Itsɛ́ 23

Tsí Kpɔ́lù tadzú má ɔma-ɛgbɛ́-àkpɛ̀dzɔ́-ɔma-Ìyúɖà ŋa†#á, tsí ó tsí arũ, tsí ní: Ìnàbí-mi ŋa, kíbí òŋu gbé nódzú-Ɔ̀ɖáyé gbà títí wáa fú òní#ɛ́, sídzó sídzó-kã̀ kò wà nɛ́ɛ̀ɖɔ̃̀-òŋu.

2 Ńbɛ̀ɛ́, ɔ̀gã́-atsɛbɔ-Ɔ̀ɖáyé ŋa† gbo wà bɛ̀. À náa kpèé ní Ànàníyà. Tsí ó wí fú ɛnɛ yèé wà bɛ̀ ŋa#á ní ká kpa arũ fú Kpɔ́lù. 3 Tsí Kpɔ́lù wà fɔ̀ fúu ní: Ìwɔ, ɔ̀nyà-atsendzɔdzú yèé ò dzɛ́#ɛ́, Ɔ̀ɖáyé nákó kpaɛ́. Ò dzokó si, tsí ní òŋu wà kpɛdzɔ́ bá òŋu ńǹrɔ́-kíbí à kɔɔ́ si nɛ́kpa-Ɔ̀ɖáyé#ɛ́. Ó ɖi, ɛkpa-Ɔ̀ɖáyé† kò fúu nɔ́ɔ̀nà ní kó kpa òŋu.

4 Tsí ɛnɛ yèé wà bɛ̀ ŋa#á wà bere Kpɔ́lù ní: Ó nyáa nɛ́ɛ̀ɖɔ̃̀, tsí wà bú ɛnɛ yèé Ɔ̀ɖáyé mú dzɛ ɔ̀gã́ fú atsɛbɔ ŋa#áà?

5 Tsí Kpɔ́lù gbo wà dzɔ́ŋù fú ŋa ní: Ówu! Ìnàbí-mi ŋa, òŋu kò mà ní ɔ̀gã́-atsɛbɔ-Ɔ̀ɖáyé ŋa ní ó dzɛ́#ɛ́. Ó ɖi, à kɔ si ńǸwé-Ɔ̀ɖáyé† ní: “Máa wíìnyɛ̀-íbàɖí nára-ɛnɛ yèé dzɛ́ ɔ̀gã́-ìlú-ɛ̀ɛ#ɛ́.”^*

6 Ńbɛ̀ɛ́, Kpɔ́lù mà ní ɔma-ɛgbɛ́-àkpɛ̀dzɔ́-ɔma-Ìyúɖà ŋa#á, ni ɛgbɛ́ méèdzì ní à dzɛ́#ɛ́. Ɔ̀nyà kã̀ŋa dzɛ́ ɔma-ɛgbɛ́-Sàɖùké† ŋa, tsí ɔ̀nyà kã̀ŋa gbo dzɛ́ ɔma-ɛgbɛ́-Fàrísì† ŋa. Náàtsùgbée bɛ́ɛ̀#ɛ́, ó bu igbe ta náàŋírĩ-ŋa, tsí wà fɔ̀ ní: Ìnàbí-mi ŋa, ɔma-ɛgbɛ́-Fàrísì ŋa ní òŋu dzɛ́#ɛ́, tsí boba-òŋu gbo dzɛ́ ɔma-ɛgbɛ́-Fàrísì ŋa ké. Ó ɖi, odzú-òŋu wà nɔ́ɔ̀nà si ní òkú ŋa nákó sɛ̃̀ dzí wá náyé ró. Náàtóoríi bɛ́ɛ̀ ní à wà kpɛdzɔ́ bá òŋu#ɛ́.

