náàtsùgbée n wà dzíkɔ̀ ɖíɖɔ̃̀ fúnɛ.

2 Ikɔ̀#ɛ́, Ɔ̀ɖáyé ti tàlé‐ɛ̀ si ìwèrè‐ɛ̀ ti dzɛ̃̀. Ó gbà ńǹtá-agbáfɔ̀-Ɔ̀ɖáyé fɔ̀† ŋa, tsí tàlé#ɛ́, tsí à kɔɔ́ si ńǸwé-Ɔ̀ɖáyé† si. 3 Ikɔ̀#ɛ́ wà wíìnyɛ̀ ti nára-Ɔma bíbí-Ɔ̀ɖáyé Yèésù Kírísítò Ɔlá-wa. Ó wáa ɖi ɔ̀nyà. Náro-ólú Ɖàfíɖì† ní à bíi#ɛ́. Tsí ó kú. 4 Ó ɖi, Ɔ̀ɖáyé dzíi ti náàŋírĩ-òkú ŋa wá náyé, tsí ó dzɛ́ Ɔma bíbí‐ɛ̀ òŋu ikpá lákṹ-kã̀. Tsí ikpá-Mímí-Ɔ̀ɖáyé† wà ńǹtá‐ɛ̀ si. Ɔ̀ɖáyé tse bɛ́ɛ̀, tsí ó má fúnɛ rere ní ó dzɛ́ Ɔma bíbí‐ɛ̀. 5 Gbà ńǹtá-Yèésù Kírísítò#ɛ́, Ɔ̀ɖáyé tse ore-ɔ̀fɛ́ fú mi ní èmi kó ɖi adzítsɛ́-Yèésù náàtsùgbé-ɔ̀nyà-ìlú ŋa kpó ká gbàá gbɔ́, tsí wà tse si ńǹtá-afɔ̀‐ɛ̀ ŋa, tsí wà nyɛ̀ɛ́ gbo. 6 Ó ɖi, ɛ̀ŋɛ gbo, è wà náàŋírĩ-ŋa. È wà náàŋírĩ-ɛnɛ yèé ŋa Ɔ̀ɖáyé tsã̀ ní ká dzɛ́ ti Yèésù Kírísítò#ɛ́. 7 Ńbɛ̀ɛ́, ǹ wà kí ɛ̀ŋɛ yèé wà ńǹlú-Rómà†, tsí Ɔ̀ɖáyé nɛ́ àmúɖɔ̃̀ fú, tsí kpè ní ɛ̀ŋɛ kó dzɛ́ tòŋu akpá akpá, ɛsɛ̀ ɛsɛ̀#ɛ́. Ɔ̀ɖáyé Boba-wa òŋu Yèésù Kírísítò Ɔlá-wa méèdzì ká tse ore-ɔ̀fɛ́ fú ŋɛ́, tsí ká fú ŋɛ́ ńtútùúrɔ̀ gbo.

Kpɔ́lù wà wo kó lɔ káà kpalɛwo olí-Yèésù ŋa ńǹlú-Rómà

8 Náàtsɛ̃̀tsɛ̃̀#ɛ́, ǹ wà gbà ńǹtá-Yèésù Kírísítò, tsí wà ɖɔ́kpɛ́ fú Ɔ̀ɖáyé-mi fú ɛ̀ŋɛ kpó. Iŋɛ́ yèé tse#ɛ́, kíbí è gba Yèésù Kírísítò gbɔ́ si#ɛ́, ó wà fì ńǹɖì ńǹɖì ŋa wérí kpó. 9 Ɔ̀ɖáyé mà ní afɔ̀-òtítɔ́ ní ǹ wà fɔ̀#ɛ́. Ǹ wà dzíkɔ̀ ti nára-Ɔma bíbí‐ɛ̀ fúnɛ, tsí ǹ wà sɛ̃̀ɛ̃́ gbo inɔ́ tã̀ã́, ànyì tã̀ã́. 10 Ó mà ní bí èmi wà wúùre fú òŋu, mà wà tédzú ŋɛ́ ńǹwèrè ɔ̀kã̀lɔ́ɔ̀kã̀, tsí mà wà fɔ̀ ní bí Ɔ̀ɖáyé dzɛ́, nákó fú mi nɔ́ɔ̀nà nɔ́dzɔ́-kã̀, tsí màa wáa kpalɛ̀wò ŋɛ́ ńǹkɛ̀ɛ́. 11 Ǹ wà fɔ̀ bɛ́ɛ̀, iŋɛ́ yèé tse#ɛ́, àmì-ŋɛ́ kò tì wà kpa mí bɔ̀. Òŋu ní tse tsí ǹ wà wo n wá ńɖi-ŋɛ́, tsí Mímí-Ɔ̀ɖáyé kó gbà ńǹtá-mi, tsí n wáa bere kùsɛ̀ɛ̀-Ɔ̀ɖáyé fú ŋɛ́, tsí àkaralé-ŋɛ́ kó wɔlɛ̀ rere#ɛ́. 12 Nàmí ká fɔ̀ gìɖì#ɛ́, èmi gbo, ɛ̀ŋɛ gbo, àkaralé yèé àa nɛ́ si ńǹtá-Yèésù Kírísítò#ɛ́, àa kó dzɔ́ wà ń ɖáàmí le ara-wa ŋa.

