Itsɛ́ 26

Kpɔ́lù wà fɔ afɔ̀-arũ-ara‐ɛ̀ nódzú-ólú Àgíkpà

Ńbɛ̀ɛ́, ólú Àgíkpà wà fɔ̀ fú Kpɔ́lù ní: Òŋu mú oŋù bɔwɔ́‐ɛ̀. Kó wíìnyɛ̀, tsí kó fɔ afɔ̀-arũ-ara‐ɛ̀ ńǹkɛ̀ɛ́.

Tsí Kpɔ́lù gbo tsɔwɔ́ fú ŋa, tsí kó fɔ afɔ̀-arũ-ara‐ɛ̀. Tsí ó ní: 2 Ólú Àgíkpà, nɔ́mbɛ́#ɛ́, òŋu wɛ éwo-ire ní òŋu bòkó fɔ afɔ̀-arũ-ara-òŋu nódzú‐ɛ̀ ti nára-afɔ̀ yèé ŋa kpó ɔma-Ìyúɖà† ŋa ń bá òŋu si#ɛ́. 3 Iŋɛ́ yèé tse#ɛ́, ó ma orò-ɔma-Ìyúɖà ŋa rere, tsí ma àrã́dzìnyà yèé ŋa gbo à wà tse#ɛ́ rere. Náàtsùgbée bɛ́ɛ̀#ɛ́, òŋu wà fɔ̀ fúu ní kó fɛ̀ɖɔ̃̀ tù, tsí kó gbɔ́ oŋù-òŋu.

4 Ó ɖi, ɔma-Ìyúɖà ŋa kpó, à ma kíbí òŋu gbé gbà#á. À ma ìgbèngbé-òŋu ńǹwèrè yèé òŋu ǹɖe nɔ́mɔ̀tsɔ́-òŋu náàŋírĩ-ɛnɛ-ìlú-òŋu ŋa ti náàsòkò nyɛ̀ŋɛ̀ wáa fú òní ńYèrúsàlɛ́mì#ɛ́. 5 À ti ma òŋu ó dzɛ̃̀, tsí bí ó wù ŋá, à nákó nyáa nya àyídzá-òŋu ti nára-kíbí òŋu gbé gbà nɛ́gbɛ́-Fàrísì†#ɛ́. Ɔma-ɛgbɛ́ ŋa#á, à náa múgírí ní àŋa kó rɛ̃̀ si nɛ́kpa-Ɔ̀ɖáyé láre ɛnɛ yèé ŋa kpó wà sɛ̃ Ɔ̀ɖáyé#ɛ́. 6 Ó ɖi báàyí#ɛ́, à wà kpɛdzɔ́ bá òŋu, iŋɛ́ yèé tse#ɛ́, òŋu módzú si nɔ́ɔ̀nà si ní Ɔ̀ɖáyé nákó sã àlé yèé ó ta si fú gbágbóǹgbàgbò-àŋa ŋa#á. 7 Tsí ɔ̀nyà-aro máàméèdzì yèé dzɛ́ ɔmalɔ́ma-Yàkúbù† ŋa#á, àŋa gbo, à módzú si nɔ́ɔ̀nà si bɛ́ɛ̀ ké ní Ɔ̀ɖáyé nákó sã àlé#ɛ́. Tsí náàtsùgbée bɛ́ɛ̀#ɛ́, òsã́-kã̀, òru-kã̀#á, odzú náa kpã́ ŋa si kũkũ, tsí à náa wà sɛ̃ Ɔ̀ɖáyé làkóò gé ni.

