Itsɛ́ 17

Kpɔ́lù òŋu Sìlásì méèdzì wà dzíkɔ̀-Ɔ̀ɖáyé ńǹlú-Tɛ̀sàlòníkì

Ńbɛ̀ɛ́, à gbà ńǹlú-Àmfìkpɔ́lì, tsí bɔ́ ńǹlú-Àkpòlòníyà, tsí lɔ káà tó ńǹlú-Tɛ̀sàlòníkì. ŃTɛ̀sàlòníkì#ɛ́, ilé-ìkpàɖé-ɔma-Ìyúɖà ŋa†-kã̀ wà bɛ̀. 2 Tsí kíbí Kpɔ́lù náa ti tseé gbà#á, náa wà lɔ ńlé-ìkpàɖé#ɛ́. Tsí ńnɔ́-ɔdzɔ́-ìmíra† mɛ́ɛta#á, náa wà lɔ bɛ̀, tsí wà wíìnyɛ̀ bá ŋa gbà ńǹtá-Ìwé-Ɔ̀ɖáyé†. 3 Náa wà nya òkpì‐ɛ̀ fú ŋa, tsí wà ń nyà ɖíre fú ŋa ní ó wà ní Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á, kó réré, tsí kú, tsí kó sɛ̃̀ dzí ti náàŋírĩ-òkú ŋa wá náyé. Tsí ó wà wí fú ŋa ní: Yèésù, ɛnɛ yèé òŋu wà dzíkɔ̀‐ɛ̀ fú ŋa#á, òŋu ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á.

4 Ńbɛ̀ɛ́, ɔma-Ìyúɖà† kã̀ŋa gba afɔ̀‐ɛ̀ gbɔ́, tsí à wáa má òŋu Sìlásì méèdzì. Ɔ̀nyà kã̀ŋa gbo wà bɛ̀, tsí dzɛ́ ɛnɛ yèé kò dzɛ́ ɔma-Ìyúɖà ŋa#á, tsí à wà sɛ̃ Ɔ̀ɖáyé. Ɔ̀nyà kpíkpɔ̀ kpíkpɔ̀ náàŋírĩ tàŋa gbo wáa má ŋa, má nára-ɔ̀nyà kpíkpɔ̀ náàŋírĩ-ɔnɔbɛ̃̀ɛ̃-gbadzúmà ŋa.

5 Ó ɖi, ɔma-Ìyúɖà-àtíbɔ̀ ŋa kpé owú-ŋa dzídzɛ, tsí à ǹɖe, tsí káà kpe ɔ̀gɛ̃-ìtá-ɔ̀nà kã̀ŋa kpérí. Tsí à wáa kpérí èrò#ɛ́, tsí à tse tsí ìlú#ɛ́ wà rò kpó gòrògòrògòrò wérí. Tsí à ǹɖe kpó, tsí lɔ ńlé-Yàsónì. À lɔ bɛ̀ káà wo Kpɔ́lù òŋu Sìlásì, tsí ká mú ŋa lɔ nódzú-ìlú#ɛ́ kpó ni. 6 Kíbí à tó ńbɛ̀#ɛ́, à kò rí ŋa. Tsí à mú Yàsónì òŋu ká‐ɛ̀, tsí mú ìnàbí kã̀ŋa gbo máa, tsí à fà ŋá wáa lɔ ńɖi-ɔ̀gã́-ìlú#ɛ́ ŋa. Tsí à wà ɖúgbe, tsí wà fɔ̀ fú ɔ̀gã́-ìlú ŋa#á ní: Ká rí idza yèé ŋa gé! Ó ɖi, àŋa ní wà nyí ìsérè-ɔ̀nyà ŋa kpó ńǹtalɛ̀#ɛ́, tsí à wáa tó ńɖi-àŋa gbo báàyí. 7 Tsí kíbí à tó bí#ɛ́, Yàsónì nyáa gbà ŋá náàledzò. Ó ɖi, àŋa kpó, à wà kɔ ɛkpa yèé ŋa ɔ̀gã́-ìdzɔba ńlɛ̀-Rómà† ɖá si#ɛ́, tsí wà fɔ̀ ní ólú-òmírɛ̃̀-kã̀ wà, tsí à náa kpèé ní Yèésù.

