Itsɛ́ 20

Kpɔ́lù lɔ ńlɛ̀-Màkɛ̀ɖónìyà òŋu ńlɛ̀-Gɛ̀rɛ́kì

Ńbɛ̀ɛ́, ńǹwèrè yèé ìlú#ɛ́ wáa tù kpó dzùù#ɛ́, Kpɔ́lù kpe atɛ̀náànyì-Yèésù ŋa kpérí, tsí ɖáàmí le ŋá. Tsí ó ní òŋu bòkó lɔ, tsí ó ǹɖe, tsí lɔ ńlɛ̀-Màkɛ̀ɖónìyà. 2 Tsí ó rɛ̃̀ wérí erè-ìyabɛ̀ ŋa, tsí ɖáàmí le atɛ̀náànyì-Yèésù ŋa ńŋɛ́ kpíkpɔ̀. Tsí ó wáa ǹɖe bɛ̀, tsí lɔ ńlɛ̀-Gɛ̀rɛ́kì, 3 tsí ó gbé bɛ̀ gbo fú òtsùkpá mɛ́ɛta. Tsí kíbí ó bòkó wɔ̀ nɔ́kɔ̃̀-odzómi lɔ ńlɛ̀-Sìrí#ɛ́, ó gbɔ́ ní ɔma-Ìyúɖà† ŋa mú arũ ɖé kpó ní àŋa kó tsoró bá òŋu. Ńbɛ̀ɛ́, ó kparɔ ìsérè, tsí ó ní òŋu kó tédzú sɛ̃̀ gbà lɔ ńlɛ̀-Màkɛ̀ɖónìyà fú ara-òŋu. 4 Ó ɖi, ɔ̀nyà kã̀ŋa tɛ̀ náànyì-Kpɔ́lù lɔ. À náa kpe ɔ̀nyà-kã̀ ní Sòkpátà ɔma-Kpírò ńǹlú-Bèré, tsí kpe ɔ̀nyà-kã̀ gbo ní Àrìsìtákò, tsí kpe ɔ̀nyà-kã̀ gbo ró ní Sɛ̀kɔ́nɖò ńǹlú-Tɛ̀sàlòníkì, tsí ɔ̀nyà-kã̀ gbo dzɛ́ Gàyú ńǹlú-Ɖèrèbé, tsí ɔ̀nyà-kã̀ gbo dzɛ́ Tìmɔ̀té. Tsí ɔ̀nyà-kã̀ gbo dzɛ́ Tùtsìkɔ́sì, tsí ɔ̀nyà-kã̀ gbo dzɛ́ Tìrófì. Àŋa méèdzì#ɛ́ gbo ti ńlɛ̀-Àsíyà. 5 Ńbɛ̀ɛ́, àŋa kpó, à tsúwádzú-wa lɔ, tsí wà ɖóro ɖè wá ńǹlú-Tòrásì. 6 Ó ɖi, àwa òŋu#ɛ́, kíbí à dzɛ ɔɖɔ̃́-Kpɔ̃́nɔ́ àrìkɛ́† tã́#á, àa wɔ̀ nɔ́kɔ̃̀-odzómi ti ńǹlú-Fìlíkpò, tsí nɔ́dzɔ́-ɛ̀kɛ́ɛrú‐ɛ̀#ɛ́, àa lɔ káà bá ŋa ńǹlú-Tòrásì#ɛ́, tsí àa dzɔ́ tse adzà-kã̀ ńǹlú#ɛ́ bɛ̀.