Tsí Kpɔ́lù tɔ́ wà wí fúu ró ní: Ólú Àgíkpà, odzú tòŋu gbo wà nɔ́ɔ̀nà si fú àlé#ɛ́. Náàtóoríi bɛ́ɛ̀ ní ɔma-Ìyúɖà ŋa wà mú afɔ̀ bá òŋu#ɛ́. 8 Àŋa ɔma-Ìyúɖà ŋa, kí tse tsí à wà dzèrèbe ní Ɔ̀ɖáyé kàkó nyáa dzí òkú ŋa wá náyé ná? Nákó nyáa tse bɛ́ɛ̀ nɔ̀. 9 Ó ɖi, òŋu ká-òŋu gbo, òŋu tsèsérè ní òŋu kó gba ɔ̀nà ɔ̀kã̀lɔ́ɔ̀kã̀ kpó, tsí òŋu kó nya Yèésù ti Nàsàrɛ́tì#ɛ́ kãdzú. 10 Iŋɛ́-ìrɔ́ nyɛ̀ŋɛ̀ ní òŋu náa tse ńYèrúsàlɛ́mì#ɛ́. Onùgbó-atsɛbɔ-Ɔ̀ɖáyé† ŋa náa fú òŋu nɔ́ɔ̀nà, tsí òŋu náa mú ɛnɛ yèé ŋa dzɛ́ ti Ɔ̀ɖáyé#ɛ́ lɔ káà sé nɛ́ɛ̀ŋà. Tsí bí à ɖáàbi kpa ŋá, tsí sɔ́ ŋa fú ikú#ɛ́, òŋu gbo, òŋu náa gbà si ńǹtá‐ɛ̀. 11 Tsí òŋu náa wà lɔ ńlé-ìkpàɖé-ɔma-Ìyúɖà ŋa† kã̀kã̀ kpeékpeé, tsí wà tsoró bá ŋa. Tsí òŋu náa mú ŋa ńkpá ní ká wíìnyɛ̀-íbàɖí ŋa nára-Yèésù. Tsí kíbí òŋu wà gbà ńǹwèrè nyɛ̀ŋɛ̀#ɛ́, òŋu gboró si tó bɛ́ɛ̀ títí òŋu náa rò ŋá bá lɔ ńǹlú-òmírɛ̃̀ ŋa gìɖì gbo, tsí káà tsoró bá ŋa.

12 Ti nára-bɛ́ɛ̀#ɛ́, ó ɖi nɔ́dzɔ́-kã̀, tsí òŋu làkóò ńǹlú-Ɖàmásì. Onùgbó-atsɛbɔ-Ɔ̀ɖáyé ŋa fú òŋu nɔ́ɔ̀nà, tsí bɛ òŋu làkóò bɛ̀ ní òŋu kó lɔ káà mú atɛ̀náànyì-Yèésù yèé wà bɛ̀ ŋa#á wá. 13 Ńǹwèrè-òsã́ gãgã#á, òŋu làkóò nɔ́ɔ̀nà-ìlú#ɛ́, tsí òŋu rí iná-kã̀. Iná#á ti nɔ́ɔ̀rɔ̃, tsí ó má láre odzúùrɔ̃̀ bɛ́, tsí ó má wérí òŋu enìkéèdzì-òŋu yèé ŋa làkóò bá òŋu#ɛ́. 14 Tsí àŋa tsubúlɛ̀ kpó, tsí òŋu gbɔ́ oŋù-kã̀, tsí oŋù#ɛ́ wà wíìnyɛ̀ fú òŋu ńǹlú-ɔma-Ìyúɖà ŋa ní: Sɔ́lù! Sɔ́lù! Kí tse tsí ò wà tsoró bá mi bɛ́ɛ̀ ná? Nákó le fɛ́ɛ héŋú ní o máa gbà si ńǹtá-awù-mi.

