Itsɛ́ 19

Kpɔ́lù gbé ńǹlú-Èfɛ́sì fú ìwèrè-kã̀

Ńbɛ̀ɛ́, ńǹwèrè yèé Àkpòlósì wà ńǹlú-Kòríntì si#ɛ́, Kpɔ́lù gbo ǹɖe, tsí gbà nɔ́ɔ̀nà-òkè yèé ŋa wà nérè-ilɛ̀-Àsíyà#á, tsí wáa tó ńǹlú-Èfɛ́sì. Kíbí ó tó ńbɛ̀#ɛ́, ó rí atɛ̀náànyì-Yèésù kã̀ŋa, 2 tsí ó wà bèrè ŋá ní: Mímí-Ɔ̀ɖáyé† kò tì wɔ̀ ńǹtá-ŋa ńǹwèrè yèé à gba Yèésù gbɔ́#ɛ́ɛ̀?

Tsí àŋa gbo, à ní: Òò! Àŋa kò tì gbɔ́, tsí ká wíìnyɛ̀-Mímí-Ɔ̀ɖáyé fú àŋa wòrí.

3 Tsí Kpɔ́lù wà bèrè ŋá ró ní: Tsí ìwɛ̀ yèésí à wɛ̀† fú ŋa?

Tsí à dzɔ́ŋù fú Kpɔ́lù ní: À wìwɛ̀ ti Yòhánà† fú àŋa.

4 Tsí Kpɔ́lù gbo sɛ̃̀ wà nya òkpì‐ɛ̀ fú ŋa ró ní: Ìɖéǹɖè ni! Ó ɖi, Yòhánà òŋu, ó wɛ̀ fú ɛnɛ yèé ŋa wò ní àŋa kó nyíìlò kpaɖà#á. Tsí náa wà fɔ̀ fú ɔma-Ìsàràyɛ́lì† ŋa kpó ní ká nɛ́ àkaralé si ńǹtá-ɛnɛ yèé bàa náànyì tòŋu#ɛ́. Ó ɖi, ɛnɛ#ɛ́, Yèésù ni.

5 Tsí kíbí à gbɔ́ afɔ̀ nyɛ̀ŋɛ̀ ŋa tã́ gé#ɛ́, à fɔ̀ ní ó ɖɔkpɛ́-Yèésù Ɔlá-wa, tsí wɛ̀ fú ŋa. 6 Tsí Kpɔ́lù mɔ́wɔ́ lé ńǹtá-ŋa, tsí Mímí-Ɔ̀ɖáyé tì wɔ̀ ńǹtá-ŋa ńǹɖì-bɛ̀ gbòkã́. Tsí à wà wí ìlú-òmírɛ̃̀ ŋa, tsí wà gba afɔ̀-Ɔ̀ɖáyé gbo fɔ̀. 7 Àŋa kpó, à wà kíbí ɔ̀nyà máàméèdzì bɛ́ ni.

8 Ńbɛ̀ɛ́, Kpɔ́lù náa wà lɔ ńlé-ìkpàɖé-ɔma-Ìyúɖà ŋa†, tsí náa mú ɛ̀ɖɔ̃̀ kã ara‐ɛ̀, tsí wà wíìnyɛ̀ fú ɔ̀nyà ŋa. Náa wà wíìnyɛ̀-kíbí Ɔ̀ɖáyé bòkó wáa dzoyè gbà#á gbo fú ŋa, tsí náa wà le oŋù si ńnɛ̀ kũkũkũ náàtsùgbée ká gba afɔ̀#ɛ́ gbɔ́. Tsí ó wà lɔ ńɖi-ŋa bɛ́ɛ̀ títí fú òtsùkpá mɛ́ɛta. 9 Ó ɖi, ɔma-Ìyúɖà† kã̀ŋa kɛ̃̀ɖɔ̃̀, tsí kɔ̀ ní àŋa kàkó gba afɔ̀#ɛ́ gbɔ́. À náa wà wíìnyɛ̀-íbàɖí ŋa nára-ɛ̀kɔ́ kpó yèé ó wà tse ti nára-Yèésù#ɛ́ nódzú-ɔ̀nyà ŋa. Kíbí à wà tse bɛ́ɛ̀#ɛ́, Kpɔ́lù fùɖá náàŋírĩ-ŋa, tsí gbɛ̃́ atɛ̀náànyì-Yèésù ŋa tɛ̀ náànyì. Ńbɛ̀ɛ́, ilé-ɛ̀kɔ́-kã̀ wà, tsí dzɛ́ ti Tìránɔ̀. Tsí Kpɔ́lù náa wà lɔ ńlé-ɛ̀kɔ́#ɛ́, tsí nɔ́dzɔ́ kɔ́dzɔ́#ɛ́, náa wà tsɛ̀kɔ́ fú ɔ̀nyà ŋa bɛ̀ níìkã̀. 10 Ó wà tse bɛ́ɛ̀ títí fú ɔɖɔ̃́ méèdzì. Tsí gbà ńǹtá-bɛ́ɛ̀#ɛ́, ɔ̀nyà yèé ŋa wà ńlɛ̀-Àsíyà kpó#ɛ́, ɛnɛ yèé dzɛ́ ɔma-Ìyúɖà gbo, ɛnɛ yèé kò dzɛ́ ɔma-Ìyúɖà gbo, àŋa kpó, à gbɔ́ afɔ̀ ti nára-Ɔlá-wa.

