Itsɛ́ 21

Kpɔ́lù làkóò ńYèrúsàlɛ́mì

Náànyì-bɛ́ɛ̀#ɛ́, àa ǹɖe ńɖi-onùgbó-ɛgbɛ́-Kírísítò-ɛnɛ-Èfɛ́sì ŋa, tsí káà wɔ̀ nɔ́kɔ̃̀-odzómi, tsí gbà gãgã lɔ ńǹlú-Kɔ́sì. Ńlɛ̀ má‐ɛ̀, àa ǹɖe bɛ̀, tsí káà tó ńlɛ̀-Ròɖó, tsí àa ǹɖe bɛ̀ gbo, tsí lɔ káà tó ńǹlú-Kpàtárà. 2 Kíbí àa tó ńbɛ̀#ɛ́, àa rí ɔkɔ̃̀-odzómi òmírɛ̃̀-kã̀, tsí ó làkóò nérè-Fènísì ńlɛ̀-Sìrí, tsí àa wɔ̀ ńnɛ̀, tsí dzì nɔ́ɔ̀nà ró. 3 Tsí àa làkóò, tsí káà mú ilɛ̀-Sìkpírò wò ńwádzú-wa bɛ́, tsí àa kɔ̀ɔ́ dzɔ̀ɔ́ náàwóòsì-wa, tsí káà bɔ́ ńlɛ̀-Sìrí. Tsí àa lɔ káà tó ńǹlú-Tíre, tsí àa tì. Tsí ɔkɔ̃̀-odzómi#ɛ́ ti arù ŋa si bɛ̀. 4 Ńǹlú-Tíre#ɛ́, atɛ̀náànyì-Yèésù kã̀ŋa wà bɛ̀, tsí àa rí ŋa, tsí àa tse adzà-kã̀ ńɖi-ŋa bɛ̀. Tsí kíbí Mímí-Ɔ̀ɖáyé† wà ńǹtá-ŋa si#ɛ́, à wà fɔ̀ fú Kpɔ́lù ní kó máa lɔ ńǹlú-Yèrúsàlɛ́mì ró. 5 Tsí kíbí adzà nyɛ̀ŋɛ̀ tã́ wáa lɔ#ɛ́, àa ǹɖe ní àa kó dzì nɔ́ɔ̀nà, tsí àŋa gbo, à ǹɖe kpó, aya gbo, ɔma gbo, tsí sɛ̃̀ wá nɔ́ɔ̀nà fùɖá náàŋírĩ-ìlú#ɛ́. Tsí àa tó nétí-àhũ, tsí àa kálɛ̀ bɛ̀, tsí wúùre fú Ɔ̀ɖáyé. 6 Tsí àa mú ɔ̀nà kpɛ̃́ bɛ̀, tsí àa wɔ̀ nɔ́kɔ̃̀-odzómi, tsí dzì nɔ́ɔ̀nà, tsí àŋa gbo, à sɛ̃̀ bɔ̀ lɔ ńlé.

