Itsɛ́ 18

Kpɔ́lù wà dzíkɔ̀-Ɔ̀ɖáyé ńǹlú-Kòríntì

Náànyì-bɛ́ɛ̀ ró#ɛ́, Kpɔ́lù wáa ǹɖe ńǹlú-Àtɛ́nì#ɛ́, tsí lɔ ńǹlú-Kòríntì. 2 Ńǹlú-Kòríntì#ɛ́, ɔma-Ìyúɖà† ŋa-kã̀ wà bɛ̀, tsí à náa kpèé ní Àkílà. Tsí nérè-Kpɔ̃́tì ní à bíi#ɛ́. À náa kpe aya‐ɛ̀ gbo ní Kpìsílà. Ó ɖi, ólú Kòlòɖíyù ɔ̀gã́-ìdzɔba-ilɛ̀-Rómà† ɖá ɛkpa-kã̀ si ní ɔma-Ìyúɖà ŋa kpó ká ǹɖe ńǹlú-Rómà ńlɛ̀-Ìtálì. Náàtsùgbée bɛ́ɛ̀ ní òŋu aya‐ɛ̀ méèdzì ǹɖe ńlɛ̀-Ìtálì, tsí wáa wà ńǹlú-Kòríntì si báàyí#ɛ́. Ńbɛ̀ɛ́, Kpɔ́lù lɔ káà sɔ̀ ńɖi-ŋa. 3 Itsɛ́-ìrɔ́ ɔ̀kã̀ntso ní à náa dzɔ́ tse#ɛ́, itsɛ́-ká mú awɔ-ɛrã ŋa tse awúrɛ́ ni. Àtsùgbée bɛ́ɛ̀#ɛ́, Kpɔ́lù tédzú kí ńɖi-ŋa, tsí à dzɔ́ wà tsitsɛ́#ɛ́ má náàdzɔ́. 4 Tsí nɔ́dzɔ́-ìmíra† kã̀kã̀#á, Kpɔ́lù náa wà lɔ ńlé-ìkpàɖé-ɔma-Ìyúɖà ŋa†. Tsí à náa mú afɔ̀ bɔwɔ́‐ɛ̀, tsí náa wà wíìnyɛ̀ bá ɔma-Ìyúɖà ŋa òŋu ɛnɛ yèé kò dzɛ́ ɔma-Ìyúɖà ŋa#á, tsí náa wà le oŋù si ńǹtá‐ɛ̀ kũkũkũ ní ká gba afɔ̀#ɛ́ ní òtítɔ́ ni.

5 Tsí kíbí Sìlásì òŋu Tìmɔ̀té méèdzì ti ńlɛ̀-Màkɛ̀ɖónìyà, tsí wáa bá Kpɔ́lù#ɛ́, ó tédzú kɛ́ ìwèrè‐ɛ̀ kpó, tsí wà ń dzíkɔ̀-Ɔ̀ɖáyé fúnɛ. Náa wà nya àyídzá fú ɔma-Ìyúɖà ŋa ní Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á ní dzɛ́ Yèésù#ɛ́. 6 Ó ɖi, ɔma-Ìyúɖà ŋa#á ní àŋa kàkó rí Kpɔ́lù nódzú, tsí à wà búu. Tsí Kpɔ́lù gbo gbã àwù‐ɛ̀, tsí wà ń nyà ɖíre fú ŋa ní: Kpɛ́rɛ́, òŋu kò sí náfɔ̀-ŋa ró. Bí à tsɛ̀rá, afɔ̀-ara tàŋa ká-ŋa ni. Ó ɖi, òŋu, òŋu gbákpá gbɛ́sɛ̀ náfɔ̀-ŋa. Òŋu wà ǹɖe ńɖi-ŋa gbo ńnɛ̀ɛ́, tsí òŋu nákó nyí lɔ ńɖi-ɛnɛ yèé kò dzɛ́ ɔma-Ìyúɖà ŋa#á.

