Itsɛ́ 28

Kpɔ́lù gbé ńlɛ̀-Mɛ̀lítà gba òtsùkpá mɛ́ɛta

Ńbɛ̀ɛ́, kíbí àa bɔ́ ńnɛ̀, tsí fùɖá bɛ́ɛ̀ tã́#á, à fɔ̀ fú wa ní ńlɛ̀-kã̀ ní àa wà si#ɛ́, tsí omi wérí‐ɛ̀ kòdzá, tsí à náa kpe ilɛ̀#ɛ́ ní Mɛ̀lítà. 2 Ó ɖi, ɛnɛ-ìlú ŋa#á tɔ́wɔ́ gbà wá rere héŋú. Ńǹwèrè nyɛ̀ŋɛ̀#ɛ́, òdzò kpé rírɔ̀, tsí otútù gbo wà tse, tsí à fɛ́ná lákṹ-kã̀ bɛ́ gì, tsí gba àwa kpó si nára-iná#á, tsí àa wà yɛ́ɛ. 3 Tsí Kpɔ́lù gbo lɔ káà kó wàwá-egi gbígbɛ̃ kã̀ŋa, tsí bòkó wáa ń ɖà ńná#á. Ó ɖi, kpamálɛ̀-kã̀ wà ńnɔ́-wàwá ŋa#á, tsí kíbí iná#á kù bòó gé#ɛ́, ó fùɖá, tsí tsákìí nɔ́wɔ́ náàrìmáa nya arũ nára‐ɛ̀. 4 Tsí kíbí ɛnɛ-ìlú ŋa#á rí ní edzò#ɛ́ dzi ɔwɔ́-Kpɔ́lù banɛ́ si bɛ́ɛ̀#ɛ́, à wà fɔ̀ náàŋírĩ-ara-ŋa ní: Ìnyà dzídzɛ-kã̀ kpókpó kò sí ńnɛ̀, idza#á, kpanɛ kpanɛ nóòkú ní ó dzɛ́#ɛ́. À kò rí iŋɛ́ tsítse-ayé gbaŋgba#á báàyí géè? Ó tsikpá, tsí fùɖá náàhũ#ɛ́ tã́. Ó ɖi, Ɔ̀ɖáyé Olí-òtítɔ́ kò dzɛ́ ní kó gbé náàyɛ̀ ró.

5 Tsí Kpɔ́lù òŋu sì gbã edzò#ɛ́ si ńná fú ara‐ɛ̀, tsí kò wà gbɔ́ ɖíɖɔ̃̀-kã̀ kpókpó gìɖì. 6 Tsí à módzú si ní nákó wú nàmí nákó tsubúlɛ̀, tsí kú gbòkã́ ni. Tsí à ɖóro si bɛ́ɛ̀ títí ó kpɛ̃́, tsí à rí ní iŋɛ́-íbàɖí-kã̀ kpókpó kò tseé. Tsí à tédzú kparɔ ìsérè, tsí wà fɔ̀ ńǹkɛ̀ɛ́ ní: Kpɔ́ dza, kò tsi ɔ̀nyà nákpotu ni, iŋɛ-kã̀ ni.

7 Ńbɛ̀ɛ́, ìɖì-ilɛ̀-kã̀ wà sɔ́má bɛ̀, tsí dzɛ́ ti onùgbó-ilɛ̀-Mɛ̀lítà#á, tsí à náa kpe onùgbó#ɛ́ ní Kpòbìlíyù. Ó gbà wá náàledzò rere, tsí rí ìtá-wa títí fú ɔdzɔ́ mɛ́ɛta. 8 Ó ɖi, boba-onùgbó#ɛ́ wà tsàkɔ̃̀rɔ̃̀. Ara‐ɛ̀ gboná si, tsí ó wà tsu ìkùlé-odzudzu gbo. Tsí Kpɔ́lù lɔ ńɖɔ̀‐ɛ̀, tsí káà wúùre fúu, tsí mú ɔwɔ́ lé ńǹtá‐ɛ̀, tsí àrɔ̃̀#ɛ́ tùú. 9 Ńbɛ̀ɛ́, àkɔ̃̀rɔ̃̀-àtíbɔ̀ yèé ŋa wà ńlɛ̀-Mɛ̀lítà#á bɛ̀#ɛ́, à náa wà wá ńɖi-Kpɔ́lù, tsí náa wà wúùre fú ŋa, tsí àrɔ̃̀ náa tù ŋá. 10 Tsí à náa wà nɛ́ àrísá fú wa tó bɛ́ɛ̀. Tsí kíbí àa bòkó wáa ǹɖe, tsí sɛ̃̀ dzì nɔ́ɔ̀nà#á, à fú wa ńŋɛ́ yèé ŋa wà ní àa kó ń rɛ̃ ɔ̀nà#á.