7 Ńbɛ̀ɛ́, àa ti ńǹlú-Tíre nɔ́kɔ̃̀-odzómi, tsí káà tó ńǹlú-Tòlèmásì. Kíbí àa tó ńǹlú#ɛ́, àa lɔ káà kí ìnàbí yèé ŋa wà bɛ̀#ɛ́, tsí tse ɔdzɔ́-kã̀ ńɖi-ŋa. 8 Ńlɛ̀ má‐ɛ̀, àa ǹɖe bɛ̀, tsí lɔ káà tó ńǹlú-Kèsàré. Kíbí àa tó ńbɛ̀#ɛ́, àa lɔ ńlé-Fìlíkpò, tsí sɔ̀ ńɖɔ̀‐ɛ̀. Fìlíkpò#ɛ́ dzɛ́ adzíkɔ̀ ɖíɖɔ̃̀ fúnɛ wérí, tsí ó wà náàŋírĩ-ɔ̀nyà méedze yèé ŋa à tsã̀ dzɔ̀ɔ́ dzɔ̀ɔ́ ńYèrúsàlɛ́mì#ɛ́.^* 9 Ɔma‐ɛ̀ ɔnɔbɛ̃̀ɛ̃ mɛ́ɛrɛ̃ kã̀ŋa gbo wà, tsí à kò ma ɔkɔ, tsí àŋa mɛ́ɛrɛ̃ mɛ́ɛrɛ̃#ɛ́ kpó dzɛ́ agbáfɔ̀-Ɔ̀ɖáyé fɔ̀† ŋa. 10 Tsí kíbí àa wà bɛ̀ si ó ti tse ɔdzɔ́ mɛ́ɛlóle kã̀ŋa#á, agbáfɔ̀-Ɔ̀ɖáyé fɔ̀†-kã̀ gbo ti nérè-Yùɖéyà. À náa kpèé ní Àgábù. 11 Tsí ó wá ńɖi-wa, tsí gba ɖíɖì-Kpɔ́lù, tsí ń ɖe ɛsɛ̀ òŋu ɔwɔ́ tòŋu ká‐ɛ̀ ŋa, tsí ní: Mímí-Ɔ̀ɖáyé wà wíìnyɛ̀-kã̀. Ká rɛ̃tígbè, tsí ká gbɔ́. Ó ɖi, ɛnɛ yèé dzɛ́ olí-ɖíɖì#ɛ́, kíbí òŋu ɖe ara-òŋu gbà#á, bɛ́ɛ̀ tútútú ní ɔma-Ìyúɖà† ŋa nákó ɖe ɛnɛ nyɛ̀ŋɛ̀ ńǹlú-Yèrúsàlɛ́mì, tsí à nákó múu bɔwɔ́-ɔ̀nyà-ìlú-àledzò ŋa#á.

12 Kíbí àa gbɔ́ bɛ́ɛ̀#ɛ́, àwa gbo, ìnàbí yèé ŋa gbo wà ńǹlú-Kèsàré bɛ̀#ɛ́, àa tsìkálɛ̀ fú Kpɔ́lù títítí ní kó máa lɔ ńǹlú-Yèrúsàlɛ́mì#ɛ́ ró. 13 Tsí Kpɔ́lù gbo gboŋù fú wa, tsí ní: Kíbí àa wà sɔkṹ bɛ́ɛ̀#ɛ́, àa bòkó mú ara kú òŋu ńnɛ̀ɛ́ nɔ̀. Ó ɖi òŋu, òŋu dzɛ́ ní ká ɖe òŋu, tsí gìɖì#ɛ́, òŋu kó káà kú ńYèrúsàlɛ́mì náàtsùgbé-Yèésù Ɔlá-òŋu.

14 Tsí àa kò tì nyáa kparɔ ìsérè‐ɛ̀ gìɖì. Ńbɛ̀ɛ́, àa kò le oŋù si ńnɛ̀ ró, tsí àa tédzú fɔ̀ ní: Ɔlɔ́dzɔ́ kó tse awù‐ɛ̀.

15 Ńbɛ̀ɛ́, náànyì-ɔdzɔ́ mɛ́ɛlóle kã̀ŋa ró#ɛ́, àa kpaɖí, tsí ǹɖe dzì nɔ́ɔ̀nà-ìlú-Yèrúsàlɛ́mì. 16 Tsí atɛ̀náànyì-Yèésù kã̀ŋa ńǹlú-Kèsàré#ɛ́ bɛ̀ tɛ̀ náànyì-wa, tsí gbɛ̃́ wa lɔ ńɖi-Nàsɔ́nì, tsí àa lɔ káà sɔ̀ ńɖɔ̀‐ɛ̀. Ɛnɛ-ilɛ̀-Sìkpírò ŋa ni, tsí òŋu gbo ti wà tɛ̀ náànyì-Yèésù ìwèrè‐ɛ̀ dzɛ̃̀.

Kpɔ́lù kpàɖé bá Yàkúbù òŋu onùgbó-ɛgbɛ́-Kírísítò ŋa

17 Ńbɛ̀ɛ́, kíbí àa káà tó ńYèrúsàlɛ́mì#ɛ́, ìnàbí yèé wà bɛ̀ ŋa#á gbà wá náyè títɛ́. 18 Ńlɛ̀ má‐ɛ̀#ɛ́, àwa Kpɔ́lù méèdzì dzɔ́ lɔ ńɖi-Yàkúbù. Tsí onùgbó-ɛgbɛ́-Kírísítò ŋa gbo kpàɖé si bɛ̀ kpó. 19 Tsí Kpɔ́lù mú okũ bɔwɔ́-ŋa, tsí kpɛ̀rɔ́ nɛ́kpa nɛ́kpa fú ŋa ti nára-iŋɛ́ kpó yèé Ɔ̀ɖáyé tse gbà ńǹtá‐ɛ̀ náàŋírĩ-ɛnɛ yèé kò dzɛ́ ɔma-Ìyúɖà ŋa#á.