11 Ńbɛ̀ɛ́, Ɔ̀ɖáyé fú Kpɔ́lù ńkpá, tsí náa wà tse iŋɛ́-àwùsì lákṹ lákṹ ŋa gbo tó bɛ́ɛ̀, 12 títí à náa kɛ́ ɔ̀dzá kã̀ŋa òŋu àwù-itsɛ́ kã̀ŋa gbo wá, tsí bí à mú ŋa kã ara-Kpɔ́lù#ɛ́, à náa kɛ́ ŋa lɔ káà lé ńǹtá-àkɔ̃̀rɔ̃̀ ŋa, tsí àrɔ̃̀-ŋa náa tù ŋá, tsí ɛnɛ yèé ŋa edzò† ŋa wà ɖɔ́kpɔ fú#ɛ́, odzú-ŋa gbo náa tù kpó.

13 Ó ɖi, ɔma-Ìyúɖà kã̀ŋa gbo wà ńǹlú#ɛ́ bɛ̀, tsí à náa wà lɔ ńǹɖì ńǹɖì ŋa wérí ní àŋa wà lé edzò ŋa sɛ̃̀ náànyì-ɔ̀nyà ŋa. Tsí àŋa gbo, à wáa wò ní àŋa kó lo ɛ̀tsɛ-Yèésù, tsí wà ń lé edzò ŋa sɛ̃̀ náànyì-ɛnɛ yèé ŋa à wà ɖɔ́kpɔ fú#ɛ́. Tsí à náa wà fɔ̀ ní: Nóŋù-ɛ̀tsɛ-Yèésù, ɛnɛ yèé Kpɔ́lù wà dzíkɔ̀‐ɛ̀ wérí#ɛ́, àa wà wí fɛ́ɛ ní kóyá! Sɛ̃̀ náànyì‐ɛ̀! 14 Ńǹlú#ɛ́, ìnàbí méedze kã̀ŋa ní náa wà tsitsɛ́-ìrɔ́ nyɛ̀ŋɛ̀#ɛ́. À náa kpe boba-ŋa ní Sɛ̀kɛ́fà. Ɔma-Ìyúɖà ŋa ni, tsí ó dzɛ́ onùgbó-atsɛbɔ-Ɔ̀ɖáyé† ŋa. 15 Ńbɛ̀ɛ́, edzò yèé wà ɖɔ́kpɔ fú ɛnɛ nyɛ̀ŋɛ̀#ɛ́ wà dzɔ́ŋù fú ìnàbí méedze ŋa#á ní: Yèésùù? Ǹ màá rere. Kpɔ́lù gbo, ǹ ma ɛnɛ yèé òŋu gbo dzɛ́#ɛ́. Tsí ɛ̀ŋɛ fe, nɛ̀ɛ́ è dzɛ́ ná?

16 Tsí ɛnɛ yèé edzò#ɛ́ wà ɖɔ́kpɔ fú#ɛ́ fò si ńǹtá-idza ŋa#á, tsí àmí‐ɛ̀ láre tiŋa, tsí ó kpa ŋá rere tó bɛ́ɛ̀ títí fa àwù ya nára-ŋa, tsí ɖáàkpà si nára-ŋa, tsí à sá fùɖá ńlé#ɛ́ néèwò néèwò.

