Rómà ŋa i

Ìwé fú ɛnɛ-Rómà ŋa

Ìwé fú ɛnɛ-Rómà ŋa nyínyà ɖíre

Kpɔ́lù ní kɔ ìwé yèé bɛ́ fú olí-Yèésù yèé ŋa wà ńǹlú-Rómà#á. Ìlú-Rómà ní dzɛ́ ìlú yèé lákṹ lárè kpó ńlɛ̀-Rómà#á, tsí ńbɛ̀ ní ɔ̀gã́-ìdzɔba-ilɛ̀-Rómà wà#á. Ńǹwèrè yèé Kpɔ́lù tse ìwé yèé bɛ́#ɛ́, ó wà ńǹlú-òmírɛ̃̀ si, tsí wà kpaɖí, tsí kó rɛ̃ ɔ̀nà-kã̀ ni. Tsí ó wò ní òŋu kó yà lɔ káà rí ɛgbɛ́-Kírísítò yèé wà ńǹlú-Rómà#á. Kíbí ó rí ní òŋu kàkó nyáa yà gbà lɔ ńbɛ̀#ɛ́, ó tse ìwé yèé bɛ́, tsí ń nya òkpì-ètò yèé Ɔ̀ɖáyé tse ní òŋu kó ń gba ɔ̀nyà ŋa là#á fú ŋa lɔ nɛ́kpa nɛ́kpa.

Ńnɔ́-ìwé#ɛ́, ó wà nyà ɖíre ní ɔ̀nyà ɔ̀kã̀lɔ́ɔ̀kã̀ kpó, ɔma-Ìyúɖà ŋa gbo, ɛnɛ yèé kò dzɛ́ ɔma-Ìyúɖà ŋa#á gbo, àŋa kpó à dzàbi-Ɔ̀ɖáyé. Náàtsùgbée bɛ́ɛ̀#ɛ́, Ɔ̀ɖáyé tse ètò-kã̀, tsí kó ń gbà ŋá là. Tsí ètò#ɛ́ ní wà dzɛ́ ní ká gbàá gbɔ́ ní Yèésù kú si ńǹtá-egi-ìɖáàgàlàdzà, tsí sɛ̃̀ dzí ti náàŋírĩ-òkú ŋa wà náyé. Bí olí-Yèésù-kã̀ gbàá gbɔ́ bɛ́ɛ̀, àbi niì, ɛkpa-Mɔ̀ɔ́sè niì, ikú niì, à kò nɛ́kpá si ńǹtá‐ɛ̀ ró.

Náànyì-bɛ́ɛ̀#ɛ́, Kpɔ́lù wíìnyɛ̀ ti nára-ɔma-Ìyúɖà yèé ŋa kɔ̀, tsí à kò gba Yèésù gbɔ́#ɛ́, (ó wà kpè ŋá ní ɔma-Ìsàràyɛ́lì ŋa,) tsí ó wà fɔ̀ ní àŋa gbo, à wà néètò yèé Ɔ̀ɖáyé tse#ɛ́. Tsí ó tsɛ̀kɔ́ fú ŋa gbo ti nára-kíbí olí-Yèésù ŋa nákó gbé gbà nɔ́Ɔ̀ɖáyé sísɛ̃̀#ɛ́.