Itsɛ́ 16

Kpɔ́lù gbɛ̃́ Tìmɔ̀té tɛ̀ náànyì

Náànyì-bɛ́ɛ̀ ró#ɛ́, Kpɔ́lù sɛ̃̀ lɔ ńǹlú-Ɖèrèbé, tsí ǹɖe bɛ̀, tsí lɔ ńǹlú-Lùsìtɛ́rà gbo. ŃLùsìtɛ́rà#á bɛ̀#ɛ́, atɛ̀náànyì-Yèésù-kã̀ wà bɛ̀, tsí à náa kpèé ní Tìmɔ̀té. Ìná‐ɛ̀ ni ɔma-Ìyúɖà† ŋa ni, tsí òŋu gbo gba Yèésù gbɔ́. Ó ɖi, boba‐ɛ̀ òŋu kò dzɛ́ ɔma-Ìyúɖà ŋa. 2 Tsí ìnàbí yèé ŋa wà ńǹlú-Lùsìtɛ́rà òŋu Ìkɔ́nì#ɛ́, à náa nya àyídzá-ɛ̀. 3 Ńbɛ̀ɛ́, Kpɔ́lù wò ní òŋu kó gbɛ̃́ɛ̃ tɛ̀ náànyì, tsí ó fɔ̀, tsí à ɖákó† fúu. À ɖákó fúu náàtsùgbée kó máa ɖɔ́kpɔ fú ɔma-Ìyúɖà ŋa yèé wà nérè-ìyabɛ̀ kpó ŋa#á ni. Iŋɛ́ yèé tse#ɛ́, àŋa kpó, à mà ní boba‐ɛ̀ kò tsi ɔma-Ìyúɖà ŋa ni. 4 Ńbɛ̀ɛ́, Kpɔ́lù òŋu enìkéèdzì‐ɛ̀ ŋa náa wà gbà ńǹlú kã̀kã̀ làkóò. Tsí ìsérè yèé adzítsɛ́-Yèésù† ŋa òŋu onùgbó-ɛgbɛ́-Kírísítò ŋa yèé wà ńYèrúsàlɛ́mì#ɛ́ kɛ́ ní ká tse báàyí#ɛ́, à náa wà fɔ̀ɔ́ fú ìnàbí ŋa làkóò, tsí à náa wà fɔ̀ fú ŋa ní ká múgírí, tsí ká wà tse si ńǹtá‐ɛ̀. 5 Ńbɛ̀ɛ́, àkaralé-ɔma-ɛgbɛ́-Kírísítò ŋa wà wɔlɛ̀ máa, tsí nɔ́dzɔ́ kɔ́dzɔ́#ɛ́, atɛ̀náànyì-Yèésù ŋa gbo náa wà ɖi kpíkpɔ̀ máa.

Mímí-Ɔ̀ɖáyé wà nyà ɖíre fú Kpɔ́lù ní kó lɔ ńlɛ̀-Màkɛ̀ɖónìyà

6 Tsí Kpɔ́lù òŋu enìkéèdzì‐ɛ̀ ŋa gbà nérè-Fìrìdzí, tsí bɔ́ nérè-Gàlátì, iŋɛ́ yèé tse#ɛ́, Mímí-Ɔ̀ɖáyé† kɔ̀ fú ŋa ní ká máa dzíkɔ̀-Ɔ̀ɖáyé ńlɛ̀-Àsíyà. 7 Tsí à gbà lɔ sɔ́má-ilɛ̀-Mìsíyà, tsí wò ní àŋa kó lɔ ńlɛ̀-Bìtìníyà. Ó ɖi, Mímí-Yèésù tɔ́ kɔ̀ fú ŋa ró ní ká máa lɔ bɛ̀ gbo. 8 Tsí à sɛ̃̀ gbà ńlɛ̀-Mìsíyà, tsí wáa lɔ ńǹlú-Tòrásì. 9 Ńǹlú#ɛ́ bɛ̀#ɛ́, Kpɔ́lù rí iŋɛ́-ànyàŋà-kã̀ nóoru. Ńnɔ́-ànyàŋà#á, ó rí ɛnɛ-ilɛ̀-Màkɛ̀ɖónìyà ŋa-kã̀, tsí ó ɖóro si, tsí wà wí fúu ní: Ǹ tsìkálɛ̀ fɛ́ɛ, wá ńɖi-àwa ɛnɛ-Màkɛ̀ɖónìyà ŋa gbo, tsí o wáa gbà fú wa ɖé.