17 Tsí ɛnɛ-Èfɛ́sì ŋa kpó, ɛnɛ yèé dzɛ́ ɔma-Ìyúɖà gbo, ɛnɛ yèé kò dzɛ́ ɔma-Ìyúɖà gbo, àŋa kpó, à gbɔ́ iŋɛ́ yèé tse idza ŋa#á bɛ́ɛ̀#ɛ́. Tsí dzidzi lákṹ-kã̀ mú ŋa kpó, tsí à wà nyɛ Yèésù Ɔlá-wa tó bɛ́ɛ̀. 18 Náàŋírĩ-ɛnɛ yèé gba Yèésù gbɔ́ ŋa#á, ɔ̀nyà kpíkpɔ̀ náa wá, tsí wà wí iŋɛ́-àrɔ̀kpà yèé ŋa à wà tse#ɛ́ gãgã nódzú-ɔ̀nyà kpó. 19 Tsí náàŋírĩ-ɛnɛ yèé ŋa náa tsogù#ɛ́, ɔ̀nyà kpíkpɔ̀ kɛ́ ìwé-ŋa wá, tsí à kpaɖí ŋa si ńǹɖì ɔ̀kã̀ntso màlèè, tsí à tãná gú ŋa kpó. Iŋɛ́ yèé à kɔ si ńǹwé ŋa#á náa ɖíre bí à náa tsogù gbà#á. Tsí à sére owó-ìwé ŋa#á kpó, tsí ó dzɛ́ owó-irɛ̃-ɛ̀fɛ́, ɛyɔ ɛgbɛ̀rú ɛgbɛ̀rú ɔ̀nà maá lé nógóòdzì (50.000). 20 Bɛ́ɛ̀ ní èsì-afɔ̀-Ɔlá-wa wà bà máa làkóò wérí òŋu ikpá lákṹ‐ɛ̀#ɛ́ ńnɛ̀ɛ́.

21 Náànyì-kíbí iŋɛ́ nyɛ̀ŋɛ̀ ŋa tse wáa lɔ tã́#á, Kpɔ́lù wáa tsèsérè ní òŋu má gbà ńlɛ̀-Màkɛ̀ɖónìyà, tsí bɔ́ nérè-Àkáyà, tsí òŋu má káà ń lɔ ńǹlú-Yèrúsàlɛ́mì ńǹkɛ̀ɛ́. Tsí ó ní: Bí òŋu lɔ ńYèrúsàlɛ́mì tã́, ó wà ní òŋu kó wáa lɔ ńǹlú-Rómà† gbo.

22 Tsí ó rã́ ɔ̀nyà méèdzì-kã̀ náàŋírĩ-ɛnɛ yèé náa tse lègbè‐ɛ̀ ŋa#á, Tìmɔ̀té òŋu Èràsítò, ní ká lɔ ńlɛ̀-Màkɛ̀ɖónìyà, tsí à lɔ. Ó ɖi, òŋu ká‐ɛ̀ kí ńlɛ̀-Àsíyà#á bɛ̀ fú ìwèrè-kã̀ oɖé.

Ìlú-Èfɛ́sì wà rò kpó náàtsùgbé-olí-Yèésù ŋa

23 Ńǹwèrè nyɛ̀ŋɛ̀#ɛ́, ɔ̀nà-Yèésù Ɔlá-wa yèé ɔ̀nyà ŋa wà fà#á ɖi afɔ̀ lákṹ-kã̀ si gìɖì héŋú ńǹlú-Èfɛ́sì#ɛ́. 24 Ńǹlú#ɛ́, ɔ̀nyà-kã̀ wà bɛ̀, tsí dzɛ́ atserɛ̃tí, tsí à náa kpèé ní Ɖɛ̀mɛ̀tírù. Tsí ilé-iŋɛ abo-kã̀ gbo wà bɛ̀, tsí à náa kpe iŋɛ#ɛ́ ní Àtɛ̀mísì. Ńbɛ̀ɛ́, Ɖɛ̀mɛ̀tírù#ɛ́ náa wà yɔ́ irɛ̃-ɛ̀fɛ́, tsí wà ń tse ilé-iŋɛ tsígíɖí tsígíɖí ŋa ńǹwànwà-ilé-Àtɛ̀mísì#ɛ́ tútútú, tsí náa wà tàá fúnɛ. Tsí gbà ńǹtá-itsɛ́ nyɛ̀ŋɛ̀#ɛ́, kò tsi owó-aréma ní náa wà sã fú àtsìtsɛ́‐ɛ̀ ŋa#á.

