Itsɛ́ 15

Onùgbó-ɛgbɛ́-Kírísítò ŋa kpàɖé si ńYèrúsàlɛ́mì

Ńbɛ̀ɛ́, ɔ̀nyà kã̀ŋa ti nérè-Yùɖéyà, tsí wá náÀntìyɔ́tsì#ɛ́ bɛ̀. À wá, tsí wáa tsɛ̀kɔ́-kã̀ fú ìnàbí ŋa. Nɛ́ɛ̀kɔ́#ɛ́, à fɔ̀ fú ŋa ní: Ó wà ní à kó ɖákó† fú ŋa kíbí ɛkpa-Mɔ̀ɔ́sè† fɔ̀ ní ká tseé gbà#á. Bí kò tsi bɛ́ɛ̀, Ɔ̀ɖáyé kàkó nyáa gbà ŋá là.

2 Ó ɖi, Kpɔ́lù òŋu Bànàbá kò gbà si ńǹtá-ɛ̀kɔ́#ɛ́, tsí ó ɖi àrã́dzìnyà fú ŋa, tsí à dzinya-ara-ŋa tó bɛ́ɛ̀. Ńbɛ̀ɛ́, à tsèsérè ní Kpɔ́lù òŋu Bànàbá má nára-ɔ̀nyà kã̀ŋa gbo ńǹlú#ɛ́ bɛ̀ ká lɔ ńYèrúsàlɛ́mì, tsí ká lɔ káà bere adzítsɛ́-Yèésù† ŋa òŋu onùgbó-ɛgbɛ́-Kírísítò ŋa náfɔ̀#ɛ́.

3 Ńbɛ̀ɛ́, ɔma-ɛgbɛ́-Kírísítò-Àntìyɔ́tsì ŋa mɔ́wɔ́ gbè fú ŋa, tsí fú ŋa ńŋɛ́ ŋa fú ɔ̀nà rírɛ̃̀#ɛ́. Tsí à ǹɖe, tsí gbà nérè-Fènísì, tsí bɔ́ nérè-Sàmàríyà†. Kíbí à làkóò#ɛ́, à náa wà kpɛ̀rɔ́-kíbí ɛnɛ yèé kò dzɛ́ ɔma-Ìyúɖà ŋa#á gbo nyí, tsí gba Yèésù gbɔ́ si báàyí#ɛ́. Tsí ó ɖi ayè títɛ́ si fú ìnàbí ŋa kpó. 4 Tsí à lɔ káà tó ńYèrúsàlɛ́mì. Kíbí à tó#ɛ́, adzítsɛ́-Yèésù ŋa òŋu onùgbó-ɛgbɛ́-Kírísítò ŋa má nára-ɔma-ɛgbɛ́-Kírísítò ŋa, à gbà ŋá náàledzò tó bɛ́ɛ̀. Tsí àŋa gbo yèé à bɛ̀ lɔ#ɛ́, à kpɛ̀rɔ́-iŋɛ́ kpó yèé Ɔ̀ɖáyé tse gbà ńǹtá-ŋa#á fú ŋa. 5 Ó ɖi, ɔma-ɛgbɛ́-Fàrísì† kã̀ŋa gbo gba Yèésù gbɔ́, tsí wà náàŋírĩ-ŋa bɛ̀. À ǹɖe, tsí wà fɔ̀ ní: Ó wà ní ká ɖákó fú ɛnɛ yèé kò dzɛ́ ɔma-Ìyúɖà ŋa#á, tsí ká ɖá ɛ̀wɔ̀ kpó yèé wà nɛ́kpa-Mɔ̀ɔ́sè#ɛ́ fú ŋa, tsí ká wà tse si ńǹtá‐ɛ̀.