20 Tsí kíbí à gbɔ́ bɛ́ɛ̀#ɛ́, à nyɛ Ɔ̀ɖáyé, tsí wà fɔ̀ fúu ní: Ìnàbí-wa, afɔ̀-kã̀ wà. Kó rí kíbí ɔ̀nyà-ɛ̀gbɛ̀lɛ́ɛ̀gbɛ̀-kã̀ náàŋírĩ-ɔma-Ìyúɖà ŋa nyí, tsí nɛ́ àkaralé si ńǹtá-Ɔlá-wa, tsí àŋa kpó à banɛ́ ɛkpa-Mɔ̀ɔ́sè† nɔ́wɔ́ méèdzì si#ɛ́ káyí. 21 Ó ɖi, kó gbɔ́ iŋɛ́ yèé ɔ̀nyà ŋa wà fɔ̀ fú ŋa ti nára‐ɛ̀#ɛ́. À ní: Ó wà kɔ́ ɔma-Ìyúɖà yèé ŋa wà ńǹlú-àledzò ŋa wérí#ɛ́ ní ká máa rɛ̃̀ si nɛ́kpa-Mɔ̀ɔ́sè ró. Ó ɖi, ká máa ɖákó† fú ɔma-ŋà ŋa ró, tsí ká máa tsorò-ɔma-Ìyúɖà ŋa gbo ró.

22 Tsí à wà fɔ̀ fúu ró ní: Bí àŋa kó tse fáà báàyí? Ó ɖi, à kàkó kɔ àrìmáa mà ní ó wá náàŋírĩ-ìlú#ɛ́ si. 23 Báàyí#ɛ́, àŋa bòkó fúu ńfɛ̀ɛ́nɔ́-kã̀, tsí kó tse si ńǹtá‐ɛ̀. Ɔ̀nyà mɛ́ɛrɛ̃ kã̀ŋa wà náàŋírĩ-àŋa, tsí à tàlé-kã̀ fú Ɔ̀ɖáyé si. 24 Ifɛ̀ɛ́nɔ́#ɛ́ ní wà dzɛ́ ní kó tɛ̀ náànyì-ŋa, tsí ká dzɔ́ lɔ káà gba àfárá, tsí kó sã owó-ɛbɔ ŋa si nárũ-ŋa, tsí ká wáa fá éwo-ŋa ńkòóró ńǹkɛ̀ɛ́. Ńbɛ̀ɛ́, ɔ̀nyà kpó nákó mà ní afɔ̀ yèé ŋa à wà fɔ̀ ti nára‐ɛ̀#ɛ́ ni, òɖòbò ni. Tsí à nákó rí mà ní òŋu ká‐ɛ̀ gìɖì gbo wà rɛ̃̀ si nɛ́kpa-Mɔ̀ɔ́sè. 25 Ó ɖi, ti nára-ɛnɛ yèé ŋa kò dzɛ́ ɔma-Ìyúɖà ŋa, tsí àŋa gbo, à nɛ́ àkaralé si ńǹtá-Ɔlá-wa#á, àŋa kɔ ìwé, tsí fɔ ìsérè yèé àŋa kɛ́#ɛ́ si ńnɛ̀ lɔ fú ŋa. Ìsérè#ɛ́ ní dzɛ́ ní: Ká máa dzɛ ɛrã yèé à ń tsɛbɔ#ɛ́ ró. Èkéèdzì‐ɛ̀#ɛ́, bí à kpa ɛrã-kã̀, tsí àmbara kí ńnɔ́‐ɛ̀, tsí kò ɖà ńlɛ̀, ká máa dzɛɛ́. Ká máa dzɛ àmbara gbo. Tsí ká wà nya ɛ̀wɔ̀ yèé ŋa wà náya òŋu nɔ́kɔ nínɛ́#ɛ́ gbo.

