Itsɛ́ 22

Tsí ó ní: Boba-mi ŋa, ìnàbí-mi ŋa, òŋu tsìkálɛ̀, ká rɛ̃tígbè, tsí ká gbɔ́ afɔ̀-arũ-òŋu.

2 Kíbí Kpɔ́lù wà wíìnyɛ̀ fú ŋa ńǹlú tàŋa ká-ŋa#á, à tɔ́ tsikó kpíríkpírí máa ró. Tsí ó wà fɔ̀ fú ŋa ró ní: 3 Òŋu, ɔma-Ìyúɖà† bíbí ní òŋu gbo, òŋu dzɛ́#ɛ́. Tsí à bí òŋu ńǹlú-Tàrísì ńlɛ̀-Sìlíkì, tsí à sɛ̃ òŋu ńǹlú-Yèrúsàlɛ́mì#ɛ́ bí. Tsí Gàmàlɛ́lì dzɛ́ akɔ́nɛ-òŋu. Tsí ó kɔ́ òŋu nɛ́kpa yèé gbágbóǹgbàgbò-àŋa ŋa fà dzɔ̀ɔ́ dzɔ̀ɔ́#ɛ́ tútútú. Ó ɖi òŋu gbo, òŋu ɖù fú Ɔ̀ɖáyé tó bɛ́ɛ̀ wáa lɔ kíbí àŋa gbo, à wà tseé gbà nɔ́mbɛ́#ɛ́.

4 Tsí òŋu tse bá ɛnɛ yèé ŋa wà fa Ɔ̀nà-Yèésù Ɔlá-wa#á títí sɔ́ ŋa fú ikú. Ɔnɔkɛ̃̀ɛ̃ gbo, ɔnɔbɛ̃̀ɛ̃ gbo, òŋu náa ɖè ŋá, tsí mú ŋa lɔ káà sé nɛ́ɛ̀ŋà. 5 Ó ɖi, ɔ̀gã́-atsɛbɔ-Ɔ̀ɖáyé ŋa† òŋu ɔma-ɛgbɛ́-onùgbó-ɔma-Ìyúɖà ŋa kpó nákó nyáa nya àyídzá ti nára-òŋu ní òtítɔ́ ní òŋu wà fɔ̀#ɛ́. Tsí ńɖi-ŋa ní òŋu gba ìwé kã̀ŋa yèé à náa ń bere ɔ̀nà#á, tsí òŋu kó lɔ ńɖi-ɔma-Ìyúɖà yèé ŋa wà ńǹlú-Ɖàmásì#ɛ́. Òŋu làkóò ńbɛ̀, tsí òŋu kó káà mú atɛ̀náànyì-Yèésù yèé ŋa wà bɛ̀#ɛ́, tsí ɖè ŋá, tsí kɛ́ ŋa wá ńYèrúsàlɛ́mì, tsí ká tsoró bá ŋa ni.

6 Ńbɛ̀ɛ́, òŋu dzì nɔ́ɔ̀nà làkóò, tsí tó sɔ́má-ìlú-Ɖàmásì#ɛ́. Ńǹwèrè-òsã́ gãgã#á gbòkã́#á, iná-kã̀ ti nɔ́ɔ̀rɔ̃, tsí má wérí-òŋu kpó, 7 tsí òŋu tsubúlɛ̀, tsí òŋu gbɔ́ oŋù-kã̀, tsí oŋù#ɛ́ wà kpe òŋu ní: Sɔ́lù! Sɔ́lù! Kí tse tsí ò wà tsoró bá mi bɛ́ɛ̀ ná?

8 Tsí òŋu gbo, òŋu wà dzɔ́ŋù ní: Ɔ̀gá-mi! Nɛ̀ɛ́ ni ná?

Tsí oŋù#ɛ́ sɛ̃̀ wà fɔ̀ fú òŋu ní: Òŋu ní dzɛ́ Yèésù ti Nàsàrɛ́tì, ɛnɛ yèé ó wà tsoró bá#á.