10 Gbòkã́#á, àa gbɔ́ òkpì‐ɛ̀ ní Ɔ̀ɖáyé wà kpè wá ní àa kó lɔ ńɖi-ɛnɛ-Màkɛ̀ɖónìyà ŋa, tsí káà dzíkɔ̀ ɖíɖɔ̃̀#ɛ́ fú ŋa. Tsí àa wò ní àa kó lɔ ńɖi-ŋa nɛ́sɛ̀ nɛ́sɛ̀.

Líɖì gba Yèésù gbɔ́ ńǹlú-Fìlíkpò

11 Tsí àa wɔ̀ nɔ́kɔ̃̀-odzómi, tsí ǹɖe ńTòrásì, tsí gbà gãgã lɔ ńǹlú-Sàmɔ̀tɛ̀rákì. Ńlɛ̀ má‐ɛ̀, àa sɛ̃̀ ǹɖe bɛ̀, tsí wɔ̀ nɔ́kɔ̃̀-odzómi ró, tsí lɔ ńǹlú-Nɛ̀yàkpólì. 12 Tsí àa tì si bɛ̀, tsí ǹɖe lɔ káà tó ńǹlú-Fìlíkpò. Tsí àa gbé bɛ̀ fú ɔdzɔ́ mɛ́ɛlóle-kã̀. Ìlú-Fìlíkpò#ɛ́, ɛnɛ-Rómà† ŋa ní wáa gbé ńnɛ̀#ɛ́, tsí ó dzɛ́ ìlú-erè-àtsɛ̃̀tsɛ̃̀ ńlɛ̀-Màkɛ̀ɖónìyà.

13 Tsí ó ɖi nɔ́dzɔ́-ìmíra†, tsí àa fùɖá náàŋírĩ-ìlú#ɛ́, tsí lɔ nétíɖò-kã̀. Àa lɔ bɛ̀ iŋɛ́ yèé tse#ɛ́, àa tsèsérè ní ńbɛ̀ ní ɔma-Ìyúɖà† ŋa náa dzɔ́ kpérí, tsí wúùre#ɛ́. Ɔnɔbɛ̃̀ɛ̃ kã̀ŋa kpérí si bɛ̀. Tsí àa dzokó náàŋírĩ-ŋa, tsí àa wíìnyɛ̀ bá ŋa. 14 Náàŋírĩ-ɔnɔbɛ̃̀ɛ̃ ŋa#á, ɔ̀kã̀ wà, tsí à náa kpèé ní Líɖì. Ó ti ńǹlú-Tìyàtírè, tsí dzɛ́ atatsɔ-ìrɔ́-kã̀. Atsɔ ŋa#á náa kpã́ kíbí omi-osũ̀ bɛ́, tsí à náa gbowó gbo héŋú. Tsí òŋu gbo wà sɛ̃ Ɔ̀ɖáyé. Ńbɛ̀ɛ́, ó wà rɛ̃tígbè-wa. Tsí Ɔlá-wa tsí ìsérè‐ɛ̀, tsí kó gbɔ́ afɔ̀ yèé Kpɔ́lù wà fɔ̀#ɛ́ rere. 15 Tsí àa wìwɛ̀-Yèésù† fúu má òŋu ɔ̀nyà-kpáfɛ‐ɛ̀ ŋa kpó. Náànyì-bɛ́ɛ̀#ɛ́, ó wà wí fú wa ní: Kíbí àa mà ìɖéǹɖè báàyí ní òŋu gbo, òŋu nɛ́ àkaralé si ńǹtá-Yèésù Ɔlá-wa#á, àwa kó wá ká lɔ, tsí àa kó káà sɔ̀ ńɖɔ̀-òŋu.