7 Tsí ó ǹɖe ńɖi-ŋa bɛ̀, tsí lɔ ńɖi-olòmírɛ̃̀-kã̀. À náa kpe ɛnɛ nyɛ̀ŋɛ̀ ní Tìtíyò Yúsítù. Ɛnɛ#ɛ́ náa nɛ́ àrísá fú Ɔ̀ɖáyé, tsí ilé‐ɛ̀ wà sɔ́má-ilé-ìkpàɖé-ɔma-Ìyúɖà ŋa#á bɛ̀ ké gé ni. 8 Ńbɛ̀ɛ́, Kírísíkpò onùgbó-ilé-ìkpàɖé-ɔma-Ìyúɖà ŋa#á gba Ɔlá-wa Yèésù gbɔ́ òŋu ɔ̀nyà-kpáfɛ‐ɛ̀ ŋa kpó. Tsí ɔ̀nyà kpíkpɔ̀ náàŋírĩ-ɛnɛ-Kòríntì ŋa yèé gbɔ́ afɔ̀ yèé ŋa Kpɔ́lù wí#ɛ́, àŋa gbo, à gba afɔ̀#ɛ́ gbɔ́, tsí à wìwɛ̀-Yèésù† fú ŋa.

9 Tsí ó ɖi nóoru-ɔdzɔ́-kã̀, tsí Ɔlá-wa mú ara‐ɛ̀ ŋa Kpɔ́lù, tsí wà wí fúu ní: Ɛ̀ɖɔ̃̀ kó máa ɖáɛ dza! Múgírí, tsí wà fɔ afɔ̀#ɛ́ làkóò kũkũ gé. Máa tsikó‐ɛ̀ gìɖì. 10 Iŋɛ́ yèé tse#ɛ́, ǹ wà náànyì-ɛ̀ɛ si. Tsí ɔwɔ́-ɔ̀nyà-kã̀ kàkó kã̀ɛ́, tsí tsoró báɛ. Ó ɖi, ɔ̀nyà kpíkpɔ̀ wà ńnɔ́-ìlú bí, tsí dzɛ́ tèmi si.

11 Ńbɛ̀ɛ́, Kpɔ́lù gbé ńǹlú-Kòríntì#ɛ́ bɛ̀ títí fú ɔɖɔ̃́-kã̀ òŋu òtsùkpá mɛ́ɛfà. Tsí náa wà tsɛ̀kɔ́-afɔ̀-Ɔ̀ɖáyé fú ɔ̀nyà ŋa.

12 Tsí ó wáa ɖi ńǹwèrè yèé Gàlíyò dzɛ́ kɔ̀màɖã́ã̀ nérè-Àkáyà si#ɛ́, tsí ɔma-Ìyúɖà ŋa mú arũ ɖé kpó ní àŋa kàkó rí Kpɔ́lù nódzú, tsí à káà múu, tsí fàá wáa lɔ ńɖi-ɛgbɛ́-àkpɛ̀dzɔ́ ŋa, 13 tsí wà fɔ̀ fú ŋa ní: Idza yèé bɛ́#ɛ́ wà tsɛ̀kɔ́ fú ɔ̀nyà ŋa, tsí wà bàdzɛ́ ŋa ní ká sɛ̃ Ɔ̀ɖáyé ńǹrɔ́-òmírɛ̃̀-kã̀ yèé gbà níìkã̀ fékúfékú fú ɛkpa yèé à ɖá si#ɛ́.

14 Kíbí Kpɔ́lù bòkó dzɔ́ŋù si náfɔ̀#ɛ́ fú ŋa gé#ɛ́, kɔ̀màɖã́ã̀ Gàlíyò òŋu ká‐ɛ̀ gbafɔ̀ nárũ‐ɛ̀, tsí wà wí fú ŋa ní: Óò! Ɔma-Ìyúɖà ŋa! Ká rɛ̃tígbè-òŋu! Ó má dzɛ́ afɔ̀-íbàɖí tsítse ɔ̀kã̀lɔ́ɔ̀kã̀ báàyí ní à kɛ́ wá#á, òŋu má ma ɔ̀kã̀ fɔ̀ náfɔ̀#ɛ́ fú ŋa nɔ̀. 15 Ó ɖi, yèé ó dzɛ́ ní à wà rã́ã̀rã̀ ti nára-ɛ̀kɔ́ ŋa òŋu ɛ́kɔ-ɔ̀nyà ŋa má nára-ɛkpa tàŋa ká-ŋa sɔ̃́ŋú gé#ɛ́, ká sɛ̃̀ lɔ káà wo ìɖì‐ɛ̀. Òŋu, òŋu kò dzɛ́ àkpɛ̀dzɔ́ fú afɔ̀ kò dzɔ afɔ̀ nyɛ̀ŋɛ̀ ŋa.