15 Tsí òŋu gbo, òŋu wà bèrèé ní: Ɔ̀gá, nɛ̀ɛ́ ni ná?

Tsí Ɔlá-wa gbo wà dzɔ́ŋù fú òŋu ní: Èmi ní dzɛ́ Yèésù ɛnɛ yèé ò wà tsoró bá#á. 16 Báàyí#ɛ́, ǹɖe ɖóro. Ó ɖi, iŋɛ́ yèé tse tsí ǹ mú ara-mi ŋàɛ́#ɛ́ ní wà dzɛ́ ní ǹ tsã̀ɛ́, tsí o ɖi adzítsɛ́-mi, tsí o wà nya àyídzá fú ɔ̀nyà ŋa ti nára-kíbí ò rí mi gbà nɔ́mbɛ́#ɛ́. Iŋɛ́ kã̀ŋa gbo wà, tsí màa wáa ń ɖíre fɛ́ɛ náànyìwà. Nàa wà wíìnyɛ̀ ti nára-iŋɛ́ nyɛ̀ŋɛ̀ ŋa gbo fú ŋa. 17 Ó ɖi, ǹ bɛ̀ɛ́ làkóò náàŋírĩ-ɔma-Ìyúɖà ŋa òŋu ɛnɛ yèé kò dzɛ́ ɔma-Ìyúɖà ŋa#á. Tsí màa gbàɛ́ dzɔ̀ɔ́ nɔ́wɔ́-ŋa. 18 Ǹ bɛ̀ɛ́ làkóò, tsí o káà tsí odzú fú ŋa, tsí o nyà ŋá ǹɖe nóòkùkù ńbí à wà si#ɛ́, tsí o fà ŋá wá ńmímá. Tsí kíbí Ètsù† dzoyè si ńǹtá-ŋa si#ɛ́, o gbà ŋá nɔ́wɔ́‐ɛ̀ wá fú Ɔ̀ɖáyé, tsí kó dzoyè si ńǹtá-ŋa. Tsí bí à nɛ́ àkaralé si ńǹtá-mi, Ɔ̀ɖáyé nákó mú àbi-ŋa tɔrɛ fú ŋa, tsí àŋa gbo, à nákó dzogú-Ɔ̀ɖáyé bá ɛnɛ yèé ŋa dzɛ́ tɛ̀ɛ̀#ɛ́.

19 Tsí Kpɔ́lù tɔ́ wà wí fúu ró ní: Ólú Àgíkpà, iŋɛ́ yèé ti nɔ́ɔ̀rɔ̃, tsí Yèésù nyàá ɖíre fú òŋu bɛ́ɛ̀#ɛ́, òŋu tse si ńǹtá‐ɛ̀ ìɖéǹɖè ni. 20 Ó ɖi, òŋu dzíkɔ̀-Ɔ̀ɖáyé fú ɛnɛ-Ɖàmásì ŋa náàtsɛ̃̀tsɛ̃̀, tsí òŋu dzíkɔ̀#ɛ́ fú ɛnɛ-Yèrúsàlɛ́mì ŋa òŋu ɛnɛ yèé ŋa wà nérè-Yùɖéyà#á kòdzá kpó. Tsí òŋu dzíkɔ̀#ɛ́ fú ɛnɛ yèé ŋa kò dzɛ́ ɔma-Ìyúɖà ŋa#á gbo, tsí òŋu náa wà fɔ̀ fú ŋa kpó ní ká nyíìlò kpaɖà, tsí ká nyí wá ńɖi-Ɔ̀ɖáyé, tsí ká wà nyàá ɖíre ńtsɛ́-ɔwɔ́-ŋà ŋa òŋu ńǹrɛ̃̀-ɛsɛ̀-ŋà ŋa. 21 Náàtsùgbée bɛ́ɛ̀ ní ɔma-Ìyúɖà ŋa wáa mú òŋu kíbí òŋu wà ńkpàtá-ilé-Ɔ̀ɖáyé† si#ɛ́, tsí wò ní ká kpa òŋu nóòkú#ɛ́. 22 Ó ɖi, títí wáa fú òní#ɛ́, Ɔ̀ɖáyé wà náànyì-òŋu si gé ni. Kò kɔ òŋu dzɔ̀ɔ́. Tsí òŋu tɔ́ wà náàyɛ̀ si, tsí wà nya àyídzá fú ɔ̀nyà kpó, maɖé gbo, onùgbó gbo, àŋa kpó, òŋu wà fɔ̀ɔ́ fú ŋa. Mɔ̀ɔ́sè† òŋu agbáfɔ̀-Ɔ̀ɖáyé fɔ̀† ŋa ti fɔ iŋɛ́ yèé ŋa bòkó wáa tse#ɛ́ si, tsí afɔ̀ yèé ŋa òŋu wà fɔ̀ fúnɛ#ɛ́, ó ɖé bá afɔ̀-ŋa#á kpó. Òŋu kò wíìnyɛ̀-ìrɔ́-òmírɛ̃̀-kã̀ kpókpó. 23 Ó ɖi, à ní: Ó wà ní Mɛ̀síyà† Agbanɛlà yèé Ɔ̀ɖáyé tsã̀, tsí bɛ̀ wá#á kó réré, tsí kú. Tsí nákó dzɛ́ ɔ̀nyà àtsɛ̃̀tsɛ̃̀ yèé nákó dzí ti náàŋírĩ-òkú ŋa wá náyé#ɛ́. Nákó kú, tsí dzí wá náyé bɛ́ɛ̀, àtóoríi kó kɛ́ mímá wá fú ɔma-Ìyúɖà ŋa òŋu ɔ̀nyà-ìlú-àledzò ŋa gbo. 24 Bɛ́ɛ̀ ní Kpɔ́lù wà fɔ afɔ̀-arũ-ara‐ɛ̀ làkóò#ɛ́ ńnɛ̀ɛ́. Tsí kɔ̀màɖã́ã̀ Fésítù bu igbe ta gé, tsí ní: Kpɔ́lù, éwo wà bàdzɛ́ fɛ́ɛ! Ìwé mímà-ɛ̀ɛ bàdzɛ́ éwo fɛ́ɛ báàyí!