7 Ńbɛ̀ɛ́, ó ɖi náalɛ́-ɔdzɔ́ɔ̀sɛ̃̀, tsí àa kpérí ní àa kó dzɔ́ dzɛ dzídzɛ-Ɔlá-wà, tsí Kpɔ́lù wà wíìnyɛ̀ bá ìɖì-ìdzokó#ɛ́. Tsí kíbí ó bɔ ilɛ̀ kó má gé, tsí kó bɔ̀ lɔ#ɛ́, ó wà wíìnyɛ̀ làkóò títí ìŋàáŋà ŋà. 8 Ńlé-ìsã́ŋú-kã̀ ní àa kpàɖé si#ɛ́, tsí à tɔ́ kãnɖé kpíkpɔ̀ si ńnɔlé#ɛ́. 9 Ńbɛ̀ɛ́, ɔmɔ̀tsɔ́-kã̀ gbo wà bɛ̀, tsí à náa kpèé ní Yùtútsì, tsí ó dzokó nárũ-odzúábɔ́ si. Tsí kíbí Kpɔ́lù wà wíìnyɛ̀ kpíkpɛ̃́ tó bɛ́ɛ̀#ɛ́, idza#á sɔ̃rũ lɔ kéɖéɖéé. Tsí kíbí ó wà nórũ#ɛ́ si gba#á, kò nyáa ɖũ ara‐ɛ̀ ró, tsí ó tsubú ti bɛ̀ ńǹtá-ìsã́ŋú-ɛ̀kɛ́ɛta ńbí à wà si#ɛ́ wá ńlɛ̀ gbìm. Tsí à wá ní ká wáa kɛ́ɛ, tsí ó ti kú si. 10 Tsí Kpɔ́lù tì wá, tsí balɛ̀ si ńǹtá‐ɛ̀, tsí fɔ̃́ɔ̃, tsí tsíi féléé, tsí wà wí fú ŋa ní: Ɛ̀ɖɔ̃̀ kó máa ɖá ŋa, ó wà náàyɛ̀ si.

11 Ńbɛ̀ɛ́, Kpɔ́lù sɛ̃̀ gu ilé#ɛ́ lɔ, tsí ó kɛ́ kpɔ̃́nɔ́, tsí bùú, tsí dzɛ. Tsí ó tɔ́ wíìnyɛ̀ fú ŋa bɛ́ɛ̀ ró títí fú ilɛ̀ má. Tsí ó ǹɖe ńɖi-ŋa, tsí bɔ̀ lɔ. 12 Ó ɖi, idza ɔmɔ̀tsɔ́#ɛ́ òŋu sɛ̃̀ dzí wá náàyɛ̀ si ńǹɖì‐ɛ̀, tsí à gbɛ̃́ɛ̃ wáa lɔ ńlé, tsí ɛ̀ɖɔ̃̀-àŋa kpó dzilɛ̀ ńǹkɛ̀ɛ́.

Kpɔ́lù wà wíìnyɛ̀ fú onùgbó-ɛgbɛ́-Kírísítò ŋa ńǹlú-Èfɛ́sì

13 Náànyì-bɛ́ɛ̀#ɛ́, àwa òŋu, àa wɔ̀ nɔ́kɔ̃̀-odzómi, tsí dzì ńwádzú lɔ ńǹlú-Ásò. Kpɔ́lù ti fɔ̀ fú wa ní àa kó kpàɖé òŋu bɛ̀, iŋɛ́ yèé tse#ɛ́, ó wò ní òŋu kó gba ɔ̀nà-ilɛ̀ lɔ. 14 Tsí kíbí ó wáa bá wa ńǹlú-Ásò#ɛ́, ó wɔ̀ nɔ́kɔ̃̀-odzómi bá wa bɛ̀, tsí àa lɔ káà ɖóro ńǹlú-Mìtìlénì. 15 Tsí àa ǹɖe bɛ̀ gbo, tsí ńlɛ̀ má‐ɛ̀#ɛ́, àa káà tó sɔ́má-ìlú-Tsíyò. Tsí nɔ́dzɔ́-èkéèdzì‐ɛ̀#ɛ́, àa káà tó ńǹlú-Sámɔ̀. Tsí ó ɖi nɔ́dzɔ́-ɛ̀kɛ́ɛta‐ɛ̀, tsí àa lɔ káà tó ńǹlú-Mìlɛ́tì. 16 Àa lɔ bɛ̀, tsí gbà nákpálà-kã̀-ìlú-Èfɛ́sì, iŋɛ́ yèé tse#ɛ́, Kpɔ́lù kò wò ní òŋu kó yà lɔ bɛ̀. Kò wò ní òŋu kó kpɛ̃́ ńlɛ̀-Àsíyà, tsí ìwèrè kó wáa lɔ fú òŋu. Ó ɖi, iŋɛ́ yèé ó wà lé#ɛ́ gé ní dzɛ́ ní kó yára, tsí bóyá ni kó tó ńǹlú-Yèrúsàlɛ́mì, tsí yáa bá ɔɖɔ̃́-Dzídzɛ titɔ̃† yèé à bòkó dzɛ#ɛ́.

