Itsɛ́ 27

À gbɛ̃́ Kpɔ́lù làkóò ńǹlú-Rómà

Ńbɛ̀ɛ́, Fésítù wáa kɛ́ ìsérè ní àa kó wɔ̀ nɔ́kɔ̃̀-odzómi, tsí ká lɔ ńlɛ̀-Ìtálì. Tsí à mú Kpɔ́lù òŋu abèŋà-òmírɛ̃̀ kã̀ŋa gbo, tsí ń bɔwɔ́-ɔ̀gá-ɛgbɛ́-sɔ́dzà ŋa-kã̀ ní kó gbɛ̃́ ŋa lɔ. À náa kpe ɔ̀gá#á ní Yùlíyù, tsí ó wà náàŋírĩ-ɛgbɛ́-sɔ́dzà yèé ŋa wà tsitsɛ́ fú ɔ̀gã́-ìdzɔba-ilɛ̀-Rómà†#á ni. 2 Tsí àa rí ɔkɔ̃̀-odzómi-kã̀. Ó ti ńǹlú-Àɖàmítì, tsí wáa làkóò nɔ́wɔ́-ìɖìsɔ̀-ɔkɔ̃̀-odzómi yèé ŋa wà ńlɛ̀-Àsíyà#á. Tsí àa wɔ̀ ńnɛ̀, tsí dzì nɔ́ɔ̀nà. Àrìsìtákò yèé ti ńǹlú-Tɛ̀sàlòníkì ńlɛ̀-Màkɛ̀ɖónìyà#á, òŋu gbo wà bá wa nɔ́kɔ̃̀-odzómi#ɛ́. 3 Kíbí ó ɖi ńlɛ̀ má‐ɛ̀#ɛ́, àa káà tó ńǹlú-Sìɖɔ̃́nì, tsí àa ɖóro bɛ̀. Tsí Yùlíyù nyɔ́nɔ́-Kpɔ́lù, tsí ó fúu nɔ́ɔ̀nà, tsí ó lɔ káà rí ídza‐ɛ̀ yèé wà bɛ̀ ŋa#á, tsí ká mɔ́wɔ́ gbè fúu oɖé. 4 Náànyì-bɛ́ɛ̀#ɛ́, àa ǹɖe bɛ̀, tsí sɛ̃̀ dzì nɔ́ɔ̀nà. Ó ɖi, awu nyí, tsí wà tse kpàɖé wa. Náàtsùgbée bɛ́ɛ̀#ɛ́, àa gbà nétí-àhũ#ɛ́ nára-ilɛ̀-Sìkpírò ńbí awu kò wà tse kpíkpɔ̀#ɛ́. 5 Tsí àa gbà náàŋírĩ-àhũ#ɛ́ lɔ sɔ́má-ilɛ̀-Sìlíkì òŋu Kpã̀fílì, tsí káà tó ńǹlú-Mírà nérè-Lùkíyà. 6 Kíbí àa tó bɛ̀#ɛ́, ɔ̀gá-sɔ́dzà ŋa#á rí ɔkɔ̃̀-odzómi-òmírɛ̃̀-kã̀. Ó ti ńǹlú-Àlɛ̀kìsã́nɖè, tsí wáa làkóò nɔ́wɔ́-ilɛ̀-Ìtálì. Tsí ó fɔ̀, tsí àa wɔ̀ ńnɛ̀, tsí sɛ̃̀ dzì nɔ́ɔ̀nà ró.

7 Ńbɛ̀ɛ́, iré-ɔkɔ̃̀-odzómi#ɛ́ nyà bɔ̀, tsí ɖi kpɛ̀lɛ́ɛ́ kpɛ̀lɛ́ɛ́ fú ɔdzɔ́ mɛ́ɛlóle kã̀ŋa, tsí àa tse ìkparà kpíkpɔ̀ tã́ná àa kó nyáa káà tó sɔ́má-ìlú-Kìnìɖí. Kíbí àa tó sɔ́má bɛ̀#ɛ́, awu kò dzɛ́ fú wa gìɖì ní àa kó gbà lɔ nɔ́wɔ́ bɛ̀, tsí àa tédzú gbà nára-gègélè-etí-àhũ ti erè-Sàlàmɔ́nɛ̀, tsí ń gbà nára-ilɛ̀-Kɛ̀rɛ́tì ńbí awu kò wà tse kpíkpɔ̀#ɛ́. 8 Tsí àa tɔ́ tse ìkparà kpíkpɔ̀ bɛ́ɛ̀ ró tã́ná àa kó nyáa gbà nétí-àhũ#ɛ́, tsí lɔ káà tó ńǹɖì-kã̀ yèé à náa kpe ní Ìɖìsɔ̀-ɔkɔ̃̀ Àfɛ́ŋú#ɛ́. Ó sɔ́má-ìlú-Làséyà.