25 Tsí Kpɔ́lù gbo dzɔ́ŋù fúu ní: Òò! Ɔba-ire Fésítù, éwo-òŋu kò wà bàdzɛ́. Afɔ̀-òtítɔ́ òŋu ìsérè mímá ní òŋu wà fɔ̀#ɛ́. 26 Ó ɖi, ólú òŋu ká‐ɛ̀ gìɖì ti ma afɔ̀ ti nára-iŋɛ́ yèé ŋa òŋu fɔ̀#ɛ́. Náàtsùgbée bɛ́ɛ̀ ní òŋu mú ɛ̀ɖɔ̃̀ kã ara-òŋu, tsí wà wíìnyɛ̀ nódzú‐ɛ̀#ɛ́. Tsí òŋu mà nóòtítɔ́ ní ó ma afɔ̀ ti nára-iŋɛ́ ŋa#á kpó. Iŋɛ́ yèé tse#ɛ́, kò tsi ńǹɖì-ìɖúkù-kã̀ ní iŋɛ́ ŋa#á tse#ɛ́.

27 Tsí Kpɔ́lù tɔ́ wà fɔ̀ fúu ró ní: Ólú Àgíkpà, afɔ̀ yèé ŋa agbáfɔ̀-Ɔ̀ɖáyé fɔ̀ ŋa ti fɔ̀ si#ɛ́ fe, ó gbà ŋá gbɔ́ nɔ̀. Ɛ̃ɛ̃, òŋu mà ìɖéǹɖè bɛ́ɛ̀ ní ó gbà ŋá gbɔ́.

28 Tsí ólú Àgíkpà gbo wà dzɔ́ŋù fú Kpɔ́lù ní: Kpɔ́ dza! Ó bɔ oɖé, tsí kíbí ó wà wíìnyɛ̀ gbà ńǹsérè‐ɛ̀#ɛ́, kó tse tsí òŋu gbo, òŋu kó ɖi olí-Yèésù gé ni.

29 Tsí Kpɔ́lù ní: Bí ó bɔ oɖé gboo, bí ìwèrè‐ɛ̀ nákó dzɛ̃̀ gboo, òŋu wà wúùre fú Ɔ̀ɖáyé ní ólú gbo, ɛnɛ yèé wà gbɔ́ oŋù-òŋu ŋa gbo nɔ́mbɛ́#ɛ́, àŋa kpó, ká wà kíbí òŋu Kpɔ́lù òŋu wà si#ɛ́. Ó ɖi, ká máa so àŋa òŋu ńwɔ̀rɔ̀ kíbí òŋu.

30 Ńbɛ̀ɛ́, ólú gbo, kɔ̀màɖã́ã̀ gbo, Bɛ̀níkè gbo má nára-ɛnɛ yèé ŋa dzokó bɛ̀#ɛ́, àŋa kpó, à ǹɖe, 31 tsí fùɖá lɔ ńǹkpá, tsí wà fɔ̀ fú ara-ŋa ní: Idza#á kò tse iŋɛ́-kã̀, tsí kó bèrè ní ká sɔ́ɔ fú ikú nàmí ká múu sé nɛ́ɛ̀ŋà nɛ́.

32 Tsí ólú Àgíkpà wà fɔ̀ fú Fésítù ní: Bí kò tsi idza#á òŋu ká‐ɛ̀ ní bèrè ní ká gbɛ̃́ òŋu lɔ ńɖi-ɔ̀gã́-ìdzɔba, tsí kó kpɛdzɔ́#ɛ́ fú òŋu#ɛ́, à má tsíi nɛ́ɛ̀ŋà#á nɔ̀.