26 Tsí Kpɔ́lù dzɛ́, tsí gbɛ̃́ ɔ̀nyà mɛ́ɛrɛ̃ ŋa#á, tsí ó ɖi ńlɛ̀ má‐ɛ̀, tsí ó gba àfárá#á bá ŋa. Tsí ó lɔ ńlé-Ɔ̀ɖáyé, tsí kó káà ɖíre ɔdzɔ́ yèé orò-àfárá#á nákó kò fú ɔ̀nyà mɛ́ɛrɛ̃ ŋa#á, tsí ká tsɛbɔ fú kṹnukṹ ńǹkɛ̀ɛ́#ɛ́.

À mú Kpɔ́lù kíbí ó wà ńlé-Ɔ̀ɖáyé si#ɛ́

27 Ɔdzɔ́ méedze ní orò-àfárá#á náa gbà tã́ná kó tã́#á. Ńbɛ̀ɛ́, ó bɔ oɖé, tsí ɔdzɔ́ méedze#ɛ́ kó kò gé, tsí Kpɔ́lù lɔ ńlé-Ɔ̀ɖáyé, tsí ɔma-Ìyúɖà† kã̀ŋa yèé ti ńlɛ̀-Àsíyà#á ríi bɛ̀, tsí à sɔ́ èrò#ɛ́ kpó, tsí à ǹɖe nyàgã̀ã̀, tsí ɔwɔ́-ŋa tɛ̀ɛ́. 28 Tsí à wà ɖúgbe, tsí wà fɔ̀ ní: Ɔma-Ìsàràyɛ́lì† ŋa, è múu bá wa ɖé ooò! Idza#á ńnɛ̀ɛ́, òŋu ní náa wà tsɛ̀kɔ́ fú ɔ̀nyà ŋa kpó ńǹɖì ńǹɖì ŋa, tsí ɛ̀kɔ́#ɛ́ bàkó fɔ́ ìlú#ɛ́ òŋu ilé-Ɔ̀ɖáyé†#ɛ́, tsí ɛkpa-Mɔ̀ɔ́sè†#ɛ́ gbo, à kàkó tse si ńǹtá‐ɛ̀ ró. Tsí yèé yɔ#ɛ́, ó gbɛ̃́ ɛnɛ yèé kò dzɛ́ ɔma-Ìyúɖà ŋa#á gìɖì gbo wɔ̀ ńnɔlé-Ɔ̀ɖáyé#ɛ́. Ó gbɛ̃ɛ̃́rĩ́ ìɖìgbé-Ɔ̀ɖáyé#ɛ́ ńnɛ̀ɛ́ nɔ̀.

29 À fɔ̀ bɛ́ɛ̀, iŋɛ́ yèé tse#ɛ́, à rí Kpɔ́lù òŋu àledzò-kã̀ ńǹlú-ŋa bɛ̀. Àledzò#ɛ́, Tìrófì ti ìlú-Èfɛ́sì ni, tsí kò dzɛ́ ɔma-Ìyúɖà ŋa. Tsí à ɖédzú ní bóyá Kpɔ́lù gbɛ̃́ òŋu gbo wɔlé-Ɔ̀ɖáyé#ɛ́ ni. 30 Afɔ̀ yèé à wà fɔ̀ yí, ìlú#ɛ́ wà rò wérí kpó, tsí ɔ̀nyà ŋa tsɛ́ kì, tsí wà bɔ́ ti nóòtã́ nóòsì, tsí wáa tó. Tsí à mú Kpɔ́lù, tsí fàá fùɖá ńkpàtá-ilé-Ɔ̀ɖáyé#ɛ́, tsí gbòkã́ gé#ɛ́, à sé èkũ̀ ŋa. 31 Tsí ɔma-Ìyúɖà ŋa wà wò ní àŋa kó kpa Kpɔ́lù nóòkú. Ó ɖi, sɔ́dzà-ɛnɛ-Rómà† ŋa wà ńǹlú#ɛ́ bɛ̀, tsí ɔ̀gã́-ŋa gbɔ́ ní bɛ́ɛ̀ ní ìlú-Yèrúsàlɛ́mì#ɛ́ wà rò wérí kpó#ɛ́. 32 Kíbí ó gbɔ́ bɛ́ɛ̀#ɛ́, kóyá kóyá gé#ɛ́, ó gbɛ̃́ ɔ̀gá-sɔ́dzà kã̀ŋa òŋu sɔ́dzà kã̀ŋa gbo, tsí à súré wáa lɔ ńɖi-èrò#ɛ́. Tsí kíbí ɔ̀nyà ŋa rí ɔ̀gã́#á òŋu sɔ́dzà ŋa bɛ́ɛ̀#ɛ́, à mí Kpɔ́lù kpíkpa. 33 Ńbɛ̀ɛ́, ɔ̀gã́#á tìmá Kpɔ́lù, tsí ní ká múu, tsí ká mú wɔ̀rɔ̀ méèdzì soó. Tsí ó wà bèrènyɛ̀ ní: Nɛ̀ɛ́ dzɛ́ ɛnɛ#ɛ́, tsí kí ó tse?

