Itsɛ́ 24

Ɔma-Ìyúɖà ŋa wà bá Kpɔ́lù fɔ̀ fú kɔ̀màɖã́ã̀ Fèlísì

Ńbɛ̀ɛ́, ó ɖi nɔ́dzɔ́-ɛ̀kɛ́ɛrú‐ɛ̀, tsí Ànàníyà ɔ̀gã́-atsɛbɔ-Ɔ̀ɖáyé ŋa† òŋu onùgbó-ìlú#ɛ́ kã̀ŋa lɔ ńǹlú-Kèsàré. Tsí à gbɛ̃́ aɖùfúnɛ ńlé-ɛdzɔ́-kã̀ tɛ̀ náànyì, tsí kó káà wíìnyɛ̀ nárũ-ŋa. À náa kpèé ní Tɛ̀túlù. Tsí à lɔ ńɖi-kɔ̀màɖã́ã̀ Fèlísì, tsí káà mú afɔ̀ yèé wà náàŋírĩ-àŋa Kpɔ́lù#ɛ́ fɔ̀ fúu. 2 Tsí à kpe Kpɔ́lù wá, tsí Tɛ̀túlù kpée bíbáfɔ̀ fú kɔ̀màɖã́ã̀#á ní: Ɔba-ire Fèlísì, kíbí ó wà rí ìtá-ìlú#ɛ́ rere#ɛ́, ó tse tsí ànyíkpaɖà wá ńǹlú#ɛ́. Tsí náàtsùgbé‐ɛ̀ òŋu iŋɛ́ nyɛ̀ŋɛ̀ ŋa ní àŋa wà ńtútùúrɔ̀ si fɛ̀ɛ̀#ɛ́. 3 Àŋa wà ɖɔ́kpɛ́ fúu ní ó kú ìtɔ́dzú títítí. 4 Ó ɖi, òŋu kàkó bàdzɛ́ ìwèrè kpíkpɔ̀ fúu. Náàtóoríi bɛ́ɛ̀#ɛ́, ó dzàaɖé kó rɛ̃tígbè-àŋa fú ìwèrè-kã̀ oɖé gé. 5 Tsí òŋu kó máa fɔ̀, tsí kó gbɔ́ɔ̀? Àŋa rí ní Kpɔ́lù, idza#á, ɔ̀nyà fɔ́ɔ̀lúfɔ́ɔ̀lú ní ó dzɛ́#ɛ́. Tsí ɔma-Ìyúɖà† yèé ŋa wà ńǹɖì ńǹɖì ŋa náyé gbaŋgba#á, ó wà tse tsí àŋírĩ-ŋa wà rò kpó. Ó ɖi, ɔ̀gã́-kã̀ ní ó dzɛ́ ńnɔ́-arú-ɛgbɛ́ ti Nàsàrɛ́tì#ɛ́. 6 Tsí kíbí ó tse gbà#á, ó wò gìɖì ní òŋu má gbɛ̃ɛ̃́rĩ́ ilé-Ɔ̀ɖáyé†#ɛ́. Ńbɛ̀ɛ́, ɔwɔ́-àŋa tɛ̀ɛ́. [Tsí àŋa wò ní àŋa kó kpɛdzɔ́ fúu kíbí ó wà nórò-àŋa gbà#á. 7 Ó ɖi, Lùsíyà ɔ̀gã́-sɔ́dzà ŋa wá òŋu ikpá líle-kã̀, tsí wáa gbàá nɔ́wɔ́-àŋa, 8 tsí wí fú àŋa ní ɛnɛ yèé ŋa mú afɔ̀ báa si#ɛ́, ká lɔ ńɖi-kɔ̀màɖã́ã̀ òŋu ká‐ɛ̀. Ńnɛ̀ɛ́ ní àŋa wá#á.] Ó ɖi, bí òŋu ká‐ɛ̀ bere idza#á náfɔ̀, nákó gbɔ́ òtítɔ́-iŋɛ́ yèé tse tsí àŋa wà mú afɔ̀ báa#á nárũ‐ɛ̀.

9 Ńbɛ̀ɛ́, ɔma-Ìyúɖà yèé wà bɛ̀ ŋa#á gbo gbà si ńǹtá-afɔ̀ yèé Tɛ̀túlù fɔ̀#ɛ́, tsí à ní: Ìɖéǹɖè ni, afɔ̀#ɛ́ tútútú gé ní ó wí lɔ#ɛ́.