Kpɔ́lù òŋu enìkéèdzì‐ɛ̀ ŋa ǹɖe ńlɛ̀-Mɛ̀lítà, tsí dzì nɔ́ɔ̀nà-ìlú-Rómà

11 Ńbɛ̀ɛ́, àa tse òtsùkpá mɛ́ɛta ńMɛ̀lítà#á bɛ̀, tsí àa sɛ̃̀ ǹɖe, tsí wɔ̀ nɔ́kɔ̃̀-odzómi-kã̀, tsí dzì nɔ́ɔ̀nà. Ɔkɔ̃̀-odzómi#ɛ́ ti ńǹlú-Àlɛ̀kìsã́nɖè, tsí à tse dzɔgidzɔ̀nyà-iŋɛ-Èdzìrɛ́ si nára‐ɛ̀. Òŋu gbo kí ńlɛ̀#ɛ́ si ńǹwèrè-òdzò-awu#ɛ́ ni. 12 Tsí àa làkóò, tsí káà tó ńǹlú-Sìràkúsì, tsí àa ɖóro bɛ̀, tsí tse ɔdzɔ́ mɛ́ɛta, 13 tsí àa sɛ̃̀ ǹɖe bɛ̀ gbo, tsí gbà nétí-àhũ#ɛ́, tsí káà tó ńǹlú-Règíyò. Tsí ó ɖi ńlɛ̀ má‐ɛ̀, tsí afɛ́fɛ́-kã̀ kpé fífɛ́. Ó fɛ́ ti nɔ́wɔ́-ìbú-ayé#ɛ́ bɛ́. Àa ǹɖe bɛ̀, tsí ńnɔ́-ɔdzɔ́ méèdzì gé#ɛ́, àa káà tó ńǹlú-Kpòtìyólì. 14 Kíbí àa tó bɛ̀#ɛ́, àa rí ìnàbí kã̀ŋa, tsí à fɔ̀ fú wa ní àa kó tse adzà-kã̀ ńɖɔ̀-àŋa. Ó ɖi, bí iŋɛ́ ŋa#á lɔ gbà, tsí àa káà tó ńǹlú-Rómà†#á ńnɛ̀ɛ́. 15 Tsí ìnàbí yèé ŋa wà ńRómà#á gbɔ́ ìdzã̀mà-wa ní bɛ́ɛ̀ ní àa bàa#á. Tsí à wáa kpàɖé wa títí ńǹlú-Adzà-Àkpíyù òŋu ńǹlú-yèé à náa kpè ní Ìɖìsɔ̀-Àledzò Mɛ́ɛta#á. Kíbí Kpɔ́lù rí ŋa bɛ́ɛ̀#ɛ́, ó ɖɔ́kpɛ́ fú Ɔ̀ɖáyé, tsí ó sɛ̃̀ ɖáàmí le ara‐ɛ̀.

16 Ńbɛ̀ɛ́, àa káà tó ńǹlú-Rómà, tsí à fú Kpɔ́lù nɔ́ɔ̀nà ní kó gbé ńlé-kã̀ níìkã̀ fú ara‐ɛ̀. Ó ɖi, sɔ́dzà-kã̀ wà ɖèé.