8 Kíbí èrò#ɛ́ òŋu ɔ̀gã́-ìlú ŋa gbɔ́ afɔ̀ yèé ŋa#á, ó ɖɔ́kpɔ fú ŋa tó bɛ́ɛ̀. 9 Tsí ɔ̀gã́-ìlú ŋa#á ɖá owó lákṹ-kã̀ fú Yàsónì òŋu atɛ̀náànyì-Yèésù-àtíbɔ̀ ŋa ní ká ń ɖóro nárũ-afɔ̀#ɛ́. Tsí à ń fú tã́ná ká kɔ̀ ŋá dzɔ̀ɔ́.

Kpɔ́lù òŋu Sìlásì méèdzì wà dzíkɔ̀-Ɔ̀ɖáyé ńǹlú-Bèré

10 Ńbɛ̀ɛ́, nóoru-ɔdzɔ́ nyɛ̀ŋɛ̀ gbòkã́#á, ìnàbí ŋa kpaɖí fú Kpɔ́lù òŋu Sìlásì ní ká lɔ. Tsí à ǹɖe bɛ̀, tsí lɔ ńǹlú-Bèré. Tsí kíbí à tó ńǹlú#ɛ́ gé#ɛ́, à lɔ ńlé-ìkpàɖé-ɔma-Ìyúɖà ŋa† yèé wà bɛ̀#ɛ́. 11 Ó ɖi, ìlò-ɔma-Ìyúɖà†-ìlú-Bèré ŋa sã̀ láre-ti ɛnɛ-ìlú-Tɛ̀sàlòníkì ŋa, tsí à dzɛ́ ní ká kɔ́ ŋa náfɔ̀ gbo. Tsí à gba afɔ̀ yèé Kpɔ́lù ŋa wà fɔ̀ fú ŋa#á òŋu ara yíyá. Tsí nɔ́dzɔ́ kɔ́dzɔ́#ɛ́, à náa wà kɛ́ Ìwé-Ɔ̀ɖáyé†, tsí wà tã̀ã́ wò, tsí wà ń ɖé bá afɔ̀ yèé ŋa Kpɔ́lù wà wí#ɛ́, tsí ká rí ní afɔ̀ ŋa#á dzɛ́ ɔ̀kã̀ntso bɛ́ɛ̀ ìɖéǹɖèè? 12 Ńbɛ̀ɛ́, ɔma-Ìyúɖà ŋa kpíkpɔ̀ gba afɔ̀#ɛ́ gbɔ́. Tsí ɔ̀nyà kpíkpɔ̀ náàŋírĩ-ɛnɛ yèé kò dzɛ́ ɔma-Ìyúɖà ŋa#á, ɔnɔbɛ̃̀ɛ̃-gbadzúmà kã̀ŋa òŋu ɔnɔkɛ̃̀ɛ̃ kã̀ŋa gbo, à gba afɔ̀#ɛ́ gbɔ́.

13 Ó ɖi, kíbí ɔma-Ìyúɖà-ìlú-Tɛ̀sàlòníkì ŋa gbɔ́ ní Kpɔ́lù tɔ́ wà dzíkɔ̀-Ɔ̀ɖáyé fú ɛnɛ-Bèré ŋa ró#ɛ́, à wá, tsí wáa ɖáfɔ̀ si náàŋírĩ-ɛnɛ-Bèré ŋa gbo, tsí ìlú#ɛ́ wà rò kpó. 14 Gbòkã́ gé#ɛ́, ìnàbí ŋa ní Kpɔ́lù kó lɔ. Tsí à gbɛ̃́ɛ̃ lɔ nɔ́wɔ́-àhũ. Ó ɖi, Sìlásì òŋu Tìmɔ̀té méèdzì kí ńǹlú-Bèré#ɛ́ bɛ̀. 15 Tsí ɛnɛ yèé wà sɛ̃ Kpɔ́lù nɔ́ɔ̀nà ŋa#á gbɛ̃́ɛ̃ lɔ títí ńǹlú-Àtɛ́nì. Kíbí à bòkó sɛ̃̀ bɔ̀ wáa lɔ#ɛ́, Kpɔ́lù bɛ̀ ŋá ńtsɛ́ ní ká dzɛ́ fú Sìlásì òŋu Tìmɔ̀té ní ká yára wáa bá òŋu.