7 Kíbí ó wí bɛ́ɛ̀#ɛ́, afɔ̀#ɛ́ ɖi àrã̀ fú ɔma-ɛgbɛ́-Fàrísì ŋa òŋu ɔma-ɛgbɛ́-Sàɖùké ŋa, tsí èrò#ɛ́ kpɛ̃́ méèdzì. 8 Ìɖéǹɖè#ɛ́, ɔma-ɛgbɛ́-Sàɖùké ŋa náa fɔ̀ ní òkú ŋa kàkó sɛ̃̀ dzí wá náyé ró, tsí à náa fɔ̀ gbo ní adzítsɛ́-ɔ̀rɔ̃† ŋa kò wà, iŋɛ òŋu edzò† ŋa gbo kò wà. Ó ɖi, ɔma-ɛgbɛ́-Fàrísì ŋa òŋu, àŋa náa fɔ̀ ní òkú ŋa nákó sɛ̃̀ dzí wá náyé ró, adzítsɛ́-ɔ̀rɔ̃ ŋa wà, iŋɛ òŋu edzò ŋa gbo wà. 9 Tsí afɔ̀#ɛ́ ɖi igbe wòò fú ŋa kpó. Akɔ́nɛ nɛ́kpa-Ɔ̀ɖáyé† kã̀ŋa gbo wà bɛ̀, tsí dzɛ́ ɔma-ɛgbɛ́-Fàrísì ŋa. Tsí àŋa gbo, à ǹɖe, tsí tse àrã́dzìnyà kũkũkũ, tsí wà fɔ̀ ní: Idza#á kò tse iŋɛ́-kã̀ kpókpó, tsí àŋa kó ń báa fɔ̀ nɛ́. Ó ɖi, bóyá báàyí#ɛ́, adzítsɛ́-ɔ̀rɔ̃-kã̀ nàmí iŋɛ́-kã̀ ní wíìnyɛ̀ fúu#ɛ́, ɔ̀nyà-kã̀ màà?

10 Ńbɛ̀ɛ́, àrã́dzìnyà#á tɔ́ wà ɖi líle máa ró, tsí ɛ̀ɖɔ̃̀ ɖá ɔ̀gã́-sɔ́dzà ŋa#á, tsí ó wà sá ní ká máa fa Kpɔ́lù ya. Tsí ó tédzú fɔ̀ fú ɛgbɛ́-sɔ́dzà ŋa ní ká tì lɔ ńlé-ɛdzɔ́#ɛ́, tsí ká káà fa Kpɔ́lù fùɖá náàŋírĩ-ŋa, tsí gbɛ̃́ɛ̃ lɔ káà si nádzɔ.

11 Tsí ó ɖi nóoru-ɔdzɔ́ nyɛ̀ŋɛ̀ ké, tsí Yèésù Ɔlá-wa mú ara‐ɛ̀ ŋa Kpɔ́lù, tsí wà wí fúu ní: Ó kú odzúgbó! Ó ɖi, ó nya àyídzá ti nára-òŋu fú ɛnɛ-Yèrúsàlɛ́mì ŋa bí ná. Báàyí#ɛ́, ó wà ní kó lɔ ńɖi-ɛnɛ-ìlú-Rómà† ŋa, tsí kó káà nya àyídzá ti nára-òŋu fú ɛnɛ-bɛ̀ ŋa gbo.

Ɔma-Ìyúɖà kã̀ŋa wà wò ní àŋa kó kpa Kpɔ́lù nóòkú

12 Ńbɛ̀ɛ́, ó ɖi ńlɛ̀ má‐ɛ̀, tsí ɔma-Ìyúɖà† kã̀ŋa mú arũ ɖé si ńǹtá-Kpɔ́lù kpó. Tsí ó tã́ ńnɔ́-ŋa si, tsí à ta Ɔ̀ɖáyé si ńǹtá‐ɛ̀ ní àŋa kàkó dzɛ, àŋa kàkó mɔ, tã́ná àŋa nákó kpaá nóòkú. 13 Ɛnɛ yèé ŋa mú arũ ɖé bɛ́ɛ̀#ɛ́, à láre ɔ̀nyà ogóòdzì bɛ́ɛ̀. 14 Tsí à ǹɖe, tsí lɔ káà bá onùgbó-atsɛbɔ-Ɔ̀ɖáyé† ŋa òŋu onùgbó-ìlú ŋa, tsí wà fɔ̀ fú ŋa ní: Ó le àŋa si, tsí ó tã́ ńnɔ́-àŋa gbo si títí àŋa ta Ɔ̀ɖáyé si ńǹtá‐ɛ̀ ní àŋa kàkó dzɛ, àŋa kàkó mɔ, tã́ná àŋa nákó kpa Kpɔ́lù nóòkú#ɛ́ ńnɛ̀ɛ́. 15 Ó ɖi, iŋɛ́ yèé à nákó tse báàyí#ɛ́ ní dzɛ́ ní àŋa gbo, ɔma-ɛgbɛ́-àkpɛ̀dzɔ́ ŋa#á gbo, ká dzɔ́ bɛkɔ̀ lɔ fú ɔ̀gã́-sɔ́dzà ŋa#á ní ká gbɛ̃́ Kpɔ́lù wá fú àŋa ró. Tsí à nákó fɔ̀ɔ́ fúu kíbí ɛnɛ yèé fɔ̀ ní à bòkó sɛ̃̀ wo ɔ̀nà nára-afɔ̀#ɛ́ rere ró bɛ́. Ó ɖi, àŋa ti kpaɖí si kpó ní àŋa nákó kpaá nóòkú tã́ná ká gbɛ̃́ɛ̃ tó ńɖi-ŋa.