13 Ìnàbí-mi ŋa, ǹ wà wò ní e mà ní mà ti wà tse ètò ní n wá ńɖi-ŋɛ́, tsí wáa kpalɛ̀wò ŋɛ́. Ó ɖi, ǹ kà rí ayè gé ni. Ǹ módzú si ní ǹ má wá, tsí wáa tsitsɛ́ náàŋírĩ-ŋɛ́, tsí itsɛ́#ɛ́ kó nɛ́ èrè fú mi. Bɛ́ɛ̀ ní mà tseé náàŋírĩ-olòmírɛ̃̀ yèé kò dzɛ́ ɔma-Ìyúɖà ŋa gbo#ɛ́. 14 Ó ɖi, ǹ dzɛŋɛ̀-ikɔ̀ ɖíɖɔ̃̀ dzídzɛ́ fúnɛ nɔ́wɔ́-ɔ̀nyà ŋa si kpó. Ɛnɛ yèé mádzú ŋa#á òŋu ɛnɛ yèé kò mádzú ŋa#á, amàwé ŋa òŋu ɛnɛ yèé kò ma ìwé ŋa#á gbo, ǹ dzɛŋɛ̀ si nɔ́wɔ́-ŋa si kpó. 15 Náàtsùgbée bɛ́ɛ̀ ní ó le mí si tó bɛ́ɛ̀ ní n wáa dzíkɔ̀ ɖíɖɔ̃̀ fú ɛ̀ŋɛ gbo#ɛ́, ɛ̀ŋɛ yèé wà ńǹlú-Rómà†#á.

Ikɔ̀ ɖíɖɔ̃̀ ti nára-Yèésù#ɛ́, ikpá wà ńnɛ̀

16 Fee! Ká dzíkɔ̀ ɖíɖɔ̃̀ ti nára-Yèésù fúnɛ kà tsanɔ́ fú èmi òŋu. Ikɔ̀ ɖíɖɔ̃̀#ɛ́, ikpá-Ɔ̀ɖáyé wà ńnɛ̀, tsí kó gba ɔ̀nyà kpó yèé nákó gba Yèésù gbɔ́#ɛ́ là. Ó wà bɛ́ɛ̀ fú ɔma-Ìyúɖà† ŋa náàtsɛ̃̀tsɛ̃̀, tsí èkéèdzì‐ɛ̀#ɛ́, ó wà bɛ́ɛ̀ fú ɛnɛ yèé kò dzɛ́ ɔma-Ìyúɖà ŋa#á gbo. 17 Ó ɖi, ikɔ̀ ɖíɖɔ̃̀#ɛ́ wà nya kíbí Ɔ̀ɖáyé náa gbanɛ nɔ́ɔ̀nyà-atsòtítɔ́ nódzú-ara‐ɛ̀#ɛ́ ɖíre fúnɛ. Tsí ɔ̀nà-kã̀ kpókpó gbo kò wà náànyì-ká gba Yèésù Kírísítò gbɔ́ tã́ná Ɔ̀ɖáyé kó gbanɛ bɛ́ɛ̀. À ti kɔɔ́ si ńǸwé-Ɔ̀ɖáyé† ní: “Ɛnɛ yèé gba Ɔ̀ɖáyé gbɔ́#ɛ́, Ɔ̀ɖáyé náa gbàá nɔ́ɔ̀nyà-atsòtítɔ́ nódzú-ara‐ɛ̀, tsí ɛnɛ nyɛ̀ŋɛ̀ nákó rí àyɛ̀.”^*

