Itsɛ́ 25

Kpɔ́lù wà bèrè ní ká gbɛ̃́ òŋu lɔ ńɖi-ɔ̀gã́-ìdzɔba-ilɛ̀-Rómà

Ńbɛ̀ɛ́, kíbí à mú kɔ̀màɖã́ã̀ Fésítù dzokó náàntã̀-oyè#ɛ́, nɔ́dzɔ́-ɛ̀kɛ́ɛta‐ɛ̀, ó ǹɖe ńKèsàré, tsí wáa lɔ ńYèrúsàlɛ́mì. 2 Tsí kíbí ó tó ńbɛ̀#ɛ́, onùgbó-atsɛbɔ-Ɔ̀ɖáyé† ŋa òŋu onùgbó-ɔma-Ìyúɖà† ŋa gbo wáa lɔ ńɖɔ̀‐ɛ̀, tsí káà mú afɔ̀ yèé wà náàŋírĩ-àŋa Kpɔ́lù méèdzì#ɛ́ fɔ̀ fúu. Tsí à le oŋù si náfɔ̀#ɛ́, 3 tsí wà wí fúu ní: Kó wòó fɔ̀ fú àŋa ɖé, tsí kó fɔ̀, tsí ká sɛ̃̀ gbɛ̃́ Kpɔ́lù wá ńYèrúsàlɛ́mì.

À wà fɔ̀ bɛ́ɛ̀, iŋɛ́ yèé tse#ɛ́, à ti mú arũ ɖé si ńǹtá-Kpɔ́lù si kpó ní bí àŋa gbɛ̃́ɛ̃ bàa nɔ́ɔ̀nà gé ná, àŋa nákó kpaá nóòkú. 4 Tsí kɔ̀màɖã́ã̀ Fésítù gbo wà dzɔ́ŋù fú ŋa ní: Kpɔ́lù wà nɛ́ɛ̀ŋà si ńKèsàré. Ó ɖi, òŋu ká-òŋu gìɖì gbo, òŋu kàkó kpɛ̃́ tã́ná òŋu nákó sɛ̃̀ bɔ̀ lɔ. 5 Ó ɖi, ɛnɛ yèé ŋa náa tóòsũ̀-afɔ̀ náàŋírĩ-ŋa#á ká tɛ̀ náànyì-òŋu, tsí bí idza#á tse iŋɛ́ kò sã̀-kã̀ ná, ni ká wáa fɔ̀ɔ́.

6 Tsí Fésítù gbé ńYèrúsàlɛ́mì#ɛ́ bɛ̀, tsí tse ɔdzɔ́ mɛ́ɛdzɔ nàmí ɔdzɔ́ maá bɛ́ɛ̀ gé, tsí sɛ̃̀ bɔ̀ lɔ ńKèsàré#ɛ́. Tsí ńlɛ̀ má‐ɛ̀, ó lɔ náànkàbà, tsí káà dzokó náàntã̀‐ɛ̀. Tsí ó fɔ̀, tsí à kpe Kpɔ́lù wá fúu. 7 Títí Kpɔ́lù kó tó#ɛ́, ɔma-Ìyúɖà yèé ŋa ti ńYèrúsàlɛ́mì wá#á, à sú wérí‐ɛ̀ kpó. Tsí à mú afɔ̀-íbàɖí lákṹ lákṹ ŋa, tsí tòó ru Kpɔ́lù ní ɔ̀nyà-ìrɔ́ yèé ó dzɛ́#ɛ́ ńnɛ̀ɛ́. Ó ɖi, à kò sì nyáa mɔ́wɔ́ tɛ iŋɛ́-kã̀, tsí ká ń nyà ɖíre ní òtítɔ́ ní à wà fɔ̀#ɛ́. 8 Tsí Kpɔ́lù gbo bòkó fɔ afɔ̀-arũ‐ɛ̀, tsí ó ní: Òŋu kò tse iŋɛ́-íbàɖí-kã̀ nára-ɛkpa-ɔma-Ìyúɖà ŋa. Òŋu kò tse iŋɛ́-íbàɖí-kã̀ nára-ilé-Ɔ̀ɖáyé† gbo. Bɛ́ɛ̀ ké ní òŋu kò tse iŋɛ́-íbàɖí-kã̀ nára-ɔ̀gã́-ìdzɔba ńlɛ̀-Rómà† gbo#ɛ́.

9 Ńbɛ̀ɛ́, Fésítù wà wo kó tse dzɔdzú-ɔma-Ìyúɖà ŋa, tsí ó wà bere Kpɔ́lù ní: Ó wò ní ká sɛ̃̀ gbɛ̃́ɛ̃ lɔ ńYèrúsàlɛ́mì, tsí ká káà kpɛdzɔ́#ɛ́ fúu bɛ̀ nódzú tòŋu ká-òŋuù?