16 Ńbɛ̀ɛ́, ɔmaá kpe Kpɔ́lù ńnyinɛ́-kã̀ gbɔ́ ɔ̀kpákù yèé à sɔ si fú Kpɔ́lù#ɛ́, tsí ó lɔ nádzɔ-sɔ́dzà ŋa#á, tsí wɔ̀ lɔ ńbí ó wà#á, tsí káà tsetí-afɔ̀#ɛ́ fúu kpó. 17 Tsí Kpɔ́lù gbo kpe ɔ̀gá-sɔ́dzà ŋa-kã̀, tsí wà wí fúu ní: Òŋu tsìkálɛ̀ fúu, kó gbɛ̃́ maɖé#ɛ́ lɔ ńɖi-ɔ̀gã́‐ɛ̀ fú òŋu ɖé. Ó ɖi, afɔ̀-kã̀ ní ó bòkó wáa wí fúu#ɛ́.

18 Tsí ɔ̀gá#á gbɛ̃́ maɖé#ɛ́ lɔ ńɖi-ɔ̀gã́‐ɛ̀, tsí wà wí fúu ní: Kpɔ́lù abèŋà#á kpe òŋu, tsí fɔ̀ ní òŋu kó gbɛ̃́ maɖé#ɛ́ wá ńɖɔ̀‐ɛ̀. Ó ɖi, ó bòkó wáa wí afɔ̀-kã̀ fúu ni.

19 Tsí ɔ̀gã́#á gbo gba maɖé#ɛ́, tsí fa ɔ̀kpá-ɔwɔ́‐ɛ̀, tsí gbɛ̃́ɛ̃ lɔ nákpálà-kã̀, tsí wà bèrèé ní: Afɔ̀ mɛ̀ɛ́ ó bòkó wáa wí fú òŋu ni?

20 Tsí maɖé#ɛ́ wà dzɔ́ŋù fúu ní: Bɛ́ɛ̀ ní ɔma-Ìyúɖà ŋa mú arũ ɖé si, tsí ní àŋa bòkó wáa bere ɔ̀nà ńɖɔ̀‐ɛ̀ ní kó fɔ̀, tsí ká gbɛ̃́ Kpɔ́lù wá ńɖi-ɛgbɛ́-àkpɛ̀dzɔ́ ŋa nɔ́ɔla#á. Ó ɖi, à nákó fɔ̀ ní àŋa bòkó sɛ̃̀ wo ɔ̀nà nára-afɔ̀#ɛ́ rere máa ró. 21 Kó máa dzɛ́ fú ŋa. Iŋɛ́ yèé tse#ɛ́, ɔ̀nyà láre ɔ̀nyà ogóòdzì bɛ́ɛ̀ ní sɔ ɔ̀kpákù si fú Kpɔ́lù#ɛ́. Ó tã́ ńnɔ́-ŋa si títí à ta Ɔ̀ɖáyé si ńǹtá‐ɛ̀ ní àŋa kàkó dzɛ, àŋa kàkó mɔ, tã́ná àŋa nákó kpaá nóòkú. Ó ɖi báàyí#ɛ́, òŋu gé ní à wà wò ní kó tsóŋù fú ŋa#á.

22 Ńbɛ̀ɛ́, ɔ̀gã́#á kã́rã́ maɖé#ɛ́ ní: Kó máa wí afɔ̀#ɛ́ fú ɔ̀nyà-kã̀ kpókpó ní bɛ́ɛ̀ ní ó wáa tsetí-afɔ̀#ɛ́ fú òŋu#ɛ́ fòò. Ó ɖi, kó lɔ.

23 Tsí ɔ̀gã́-sɔ́dzà ŋa#á kpe ɔ̀gá-ɛgbɛ́-sɔ́dzà méèdzì kã̀ŋa, tsí wà wí fú ŋa ní: Kóyá fú ŋa, ká kpaɖí sɔ́dzà-abanɛ́-iŋɛ́-ìdzògu ŋa igboó (200), tsí ká kpaɖí sɔ́dzà yèé náa gu atsĩ ŋa#á gbo maá lé nɔ́gɔ́ɔta (70) má nára-sɔ́dzà-olí-ɔ̀tsɔ̀ ŋa gbo igboó (200). Tsí bí òruru ru gé ná, àŋa kpó ká kpaɖí si, tsí ká dzì nɔ́ɔ̀nà-ìlú-Kèsàré. 24 Tsí ká kpaɖí atsĩ kã̀ŋa gbo, tsí ká ń kɛ́ Kpɔ́lù lɔ nɔ́wɔ́ nɔ́wɔ́ fú kɔ̀màɖã́ã̀ Fèlísì.