Ɔ̀nyà kpó dzɛ́ adzàbi nódzú-Ɔ̀ɖáyé

18 Ɔ̀ɖáyé wà nya inɔ́ bíbí‐ɛ̀ ɖíre ti nɔ́ɔ̀rɔ̃. Inɔ́ bíi si tó bɛ́ɛ̀ fú àbi ɔ̀kã̀lɔ́ɔ̀kã̀ kpó yèé ɔ̀nyà ŋa wà dzɛ#ɛ́, òŋu iŋɛ́-íbàɖí ɔ̀kã̀lɔ́ɔ̀kã̀ kpó yèé ŋa à wà tse#ɛ́. Kíbí à wà tse íbàɖí bɛ́ɛ̀#ɛ́, ó wà ɖí ɔ̀nà fúnɛ, tsí ɔ̀nyà ŋa kò ma òtítɔ́ ró. 19 Inɔ́ bí Ɔ̀ɖáyé si bɛ́ɛ̀, iŋɛ́ yèé tse#ɛ́, iŋɛ́ yèé ɔ̀nyà nákó nyáa mà ti nára-Ɔ̀ɖáyé#ɛ́ kò ɖúkù fú ɔ̀nyà-kã̀ kpókpó. Ɔ̀ɖáyé nyàá ɖíre fúnɛ. 20 Kíbí Ɔ̀ɖáyé wà gbà#á, ɔ̀nyà-kã̀ kò ríi wòrí. Ó ɖi, kíbí ó ɖá ayé gbaŋgba#á títí wáa fú nɔ́mbɛ́#ɛ́, iŋɛ́ yèé ó ɖá ŋa kpó#ɛ́ wà nya kíbí ó wà gbà#á ɖíre fúnɛ. Ɔ̀ɖáyé nɛ́kpá, tsí ikpá‐ɛ̀ kò nɛ́ ìkpàkũ, tsí òŋu níìkã̀ntso gbo gé ní dzɛ́ Ɔ̀ɖáyé#ɛ́. Kíbí ó dzɛ́ bɛ́ɛ̀#ɛ́, ɔ̀nyà ŋa kàkó nyáa mú ɖáŋgá-kã̀ kpókpó, tsí ń ɖáa ní àŋa kò màá. 21 Ó ɖi, à ma Ɔ̀ɖáyé#ɛ́ tã́ná à kò sì wà nyɛ̀ɛ́, tsí wà ɖɔ́kpɛ́ fúu kíbí ó dzɔ ní ká wà tseé fúu#ɛ́. Kà kàa bɛ́ɛ̀, ifɛ̀ɛ́nɔ́-ŋa kò má si ró, tsí ìsérè-ŋa gbo yèé kò wà tsitsɛ́ ró#ɛ́ kí nóòkùkù si kpó kpìrìm. 22 Tsí à ɖédzú àŋa nɛ́ ifɛ̀ɛ́nɔ́-kã̀ si ńnɛ̀ɛ́ ni. Ó ɖi, éwo kò wà fú ŋa. 23 Ɔ̀ɖáyé olí-iyì, ɛnɛ yèé kà kú láyé#ɛ́ ní à má wà sɛ̃̀#ɛ́. Ó ɖi, à kɔ̀, tsí dzì ńŋɛ ŋa sísɛ̃̀. À tse iŋɛ ŋa#á, tsí ìkùbɔ̀ ŋa nɛ́ ìwànwà-ɔ̀nyà, ɛnɛ yèé sì dzɛ́ iŋɛ́ tútù#ɛ́, tsí ɔ̀kã̀ ŋa wà kíbí ɛyɛ ŋa, tsí ɔ̀kã̀ ŋa gbo wà kíbí ɛrã-olí-ɛsɛ̀ mɛ́ɛrɛ̃ ŋa, tsí ɔ̀kã̀ ŋa gbo wà kíbí ɛrã-afàńlɛ̀ ŋa.

24 Náàtsùgbée kíbí à wà tse bɛ́ɛ̀#ɛ́, Ɔ̀ɖáyé nya ɔwɔ́ nára-ŋa, tsí kṹnukṹ wà tse yèé wùú#ɛ́. Tsí à wà tse iŋɛ́ yèé kò ɖíirí fú odzú, tsí kò ɖíi gbɔ́ fú etí ŋa#á bá ara-ŋà ŋa. 25 À kɔ̀ ní àŋa kàkó gba afɔ̀-òtítɔ́ ti nára-Ɔ̀ɖáyé, tsí à dzɛ́, tsí gba afɔ̀-òɖòbò òŋu. Ńnɛ̀ ní à wà sɛ̃ iŋɛ́ yèé Ɔ̀ɖáyé ɖá si ŋa#á, tsí à kɔ̀ ní àŋa kàkó sɛ̃ Ɔ̀ɖáyé òŋu ká‐ɛ̀#ɛ́. Ɔ̀ɖáyé#ɛ́ ní sì wà ní ká wà nyɛ̀ òsã́-kã̀, òru-kã̀#á. Ɛ̀tsɛ.