9 Tsí ɛnɛ yèé ŋa wà bɛ̀ bá òŋu#ɛ́ rí iná#á. Ó ɖi, à kò gbɔ́ oŋù-ɛnɛ yèé wà wíìnyɛ̀ fú òŋu#ɛ́. 10 Tsí òŋu sɛ̃̀ wà bèrè ró ní: Ɔlá-mi! Kí òŋu nákó tse ná?

Tsí Ɔlá-òŋu gbo wà dzɔ́ŋù fú òŋu ní: Òŋu kó ǹɖe, tsí òŋu kó lɔ ńǹlú-Ɖàmásì#ɛ́. Bí òŋu tó bɛ̀, iŋɛ́ kpó yèé wà ní òŋu kó tse#ɛ́, à nákó fɔ̀ɔ́ fú òŋu.

11 Kíbí iná#á má gbà tó#ɛ́, ó fɔ́ odzú-òŋu, tsí ɛnɛ yèé tɛ̀ náànyì-òŋu làkóò ŋa#á fa ɔ̀kpá-ɔwɔ́-òŋu, tsí gbɛ̃́ òŋu lɔ ńǹlú-Ɖàmásì#ɛ́ ni.

12 Ńbɛ̀ɛ́, ɔ̀nyà-kã̀ wà ńǹlú#ɛ́ bɛ̀, tsí à náa kpèé ní Ànàníyà. Náa nɛ́ àrísá fú Ɔ̀ɖáyé, tsí náa wà rɛ̃̀ si nɛ́kpa-Mɔ̀ɔ́sè† gbo. Tsí ɔma-Ìyúɖà yèé ŋa kpó wà ńǹlú-Ɖàmásì#ɛ́ náa nya àyídzá-ire ti nára‐ɛ̀. 13 Ńbɛ̀ɛ́, Ànàníyà#á wá ńɖɔ̀-òŋu, tsí wáa ɖóro sɔ́má-òŋu, tsí wà fɔ̀ fú òŋu ní: Sɔ́lù Ìnàbí-mi, odzú‐ɛ̀ɛ kó tsí, tsí o rírã.

Tsí ńǹɖì-bɛ̀ gbòkã́#á, odzú-òŋu tsí, tsí òŋu wà rí Ànàníyà#á rere. 14 Tsí ó wà wí fú òŋu ró ní: Ɔ̀ɖáyé yèé gbágbóǹgbàgbò-àŋa ŋa sɛ̃̀ wáa lɔ#ɛ́ ti tsã òŋu Sɔ́lù si náàtsùgbé-òŋu kó ma awù‐ɛ̀. Ó tsã òŋu, tsí òŋu kó rí Yèésù, ɛnɛ yèé dzɛ́ atsòtítɔ́#ɛ́, tsí òŋu kó gbɔ́ oŋù tòŋu ká‐ɛ̀ gìɖì gìɖì. 15 Ó ɖi, òŋu nákó wà nya àyídzá-Yèésù#ɛ́ nódzú-ɔ̀nyà kpó, àyídzá-iŋɛ́ kpó yèé òŋu rí, tsí gbɔ́#ɛ́. 16 Ó ɖi, kí òŋu wà ɖóro ɖè báàyí ró? Òŋu kó ǹɖe, tsí òŋu kó wà kpe Yèésù Ɔlá-wa ní kó mɔ́wɔ́ gbè fú òŋu ɖé, tsí ká wìwɛ̀-Yèésù† fú òŋu, tsí Ɔ̀ɖáyé kó gba òŋu nɔ́wɔ́-àbi-òŋu ŋa.