16 Tsí Gàlíyò fɔ̀, tsí à lé ŋa fùɖá ńɖi-ɛgbɛ́-àkpɛ̀dzɔ́ ŋa#á. 17 Tsí ɛnɛ yèé wà bɛ̀ ŋa kpó#ɛ́, à tédzú mú Sòtɛ́nì onùgbó-ilé-ìkpàɖé-ɔma-Ìyúɖà ŋa#á, tsí kpaá nódzú-ɛgbɛ́-àkpɛ̀dzɔ́ ŋa#á bɛ̀ ké. Ó ɖi, Gàlíyò òŋu kò tì ń kpe afɔ̀-kã̀ gìɖì.

Kpɔ́lù dzì nɔ́ɔ̀nà-ìlú-Àntìyɔ́tsì

18 Náànyì-bɛ́ɛ̀#ɛ́, Kpɔ́lù tɔ́ gbé kpíkpɛ̃́ ńǹlú-Kòríntì#ɛ́ bɛ̀ ró. Tsí náànyìwà#á, ó wáa ǹɖe ńɖi-ìnàbí ŋa, tsí gbɛ̃́ Kpìsílà òŋu Àkílà tɛ̀ náànyì, tsí à dzì nɔ́ɔ̀nà-ilɛ̀-Sìrí. Dzɔ̀ɔ́ dzɔ̀ɔ́#ɛ́, Kpɔ́lù ti ta àlé-kã̀ fú Ɔ̀ɖáyé si. Tsí kíbí à tó ńǹlú-Kɛ̀kɛ̀rɛ́yà#á, ó fá éwo‐ɛ̀ ńkòóró kpó náàtsùgbé-àlé#ɛ́. Tsí àa wɔ̀ nɔ́kɔ̃̀-odzómi, 19 tsí lɔ káà tó ńǹlú-Èfɛ́sì, tsí ó kɔ enìkéèdzì‐ɛ̀ ŋa dzɔ̀ɔ́, tsí òŋu ká‐ɛ̀ lɔ ńlé-ìkpàɖé-ɔma-Ìyúɖà ŋa†, tsí wà wíìnyɛ̀ bá ŋa. 20 Tsí ɔma-Ìyúɖà† ŋa#á wà wí fú Kpɔ́lù ní kó máa yáa ǹɖe ńɖi-àŋa. Ó ɖi, Kpɔ́lù kò dzɛ́ fú ŋa, 21 tsí kíbí ó bòkó ǹɖe ńɖi-ŋa#á, ó wà wí fú ŋa ní: Bí Ɔ̀ɖáyé dzɛ́, òŋu nákó wáa sɛ̃̀ wá ró, tsí wáa rí ŋa.

Tsí ó káà wɔ̀ nɔ́kɔ̃̀-odzómi, tsí ǹɖe ńǹlú-Èfɛ́sì#ɛ́ bɛ̀, 22 tsí lɔ ńǹlú-Kèsàré, tsí tɔ́ ǹɖe bɛ̀ gbo ró, tsí gbà lɔ ńYèrúsàlɛ́mì, tsí káà kí ɔma-ɛgbɛ́-Kírísítò ŋa bɛ̀. Tsí náànyì-bɛ́ɛ̀ ró#ɛ́, ó tɔ́ ǹɖe bɛ̀ gbo, tsí sɛ̃̀ wáa lɔ náÀntìyɔ́tsì-ilɛ̀-Sìrí. 23 Tsí ó gbé bɛ̀ fú ìwèrè-kã̀, tsí ó wáa ǹɖe bɛ̀ gbo, tsí náa wà gbà ńǹlú kã̀kã̀ nɛ́kpa nɛ́kpa nérè-Gàlátì òŋu erè-Fìrìdzí, tsí wà ɖáàmí le atɛ̀náànyì-Yèésù ŋa àtóoríi àkaralé-ŋa kó wɔlɛ̀ rere.