9 Báàyí#ɛ́, ìwèrè kpíkpɔ̀ lɔ ɖí wa, tsí ɔ̀nà rírɛ̃̀-wa#á gbo kò wà bí ire fú wa. Ó ɖi, ɔɖɔ̃́-Ɔdzɔ́-arũ ɖíɖì ti wáa lɔ, tsí ìwèrè-òdzò-awu sɔ́má. Ńbɛ̀ɛ́, Kpɔ́lù wà kã́rã́ ŋa, 10 tsí wà fɔ̀ fú ŋa ní: Idza ŋa, òŋu wà rí iŋɛ́-kã̀. Bí ó dzɛ́ ní àŋa kó wà nɔ́ɔ̀nà rírɛ̃̀#ɛ́ làkóò si#ɛ́, kàkó wáa bí ire fú àŋa. Ó ɖi, ɔkɔ̃̀-odzómi#ɛ́ òŋu arù yèé ŋa kpó ó rù#ɛ́ nákó tsɛ̀rá, tsí kò tsi iŋɛ́ nyɛ̀ŋɛ̀ ŋa sɔ̃́ŋúú gé ni, àŋa ká-àŋa gìɖì gbo, bí àŋa kò máa tse, àŋa nákó kí ńnɛ̀.

11 Ńbɛ̀ɛ́, ɔ̀gã́-ɔkɔ̃̀#ɛ́ òŋu olí-ɔkɔ̃̀#ɛ́ gbo fú ifɛ̀ɛ́nɔ́-òmírɛ̃̀. Tsí ɔ̀gá-sɔ́dzà ŋa#á gbɔ́ afɔ̀ tiŋa láre afɔ̀-Kpɔ́lù. 12 Ó ɖi, ìɖìsɔ̀-ɔkɔ̃̀-odzómi#ɛ́ kò dzɛ́ ìɖì rere-kã̀, tsí ká nyáa gbé bɛ̀ ńǹwèrè-òdzò-awu. Náàtsùgbée bɛ́ɛ̀#ɛ́, ɔ̀nyà kpíkpɔ̀ náàŋírĩ-ŋa wò ní àŋa kó dzì nɔ́ɔ̀nà, tsí bóyá ni àŋa kó tó ńǹɖìsɔ̀-ɔkɔ̃̀-odzómi-Fɔ̀níkì ńlɛ̀-Kɛ̀rɛ́tì, tsí àŋa kó gbé bɛ̀ ńǹwèrè-òdzò-awu#ɛ́. Ìɖìsɔ̀#ɛ́ wà ńǹbú-ayé nɔ́wɔ́-bùkúù òŋu òro-ayé nɔ́wɔ́-bùkúù ké.