Kpɔ́lù wà wíìnyɛ̀ fú ɔma-Ìyúɖà yèé ŋa wà ńǹlú-Rómà#á

17 Tsí ó ɖi nɔ́dzɔ́-ɛ̀kɛ́ɛta‐ɛ̀, tsí Kpɔ́lù bɛkɔ̀ kpe onùgbó-ɔma-Ìyúɖà† ŋa yèé wà ńRómà† bɛ̀#ɛ́ ní ká wá ńɖɔ̀-òŋu. Tsí à wá, tsí wáa kpìɖé ńɖɔ̀‐ɛ̀, tsí ó wà wí fú ŋa ní: Ìnàbí-mi ɔma-Ìyúɖà ŋa, òŋu kò tse iŋɛ́-íbàɖí-kã̀ kpókpó nára-ɔma-Ìsàràyɛ́lì† ŋa nàmí nára-orò-gbágbóǹgbàgbò-àŋa ŋa. Ó ɖi, à sì mú òŋu si nɛ́ɛ̀ŋà ńYèrúsàlɛ́mì, tsí wáa kɛ́ òŋu bɔwɔ́-ɛnɛ-Rómà ŋa. 18 Tsí ɛnɛ-Rómà ŋa bere òŋu náfɔ̀ ti nára-afɔ̀#ɛ́, tsí à wò ní ká kɔ òŋu dzɔ̀ɔ́, iŋɛ́ yèé tse#ɛ́, à kò rí iŋɛ́-íbàɖí-kã̀ kpókpó nára-òŋu, tsí kó bèrè ní ká ń ɖáàbi kpa òŋu nóòkú. 19 Ó ɖi, kíbí ɔma-Ìyúɖà ŋa kò dzɛ́ ní ká kɔ òŋu dzɔ̀ɔ́#ɛ́, òŋu tédzú sɔ́ afɔ̀#ɛ́ lɔ ńɖi-ɔ̀gã́-ìdzɔba ní kó fɔ̀ɔ́ fú òŋu. Ó ɖi, kíbí òŋu sì tse bɛ́ɛ̀#ɛ́, kò tsi òŋu wà wo òŋu kó mú afɔ̀ bá ɔ̀nyà-ìlú-òŋu ŋa ni. 20 Náàtóoríi bɛ́ɛ̀ ní òŋu kpè ŋá ní ká wá, tsí àŋa kó dzɔ́ banɛ́ afɔ̀#ɛ́. Ó ɖi, àŋa gbo, à ma iŋɛ́ yèé ɔma-Ìsàràyɛ́lì ŋa módzú si nɔ́ɔ̀nà si fú#ɛ́. Náàtsùgbée bɛ́ɛ̀ ní òŋu so wɔ̀rɔ̀-ɛ̀ŋà si#ɛ́.

21 Ńbɛ̀ɛ́, ɔma-Ìyúɖà ŋa#á wà dzɔ́ŋù fú Kpɔ́lù ní: Àŋa kò gba ìwé-kã̀ kpókpó ti ńɖi-ɛnɛ-erè-Yùɖéyà ŋa, tsí kó wíìnyɛ̀-kã̀ ti nára‐ɛ̀. Tsí ìnàbí-àŋa-kã̀ gbo kò gba ikɔ̀-kã̀ ti bɛ̀ wá fú àŋa nàmí kó wáa wíìnyɛ̀-íbàɖí-kã̀ ti nára‐ɛ̀ fú àŋa. 22 Ó ɖi, àŋa wà wò ní bí afɔ̀-kã̀ wà ńǹsérè‐ɛ̀, ni kó fɔ̀ɔ́ fú àŋa, tsí àŋa kó gbɔ́. Iŋɛ́ yèé tse#ɛ́, àŋa mà ní ɔ̀nyà ŋa nya odzú kã ɛgbɛ́ yèé ó wà#á ńǹɖì-ɔ̀kã̀lɔ́ɔ̀kã̀ kpó si gé ni.

23 Ńbɛ̀ɛ́, ɔma-Ìyúɖà ŋa#á ɖá ɔdzɔ́-òmírɛ̃̀-kã̀ fúu ní àŋa kó sɛ̃̀ wáa kpìɖé. Tsí ɔdzɔ́#ɛ́ tó, tsí à sɛ̃̀ wá ńɖɔ̀‐ɛ̀. Ó ɖi, à wá kpíkpɔ̀ láre ti àtsɛ̃̀tsɛ̃̀. Ti náàwúrɔ̀ lɔ fú alɛ́#ɛ́, Kpɔ́lù banɛ́ afɔ̀#ɛ́ bá ŋa. Ó nya àyídzá fú ŋa ti nára-kíbí Ɔ̀ɖáyé bòkó wáa dzoyè gbà#á. Tsí náa wà le oŋù si ńǹtá‐ɛ̀ fú ŋa kũkũkũ ti nára-Yèésù. Ó ɖi, náa wà kɛ́ ìwé-ɛkpa-Mɔ̀ɔ́sè† òŋu ìwé-agbáfɔ̀-Ɔ̀ɖáyé fɔ̀† ŋa, tsí wà ń nyà ɖíre fú ŋa ní ká gba afɔ̀#ɛ́ gbɔ́ ní òtítɔ́ ni. 24 Tsí ɔ̀nyà kã̀ŋa gba afɔ̀#ɛ́ gbɔ́. Ó ɖi, ɛnɛ-àtíbɔ̀ ŋa kɔ̀ ní àŋa kàkó gbà gbɔ́.