17 Ńbɛ̀ɛ́, òŋu sɛ̃̀ bɔ̀ wáa lɔ ńYèrúsàlɛ́mì. Tsí ó ɖi nɔ́dzɔ́-kã̀, tsí òŋu wà ńnɔlé-Ɔ̀ɖáyé si, tsí wà wúùre. Tsí iŋɛ́-kã̀ tse fú òŋu kíbí à náa rí odzú bɛ́#ɛ́. 18 Tsí òŋu rí Ɔlá-wa, tsí ó wà fɔ̀ fú òŋu ní: Kóyá fɛ́ɛ! Ǹɖe ńǹlú-Yèrúsàlɛ́mì bí nɛ́sɛ̀ nɛ́sɛ̀. Ó ɖi, bí ò wà nya àyídzá ti nára-mi ńǹlú#ɛ́ bí, ɔ̀nyà ŋa kàkó gbà si ńǹtá‐ɛ̀.

19 Tsí òŋu wà dzɔ́ŋù fúu ní: Ɔlá-mi, ɔ̀nyà ŋa mà ní òŋu náa lɔ ńlé-ìkpàɖé-ɔma-Ìyúɖà ŋa† kã̀kã̀ dzɔ̀ɔ́ dzɔ̀ɔ́, tsí bí òŋu rí ɔ̀nyà-kã̀, tsí ó nɛ́ àkaralé si ńǹtá‐ɛ̀ gé ná, òŋu náa múu wáa lɔ káà sé nɛ́ɛ̀ŋà, tsí à náa tsɔ̀ɔ́ náàtàmì gbo tó bɛ́ɛ̀. 20 Tsí ńǹwèrè yèé à mú Sètèfánì, anyàyídzá-Yèésù#ɛ́, tsí kpaá nóòkú#ɛ́ fe, òŋu wà bɛ̀ nɔ́dzɔ́ nyɛ̀ŋɛ̀, tsí òŋu gbo, òŋu gbà si ńǹtá‐ɛ̀, tsí wà ɖe àwù-ɛnɛ yèé kpaá ŋa#á.

21 Tsí Ɔlá-wa sɛ̃̀ wà wí fú òŋu ró ní: Òŋu kó ǹɖe. Ó ɖi, òŋu bòkó bɛ òŋu lɔ ńǹɖì dzídzɛ̃̀-kã̀, ńɖi-ɛnɛ yèé kò dzɛ́ ɔma-Ìyúɖà ŋa#á.

Kpɔ́lù wà wíìnyɛ̀ bá ɔ̀gã́-sɔ́dzà ŋa

22 Ńbɛ̀ɛ́, ɔma-Ìyúɖà† ŋa rɛ̃tígbè-Kpɔ́lù títí wáa fú ńbí ó wí afɔ̀ nyɛ̀ŋɛ̀#ɛ́. Tsí afɔ̀#ɛ́ kí ńǹtá-bɛ́ɛ̀, tsí à wà ɖúgbe, tsí wà fɔ̀ ní: Ká kpòkú‐ɛ̀! Ɔ̀nyà-ìrɔ́ yèé, kò wà ní kó gbé ńǹtalɛ̀#ɛ́!

23 Tsí à wà kɔ kíríɖíɖí kíríɖíɖí, tsí wà bɔ́ àwù-ŋà ŋa, tsí wà gbã̀ ŋá, tsí wà sú kàrùwà lɔ ńǹgbèrí tùùù. 24 Tsí ɔ̀gã́-sɔ́dzà ŋa#á fɔ̀ ní ká fa Kpɔ́lù wɔ̀ nádzɔ-sɔ́dzà ŋa#á, tsí ká tsɔ̀ɔ́ náàtàmì rere kó tóo, náàtsùgbée kó nyáa fɔ iŋɛ́ yèé gìɖì tse tútútú, tsí ɔma-Ìyúɖà ŋa wà ɖúgbe bòó tó bɛ́ɛ̀#ɛ́. 25 Tsí à fàá lɔ, tsí ɖèé, tsí bòkó kpée tsítsɔ̀ náàtàmì#ɛ́ gé, tsí Kpɔ́lù wà fɔ̀ fú ɔ̀gá-ɛgbɛ́-sɔ́dzà ŋa yèé wà bɛ̀#ɛ́ ní: Ɔ̀nà mɛ̀ɛ́ wà fú ŋa ní ká tse bɛ́ɛ̀? Bí ɔ̀nyà-kã̀ dzɛ́ ɛnɛ-Rómà† ŋa, à náa kpɛdzɔ́ fúu tã́ná ká tsɔ̀ɔ́ náàtàmì ni nɔ̀.