Kpɔ́lù wà fɔ afɔ̀-arũ‐ɛ̀

10 Tsí kɔ̀màɖã́ã̀#á tsɔwɔ́ fú Kpɔ́lù ní kó wíìnyɛ̀. Tsí Kpɔ́lù gbo wà dzɔ́ŋù fúu ní: Ó kú oŋù. Ó ɖi, òŋu mà ní ó wà kpɛdzɔ́ fú ɔ̀nyà ŋa ńǹlú-àŋa#á báàyí#ɛ́, ɔɖɔ̃́‐ɛ̀ ti lɔ. Tsí kíbí òŋu bòkó fɔ afɔ̀-arũ-òŋu#ɛ́, òŋu àkaralé ní òŋu bòkó wíi#ɛ́. 11 Ó ɖi, kɔ̀màɖã́ã̀ òŋu ká‐ɛ̀ gbo nákó nyáa mà báàyí ní kò láre ɔdzɔ́ máàméèdzì wòná ní òŋu lɔ ńYèrúsàlɛ́mì ní òŋu kó káà sɛ̃ Ɔ̀ɖáyé#ɛ́. 12 Tsí à kò sì rí òŋu, tsí òŋu kó wà tse àrã́dzìnyà bá ɔ̀nyà-kã̀ ńlé-Ɔ̀ɖáyé. Tsí à kò rí òŋu ńlé-ìkpàɖé-ɔma-Ìyúɖà ŋa† òŋu náàŋírĩ-ìlú#ɛ́ gbo ńǹɖì-kã̀ kpókpó, tsí òŋu kó wà tse iŋɛ́-kã̀, tsí wà ń kpérí èrò#ɛ́ ní ká tse iŋɛ́ kò sã̀-kã̀ gbo. 13 Tsí afɔ̀ yèé ŋa ɛnɛ ŋa#á kɛ́, tsí ń bá òŋu si báàyí#ɛ́ fee, kí à kó nyáa mɔ́wɔ́ tɛ̀ ńnɛ̀, tsí ń nyà ɖíre ní òtítɔ́ ní ó dzɛ́#ɛ́ ná? 14 Ó ɖi, iŋɛ́ yèé òŋu mà, tsí òŋu kó fɔ̀ fúu#ɛ́ gé ní dzɛ́ ní òŋu wà sɛ̃ Ɔ̀ɖáyé yèé gbágbóǹgbàgbò-òŋu ŋa sɛ̃̀ wáa lɔ#ɛ́. Òŋu wà sɛ̃̀ɛ̃́ gbà nɔ́ɔ̀nà-Ɔlá-àŋa ni. Ɔ̀nà#á ní àŋa ɔma-Ìyúɖà† ŋa wà kpè ní arú-ɛgbɛ́#ɛ́. Ó ɖi, iŋɛ́ yèé ŋa kpó à kɔ si ńǹwé-ɛkpa-Mɔ̀ɔ́sè† òŋu agbáfɔ̀-Ɔ̀ɖáyé fɔ̀† ŋa#á, òŋu gbà ŋá gbɔ́. 15 Tsí òŋu módzú si nɔ́ɔ̀nà si fú iŋɛ́-kã̀, tsí ɛnɛ yèé ŋa wà bá òŋu fɔ̀ gbo#ɛ́, àŋa gbo, à módzú si nɔ́ɔ̀nà si bɛ́ɛ̀ ké. Iŋɛ́#ɛ́ ní wà dzɛ́ ní ɛnɛ yèé kú lɔ ŋa#á, atsòtítɔ́ gbo, ɔ̀nyà-íbàɖí gbo, àŋa kpó, Ɔ̀ɖáyé nákó sɛ̃̀ dzí ŋa wá náyé. 16 Náàtsùgbée bɛ́ɛ̀#ɛ́, òŋu gbo, òŋu wà múgírí ńǹwèrè-ɔ̀kã̀lɔ́ɔ̀kã̀ ní bí òŋu wà nódzú-Ɔ̀ɖáyé òŋu nódzú-ɔ̀nyà ŋa si, ni sídzó sídzó-kã̀ kó máa wà nɛ́ɛ̀ɖɔ̃̀-òŋu gbo.

17 Ńbɛ̀ɛ́, òŋu ǹɖe ńYèrúsàlɛ́mì báàyí#ɛ́, ɔɖɔ̃́‐ɛ̀ ti dzɛ̃̀. Tsí òŋu kɛ́ owó, tsí sɛ̃̀ bɔ̀ wá ní òŋu kó wáa mɔ́wɔ́ gbè fú ɔ̀nyà-ìlú-òŋu ŋa, tsí òŋu kó tsɛbɔ fú Ɔ̀ɖáyé gbo. 18 Iŋɛ́ yèé ŋa òŋu wà tse#ɛ́ ńnɛ̀ɛ́. Tsí à mú òŋu rí ńlé-Ɔ̀ɖáyé#ɛ́. Ó ɖi, òŋu ti tsorò-àfárá tã́. Èrò-kã̀ kpókpó kò wérí-òŋu si bɛ̀, tsí ɔ̀nyà ŋa kò wà tse iŋɛ́ kòdzɔkòdzɔ-kã̀ gbo. 19 Ó ɖi, ká fɔ̀ gìɖì#ɛ́, ɔma-Ìyúɖà kã̀ŋa ti ńlɛ̀-Àsíyà, tsí wà bɛ̀ nɔ́dzɔ́ nyɛ̀ŋɛ̀. Àŋa gìɖì ní má wà bí nódzú-òŋu ká‐ɛ̀, tsí mú afɔ̀ bá òŋu bí à rí iŋɛ́ kò sã̀-kã̀ ti ńɖɔ̀-òŋu#ɛ́. 20 Ó ɖi, kíbí ɛnɛ nyɛ̀ŋɛ̀ ŋa#á kò wà bí#ɛ́, ká kpe ɔma-Ìyúɖà yèé ŋa wà ńbíbɛ́#ɛ́, tsí ká bèrè ŋá ní: Kíbí à gbɛ̃́ òŋu lɔ nódzú-àkpɛ̀dzɔ́ ŋa#á fee, íbàɖí yèésí à gbɔ́ ní òŋu tse ni? Ká fɔ̀ɔ́ káyí. 21 Bí kò tsi afɔ̀ ɔ̀kã̀ntso yèé òŋu ǹɖe ɖóro, tsí ɖúgbe, tsí wà fɔ̀ ní: Òŋu gbà gbɔ́ ní Ɔ̀ɖáyé nákó sɛ̃̀ dzí òkú ŋa wá náyé#ɛ́. Náàtsùgbée bɛ́ɛ̀ ní à wà kpɛdzɔ́ bá òŋu#ɛ́.