Kpɔ́lù wà dzíkɔ̀-Ɔ̀ɖáyé ńǹlú-Àtɛ́nì

16 Ńbɛ̀ɛ́, Kpɔ́lù wà ɖóro ɖe Sìlásì òŋu Tìmɔ̀té ńǹlú-Àtɛ́nì#ɛ́ bɛ̀. Tsí kíbí ó wà bɛ̀ si#ɛ́, ó rí ní iŋɛ ŋa kpɔ̀ náàŋírĩ-ìlú#ɛ́ héŋú. Kíbí Kpɔ́lù rí bɛ́ɛ̀#ɛ́, ó ɖɔ́kpɔ fúu tó bɛ́ɛ̀. 17 Tsí náa wà lɔ ńlé-ìkpàɖé-ɔma-Ìyúɖà ŋa†, tsí wà wíìnyɛ̀ bá ŋa ti nára-afɔ̀-Ɔ̀ɖáyé, tsí wà wíi bá ɛnɛ yèé kò dzɛ́ ɔma-Ìyúɖà ŋa#á gbo, tsí wà sɛ̃ Ɔ̀ɖáyé#ɛ́. Náa wà lɔ náàbɔ̀ɔ́mɛ̀-ìlú#ɛ́ gbo nɔ́dzɔ́ kɔ́dzɔ́, tsí bí ó bá ɔ̀nyà ɔ̀kã̀lɔ́ɔ̀kã̀ gé ná, náa wíìnyɛ̀ báa ti nára-afɔ̀#ɛ́.

18 Ńǹlú#ɛ́ bɛ̀#ɛ́, ɛgbɛ́-akɔ́nɛ kã̀ŋa wà ńǹrɔ́ǹrɔ́, tsí dzɛ́ ɛgbɛ́-akɔ́nɛ ńfɛ̀ɛ́nɔ́ ŋa. À náa kpe ɔ̀kã̀ ní ɛgbɛ́-Sɛ̀tòyíkì ŋa, tsí kpe òmírɛ̃̀-kã̀ gbo ní ɛgbɛ́-Ɛ̀kpìkúrì ŋa. Tsí akɔ́nɛ yèé ŋa kpó náa waà tse àrã́dzìnyà bá Kpɔ́lù. Ńbɛ̀ɛ́, ɔ̀nyà kã̀ŋa náa wà fɔ̀ ní: Nɛ̀ɛ́ gbo ni yàrobí yèé ná! Òkpì-afɔ̀ yèé ó wà fɔ̀ ŋa#á fáà ná?

Tsí olòmírɛ̃̀ kã̀ŋa gbo wà fɔ̀ ní: È gbɔ́! Ó wà kíbí ó wà wíìnyɛ̀ ti nára-iŋɛ-òmírɛ̃̀ kã̀ŋa ni dza.

À wà wí bɛ́ɛ̀, iŋɛ́ yèé tse#ɛ́, Kpɔ́lù wà dzíkɔ̀ ɖíɖɔ̃̀ ti nára-Yèésù òŋu kíbí òkú ŋa nákó dzí wá náyé#ɛ́. 19 Ńbɛ̀ɛ́, à gbɛ̃́ Kpɔ́lù lɔ ńɖi-ɛgbɛ́-onùgbó-ìlú#ɛ́ ŋa,^* tsí wà wí fúu ní: Àŋa wà wo kó nya òkpì-ɛ̀kɔ́ titɔ̃ yèé ó wà kɔ́nɛ#ɛ́ fú àŋa ńǹkɛ̀ɛ́. 20 Iŋɛ́ yèé tse#ɛ́, afɔ̀-ìrɔ́ yèé ŋa àŋa kò gbɔ́ wòrí#ɛ́ ní ó wà wí fú àŋa#á. Kó nya òkpì‐ɛ̀ fú àŋa ńǹkɛ̀ɛ́, tsí àŋa kó gbɔ́.