6 Ńbɛ̀ɛ́, adzítsɛ́-Yèésù ŋa òŋu onùgbó-ɛgbɛ́-Kírísítò ŋa kpàɖé, tsí ká wo ɔ̀nà nára-afɔ̀#ɛ́, tsí ma ɔ̀kã̀ ńnɛ̀. 7 Tsí afɔ̀#ɛ́ ɖi àrã́dzìnyà fú àŋa gbo, tsí à wà taá, tsí wà gbàá náàŋírĩ-ara-ŋa. Tsí Òkúta ǹɖe ɖóro, tsí ní: Ìnàbí-mi ŋa! Àŋa kpó, à mà rere ní Ɔ̀ɖáyé tsã òŋu náàŋírĩ-ŋa ó ti dzɛ̃̀ oɖé báàyí ní òŋu kó dzíkɔ̀ ɖíɖɔ̃̀#ɛ́ fú ɛnɛ yèé kò dzɛ́ ɔma-Ìyúɖà ŋa#á, tsí àŋa gbo ká gba Yèésù gbɔ́ nɔ̀. 8 Tsí Ɔ̀ɖáyé, ɛnɛ yèé ma ìsérè yèé wà ńnɔ́-ɔ̀nyà ŋa#á, tse tsí Mímí‐ɛ̀ tì wɔ̀ ńǹtá-ŋa kíbí ó tì wɔ̀ ńǹtá-àŋa gbo tútútú#ɛ́. Bɛ́ɛ̀ ní ó nyà ɖíre ní òŋu gbà ŋá#á. 9 Ó ɖi, kíbí à gba Yèésù gbɔ́#ɛ́, ó wɛ inɔ́ fú ŋa, tsí à má kpó. Ńnɛ̀ ní ó wà nyà ɖíre ní òŋu kò mú ìyàtɔ̀-kã̀ kpókpó si náàŋírĩ-àŋa-ŋa méèdzì#ɛ́. 10 Kíbí ó dzɛ́ bɛ́ɛ̀#ɛ́, kí tse tsí à wà ɖã́ Ɔ̀ɖáyé wò báàyí? À wà mú arù lákṹ-kã̀ tɛ̀ ŋá má ńnɛ̀ɛ́ nɔ̀. Gbágbóǹgbàgbò-àŋa ŋa rùú kũ̀, tsí àŋa gbo, àŋa rùú kũ̀. Tsí kí tse ńǹkɛ̀ɛ́? 11 Kà kàa bɛ́ɛ̀, àŋa òŋu, àŋa karalé ní Ɔlá-wa Yèésù tse ore-ɔ̀fɛ́ fú àŋa, tsí tse tsí Ɔ̀ɖáyé gba àŋa ɔma-Ìyúɖà† ŋa là. Bɛ́ɛ̀ ké tútútú ní ó tse fú ɛnɛ yèé kò dzɛ́ ɔma-Ìyúɖà ŋa#á gbo, tsí gbà ŋá là#á.

12 Ńbɛ̀ɛ́, kíbí Òkúta wíìnyɛ̀ tã́#á, ìɖì-ìdzokó#ɛ́ kpó kpa wííí. Tsí Bànàbá òŋu Kpɔ́lù wà wíìnyɛ̀ fú ŋa. À wíìnyɛ̀ ti nára-iŋɛ́-àwùsì lákṹ lákṹ yèé ŋa Ɔ̀ɖáyé tse gbà ńǹtá-ŋa náàŋírĩ-ɛnɛ yèé kò dzɛ́ ɔma-Ìyúɖà ŋa#á, tsí àŋa kpó, à wà rɛ̃tígbè-ŋa. 13 Tsí kíbí à wíìnyɛ̀ tã́#á, Yàkúbù^* gbo wà bɛ̀, tsí ó ǹɖe, tsí ní: Ìnàbí-mi ŋa, è rɛ̃tígbè, tsí e gbɔ́. 14 Sìmɔ́nì Òkúta nya òkpì-afɔ̀ lɔ fú àŋa ńǹsɛ̃̀ɛ̃́, tsí fɔ kíbí Ɔ̀ɖáyé òŋu ká‐ɛ̀ ti banɛ́ ìlú yèé ŋa kò dzɛ́ ti ɔma-Ìyúɖà ŋa náàtsɛ̃̀tsɛ̃̀ gbà#á. Tsí ó tsã ɔ̀nyà kã̀ŋa náàŋírĩ-ŋa ní ká ɖi tòŋu. 15 Ó ɖi, afɔ̀-Sìmɔ́nì#ɛ́ wà ɖé bá afɔ̀ yèé agbáfɔ̀-Ɔ̀ɖáyé fɔ̀† ŋa ti fɔ̀ si#ɛ́. À kɔ si ní:

16 “Ɔlɔ́dzɔ́ ní: Ìwèrè-kã̀ bàa, tsí màa sɛ̃̀ wá, tsí sɛ̃̀ wáa malé-Ɖàfíɖì†.