34 Tsí náàŋírĩ-ɛnɛ yèé ŋa kpérí si bɛ̀#ɛ́, ɔ̀nyà kã̀ŋa wà ɖúgbe ìrɔ́-kã̀, tsí olòmírɛ̃̀ ŋa gbo wà ɖúgbe ìrɔ́-òmírɛ̃̀. Tsí kíbí igbe#ɛ́ wà gbà tó#ɛ́, ɔ̀gã́-sɔ́dzà ŋa#á kò nyáa ma ɔ̀kã̀ náfɔ̀#ɛ́ tútútú gìɖì. Tsí ó ní ká tédzú gbɛ̃́ Kpɔ́lù lɔ káà si nádzɔ-sɔ́dzà ŋa. 35 Kíbí à gbɛ̃́ɛ̃ làkóò, tsí káà tó ńɖi-àtɛ̀gù ńbí à náa gù wɔlé#ɛ́, èrò#ɛ́ wà tse líle tó bɛ́ɛ̀, tsí ó wà ní sɔ́dzà ŋa kó kɛ́ɛ banɛ́ ni. 36 Tsí ɔ̀nyà kpó tɛ̀ náànyì‐ɛ̀ làkóò, tsí wà ɖúgbe ní: Ká kpòkú‐ɛ̀!

Kpɔ́lù wà fɔ afɔ̀-arũ‐ɛ̀

37 Ńbɛ̀ɛ́, kíbí à bòkó gbɛ̃́ Kpɔ́lù wɔ̀ nádzɔ-sɔ́dzà ŋa#á, ó wà wí fú ɔ̀gã́-sɔ́dzà ŋa#á ní: Òŋu tsìkálɛ̀, kó fú òŋu nɔ́ɔ̀nà, tsí òŋu kó wíìnyɛ̀-kã̀ ɖé.

Tsí ɔ̀gã́#á wà dzɔ́ŋù fúu ní: Hàá! Nà fɔ gɛ̀rɛ́kìì? 38 Òŋu ɖédzú idza-kã̀ yèé ti néÈdzíkpítì ńǹyàsɛ̃̀ɛ̃́-kã̀ bɛ́#ɛ́ ni nɔ̀. Idza yèé ɖá afɔ̀ si, tsí gbɛ̃́ ɔ̀nyà kò gbɔ̃́ɔ̃̀rã̀ ɛgbàá ɛgbàá ɔ̀nà méèdzì (4000) kã̀ŋa lɔ nɔ́ɔ̀ɖã̀#á. Òŋu ɖédzú òŋu ni.

39 Tsí Kpɔ́lù ní: Òò, kò tsi òŋu ni. Ɔma-Ìyúɖà† ŋa ní òŋu dzɛ́#ɛ́, tsí òŋu ti ńǹlú-Tàrísì ńlɛ̀-Sìlíkì. Ìlú lákṹ-kã̀ ni. Òŋu tsìkálɛ̀, kó fú òŋu nɔ́ɔ̀nà, tsí òŋu kó wíìnyɛ̀-kã̀ fú ɔ̀nyà ŋa.

40 Tsí ɔ̀gã́-sɔ́dzà ŋa#á fúu nɔ́ɔ̀nà, tsí Kpɔ́lù ǹɖe ɖóro ńǹtá-àtɛ̀gù ŋa#á, tsí tsɔwɔ́ fú èrò#ɛ́, tsí à tsikó kpó wííí. Tsí Kpɔ́lù kpé ìlú-ɔma-Ìyúɖà ŋa fífɔ̀, tsí wà wíìnyɛ̀ fú ŋa.