21 Ká fɔ̀ gìɖì#ɛ́, ɛnɛ-Àtɛ́nì ŋa òŋu àledzò ŋa kpó yèé wà ńǹlú#ɛ́, afɔ̀ yèé náa ɖìi gbɔ́ fú ŋa#á, afɔ̀ titɔ̃ ŋa sɔ̃́ŋú gé ni. Tsí à kà tse iŋɛ́-kã̀ kpókpó náànyì-ká wà fɔ̀, tsí wà gbɔ́ afɔ̀-ìrɔ́ nyɛ̀ŋɛ̀ ŋa.

22 Ńbɛ̀ɛ́, Kpɔ́lù ǹɖe ɖóro náàŋírĩ-ɛgbɛ́-onùgbó-ìlú ŋa#á, tsí wà fɔ̀ fú ŋa ní: Ɛnɛ-Àtɛ́nì ŋa, òŋu rí ní ńnɔ́-iŋɛ́ kpó yèé ŋa à wà tse#ɛ́, à wà sɛ̃ iŋɛ kpíkpɔ̀ héŋú. 23 Ó ɖi, kíbí òŋu wà gbà náàŋírĩ-ìlú#ɛ́, òŋu wà rí ìɖì-iŋɛ-ŋà ŋa, tsí òŋu káà tó ńǹɖì-kã̀, tsí òŋu rí, tsí à kɔ si ńǹtá-ìdzɛ̀bɔ-kã̀ ní: “Ìdzɛ̀bɔ yèé#ɛ́, ti iŋɛ-kã̀ yèé àa kò mà#á ni.” Báàyí#ɛ́, iŋɛ yèé à wà sɛ̃̀ náàrìmáa màá#á, òŋu ní òŋu wà ɖíre fú ŋa#á.

24 Iŋɛ#ɛ́, Ɔ̀ɖáyé ni. Ɔ̀ɖáyé#ɛ́ ní ɖá ayé gbaŋgba#á kpó òŋu iŋɛ́ ɔ̀kã̀lɔ́ɔ̀kã̀ kpó yèé wà#á. Òŋu ké ní wà dzoyè si ńǹtá-ìgbèrí òŋu ilɛ̀#ɛ́. Tsí ilé-iŋɛ yèé ɔ̀nyà ŋa ma si#ɛ́, kà gbé ńnɛ̀. 25 Tsí iŋɛ́-kã̀ kpókpó gbo kò wà hã́ Ɔ̀ɖáyé, tsí ɔ̀nyà-kã̀ kó fúu. Kà kàa bɛ́ɛ̀, òŋu ní náa wà fú ɔ̀nyà ŋa kpó néèéfù, tsí à wà mí, tsí wà náàyɛ̀ si, tsí náa fúnɛ ńŋɛ́ ɔ̀kã̀lɔ́ɔ̀kã̀ gbo kpó#ɛ́. 26 Tsí gbà ńǹtá-ɔ̀nyà ɔ̀kã̀ntso#ɛ́, ó ɖá ɔ̀nyà ŋa si ńǹlú ŋa kpó ní ká gbé ńǹtá-ilɛ̀#ɛ́. Tsí ó ɖá odzúbara si náàŋírĩ-ìlú ŋa gbo kpó ńbí ɔ̀nyà ŋa wà#á, tsí ɖá ìwèrè ŋa gbo ńǹrɔ́ǹrɔ́ fú ŋa. 27 Ó tse iŋɛ́ yèé ŋa kpó si, àtsùgbée ɔ̀nyà ŋa kó wà wòó ni. Tsí bóyá#á, bí ɔ̀nyà ŋa wà bɔ́dzì wérí làkóò#ɛ́, à nákó wáa ríi. Ó ɖi, nóòtítɔ́#ɛ́, ìɖì-Ɔ̀ɖáyé òŋu ìɖì-àŋa méèdzì kò dzɛ̃̀. 28 Ìɖéǹɖè#ɛ́, òŋu ní fú àŋa náàyɛ̀, tsí àŋa wà si, tsí kṹnukṹ wà lɔ, tsí wà bɔ̀#ɛ́. Afɔ̀#ɛ́ ké ní ɔ̀nyà-kã̀ náàŋírĩ-akpèlè-ŋà ŋa-kã̀ gbo fɔ̀#ɛ́. Ó ní: “Àwa gbo, ɔma‐ɛ̀ ŋa bíbí ní àa dzɛ́#ɛ́.”