25 Tsí ɔ̀gã́#á kɔ ìwé fú ŋa ní ká ń lɔ fú kɔ̀màɖã́ã̀#á. Ńnɔ́-ìwé#ɛ́, ó fɔ̀ si ńnɛ̀ ní: 26 “Èmi, Kòlòɖíyù Lùsíyà ní wà tse ìwé yèé fú ìwɔ ɔba-ire Fèlísì yèé dzɛ́ kɔ̀màɖã́ã̀#á, tsí wà ń kíɛ#ɛ́. 27 Bɛ́ɛ̀ ní ɔma-Ìyúɖà ŋa mú idza-kã̀, tsí ǹ fɔ̀ ní ká gbɛ̃́ɛ̃ wá fɛ́ɛ#ɛ́. À wà wo ká kpaá nóòkú. Tsí kíbí ǹ wáa gbɔ́ ní ɛnɛ-Rómà† ŋa ní idza#á dzɛ́#ɛ́, èmi ɛgbɛ́-sɔ́dzà ŋa-kã̀ lɔ káà gbàá dzɔ̀ɔ́ nɔ́wɔ́-ŋa. 28 Ńbɛ̀ɛ́, ǹ wò ní n ma iŋɛ́ yèé gìɖì tse tútútú, tsí ɔma-Ìyúɖà ŋa wà mú afɔ̀ báa#á. Tsí ǹ gbɛ̃́ɛ̃ lɔ ńɖi-ɛgbɛ́-àkpɛ̀dzɔ́-ɔma-Ìyúɖà ŋa†#á ní ká wo ɔ̀nà nára-afɔ̀#ɛ́. 29 Tsí ǹ rí mà ní à wà mú afɔ̀ bá idza#á ti nára-afɔ̀-ɛkpa tàŋa ká-ŋa ni. Ó ɖi, kò tse iŋɛ́-kã̀ kpókpó, tsí ká sɔ́ɔ fú ikú nàmí ká múu sé nɛ́ɛ̀ŋà. 30 Báàyí#ɛ́, à wáa tsetí fú mi ní ɔma-Ìyúɖà ŋa#á sɔ ɔ̀kpákù-kã̀, tsí wà wo ká ń kpaá nóòkú kãrãã. Ńnɛ̀ ní ǹ fɔ̀, tsí à gbɛ̃́ idza#á wá ńɖɔ̀-ɛ̀ɛ nɛ́sɛ̀ nɛ́sɛ̀#ɛ́. Tsí ǹ wí fú ɛnɛ yèé ŋa mú afɔ̀ báa si#ɛ́ ní ká wáa fɔ afɔ̀ yèé wà náàŋírĩ-àŋa‐ɛ̀ méèdzì#ɛ́ ńɖɔ̀-ɛ̀ɛ.”

31 Ńbɛ̀ɛ́, sɔ́dzà ŋa#á tse si nóŋù-afɔ̀ yèé ŋa à wí fú ŋa#á, tsí nóoru nyɛ̀ŋɛ̀#ɛ́, à gbɛ̃́ Kpɔ́lù lɔ títí ńǹlú-Àntìkpàtírì. 32 Ńlɛ̀ má‐ɛ̀#ɛ́, sɔ́dzà yèé ŋa wà rɛ̃̀ nɛ́sɛ̀#ɛ́, à sɛ̃̀ bɔ̀ wáa lɔ nádzɔ-ŋa. Tsí sɔ́dzà yèé ŋa náa gu atsĩ#ɛ́, à gbɛ̃́ Kpɔ́lù, tsí dzì nɔ́ɔ̀nà, 33 tsí à káà tó ńǹlú-Kèsàré, tsí mú ìwé#ɛ́ bɔwɔ́-kɔ̀màɖã́ã̀, tsí mú Kpɔ́lù gbo ɖíre fúu. 34 Tsí kɔ̀màɖã́ã̀#á gbo kã ìwé#ɛ́, tsí wà bere Kpɔ́lù ní: Ńlɛ̀-ìlú yèésí ó ti ni?

Tsí ó dzɔ́ŋù fúu ní: Òŋu ti ńlɛ̀-Sìlíkì.

35 Tsí ó wà wí fú Kpɔ́lù ní: Bí ɛnɛ yèé ŋa mú afɔ̀ báa si#ɛ́ wá, òŋu nákó gbɔ́ oŋù-arũ‐ɛ̀.

Tsí ó fú ɔ̀nà ní ká gbɛ̃́ Kpɔ́lù lɔ káà si ńlé-Èróɖì†, tsí wà ɖèé bɛ̀.