Awu lákṹ-kã̀ wà tse ńǹtá-àhũ, tsí bòkó ɖa ɔkɔ̃̀-odzómi#ɛ́ ɖé

13 Ńbɛ̀ɛ́, afɛ́fɛ́-kã̀ kpé fífɛ́ ti nɔ́wɔ́-ìbú-ayé#ɛ́ bɛ́, tsí à ɖédzú ní àŋa nákó nyáa tse si ńǹtá-ètò yèé àŋa tse#ɛ́ ni. Tsí à nya àɖáɖóro-ɔkɔ̃̀#ɛ́ ǹɖe, tsí à dzì nɔ́ɔ̀nà. À gbà nétí-àhũ#ɛ́ nára-ilɛ̀-Kɛ̀rɛ́tì, tsí làkóò. 14 Ó ɖi, títí kó bɔ oɖé gé#ɛ́, awu lákṹ-kã̀ kpé tsítse kũkũ ti ńǹtá-òkè ŋa bɛ́ gbàgbàgbà. À náa kpe awu#ɛ́ ní awu ti òro-ayé nɔ́wɔ́-òntsà. 15 Tsí awu#ɛ́ kɛ́ ɔkɔ̃̀-odzómi#ɛ́ làkóò ńwádzú, tsí kò dzɛ́ ní kó nyí lɔ nɔ́wɔ́-òmírɛ̃̀ ró. Tsí àa tédzú tsikó, tsí awu#ɛ́ kɛ́ wa làkóò ńǹkɛ̀ɛ́ gé ni. 16 Tsí àa gbà nára-ilɛ̀ tsígíɖí-kã̀ ńbí awu kò wà tse kpíkpɔ̀#ɛ́. À náa kpe ilɛ̀#ɛ́ ní Káwúɖà. Ó ɖi, ɔkɔ̃̀-odzómi tsígíɖí-kã̀ wà náànyì-ɔkɔ̃̀ lákṹ#ɛ́, tsí àa tɔ́ tse ìkparà kpíkpɔ̀ bɛ́ɛ̀ ró tã́ná àa kó nyáa tóòsũ̀‐ɛ̀, 17 tsí àa kɛ́ɛ ǹɖe nómi, tsí ń si ńǹtá-ɔkɔ̃̀-odzómi lákṹ#ɛ́. Tsí náànyì-bɛ́ɛ̀#ɛ́, àtɔ̀kɔ̃̀ ŋa mú okù, tsí ɖi ɔkɔ̃̀-odzómi lákṹ#ɛ́ kpã́nyí ní kó máa fɔ́. Tsí à mú àɖáɖóro-ìrɔ́-òmírɛ̃̀-kã̀ gbo si nómi. Iŋɛ́ yèé tse#ɛ́, à wà sá ní àŋa kó máa káà kí ńǹnyarĩ̀-inɔ́-àhũ yèé ŋa wà nétíko-àhũ-erè-Líbì#ɛ́.^* Tsí awu#ɛ́ kɛ́ ŋa làkóò kíbí ó wùú gbà#á. 18 Ńlɛ̀ má‐ɛ̀, kíbí awu#ɛ́ tɔ́ le si ró#ɛ́, tsí wà kɛ́ wa làkóò kũkũkũ#ɛ́, à kó arù ŋa ɖà nómi, náàtsùgbé-ɔkɔ̃̀#ɛ́ kó fɛ́rɛ́. 19 Tsí ó ɖi nɔ́dzɔ́-ɛ̀kɛ́ɛta‐ɛ̀, tsí à mú ɔwɔ́ tàŋa ká-ŋa, tsí ń se iŋɛ́-itsɛ́-ɔkɔ̃̀ ŋa#á gbo ɖà nómi. 20 Tsí àa gbé bɛ́ɛ̀ gba ɔdzɔ́ kpíkpɔ̀ náàrì rí odzúùrɔ̃̀ òŋu àrã̀wo ŋa ró. Tsí awu#ɛ́ gbo le si, tsí wà tse kũkũkũ làkóò bɛ́ɛ̀ ké. Ńbɛ̀ɛ́, odzú-àwa kpó nyà ńǹkɛ̀ɛ́ ní àa kàkó nyáa bɔ́ ńnɛ̀ ró.

21 Ɔdzɔ́ kpíkpɔ̀ gbo ti wáa lɔ, tsí àa kò dzɛ iŋɛ́-kã̀ kpókpó. Ńbɛ̀ɛ́, Kpɔ́lù ǹɖe ɖóro náàŋírĩ-ŋa, tsí wà fɔ̀ fú ŋa ní: Idza ŋa, à rí báàyí nɔ̀. À má ti gbɔ́ afɔ̀-òŋu#ɛ́, àŋa kàá ǹɖe ńlɛ̀-Kɛ̀rɛ́tì. Tsí iŋɛ́ ŋa kàá bàdzɛ́, tsí arù ŋa gbo kàá rá fú àŋa. 22 Ó ɖi báàyí#ɛ́, òŋu wà fɔ̀ fú ŋa ní: Ká gbódzú. Ɔ̀nyà-kã̀ kpókpó náàŋírĩ-ŋa kàkó kí ńnɛ̀, ɔkɔ̃̀-odzómi#ɛ́ sɔ̃́ŋú gé ní nákó rá#á. 23 Ó ɖi, nóoru#ɛ́, Ɔ̀ɖáyé yèé òŋu dzɛ́ tɛ̀ɛ̀, tsí òŋu wà sɛ̃̀#ɛ́, ó bɛ adzítsɛ́-ɔ̀rɔ̃†-kã̀ wá fú òŋu. 24 Tsí adzítsɛ́-ɔ̀rɔ̃#ɛ́ wà fɔ̀ fú òŋu ní: Kpɔ́lù, ɛ̀ɖɔ̃̀ kó máa ɖáɛ. Ó wà ní o lɔ ńɖi-ɔ̀gã́-ìdzɔba ńlɛ̀-Rómà, tsí kó kpɛdzɔ́ fɛ́ɛ. Tsí kíbí Ɔ̀ɖáyé wà wo ire fɛ́ɛ#ɛ́, ó ti tse tsí ɛnɛ yèé ŋa kpó wà nɔ́kɔ̃̀#ɛ́ báɛ#ɛ́ nákó bɔ́ ńnɛ̀, tsí ɛ̀ya kàkó ya ŋá.