22 Ńbɛ̀ɛ́, kɔ̀màɖã́ã̀ Fèlísì sɔ́ ɛdzɔ́#ɛ́ si nɔ́dzɔ́-òmírɛ̃̀. Òŋu ká‐ɛ̀ gbo ti ma iŋɛ́ kpíkpɔ̀ ti nára-ɔ̀nà-Ɔlá-wa. Tsí ó wà fɔ̀ fú ŋa ní: Ɔ̀gã́ Lùsíyà nákó wá tã́ná òŋu kó nyáa wo ɔ̀nà nára-afɔ̀#ɛ́, tsí kpɛdzɔ́‐ɛ̀ fú ŋa ni.

23 Tsí ó tsóŋù fú ɔ̀gá-sɔ́dzà ŋa#á-kã̀ ní: Kó gbɛ̃́ Kpɔ́lù lɔ káà si nɛ́ɛ̀ŋà, tsí kó wà ɖèé. Ó ɖi, kó fúu náyè oɖé, tsí kó fúu nɔ́ɔ̀nà gbo, tsí ɔ̀nyà‐ɛ̀ ŋa kó wà wá ńɖɔ̀‐ɛ̀, tsí wà dzítsɛ́ ŋa fúu.

Kpɔ́lù wà wíìnyɛ̀ bá Fèlísì òŋu aya‐ɛ̀

24 Náànyì-bɛ́ɛ̀#ɛ́, Fèlísì òŋu aya‐ɛ̀ gbo wáa tó. À náa kpe aya#á ní Ɖɛ̀rùsílà. Ɔma-Ìyúɖà† ŋa ní ó dzɛ́#ɛ́. Tsí Fèlísì fɔ̀, tsí à kpe Kpɔ́lù wá fúu, tsí ó wà gbɔ́ afɔ̀ ti nára-kíbí à náa nɛ́ àkaralé sí ńǹtá-Yèésù Kírísítò gbà#á nárũ‐ɛ̀. 25 Tsí Kpɔ́lù wíìnyɛ̀ fúu ti nára-òtítɔ́ tsítse òŋu kíbí ó wà ní ká wà mú ara-nɛ#ɛ́, tsí wí fúu gbo ní ɔdzɔ́-kã̀ bàa, tsí Ɔ̀ɖáyé nákó wáa kpɛdzɔ́ fú ɔ̀nyà ŋa náyé gbaŋgba#á kpó. Ńbɛ̀ɛ́, ɛ̀ɖɔ̃̀ kpé Fèlísì ɖíɖá, tsí ó wà wí fú Kpɔ́lù ní: Afɔ̀#ɛ́ sã̀ bɛ́ɛ̀, àŋa kó ń gbè bɛ̀ tã́ná. Tsí bí òŋu rí ayè nɔ́dzɔ́-òmírɛ̃̀-kã̀ ró, òŋu nákó fɔ̀, tsí ká kpèé fú òŋu.

26 Náa módzú si gbo ní Kpɔ́lù nákó fú òŋu nówó. Náàtsùgbée bɛ́ɛ̀ ní náa wà bɛkɔ̀ kpeékpeé ní kó wá, tsí àŋa kó wíìnyɛ̀#ɛ́.

27 Ńbɛ̀ɛ́, ɔɖɔ̃́ méèdzì wáa lɔ, tsí ɔ̀nyà-kã̀ wáa kparɔ ìɖì-Fèlísì. À náa kpe ɛnɛ nyɛ̀ŋɛ̀ ní Kpɔ̀kíyù Fésítù. Ó ɖi, Fèlísì wà wo kó tse dzɔdzú-ɔma-Ìyúɖà ŋa, tsí ó kɔ Kpɔ́lù dzɔ̀ɔ́ nɛ́ɛ̀ŋà#á si.