25 Tsí ó ɖi nɔ́dzɔ́-kã̀, tsí Ɖɛ̀mɛ̀tírù#ɛ́ kpe àtsìtsɛ́‐ɛ̀ ŋa òŋu ɛnɛ yèé wà tsitsɛ́-ìrɔ́ nyɛ̀ŋɛ̀ ŋa kpó#ɛ́ kpérí, tsí wà fɔ̀ fú ŋa ní: Tèmi ŋa! Àŋa rá ni. Àŋa kpó, à mà ní itsɛ́ nyɛ̀ŋɛ̀#ɛ́ ní àŋa wà tse, tsí ayé-àŋa tù si kpó#ɛ́ nɔ̀. 26 Tsí à sì wà rí, tsí wà gbɔ́ iŋɛ́ yèé wà tse báàyí gbo#ɛ́. Kpɔ́lù, idza nyɛ̀ŋɛ̀#ɛ́, wà kɔ́nɛ, tsí wà fɔ̀ ní iŋɛ yèé ɔ̀nyà ŋa tse#ɛ́, ni kò tsi iŋɛ gìɖì gìɖì ni. Tsí ó le oŋù si náfɔ̀#ɛ́ títí ɔ̀nyà kpíkpɔ̀ kpíkpɔ̀ kparɔ ìsérè, tsí wà tɛ̀ náànyì‐ɛ̀. Tsí kò sì dzɛ́ ńǹlú-Èfɛ́sì bí sɔ̃́ŋú gé ní ó wà tse bɛ́ɛ̀#ɛ́, afɔ̀#ɛ́ bɔɖé kó gba ilɛ̀-Àsíyà#á kpó kòdzá. 27 Báàyí#ɛ́, òŋu wà rí ní iŋɛ́-íbàɖí-kã̀ bòkó tse. Itsɛ́-àŋa#á kàkó gbadzé ró. Tsí yèé yɔ#ɛ́, ilé-iŋɛ lákṹ Àtɛ̀mísì#ɛ́ gbo kàkó gba fíníkì nódzú-ɔ̀nyà ŋa ró. Ká rí káyí, iŋɛ yèé ɛ́kɔ‐ɛ̀ wà fì, tsí ɔ̀nyà yèé ŋa wà ńlɛ̀-Àsíyà kpó#ɛ́ wà sɛ̃̀, tsí ɔ̀nyà ŋa gbo kpó náyé gbaŋgba#á wà sɛ̃̀#ɛ́, lílákṹ‐ɛ̀ nákó nyàbɔ̀ nɔ̀.

28 Tsí kíbí ɛnɛ yèé wà bɛ̀ ŋa#á gbɔ́ afɔ̀ nyɛ̀ŋɛ̀ ŋa gé#ɛ́, ó dzà ŋá nára. Tsí à kpé igbe ɖíɖá, tsí wà fɔ̀ ní: Àtɛ̀mísì ní lákṹ#ɛ́ ooò! Iŋɛ-ɛnɛ-Èfɛ́sì ŋa ní tó bɛ́ɛ̀#ɛ́.

29 Gbòkã́#á, ìlú#ɛ́ wà rò wérí kpó gòrògòrògòrò. Tsí ɔ̀nyà ŋa ǹɖe kpó nyàgã̀ã̀, tsí làkóò ńǹɖì-ìkpérí lákṹ-kã̀. Tsí à lɔ káà mú ɛnɛ-Màkɛ̀ɖónìyà méèdzì-kã̀ gbo yèé ŋa dzɛ́ enìkéèdzì-Kpɔ́lù#ɛ́, Gàyú òŋu Àrìsìtákò, tsí fà ŋá lɔ ńǹɖì-ìkpérí#ɛ́. 30 Tsí Kpɔ́lù gbo wò ní òŋu má lɔ náàŋírĩ-ɔ̀nyà yèé kpérí si ŋa#á. Ó ɖi, atɛ̀náànyì-Yèésù ŋa kɔ̀ fúu. 31 Àtsìtsɛ́-ìdzɔba lákṹ kã̀ŋa gbo ńlɛ̀-Àsíyà#á dzɛ́ ńdza‐ɛ̀, tsí wà ńǹlú#ɛ́ bɛ̀. Àŋa gbo, à bɛkɔ̀ wáa lɔ fúu ní àŋa tsìkálɛ̀ fúu ní ɛsɛ̀‐ɛ̀ kó máa tɛ̀ ńǹɖì-ìkpérí#ɛ́ bɛ̀.