25 Tsí Kpɔ́lù wà fɔ̀ fú ŋa ró ní: Idza ŋa, ká gbódzú. Ó ɖi, òŋu nɛ́ àkaralé si ńǹtá-Ɔ̀ɖáyé ní afɔ̀ yèé ó fɔ̀ fú òŋu#ɛ́ nákó tsɛ ìɖéǹɖè ni. 26 Ó ɖi, kíbí iŋɛ́ ŋa#á wà lɔ gbà#á, ó wà ní àŋa kó káà kí nára-ilɛ̀-kã̀.

27 Ńbɛ̀ɛ́, ó ɖi ɔdzɔ́ máàmɛ́ɛrɛ̃‐ɛ̀ báàyí ní awu lákṹ#ɛ́ wà tse bá wa làkóò ńǹtá-àhũ-Mɛ̀ɖìtɛ̀ràné#ɛ́. Tsí ó ɖi ńǹwèrè-ìŋàáŋà, tsí àtɔ̀kɔ̃̀ ŋa#á wà tsèsérè ní àa sɔ́má-ilɛ̀-kã̀. 28 Tsí à kɛ́ okù-kã̀. Okù#ɛ́, à ɖi iŋɛ́ wíwówo-kã̀ si nárũ‐ɛ̀. Òŋu ní à náa ń kpurã àhũ, tsí ká rí nínɔnɔ̀‐ɛ̀#ɛ́. Tsí à kpũ̀rã̀ã́, tsí à rí ɔwɔ́ ogú. Tsí à sɔ́ lɔ oɖé, tsí kpũ̀rã̀ã́ ró, tsí à rí ɔwɔ́ mɛ́ɛɖógú. 29 Ńbɛ̀ɛ́, à wà sá ní ɔkɔ̃̀#ɛ́ kó máa káà gú òkúta ŋa, tsí fɔ́. Náàtsùgbée bɛ́ɛ̀#ɛ́, à mú àɖáɖóro mɛ́ɛrɛ̃ si nómi náànyì-ɔkɔ̃̀#ɛ́, tsí ɖóro si, tsí wà wò ní ilɛ̀ kó yáa má fú àŋa ńǹkɛ̀ɛ́.

30 Tsí àtɔ̀kɔ̃̀ ŋa#á wà wo ká sá fùɖá lɔ. Ńnɛ̀ ní à kɛ́ ɔkɔ̃̀-odzómi tsígíɖí#ɛ́ si ńǹtá-omi, tsí wà tse kíbí ɛnɛ yèé fɔ̀ ní à bòkó lɔ káà mú àɖáɖóro kã̀ŋa gbo si ńwádzú-ɔkɔ̃̀ lákṹ#ɛ́ bɛ́#ɛ́.

31 Tsí Kpɔ́lù wà wí fú sɔ́dzà ŋa#á òŋu ɔ̀gá-ŋa ní: Bí ɛnɛ ŋa#á kò gbé ńnɔ́-ɔkɔ̃̀#ɛ́, è kàkó nyáa rí ɔlà fòò.

32 Kíbí sɔ́dzà ŋa#á gbɔ́ bɛ́ɛ̀#ɛ́, à rɛ́ okù-ɔkɔ̃̀ tsígíɖí#ɛ́, tsí à kɔ̀ɔ́ dzɔ̀ɔ́ ńǹtá-omi#ɛ́, tsí ó lɔ.

33 Tsí kíbí à ɖóro si ní ilɛ̀ kó má#á, Kpɔ́lù wà ɖáàmí le àŋa kpó ní ká wo iŋɛ́-kã̀ dzɛ, tsí ó wà wí fú ŋa ní: Ó ɖi ɔdzɔ́ máàmɛ́ɛrɛ̃‐ɛ̀ nɔ́mbɛ́ ní àŋa wà si náàrì dzɛ iŋɛ́-kã̀ kpókpó#ɛ́. 34 Ó ɖi, ká dzɛŋɛ́ ńǹkɛ̀ɛ́ ɖé, tsí àmí kó kò ŋá, tsí ká nyáa bɔ́ ńnɛ̀. Ó ɖi, irɔ̃-éwo-ŋa ɔma-kã̀ gìɖì kàkó nɔ̀.