Àkílà òŋu Kpìsílà méèdzì kpàɖé bá Àkpòlósì

24 Ńbɛ̀ɛ́, ɔma-Ìyúɖà†-kã̀ gbo wà, tsí à náa kpèé ní Àkpòlósì. Ńǹlú-Àlɛ̀kìsã́nɖè ní à bíi#ɛ́. Ó ma afɔ̀, tsí ma Ìwé-Ɔ̀ɖáyé† gbo tó bɛ́ɛ̀. Tsí òŋu gbo wáa tó ńǹlú-Èfɛ́sì#ɛ́. 25 À ti tsɛ̀kɔ́ kpíkpɔ̀ fúu ti nára-ɔ̀nà-Yèésù Ɔlá-wa, tsí ara‐ɛ̀ náa gboná náfɔ̀ fífɔ̀ tò bɛ́ɛ̀, títí bí ó wà dzíkɔ̀ ɖíɖɔ̃̀ ti nára-Yèésù#ɛ́, òtítɔ́ yèé wà ńnɛ̀ tútútú#ɛ́ gé ní náa wà fɔ̀#ɛ́. Ó ɖi, afɔ̀-ìwɛ̀ yèé Yòhánà† wɛ̀† fú ɔ̀nyà ŋa#á sɔ̃́ŋú gé ní ó mà#á. Kò ma afɔ̀-kã̀ lárè bɛ́ɛ̀ ró. 26 Tsí ó lɔ ńlé-ìkpàɖé-ɔma-Ìyúɖà ŋa, tsí mú ɛ̀ɖɔ̃̀ kã ara‐ɛ̀, tsí káà kpé afɔ̀ fífɔ̀ fú ɔ̀nyà ŋa. Ńbɛ̀ɛ́, kíbí Kpìsílà òŋu Àkílà rɛ̃tígbè‐ɛ̀#ɛ́, à rí ní iŋɛ́ kã̀ŋa bɔ oɖé fúu. Tsí à gbɛ̃́ɛ̃ lɔ ńɖɔ-ara-ŋa, tsí à káà nya òkpì-kíbí à náa fa ɔ̀nà-Ɔ̀ɖáyé gbà tútútú#ɛ́ máa fúu ró.

27 Ńbɛ̀ɛ́, Àkpòlósì#ɛ́ wáa tsèsérè ní òŋu kó lɔ nérè-Àkáyà. Tsí ìnàbí ŋa dzɛ́ fúu, tsí à kɔ ìwé-kã̀ fúu ní kó ń lɔ fú atɛ̀náànyì-Yèésù yèé ŋa wà ńǹlú ńbí ó làkóò#ɛ́. À kɔ si ńnɔ́-ìwé#ɛ́ ní bí ó tó ńɖi-ŋa, ni ká gbàá náàledzò rere.

Tsí kíbí ó káà tó ńbɛ̀#ɛ́, ɛnɛ yèé ŋa gba Yèésù gbɔ́ gbà ńǹtá-ore-ɔ̀fɛ́-Ɔ̀ɖáyé#ɛ́, ó gbà fú ŋa nɔ́ɔ̀nà kpíkpɔ̀ gìɖì héŋú. 28 Ó ɖi, nódzú-ɔ̀nyà kpó#ɛ́, Àkpòlósì náa wà wíìnyɛ̀, tsí wà le oŋù si ńnɛ̀ kũkũ fú ɔma-Ìyúɖà ŋa títí à kò nyáa ɖugbã̀‐ɛ̀ náfɔ̀#ɛ́ gìɖì. Náa wà kɛ́ Ìwé-Ɔ̀ɖáyé†, tsí wà ń nyà ɖíre fú ŋa ní Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á, Yèésù ni.