Tsí ó le oŋù si náfɔ̀#ɛ́ ní àa kó gbà si ńǹtá‐ɛ̀ fú òŋu.

À mú Kpɔ́lù òŋu Sìlásì si nɛ́ɛ̀ŋà

16 Tsí ó ɖi nɔ́dzɔ́-òmírɛ̃̀-kã̀, tsí àa sɛ̃̀ làkóò ńbí à náa wúùre#ɛ́ ró. Tsí àa kpàɖé èkíɖã-kã̀. Èkíɖã#á, arú ní ó dzɛ́#ɛ́, tsí ó wà rí odzú. Iŋɛ́ yèé la odzú fúu#ɛ́ náa wà múu bɔ awo fúnɛ. Tsí itsɛ́-awo bíbɔ#ɛ́ náa wà fa owó kpíkpɔ̀ kpíkpɔ̀ wá fú olówó‐ɛ̀ ŋa. 17 Ńbɛ̀ɛ́, arú#ɛ́ náa wà tɛ̀ náànyì-àwa Kpɔ́lù méèdzì, tsí wà ɖúgbe náànyì-wa, tsí wà fɔ̀ ní: Hàá, hàá, hàá, è rí gé ooò! Ɛnɛ ŋa#á, àtsìtsɛ́-Ɔ̀ɖáyé Oléwo ní à dzɛ́#ɛ́. À wáa dzíkɔ̀ fú ŋɛ́ ti nára-kíbí à náa rí ɔlà gbà fáà#á ni.

18 Tsí ó wà tse bɛ́ɛ̀ títí fú ɔdzɔ́ kpíkpɔ̀ ŋa. Ńǹtã̀ntã́‐ɛ̀#ɛ́, ó wáa dza Kpɔ́lù nára tó bɛ́ɛ̀. Tsí ó nyí, tsí wà fɔ̀ fú edzò† yèé la odzú fú èkíɖã#á ní: Kóyá fɛ́ɛ! Nóŋù-ɛ̀tsɛ-Yèésù Kírísítò, ǹ wà wí fɛ́ɛ ní sɛ̃̀ náànyì‐ɛ̀!

Tsí ńǹɖì-bɛ̀ gbòkã́#á, edzò#ɛ́ sɛ̃̀ náànyì‐ɛ̀.

19 Olówó‐ɛ̀ ŋa, kíbí à rí ní iŋɛ́ yèé náa fa owó wá fú ŋa, tsí à fa ànyìtɛ̀ si#ɛ́, arũ‐ɛ̀ kũ#ɛ́, à fa ɔwɔ́ tɛ Kpɔ́lù òŋu Sìlásì, tsí à fà ŋá lɔ náàbɔ̀ɔ́mɛ̀-ìlú#ɛ́ nódzú-àkpɛ̀dzɔ́-ìlú#ɛ́ ŋa. 20 Tsí à gbɛ̃́ ŋa lɔ ńɖi-àkpɛ̀dzɔ́ ŋa#á, tsí wà wí fú ŋa ní: Ká rí ɔma-Ìyúɖà† yèé ŋa gé. À wá, tsí bòkó wáa bàdzɛ́ ìlú#ɛ́ fú àŋa. 21 Ó ɖi, à waà kɔ́nɛ ní ká tsorò-ìrɔ́-òmírɛ̃̀-kã̀. Tsí àŋa, ɛnɛ-Rómà† ŋa#á, ɔ̀nà-kã̀ kò wà fú àŋa ní àŋa kó dzɛ́ títí wà tsorò-ìrɔ́ nyɛ̀ŋɛ̀ ŋa.