17 Ńbɛ̀ɛ́, kíbí àa wà rɔ ɛsɛ̀ ńǹlú-Mìlɛ́tì#ɛ́, Kpɔ́lù bɛ ɔ̀nyà-kã̀ lɔ ńǹlú-Èfɛ́sì#ɛ́ ní kó lɔ káà kpe onùgbó-ɛgbɛ́-Kírísítò-ibɛ̀ ŋa wá fú òŋu. 18 Tsí ó káà kpè ŋá, tsí kíbí à wáa tó ńɖɔ̀‐ɛ̀#ɛ́, ó wà wí fú ŋa ní: Títí nɔ́dzɔ́ yèé òŋu kɔ́ wá náàŋírĩ-ŋa ńlɛ̀-Àsíyà#á, à ma kíbí òŋu gbé gbà ńǹwèrè ìmarũ yèé òŋu tse ńɖi-ŋa kpó#ɛ́. 19 Òŋu tsitsɛ́ fú Ɔlá-wa òŋu ìrɔ̀lɛ̀ òŋu inyɔ́kṹ nódzú. Tsí kíbí ɔma-Ìyúɖà† ŋa náa wà mú arũ ɖé kpó ní àŋa kó kpa òŋu nóòkú#ɛ́, òŋu náa wà réré kpíkpɔ̀. 20 Tsí à mà gbo ní iŋɛ́ kpó yèé nákó mɔ́wɔ́ gbè fú ŋa#á, òŋu dzíkɔ̀‐ɛ̀ fú ŋa. Òŋu kò ɖɔbɔ nára-iŋɛ́-kã̀ kpókpó fú ŋa. Ńnɔ́-ilé ŋa gbo, nódzú-ɔ̀nyà ŋa gbo, òŋu náa wà tsɛ̀kɔ́ fú ŋa. 21 Òŋu náa wà le oŋù si náfɔ̀#ɛ́ fú ɔma-Ìyúɖà ŋa gbo òŋu ɛnɛ yèé kò dzɛ́ ɔma-Ìyúɖà ŋa#á gbo ní ká nyíìlò kpaɖà, tsí ká wá ńɖi-Ɔ̀ɖáyé, tsí ká gba Yèésù Kírísítò Ɔlá-wa gbɔ́.