29 Tsí kíbí àŋa dzɛ́ ɔma‐ɛ̀ ŋa bíbí báàyí#ɛ́, kò wà ní àŋa kó ɖédzú ìwànwà-Ɔ̀ɖáyé wà kíbí dzɔgidzɔ̀nyà yèé ŋa à mú siká, irɛ̃-ɛ̀fɛ́ nàmí òkúta, tsí ń tse si#ɛ́. Iŋɛ́ nyɛ̀ŋɛ̀ ŋa kpó#ɛ́, ɔ̀nyà ŋa ní wà tsèsérè, tsí wà tse ŋá bɛ́ɛ̀#ɛ́. 30 Ńǹwèrè yèé ɔ̀nyà ŋa wà náàrìmà si#ɛ́, Ɔ̀ɖáyé náa fodzú ɖií si. Ó ɖi báàyí#ɛ́, ó wà fɔ̀ fú ɔ̀nyà-ìlú ŋa kpó ní ká nyíìlò kpaɖà. 31 Iŋɛ́ yèé tse#ɛ́, Ɔ̀ɖáyé ɖá ɔdzɔ́-kã̀ si, tsí nɔ́dzɔ́ nyɛ̀ŋɛ̀#ɛ́, nákó kpɛdzɔ́ fú ɔ̀nyà ŋa kpó náyé#ɛ́ òŋu òtítɔ́. Ó ti tsã ɔ̀nyà-kã̀ gbo si, tsí gbà ńǹtá-ɛnɛ nyɛ̀ŋɛ̀#ɛ́ ní nákó kpɛdzɔ́#ɛ́. Tsí kó ń nyà ɖíre ní ìɖéǹɖè òŋu nákó tseé#ɛ́, ó dzí ɛnɛ#ɛ́ ti náàŋírĩ-òkú ŋa wá náyé.

32 Kíbí ɛnɛ yèé wà bɛ̀ ŋa#á gbɔ́ ní Kpɔ́lù wà wíìnyɛ̀ ti nára-dzídzí wá náyé-òkú ŋa gé#ɛ́, ɔ̀nyà kã̀ŋa wà múu tse, tsí ɛnɛ-òmírɛ̃̀ kã̀ŋa gbo wà fɔ̀ ní: Ó sã̀! Àŋa nákó sɛ̃̀ wáa gbɔ́ afɔ̀#ɛ́ nárũ‐ɛ̀ nɔ́dzɔ́-òmírɛ̃̀-kã̀ ró. 33 Afɔ̀#ɛ́ kí ńǹtá-bɛ́ɛ̀, tsí Kpɔ́lù ǹɖe ńɖi-ŋa. 34 Ó ɖi, ɔ̀nyà kã̀ŋa tɛ̀ náànyì-Kpɔ́lù, tsí gba Yèésù gbɔ́. Tsí náàŋírĩ-ŋa#á, ɔ̀nyà-kã̀ dzɛ́ ɔ̀nyà-ɛgbɛ́-onùgbó-ìlú#ɛ́ ŋa, tsí à náa kpèé ní Ɖɛ̀nísì. Ɔnɔbɛ̃̀ɛ̃-kã̀ gbo wà náàŋírĩ-ŋa, tsí à náa kpe òŋu gbo ní Ɖàmàrísì má nára-olòmírɛ̃̀ kã̀ŋa gbo.