22 Tsí èrò#ɛ́ kpó kpérí, tsí bínɔ́ si fú Kpɔ́lù òŋu Sìlásì méèdzì. Tsí àkpɛ̀dzɔ́ ŋa#á fɔ̀, tsí à fa àwù ǹɖe nára-ŋa, tsí à ní ká kpa ŋá. 23 Tsí à kpa ŋá rere tó bɛ́ɛ̀, tsí à mú ŋa lɔ káà sé, tsí fɔ̀ fú aɖe-ɛ̀ŋà#á ní kó wà ɖè ŋá rere. 24 Kíbí aɖe-ɛ̀ŋà#á gbɔ́ bɛ́ɛ̀#ɛ́, ó mú ŋa lɔ káà si títí ńnɔ́-ilé-kã̀ sã́ŋú sã́ŋú nɛ́ɛ̀ŋà#á. Tsí ó mú ɛ̀ŋà si nɛ́sɛ̀ fú ŋa, àtsùgbée ká máa sá.

25 Tsí ó ɖi ńǹwèrè-ìŋàáŋà-ogú méedze, tsí Kpɔ́lù òŋu Sìlásì wà wúùre, tsí wà kɔ̃rĩ, tsí wà ń nyɛ Ɔ̀ɖáyé. Tsí abèŋà-àtíbɔ̀ ŋa gbo wà gbɔ́ oŋù-ŋa. 26 Gbòkã́ gé#ɛ́, ilɛ̀ mì kũkũ gìgìgì, tsí mi òkpì-ilé-ɛ̀ŋà#á gbo kpó, tsí èkũ̀‐ɛ̀ ŋa tsí dzɔ̀ɔ́ kpó gbòkã́, tsí wɔ̀rɔ̀ yèé ŋa gbo à ń so abèŋà ŋa#á si#ɛ́ dzá sɔ ńlɛ̀ kpó. 27 Tsí aɖe-ɛ̀ŋà#á gbo dzí gbòkã́ gbìrì, tsí rí ní èkũ̀ ŋa tsí dzɔ̀ɔ́ si kpó. Ńbɛ̀ɛ́, ó ɖédzú abèŋà ŋa#á sá lɔ ni, tsí ó kpɔ tàsú‐ɛ̀ gbòkã́, tsí wà wo kó kpa ara‐ɛ̀ nóòkú. 28 Ó ɖi, Kpɔ́lù ríi, tsí ɖúgbe kũkũ-kã̀ lɔ fúu ní: Máa tse íbàɖí bá ara-ɛ̀ɛ dza! Àwa kpó, àa wà bí si nɔ́wɔ́ nɔ́wɔ́.

29 Tsí aɖe-ɛ̀ŋà#á bèrè ní ká fú òŋu ńkanɖé-kã̀ káyí, tsí kóyá kóyá gé#ɛ́, ó wɔ̀ lɔ títí ńnɔlé ńbí Kpɔ́lù òŋu Sìlásì méèdzì wà#á. Ó wà ŋá kpó kpàkpàkpà, tsí ó lɔ káà kálɛ̀ nábɛ́-ŋa. 30 Tsí ó gbɛ̃́ ŋa fùɖá, tsí wà bèrè ŋa ní: Ɔ̀gá-mi ŋa! Bí èmi gbo màa tse fáà, tsí rí ɔlà báàyí?

31 Tsí Kpɔ́lù òŋu Sìlásì wà dzɔ́ŋù fúu ní: Mú àkaralé-ɛ̀ɛ kpó si ńǹtá-Yèésù Ɔlá-wa, tsí Ɔ̀ɖáyé kó gbàɛ́ là, ìwɔ ɔ̀nyà-kpáfɛ-ɛ̀ɛ ŋa kpó.