32 Ńǹwèrè nyɛ̀ŋɛ̀#ɛ́, ìɖì-ìkpérí#ɛ́ ɖi òmírɛ̃̀ si kpó. Tsí ɔ̀nyà kã̀ŋa wà ɖúgbe-ìrɔ́-kã̀, tsí olòmírɛ̃̀ ŋa gbo wà ɖúgbe-ìrɔ́-òmírɛ̃̀. Ó ɖi, ɔ̀nyà kpíkpɔ̀ gìɖì kò tì ma iŋɛ́ yèé báa wá, tsí ɔ̀nyà kpó wáa kpérí si bɛ́ɛ̀#ɛ́. 33 Tsí ɔma-Ìyúɖà† ŋa téle ɔ̀nyà-kã̀ si ńwádzú-afɔ̀#ɛ́. À náa kpe ɛnɛ#ɛ́ ní Àlɛ̀kìsã́nɖè. Tsí à nya òkpì-iŋɛ́ yèé wà tse#ɛ́ fúu, tsí ó tsɔwɔ́ fú èrò#ɛ́ ní afɔ̀-kã̀ wà fú òŋu, tsí òŋu bòkó fɔ̀, tsí ń gbè fú tòŋu ŋa. 34 Ó ɖi, à rí mà ní ɔma-Ìyúɖà ŋa ní ó dzɛ́#ɛ́, tsí à tɔ́ bu igbe ta ró, tsí wà fɔ̀ ní: Àtɛ̀mísì ní lákṹ#ɛ́ ooò! Iŋɛ-ɛnɛ-Èfɛ́sì ŋa ní tó bɛ́ɛ̀#ɛ́. Tsí à ɖúgbe#ɛ́ bɛ́ɛ̀ tsùù títítí fú ìwèrè-aŋgo méèdzì.

35 Tsí ńǹtã̀ntã́‐ɛ̀#ɛ́, akɔ̀wé-ìlú#ɛ́ ɖá igbe#ɛ́ ɖóro, tsí ó wà wí fú ŋa ní: Ɛnɛ-Èfɛ́sì ŋa, òŋu ní fòò, nɛ̀ɛ́ tútútú bɔ̀ ńǹtalɛ̀, tsí kò mà ní ɛnɛ-ìlú-Èfɛ́sì ŋa wà ɖe ilé-iŋɛ lákṹ Àtɛ̀mísì#ɛ́, tsí wà ɖe ìwànwà‐ɛ̀ gbo yèé ti ɔ̀rɔ̃ dzì wá#á ná? 36 Nɛ̀ɛ́ kó nyáa fɔ̀ ní òɖòbò ni? Tsí bí ó dzɛ́ bɛ́ɛ̀, ó wà ní inɔ́-ŋa kó tù nɔ̀. Tsí tã́ná ká wà ɖá iŋɛ́-kã̀ gbo si#ɛ́, ìsérè kó wà tó ŋa rere. 37 Ká rí káyí! Ɛnɛ yèé ŋa à ní àŋa fà wá bí ŋa báàyí#ɛ́, à kò tsole iŋɛ́-kã̀ ńlé-iŋɛ#ɛ́, tsí à kò sì wí afɔ̀-íbàɖí-kã̀ gbo nára‐ɛ̀. 38 Bí ó tsi Ɖɛ̀mɛ̀tírù òŋu enìkéèdzì‐ɛ̀ yèé ŋa dzɔ́ wà tsitsɛ́ ɔ̀kã̀ntso#ɛ́ wà wo ká kpe ɔ̀nyà-kã̀ nɛ́dzɔ́, ɔdzɔ́-ɛdzɔ́ kpíkpè ŋa wà si, tsí kɔ̀màɖã́ã̀ ŋa gbo wà si nɔ̀. Ńbɛ̀ ní ó wà ní ká kɛ́ afɔ̀-ŋà ŋa lɔ#ɛ́. 39 Tsí bí afɔ̀-òmírɛ̃̀ kã̀ŋa gbo wà fú ŋa, ká wáa fɔ̀ɔ́ ńǹɖì-ìkpàɖé-ɛdzɔ́-ìlú#ɛ́. Bɛ́ɛ̀ ní ó wà ní ká tse#ɛ́ ńnɛ̀ɛ́. 40 Ó ɖi, bí àŋa kò máa tse, à nákó bá àŋa fɔ̀ ní àŋa ní wà ɖá afɔ̀ si#ɛ́ oo. Iŋɛ́ yèé tse#ɛ́, bí à ní àŋa kó fɔ iŋɛ́ yèé bá ìkpérí yèé#ɛ́ wá báàyí#ɛ́, àŋa kàkó nyáa wíi.

Tsí oŋù-akɔ̀wé#ɛ́ dzilɛ̀ bɛ̀, tsí ó lé ŋa ní kṹnukṹ kó lɔ ńlé, tsí àŋa kpó, à gbɛ̀ya.