35 Kíbí Kpɔ́lù wí fú ŋa bɛ́ɛ̀ tã́#á, ó kɛ́ kpɔ̃́nɔ́, tsí bere ɛ̀tsɛ-Ɔ̀ɖáyé si ńǹtá‐ɛ̀ nódzú-ŋa kpó, tsí ó bùú, tsí kpée dzídzɛ. 36 Ńbɛ̀ɛ́, ara yá ɛnɛ-àtíbɔ̀ ŋa gbo kpó, tsí àŋa gbo, à dzɛŋɛ́. 37 Ó ɖi, àwa ɔ̀nyà ìmarũ yèé wà nɔ́kɔ̃̀#ɛ́, àa dzɛ́ ɔ̀nyà mɛ́ɛrɛ̃ ɖí nɔ́gɔ́ɔrɛ̃ lé ńgboó (276). 38 Tsí kíbí àŋa kpó, à dzɛŋɛ́, tsí yó tã́#á, à mú arù-dzídzɛ yèé bɔ̀ ŋa#á ɖà nómi náàtóoríi ɔkɔ̃̀#ɛ́ kó fɛ́rɛ́.

39 Ńbɛ̀ɛ́, ilɛ̀ má, tsí odzú-àtɔ̀kɔ̃̀ ŋa#á rè, tsí à kò ma ńǹyabisí à wà si#ɛ́. Ó ɖi, à rí akpá-àhũ-kã̀ òŋu ìnyarĩ̀-etí-àhũ. Tsí à tsèsérè ní bóyá ni àŋa kó tu ɔkɔ̃̀#ɛ́ lɔ káà gbè bɛ̀. 40 Tsí à rɛ́ okù-àɖáɖóro ŋa#á, tsí kɔ̀ ŋá dzɔ̀ɔ́ nómi, tsí tú okù-ɔ̀kpá yèé náa nyí ɔkɔ̃̀#ɛ́ gbo ǹɖe gbòkã́. Tsí à mú atsɔ-kã̀ so ńwádzú-ɔkɔ̃̀#ɛ́ náàtsùgbé-awu kó nyáa télèé, tsí à dzì nɔ́ɔ̀nà làkóò nɔ́wɔ́-etílɛ̀-ìnyarĩ̀-etí-àhũ#ɛ́. 41 Ó ɖi, ɔkɔ̃̀#ɛ́ káà kí ńǹnyarĩ̀-inɔ́-omi#ɛ́, tsí iwádzú‐ɛ̀ rì lɔ ńnɔ́-ìnyarĩ̀#ɛ́, tsí kò nɛ́ kó nyáa sɔ́ ró. Tsí kíbí ɔtsã́-omi ŋa#á gbo wà kpa tó gbà#á, à wà fɔ́ ànyì-ɔkɔ̃̀#ɛ́ gé ni.

42 Tsí sɔ́dzà ŋa wà wò ní àŋa kó kpa abèŋà yèé ŋa wà nɔ́kɔ̃̀#ɛ́ nóòkú náàtóoríi ká máa wɛɖò, tsí sá lɔ. 43 Ó ɖi, ɔ̀gá-ŋa kò wà wò ní Kpɔ́lù kó kú, tsí ó kɔ̀ fú ŋa ní ká máa tse bɛ́ɛ̀. Tsí ó tsóŋù fú ɛnɛ yèé máa wɛɖò ŋa#á ní ká tsɛ̃̀tsɛ̃̀ bɔ́ si nómi, tsí fùɖá lɔ náàtàkè, 44 tsí ɛnɛ-àtíbɔ̀ ŋa gbo ká dzì ńǹtá-egi ŋa nàmí ńǹtá-fífɔ́-ɔkɔ̃̀#ɛ́ ŋa, tsí ká fùɖá. Bɛ́ɛ̀ ní àŋa kpó, à tse tsí fùɖá dzá náàtàkè nɔ́wɔ́ nɔ́wɔ́, tsí ɛ̀ya kò ya ɔ̀nyà-kã̀ kpókpó náàŋírĩ-ŋa#á ńnɛ̀ɛ́.