25 Ńbɛ̀ɛ́, à wà wo ká ǹɖe, tsí náàŋírĩ-ara-ŋa#á, ìsérè-ŋa kò tse ɔ̀kã̀ntso si gé ni. Tsí Kpɔ́lù mú afɔ̀ ɔ̀kã̀ntso yèé bɔ̀ nɔ́wɔ́‐ɛ̀#ɛ́ máa fú ŋa, tsí ní: Mímí-Ɔ̀ɖáyé† wíìnyɛ̀-kã̀ fú gbágbóǹgbàgbò-ŋà ŋa wáa lɔ gbà ńǹtá-agbáfɔ̀-Ɔ̀ɖáyé fɔ̀ Yèsáyà†. Afɔ̀#ɛ́, òtítɔ́ ni.

26 Ó ní: “Lɔ ńɖi-ɔma-Ìsàràyɛ́lì ŋa, tsí o fɔ̀ fú ŋa ní:

È nákó mú etí-ŋɛ́ ŋa gbɔ̃́ɔ̃̀rã̀ rere tó bɛ́ɛ̀. Ó ɖi, afɔ̀ kàkó yé ŋɛ́.

Tsí è nákó mú odzú-ŋɛ́ ŋa gbo wòrã rere tó bɛ́ɛ̀.

Ó ɖi, è kàkó rí iŋɛ́-kã̀ kpókpó mà.

27 Iŋɛ́ yèé tse#ɛ́, ifɛ̀ɛ́nɔ́ tã́ ɖí ɔma-Ìsàràyɛ́lì ŋa,

àtóoríi ká máa wà gbɔ́ òkpì-afɔ̀-Ɔ̀ɖáyé.

Tsí à ɖi etí, àtsùgbée ká máa wà rɛ̃tígbè‐ɛ̀.

Tsí à ɖi odzú, àtsùgbée ká máa wà rírã.

À tse bɛ́ɛ̀, àtsùgbée ká máa nyí lɔ ńɖɔ̀‐ɛ̀,

tsí kó bɔ ŋá.”^*

28 Tsí Kpɔ́lù wà wí fú ŋa ró ní: Ká mà rere ní Ɔ̀ɖáyé kɛ́ ikɔ̀ ɖíɖɔ̃̀ ti nára-kíbí náa gbanɛ là#á lɔ fú ɛnɛ yèé kò dzɛ́ ɔma-Ìyúɖà ŋa#á. Tsí àŋa òŋu, à nákó rɛ̃tígbè‐ɛ̀.

[ 29 Tsí oŋù-Kpɔ́lù dzilɛ̀ bɛ̀, tsí ɔma-Ìyúɖà ŋa dzì nɔ́ɔ̀nà-ilé, tsí wà náàrã́dzìnyà náàŋírĩ-ara-ŋa kũkũ làkóò si ńǹkɛ̀ɛ́.]

30 Kpɔ́lù gbé ńlé yèé ó gbà, tsí wà sã owó ńǹtá‐ɛ̀ nyɛ̀ŋɛ̀#ɛ́ títí fú ɔɖɔ̃́ méèdzì. Tsí ɛnɛ yèé ŋa kpó náa wá ńɖɔ̀‐ɛ̀#ɛ́, náa gbà ŋá, tsí wíìnyɛ̀ fú ŋa. 31 Ó ɖi, náa wà dzíkɔ̀ fúnɛ ti nára-kíbí Ɔ̀ɖáyé bòkó wáa dzoyè gbà#á, tsí náa wà tsɛ̀kɔ́ fúnɛ ti nára-Yèésù Kírísítò Ɔlá-wa gbo. Kíbí náa wà wíìnyɛ̀ bɛ́ɛ̀#ɛ́, náa mú ɛ̀ɖɔ̃̀ kã ara‐ɛ̀, tsí iŋɛ́-kã̀ kpókpó kà ɖí ɔ̀nà fúu gìɖì.