10 Tsí Kpɔ́lù gbo dzɔ́ŋù fúu ní: Ńlé-ɛdzɔ́-ìdzɔba ńlɛ̀-Rómà ní òŋu wà si#ɛ́. Ńbɛ̀ ní ó wà ní ká kpɛdzɔ́ fú òŋu#ɛ́. Ó ɖi, òŋu kò tse iŋɛ́-íbàɖí-kã̀ kpókpó nára-ɔma-Ìyúɖà ŋa, tsí kɔ̀màɖã́ã̀ òŋu ká‐ɛ̀ gìɖì gbo mà bɛ́ɛ̀ nɔ̀. 11 Nágbaɖa-kã̀#á, bí ó dzɛ́ ní òŋu tse iŋɛ́-íbàɖí-kã̀, tsí ó bèrè ní ká kpa òŋu nóòkú, òŋu kò wà kɔ ikú. Nágbaɖa-èkéèdzì#ɛ́, bí afɔ̀ yèé ŋa à mú, tsí ń bá òŋu si#ɛ́ kò nɛ́wo#ɛ́, ɔ̀nà kò wà fú ɔ̀nyà-kã̀ kpókpó, tsí kó mú òŋu bɔwɔ́-ŋa. Ó ɖi, ɔ̀gã́-ìdzɔba ńlɛ̀-Rómà òŋu ká‐ɛ̀ kó kpɛdzɔ́#ɛ́ fú òŋu.

12 Ńbɛ̀ɛ́, Fésítù lɔ ńǹkpá oɖé òŋu afúfɛ̀ɛ́nɔ́‐ɛ̀ ŋa, tsí ó sɛ̃̀ wà wí fú Kpɔ́lù ní: Ó wò ní ɔ̀gã́-ìdzɔba ńlɛ̀-Rómà kó kpɛdzɔ́#ɛ́ fú òŋu nɔ̀. Ìɖéǹɖè ni, à nákó gbɛ̃́ɛ̃ lɔ fúu.

Kpɔ́lù wà fɔ afɔ̀-arũ‐ɛ̀ nódzú-ólú Àgíkpà

13 Náànyì-bɛ́ɛ̀#ɛ́, ólú Àgíkpà òŋu ɔmàná‐ɛ̀ Bɛ̀níkè^* gbo wáa tó ńKèsàré#ɛ́, tsí ká wáa kpalɛwo kɔ̀màɖã́ã̀ Fésítù. 14 Tsí à tse ɔdzɔ́ mɛ́ɛlóle kã̀ŋa ńǹlú#ɛ́ bɛ̀. Ńbɛ̀ɛ́, Fésítù mú afɔ̀-Kpɔ́lù#ɛ́, tsí wà ń sũ ólú Àgíkpà ní: Bɛ́ɛ̀ ní idza-kã̀ wà bí, tsí kɔ̀màɖã́ã̀ Fèlísì kɔ̀ɔ́ dzɔ̀ɔ́ nɛ́ɛ̀ŋà si títí òŋu wáa báa#á. 15 Ó ɖi, kíbí òŋu lɔ ńYèrúsàlɛ́mì#ɛ́, onùgbó-atsɛbɔ-Ɔ̀ɖáyé† ŋa òŋu onùgbó-ɔma-Ìyúɖà ŋa gbo wá ńɖɔ̀-òŋu, tsí wáa mú afɔ̀ yèé wà náàŋírĩ-àŋa idza#á méèdzì#ɛ́ fɔ̀ fú òŋu, tsí bèrè ní òŋu kó ɖáàbi fúu. 16 Tsí òŋu dzɔ́ŋù fú ŋa ní: Ɛkpa-kã̀ kò wà fú ɛnɛ-Rómà† ŋa ní ká tse bɛ́ɛ̀. Ó ɖi, ɛnɛ yèé à wà mú afɔ̀ bá#á náa kpàɖé bá ɛnɛ yèé ŋa mú afɔ̀ báa#á, tsí à náa nyà si nódzú fú ara-ŋa ni. À náa tse bɛ́ɛ̀ náàtsùgbé-ɛnɛ yèé à mú afɔ̀ bá#á, kó nyáa fɔ afɔ̀-arũ‐ɛ̀ ti nára-afɔ̀#ɛ́. Bí à náa tse tã́ná ká ɖáàbi fúnɛ#ɛ́ ńnɛ̀ɛ́. 17 Ńbɛ̀ɛ́, ɔma-Ìyúɖà ŋa#á wá ńɖɔ̀-òŋu, tsí ńlɛ̀ má‐ɛ̀ nɛ́sɛ̀ nɛ́sɛ̀ gé#ɛ́, òŋu gbo, òŋu lɔ ńlé-ɛdzɔ́, tsí káà dzokó, tsí òŋu fɔ̀, tsí à gbɛ̃́ idza#á wá. 18 Tsí ɛnɛ yèé ŋa mú afɔ̀ báa si#ɛ́, àŋa gbo, à ǹɖe ɖóro, tsí wíìnyɛ̀. Òŋu ɖédzú à nákó fɔ̀ ní Kpɔ́lù tse iŋɛ́-íbàɖí lákṹ kã̀ŋa ni. Ó ɖi, à kò fɔ̀ bɛ́ɛ̀ gìɖì. 19 À wà tse àrã́dzìnyà báa ti nára-kíbí à náa sɛ̃ Ɔ̀ɖáyé gbà#á òŋu ti nára-ɔ̀nyà-kã̀ yèé à náa kpè ní Yèésù#ɛ́ gé ni. Yèésù#ɛ́ ti kú, tsí Kpɔ́lù òŋu wà fɔ̀ ní ó wà náàyɛ̀ si. 20 Ti nára-bɛ́ɛ̀#ɛ́, òŋu kò ma ìsérè mɛ̀ɛ́ òŋu kó mú banɛ́ náfɔ̀#ɛ́ gìɖì. Ńbɛ̀ɛ́, òŋu fɔ̀ fú Kpɔ́lù ní bí ó dzɛ́ ná, ni ká sɛ̃̀ gbɛ̃́ɛ̃ lɔ ńYèrúsàlɛ́mì, tsí ká lɔ káà kpɛdzɔ́#ɛ́ fúu bɛ̀. 21 Ó ɖi, Kpɔ́lù kò dzɛ́. Tsí ó ní: Ńbí afɔ̀#ɛ́ ɖà#á, ká wà ɖe òŋu títí ɔ̀gã́ lákṹ-ilɛ̀-Rómà òŋu ká‐ɛ̀ kó kpɛdzɔ́#ɛ́ fú òŋu.