Ilé#ɛ́ ti ɖíwó si.

Ó ɖi, màa tɔ́tse ìkpofò#ɛ́, tsí sɛ̃̀ malé#ɛ́ si ńǹɖì‐ɛ̀.

17 Màa tse bɛ́ɛ̀, tsí ɔ̀nyà-àtíbɔ̀ yèé ŋa wà náyé#ɛ́ kpó#ɛ́ ká nyí,

tsí wà wo Ɔlɔ́dzɔ́.

Ɛ̃ɛ̃! Ɔ̀nyà-ìlú kpó yèé ŋa ǹ kpè ní ká ɖi tèmi#ɛ́,

à nákó nyí bɛ́ɛ̀.

Afɔ̀-Ɔlɔ́dzɔ́ ńnɛ̀ɛ́.

18 Ó tse tsí ɔ̀nyà ŋa ti ma iŋɛ́ nyɛ̀ŋɛ̀ si dzɔ̀ɔ́ dzɔ̀ɔ́ ìwèrè‐ɛ̀ ti dzɛ̃̀.”^*

19 Tsí Yàkúbù tɔ́ wà wí fú ŋa ró ní: Ńǹsérè tòŋu#ɛ́, ɛnɛ yèé kò dzɛ́ ɔma-Ìyúɖà ŋa, tsí à gba Yèésù gbɔ́#ɛ́, kò wà ní àŋa kó ɖá òfò-kã̀ kpókpó bɔwɔ́-ŋa ró. 20 Ó ɖi, iŋɛ́ yèé àŋa kó tse gé#ɛ́ ní dzɛ́ ní àŋa kó kɔ ìwé lɔ fú ŋa, tsí ɖá ɛ̀wɔ̀ kã̀ŋa fú ŋa. Ɛ̀wɔ̀ ŋa#á ní dzɛ́ ní ɛrã yèé à ń tsɛbɔ fú iŋɛ ŋa#á, arũ-ŋa kó máa kã̀ã́ láyé ró. Ó ɖi, ɛrã-ìrɔ́ nyɛ̀ŋɛ̀ ŋa kò má nódzú-Ɔ̀ɖáyé. Èkéèdzì‐ɛ̀#ɛ́, ká wà nyɛ̀wɔ̀ yèé ŋa wà náya òŋu nɔ́kɔ nínɛ́#ɛ́. Èkéèdzì‐ɛ̀ ró#ɛ́, bí à kpa ɛrã-kã̀, tsí àmbara kí ńnɔ́‐ɛ̀, tsí kò ɖà ńlɛ̀, ká máa dzɛ ɛrã-ìrɔ́ nyɛ̀ŋɛ̀ gbo. Tsí ká máa dzɛ àmbara gbo. 21 Ó ɖi, títí ńǹwèrè-gbágbóǹgbàgbò-àŋa ŋa#á, ɔ̀nyà ŋa náa wà tsɛ̀kɔ́ ti nára-ɛkpa-Mɔ̀ɔ́sè fúnɛ ńǹlú kã̀kã̀. À náa wà kã̀ã́ ńlé-ìkpàɖé-ɔma-Ìyúɖà ŋa† nɔ́dzɔ́-ìmíra† kã̀kã̀ kpó.

À kɔ ìwé-kã̀ lɔ fú atɛ̀náànyì-Yèésù yèé ŋa kò dzɛ́ ɔma-Ìyúɖà, tsí wà náÀntìyɔ́tsì#ɛ́

22 Ńbɛ̀ɛ́, ó sã̀ fú adzítsɛ́-Yèésù† ŋa òŋu onùgbó-ɛgbɛ́-Kírísítò ŋa má nára-ɔma-ɛgbɛ́-Kírísítò ŋa gbo kpó ní àŋa kó tsã ɔ̀nyà kã̀ŋa náàŋírĩ-àŋa, tsí bɛ̀ ŋá tɛ̀ náànyì-Kpɔ́lù òŋu Bànàbá lɔ náÀntìyɔ́tsì#ɛ́. Tsí à tsã ɔ̀nyà méèdzì-kã̀. À náa kpe ɔ̀nyà-kã̀ ní Yúɖà, tsí kpèé gbo ró ní Bàràsábà, tsí à náa kpe enìkéèdzì‐ɛ̀ òŋu ní Sìlásì. Idza méèdzì yèé ŋa#á, ɔ̀nyà-gbadzúmà ŋa ní à dzɛ́ náàŋírĩ-atɛ̀náànyì-Yèésù ŋa#á. 23 Ńbɛ̀ɛ́, afɔ̀ yèé ŋa à kɔ si ńǹwé yèé à kɛ́ bɔwɔ́-ŋa#á ní:

Àwa ìnàbí-ŋɛ́ adzítsɛ́-Yèésù ŋa òŋu onùgbó-ɛgbɛ́-Kírísítò ŋa, àa wà tse ìwé yèé fú ɛ̀ŋɛ ìnàbí yèé ŋa kò dzɛ́ ɔma-Ìyúɖà ŋa, tsí wà náÀntìyɔ́tsì òŋu ńlɛ̀-Sìrí òŋu ńlɛ̀-Sìlíkì#ɛ́, tsí wà ń kí ŋɛ́. 24 Àa gbɔ́ ní bɛ́ɛ̀ ní ɔ̀nyà kã̀ŋa náàŋírĩ-wa wá ńɖi-ŋɛ́ bɛ̀, tsí wáa fɔ afɔ̀ kã̀ŋa fú ŋɛ́, tsí ń ròmá ìsérè-ŋɛ́ ŋa, tsí mú ìhã̀ŋù gbo si nɛ́ɛ̀ɖɔ̃̀ fú ŋɛ́#ɛ́. Ó ɖi, kò tsi àwa ní bɛ̀ ŋá ńtsɛ́-ìrɔ́ nyɛ̀ŋɛ̀#ɛ́. 25 Náàtóoríi bɛ́ɛ̀#ɛ́, àwa kpó, àa dzɔ́ kɛ́ ìsérè ɔ̀kã̀ntso ní àa kó tsã ɔ̀nyà kã̀ŋa, tsí bɛ̀ ŋá wá fú ŋɛ́. À nákó tɛ̀ náànyì-àrínódzú-wa ŋa Bànàbá òŋu Kpɔ́lù méèdzì wá ńɖi-ŋɛ́. 26 Idza méèdzì nyɛ̀ŋɛ̀ ŋa#á ní mú ikú-ŋa tà fú itsɛ́-Yèésù Kírísítò Ɔlá-wa#á. 27 Ó ɖi, Yúɖà òŋu Sìlásì méèdzì ní àa bɛ̀#ɛ́. Bí à tó ńɖi-ŋɛ́, à nákó fɔ afɔ̀ kpó yèé àa wí si ńǹwé#ɛ́ tútútú fú ŋɛ́. 28 Nóòtítɔ́#ɛ́, ó dzɔdzú-Mímí-Ɔ̀ɖáyé†, tsí dzɔdzú-àwa gbo kpó ní àa kàkó mú arù-kã̀ kpókpó tɛ̀ ŋɛ́ má ró, bí kò tsi ɛ̀wɔ̀ kã̀ŋa yèé kpã́dzú lárè gé#ɛ́. 29 Ɛ̀wɔ̀ yèé kpã́dzú lárè ŋa#á ní: È kàkó dzɛ ɛrã yèé à ń tsɛbɔ#ɛ́ ró. Bí à kpa ɛrã-kã̀ gbo, tsí àmbara kí ńnɔ́‐ɛ̀, tsí kò ɖà ńlɛ̀, è máa dzɛɛ́. È máa dzɛ àmbara gbo. Tsí è náa wà nya ɛ̀wɔ̀ yèé ŋa wà náya òŋu nɔ́kɔ nínɛ́#ɛ́ gbo. Bí è nya ɛ̀wɔ̀ yèé ŋa kpó gé ná, ire ní è wà tse bɛ́ɛ̀#ɛ́. Ara kó le ɛ̀ŋɛ kpó.