32 Tsí à dzíkɔ̀-Ɔ̀ɖáyé fú òŋu ɔ̀nyà-kpáfɛ‐ɛ̀ ŋa kpó. 33 Tsí nóoru#ɛ́ ńǹɖì-bɛ̀ gbòkã́#á, aɖe-ɛ̀ŋà#á gbɛ̃́ Kpɔ́lù òŋu Sìlásì lɔ, tsí ńbí à gba àkpà#á, ó tɛ̀ɛ́ fú ŋa kpó. Tsí à wìwɛ̀-Yèésù† fú òŋu ɔ̀nyà-kpáfɛ‐ɛ̀ ŋa. 34 Tsí ó gbɛ̃́ ŋa lɔ ńlé tòŋu ká‐ɛ̀, tsí káà fú ŋa ńdzídzɛ, tsí à dzɛ. Tsí kíbí ó nɛ́ àkaralé si ńǹtá-Ɔ̀ɖáyé báàyí#ɛ́, òŋu ɔ̀nyà-kpáfɛ‐ɛ̀ ŋa kpó, à wà náyè títɛ́ si gé ni.

35 Ńbɛ̀ɛ́, ó ɖi ńlɛ̀ má‐ɛ̀, tsí àkpɛ̀dzɔ́-ìlú ŋa#á bɛ sɔ́dzà kã̀ŋa wáa lɔ fú aɖe-ɛ̀ŋà#á ní kó kɔ ɛnɛ ŋa#á dzɔ̀ɔ́. 36 Tsí òŋu gbo ǹɖe lɔ káà dzíkɔ̀#ɛ́ fú ŋa ní: Àkpɛ̀dzɔ́ ŋa bɛkɔ̀ wá fú òŋu ńǹsɛ̃̀ɛ̃́ ní òŋu kó kɔ̀ ŋá dzɔ̀ɔ́ fòò. Ó ɖi báàyí#ɛ́, ká ǹɖe, tsí ká bɔ̀ lɔ fú ara-ŋa.

37 Ó ɖi, Kpɔ́lù kɔ̀, tsí wà wí fú sɔ́dzà ŋa#á ní: Ɔ̀nà‐ɛ̀ fáà! À kò kpɛdzɔ́-afɔ̀#ɛ́ gìɖì gbo tã́ná à mú àŋa, tsí tsɔ̀ àŋa nɔ́ɔ̀kpá náàwùdzɔ. À kà tse bɛ́ɛ̀ fú ɛnɛ-Rómà ŋa, tsí ɛnɛ-Rómà ŋa ní àŋa sì dzɛ́#ɛ́! Tsí à mú àŋa lɔ káà sé nɛ́ɛ̀ŋà gbo. Tsí báàyí#ɛ́, à wà wo ká kɔ̀ àŋa dzɔ̀ɔ́ ńǹɖúkùù? Òò! Kò tsi afɔ̀-bɛ́ɛ̀ ni. Àŋa ká-ŋa gìɖì ká wá, tsí ká wáa kɔ àŋa dzɔ̀ɔ́.

38 Tsí sɔ́dzà ŋa#á sɛ̃̀ gba afɔ̀ yèé ŋa Kpɔ́lù wí#ɛ́ lɔ káà fɔ̀ fú àkpɛ̀dzɔ́ ŋa#á. Kíbí à gbɔ́ ní ɛnɛ-Rómà ŋa ní à dzɛ́#ɛ́, ɛ̀ɖɔ̃̀ ɖá ŋa, 39 tsí à wá, tsí ní ká múu tɔrɛ fú àŋa. Tsí à tsí ŋa nɛ́ɛ̀ŋà#á, tsí tsìkálɛ̀ fú ŋa ní ká ǹɖe ńǹlú#ɛ́, tsí ká bɔ̀ lɔ. 40 Tsí kíbí Kpɔ́lù òŋu Sìlásì fùɖá nɛ́ɛ̀ŋà#á, à lɔ ńɖi-Líɖì. Tsí à káà kpàɖé bá ìnàbí ŋa bɛ̀, tsí ɖáàmí le ŋá. Náànyì-bɛ́ɛ̀#ɛ́, à ǹɖe, tsí bɔ̀ lɔ.