22 Báàyí#ɛ́, Mímí-Ɔ̀ɖáyé† mú òŋu ńkpá ní òŋu kó lɔ ńYèrúsàlɛ́mì, tsí òŋu wà nɔ́ɔ̀nà‐ɛ̀ si làkóò. Tsí òŋu kò sì ma iŋɛ́ yèé bòkó káà tse òŋu bɛ̀#ɛ́. 23 Ó ɖi, iŋɛ́ yèé òŋu mà gé#ɛ́ ní dzɛ́ ní ńǹlú kã̀kã̀ kpó ńbí òŋu náa tó#ɛ́, Mímí-Ɔ̀ɖáyé náa wà kã́rã́ òŋu ní à nákó mú òŋu si nɛ́ɛ̀ŋà, tsí òŋu nákó wáa bá ìréré kpíkpɔ̀ kpàɖé. 24 Ó ɖi, òŋu ti mú ikú-òŋu tà ná. Òŋu wà wò ní òŋu kó rɛ̃ ɔ̀nà-òŋu tã́, tsí òŋu kó tse itsɛ́ yèé Yèésù Ɔlá-wa ń bɔwɔ́-òŋu#ɛ́ dzálɛ̀. Ó ɖátsɛ́ fú òŋu ní òŋu kó dzíkɔ̀ ɖíɖɔ̃̀-kã̀ fúnɛ ní Ɔ̀ɖáyé náa tse ore-ɔ̀fɛ́ fúnɛ. Tsí bí òŋu nákó nyáa tseé dzálɛ̀#ɛ́, iŋɛ́-kã̀ kpókpó kàkó kpã́dzú fú òŋu ró.

25 Dzɔ̀ɔ́ dzɔ̀ɔ́#ɛ́, òŋu náa wà gbà ńǹtá-ŋa kpó, tsí wà dzíkɔ̀ fú ŋa ní Ɔ̀ɖáyé bòkó wáa dzoyè si ńǹtá-àŋa. Ó ɖi báàyí#ɛ́, òŋu mà ní ɔ̀kã̀-ŋa-kã̀ kpókpó kàkó rí òŋu láyé ró. 26 Àtsùgbée bɛ́ɛ̀ ní òŋu wà le òŋu si ńnɛ̀ kũkũkũ fú ŋa nɔ́mbɛ́ ní bí ɔ̀nyà-kã̀ mú ara‐ɛ̀ tsɛ̀rá, ó tse afɔ̀-ɔlá‐ɛ̀ òŋu ká‐ɛ̀. Kò ti ńɖɔ̀-òŋu, 27 iŋɛ́ yèé tse#ɛ́, òŋu kò ɖɔbɔ nára-iŋɛ́-kã̀ kpókpó fú ŋa. Kà kàa bɛ́ɛ̀, ètò yèé Ɔ̀ɖáyé tse si kpó#ɛ́, òŋu dzíkɔ̀‐ɛ̀ fú ŋa. 28 Ó ɖi, ká tsɔ́ éwo-ara-ŋa rere nára-àŋa ká-ŋa òŋu nára-agbo-Ɔ̀ɖáyé yèé wà bɛ̀#ɛ́. Ó ɖi, Mímí-Ɔ̀ɖáyé mú agbo#ɛ́ bɔwɔ́-ŋa ní ká wà rí ìtá‐ɛ̀. Agbo-Ɔ̀ɖáyé#ɛ́ wà kíbí agbo-àgùɖã̀ bɛ́ ni, tsí à dzɛ́ aró-agbo#ɛ́ fúu. Tsí kíbí aró-àgùɖã̀-kã̀ náa tɔ́dzú àgùɖã̀‐ɛ̀ ŋa rere#ɛ́, àŋa gbo ká wà tɔ́dzú agbo-Ɔ̀ɖáyé#ɛ́ bɛ́ɛ̀. Agbo#ɛ́, Ɔ̀ɖáyé tse tsí kó dzɛ́ tòŋu ká‐ɛ̀ gbà ńǹtá-àmbara-Ɔma bíbí‐ɛ̀ yèé ɖà ńlɛ̀#ɛ́. 29 Tsí òŋu mà gbo ní bí òŋu wáa ǹɖe ńɖi-ŋa tã́, ɔ̀nyà kã̀ŋa nákó wáa wá náàŋírĩ-ŋa. À nákó wáa fɔ́ agbo-Ɔ̀ɖáyé#ɛ́. Ɛnɛ nyɛ̀ŋɛ̀ ŋa náa tse kíbí òkóòkò ŋa náa wáa fɔ́ agbo-àgùɖã̀ ŋa bɛ́#ɛ́ ni. 30 Tsí náàŋírĩ-àŋa ká-ŋa gìɖì#ɛ́, ɔ̀nyà kã̀ŋa gbo nákó ǹɖe, tsí wà fɔ afɔ̀-òɖòbò ŋa náàtsùgbé-atɛ̀náànyì-Yèésù ŋa kó nyí, tsí wà tɛ̀ náànyì-ŋa làkóò. 31 Ó ɖi, ká wà ɖíìdzáyè, tsí ká wà tédzú gbo ní òsã́-kã̀, òru-kã̀ títí fú ɔɖɔ̃́ mɛ́ɛta#á, òŋu náa wà fú ɔ̀nyà kã̀kã̀ ńfɛ̀ɛ́nɔ́ títí inyɔ́kṹ náa wà nódzú-òŋu si náàtsùgbé-ŋa.