30 Ńbɛ̀ɛ́, à tsóŋù fú ɛnɛ yèé ŋa à bɛ̀ làkóò#ɛ́, tsí à dzì nɔ́ɔ̀nà, tsí lɔ náÀntìyɔ́tsì#ɛ́. Kíbí à káà tó#ɛ́, à kpe atɛ̀náànyì-Yèésù yèé ŋa wà bɛ̀#ɛ́ kpérí, tsí à kɛ́ ìwé#ɛ́ bɔwɔ́-ŋa. 31 Kíbí à kã̀ã́ tã́#á, ó tɛ́ àŋa kpó náyè, tsí afɔ̀#ɛ́ ɖáàmí le ŋá gbo tó bɛ́ɛ̀. 32 Ó ɖi, Yúɖà òŋu Sìlásì méèdzì, agbáfɔ̀-Ɔ̀ɖáyé fɔ̀† ŋa ní à dzɛ́#ɛ́. Tsí à wíìnyɛ̀ kpíkpɔ̀ kpíkpɔ̀ fú ìnàbí ŋa#á, tsí ń ɖáàmí le ŋá, tsí tse tsí àkaralé-ŋa gbo kó wɔlɛ̀. 33 Tsí à gbé bɛ̀ fú ɔdzɔ́ mɛ́ɛlóle kã̀ŋa. Kíbí à bòkó sɛ̃̀ bɔ̀ wáa lɔ#ɛ́, ìnàbí ŋa tu ɛ̀tsɛ fú ŋa, tsí ní ká rɛ̃ ɛsɛ̀-ire fòò. Tsí à sɛ̃̀ bɔ̀ wáa lɔ ńɖi-ɛnɛ yèé ŋa bɛ̀ ŋá#á. [ 34 Ó ɖi, Sìlásì òŋu kí bɛ̀.] 35 Tsí Kpɔ́lù òŋu Bànàbá, àŋa, à kí náÀntìyɔ́tsì#ɛ́ bɛ̀. Tsí à náa má ɔ̀nyà kã̀ŋa, tsí à náa dzɔ́ wà tsɛ̀kɔ́-afɔ̀-Ɔ̀ɖáyé fú ɔ̀nyà ŋa, tsí wà dzíkɔ̀ ɖíɖɔ̃̀ ti nára-Yèésù Ɔlá-wa gbo fúnɛ.

Kpɔ́lù òŋu Bànàbá méèdzì gbɛ̀ya

36 Náànyì-bɛ́ɛ̀#ɛ́, ó ɖi nɔ́dzɔ́-kã̀, tsí Kpɔ́lù wà wí fú Bànàbá ní: Àŋa kó ǹɖe, tsí àŋa kó sɛ̃̀ gbà ńǹlú kã̀kã̀ ńbí àŋa lɔ dzɔ̀ɔ́ dzɔ̀ɔ́ ŋa, tsí ti dzíkɔ̀ ɖíɖɔ̃̀ ti nára-Yèésù Ɔlá-wa fú ɔ̀nyà ŋa#á, tsí àŋa kó káà kpalɛwo ìnàbí yèé wà bɛ̀ ŋa#á, tsí àŋa kó rí káyí ní fee, bí iŋɛ́ ŋa#á wà lɔ gbà fáà fú ŋa.

37 Ńbɛ̀ɛ́, Bànàbá wò ní Yòhánà† yèé à náa kpè ní Mákò#ɛ́ kó lɔ bá àŋa, 38 tsí Kpɔ́lù ní: Òŋu kɔ̀. Ó ɖi, idza yèé ti sɛ̃̀ náànyì-àŋa títí ńlɛ̀-Kpã̀fílì, tsí kò lɔ ńtsɛ́#ɛ́ bá àŋa gìɖì#ɛ́, kò wà ní kó lɔ bá àŋa ró.

39 Afɔ̀ yèé à fɔ̀ yí, ó ɖi fà, tsí n fà fú ŋa títí kṹnukṹ gbɛ̀ya. Tsí Bànàbá gbɛ̃́ Mákò tɛ̀ náànyì, tsí à káà wɔ̀ nɔ́kɔ̃̀-odzómi, tsí fodzú fú ɔwɔ́-ilɛ̀-Sìkpírò. 40 Tsí Kpɔ́lù gbo tsã Sìlásì, tsí gbɛ̃́ɛ̃ tɛ̀ náànyì, tsí ìnàbí ŋa múu bɔwɔ́-Ɔlɔ́dzɔ́ ní kó tse ore-ɔ̀fɛ́ fúu. Tsí ó ǹɖe lɔ. 41 Tsí ó gbà lɔ ńlɛ̀-Sìrí òŋu ńlɛ̀-Sìlíkì, tsí náa wà ɖáàmí le ɔma-ɛgbɛ́-Kírísítò ŋa làkóò.