26 Kíbí ɔ̀gá#á gbɔ́ bɛ́ɛ̀#ɛ́, ó yára lɔ káà tsetí fú ɔ̀gã́‐ɛ̀ ní: Hàá! Ó ma iŋɛ́ yèé ó bòkó ɖá si#ɛ́ɛ̀? Idza#á, ɛnɛ-Rómà ŋa ní ó dzɛ́#ɛ́ fòò.

27 Tsí ɔ̀gã́#á gbo ǹɖe gbòkã́, tsí wáa lɔ ńɖi-Kpɔ́lù, tsí wà bèrèé ní: Kó wí òtítɔ́ fú òŋu ní fee, ɛnɛ-Rómà ŋa ní ó dzɛ́ ìɖéǹɖè#ɛ́ɛ̀?

Tsí Kpɔ́lù ní: Ɛ̃ɛ̃, ìɖéǹɖè ni.

28 Tsí ɔ̀gã́#á sɛ̃̀ wà wí fú Kpɔ́lù ró ní: Òŋu, kò tsi owó-aréma ní òŋu sã tã́ná òŋu kó ɖí ɛnɛ-Rómà ŋa#á oo.

Tsí Kpɔ́lù gbo sɛ̃̀ wà dzɔ́ŋù fúu ní: Tsí òŋu fe, náàmbara-ɛnɛ-Rómà ŋa ní òŋu ti#ɛ́.

29 Ńǹɖì-bɛ̀ gbòkã́#á, ɛnɛ yèé ŋa bòkó tsɔ Kpɔ́lù náàtàmì náàtsùgbée kó wíìnyɛ̀#ɛ́, à tòkpì náànyì kpó. Tsí kíbí ɔ̀gã́-sɔ́dzà ŋa#á gbo mà báàyí ní Kpɔ́lù dzɛ́ ɛnɛ-Rómà ŋa#á, ɛ̀ɖɔ̃̀ wà ɖáa, iŋɛ́ yèé tse#ɛ́, òŋu ní fɔ̀, tsí à ɖèé ńwɔ̀rɔ̀ si#ɛ́.

À gbɛ̃́ Kpɔ́lù lɔ ńɖi-ɛgbɛ́-àkpɛ̀dzɔ́-ɔma-Ìyúɖà ŋa

30 Tsí ó ɖi ńlɛ̀ má‐ɛ̀, tsí ɔ̀gã́-sɔ́dzà ŋa#á tsèsérè ní iŋɛ́ gìɖì tse tútútú, tsí ɔma-Ìyúɖà† ŋa wà mú afɔ̀ bá Kpɔ́lù#ɛ́, òŋu nákó màá kpoŋu gé ni. Ńbɛ̀ɛ́, ó fɔ̀, tsí à tú wɔ̀rɔ̀ ŋa nára-Kpɔ́lù, tsí ó kpe onùgbó-atsɛbɔ-Ɔ̀ɖáyé† ŋa òŋu ɛgbɛ́-àkpɛ̀dzɔ́-ɔma-Ìyúɖà ŋa† ní ká kpìɖé, tsí wo ɔ̀nà nára-afɔ̀#ɛ́. Tsí à kpìɖé#ɛ́ bɛ́ɛ̀, tsí à gbɛ̃́ Kpɔ́lù wáa ɖóro nódzú-ŋa.