32 Báàyí#ɛ́, òŋu wà mú ŋa bɔwɔ́-Ɔ̀ɖáyé, tsí wà bèrè ní afɔ̀-ore-ɔ̀fɛ́‐ɛ̀ tsítse kó kí ńǹsérè si fú ŋa. Afɔ̀#ɛ́ nɛ́kpá, tsí nákó tse tsí àkaralé yèé à nɛ́ si ńǹtá-Ɔ̀ɖáyé#ɛ́ nákó wɔlɛ̀, tsí tse tsí à nákó dzogú-iŋɛ́-ire ŋa gbo yèé Ɔ̀ɖáyé kpaɖí si fú ɛnɛ yèé ŋa kpó dzɛ́ tɛ̀ɛ̀#ɛ́. 33 Ó ɖi, odzú-òŋu kò sì kí ńǹtá-owó nàmí siká nàmí iŋɛ́-èbò-ara-ɔ̀nyà-kã̀ kpókpó gbo. 34 Tsí àŋa ká-ŋa gìɖì, à mà ní ɔwɔ́ tòŋu ká-òŋu ní òŋu ń tsitsɛ́, tsí ń banɛ́ ara-òŋu, tsí ń banɛ́ enìkéèdzì-òŋu ŋa gbo#ɛ́. 35 Ó ɖi, ńnɔ́-iŋɛ́ kpó yèé òŋu náa tse#ɛ́, òŋu náa wà nyà ɖíre fú ŋa ní ó wà ní ká wà tsitsɛ́ kũkũ náàtóoríi ká nyáa wà mɔ́wɔ́ gbè fú ɛnɛ yèé kò nɛ́kpá ŋa#á. Tsí àŋa kó wà tédzú afɔ̀ yèé Yèésù Ɔlá-wa òŋu ká‐ɛ̀ gbo ti fɔ̀ si#ɛ́. Ó ní: Bí ɔ̀nyà-kã̀ náa wà tsɔ̀yà fúnɛ#ɛ́, náa gba kùsɛ̀ɛ̀ láre ɛnɛ yèé náa wà gba iŋɛ́ nɔ́wɔ́-nɛ làkóò gé#ɛ́.

36 Ńbɛ̀ɛ́, oŋù-Kpɔ́lù dzilɛ̀ bɛ̀, tsí ó ǹɖe kálɛ̀ bá ŋa kpó, tsí wúùre fú Ɔ̀ɖáyé. 37 Tsí àŋa kpó, à fɔ́ nɔ́kṹ, tsí wà fɔ̃́ Kpɔ́lù, tsí wà mɔ́wɔ́ bɔ́ɔ. 38 Tsí iŋɛ́ yèé kpara fú ŋa lárè#ɛ́ ní dzɛ́ ní Kpɔ́lù wí fú ŋa ní à kàkó rí òŋu láyé ró. Tsí à sɛ̃ Kpɔ́lù nɔ́ɔ̀nà títí ó káà wɔ̀ nɔ́kɔ̃̀-odzómi.