Ńbɛ̀ɛ́, òŋu gbo, òŋu fɔ̀ ní ká múu si nɛ́ɛ̀ŋà, tsí wà ɖèé bɛ̀ títí fú ìwèrè yèé òŋu nákó fɔ̀, tsí ká gbɛ̃́ɛ̃ lɔ fú ɔ̀gã́-ìdzɔba#á.

22 Ńbɛ̀ɛ́, ólú Àgíkpà wà fɔ̀ fú kɔ̀màɖã́ã̀ Fésítù ní: Òŋu ká-òŋu gìɖì gbo, òŋu wà wo òŋu kó gbɔ́ oŋù nárũ-idza#á.

Tsí Fésítù gbo wà dzɔ́ŋù fúu ní: Kó máa tsí arũ, nɔ́ɔla nákó gbɔ́ oŋù‐ɛ̀.

23 Tsí ó ɖi ńlɛ̀ má‐ɛ̀, tsí ólú Àgíkpà òŋu ɔmàná‐ɛ̀ Bɛ̀níkè wáa tó òŋu iyì lákṹ-kã̀. Tsí à wɔ̀ náànkàbà-kɔ̀màɖã́ã̀, àŋa onùgbó-sɔ́dzà ŋa má nára-onùgbó-ìlú ŋa gbo. Tsí Fésítù fú ɔ̀nà ní ká lɔ káà gbɛ̃́ Kpɔ́lù wá, tsí à gbɛ̃́ɛ̃ wá. 24 Tsí Fésítù ní: Ólú Àgíkpà òŋu ɔ̀nyà kpó yèé wà bá àŋa si#ɛ́, ká rí, idza#á ńnɛ̀ɛ́. Ó ɖi, ɔma-Ìyúɖà ŋa kpó wáa rí òŋu ti nára‐ɛ̀ ńYèrúsàlɛ́mì, tsí wá ńɖɔ̀-òŋu ńbíbɛ́ gbo, tsí wà ɖúgbe ní kò wà ní kó wà náàyɛ̀ si ńǹtalɛ̀#ɛ́ ró. 25 Ó ɖi, òŋu rí ní kò tse iŋɛ́-íbàɖí-kã̀, tsí kó bèrè ní ká sɔ́ɔ fú ikú. Ńbɛ̀ɛ́, òŋu ká‐ɛ̀ bèrè ní ɔ̀gã́-ìdzɔba òŋu ká‐ɛ̀ kó kpɛdzɔ́#ɛ́ fú òŋu. Tsí òŋu tsèsérè ní òŋu kó fɔ̀, tsí ká gbɛ̃́ɛ̃ lɔ. 26 Ó ɖi, iŋɛ́ yèé gìɖì tútútú òŋu kó kɔ si ńǹwé ti nára-idza#á lɔ fú ɔba lákṹ#ɛ́, òŋu kò màá. Náàtsùgbée bɛ́ɛ̀ ní òŋu gbɛ̃́ɛ̃ wá nódzú-ŋa#á, tsí yèé kpã́dzú#ɛ́, nódzú-ólú Àgíkpà, tsí bí ó bèrèé náfɔ̀ tã́, ni òŋu kó ma iŋɛ́ yèé òŋu kó kɔ si ńǹwé#ɛ́. 27 Ó ɖi, ńǹsérè-òŋu#ɛ́, ká gbɛ̃́ abèŋà-kã̀ làkóò ńlɛ̀-Rómà náàrìmáa nyáa fɔ òkpì-iŋɛ́ yèé ó tse, tsí à mú afɔ̀ báa si#ɛ́, kò nɛ́wo.