26 Náàtsùgbée kíbí à wà tse bɛ́ɛ̀#ɛ́, Ɔ̀ɖáyé nya ɔwɔ́ nára-ŋa, tsí à kà nyáa mú ara-ŋa, tsí kṹnukṹ náa wà tse iŋɛ́ yèé kò dzɔ ní ɔ̀nyà kó tse ŋa#á. Tsí ɔnɔbɛ̃̀ɛ̃ ŋa wà ǹɖe, tsí wà sũ̀ bá ɔnɔbɛ̃̀ɛ̃ ŋa náàrì nɛ́ anɔ́ nódzú. À sé ɔwɔ́-ayé#ɛ́ ńnɛ̀ɛ́. 27 Bɛ́ɛ̀ ké ní ɔnɔkɛ̃̀ɛ̃ ŋa gbo kɔ ɔnɔbɛ̃̀ɛ̃ ŋa dzɔ̀ɔ́, tsí wà sũ̀ bá ɔnɔkɛ̃̀ɛ̃ ŋa#á. Ó ɖi, ɔnɔkɛ̃̀ɛ̃ òŋu ɔnɔbɛ̃̀ɛ̃ ní wà ní ká ma èwò-ara-ŋa#á. Tsí àŋa òŋu, awù-ɔnɔkɛ̃̀ɛ̃ kó sũ̀ bá ɔnɔkɛ̃̀ɛ̃ gé ní náa wà ŋɔ́ ŋa#á. Kíbí à wà tse iŋɛ́ yèé kò dzɔ ní ɔ̀nyà kó tse nyɛ̀ŋɛ̀ ŋa#á, tsí à sé ɔwɔ́-ayé#ɛ́ si bɛ́ɛ̀#ɛ́, Ɔ̀ɖáyé ti kpɛdzɔ́ bá ŋa dzì ńǹɖì‐ɛ̀ bí ná.

28 Kíbí à kɔ̀ ní àŋa kàkó ma Ɔ̀ɖáyé#ɛ́, Ɔ̀ɖáyé gbo nya ɔwɔ́ nára-ŋa, tsí ìsérè-ŋa kò wà ń ti ɔ̀nyà si ró, tsí à wà tse iŋɛ́ wérewère ŋa. 29 Tsí à ɖi ɔ̀nyà-àrìmáa tse òtítɔ́ ŋa, tsí ɖi ɔ̀nyà-íbàɖí si, tsí odzú-ŋa náa kí ńǹtá-iŋɛ́-nɛ si, tsí à kãnɔ́ gbo si. À náa wà dzowú-nɛ gbo, tsí à náa wà kpa ɔ̀nyà nóòkú gbo, tsí à náa wà rã́ã̀rã̀ gbo, tsí à náa wà ɖàbàrá gbo, tsí à náa wà tsoró bánɛ gbo. À ɖi olí-arũ yíyá ŋa si, 30 tsí à náa wà kpe ɛ́kɔ-nɛ gbo, tsí à ɖi ɔ̀tɛ̀-Ɔ̀ɖáyé, tsí arũ-ŋa náa wà gbó náfɔ̀ gbo, tsí à náa wà tse kɛ́rɛ́kɛ́rɛ́ gbo, tsí wà rí ara-ŋa kadzá. Ɔ̀nà yèé ká gbà, tsí tse íbàɖí#ɛ́ gé ní à náa wà wò#ɛ́. À kà rɛ̃tígbè-boba-ŋà ŋa òŋu ìnà-ŋà ŋa gbo. 31 Tsí à kà nɛ́ ìrã̀ã́mà gbo, tsí à kà nyáa nɛ́ àkaralé si ńǹtá-ŋa gbo, tsí à kà dzáfɔ̀-nɛ gbo, tsí à kà rí ànyínɔ́ fúnɛ gbo. 32 À mà si rere ní Ɔ̀ɖáyé fɔ̀ si ní òŋu nákó kpɛdzɔ́ bá ɛnɛ yèé wà lìlò-ìrɔ́-bɛ́ɛ̀ ŋa#á. À mà si ní ikú ní nákó kpa ŋá#á. Tsí à kò sì wà lò bɛ́ɛ̀ sɔ̃́ŋú gé. Yèé yɔ#ɛ́, à wà gbà si ńǹtá‐ɛ̀ fú ɛnɛ yèé wà lò bɛ́ɛ̀ ŋa gbo#ɛ́.