Itsɛ́ 14

Kpɔ́lù òŋu Bànàbá wà dzíkɔ̀-Ɔ̀ɖáyé ńǹlú-Ìkɔ́nì

Ńbɛ̀ɛ́, kíbí Kpɔ́lù òŋu Bànàbá tó ńǹlú-Ìkɔ́nì#ɛ́, à tse kíbí à tse náÀntìyɔ́tsì gbo#ɛ́. À lɔ ńlé-ìkpàɖé-ɔma-Ìyúɖà ŋa†, tsí wà dzíkɔ̀-Ɔ̀ɖáyé fú ŋa. À fɔ̀ɔ́ títí ɔ̀nyà kpíkpɔ̀ kpíkpɔ̀ náàŋírĩ-ɔma-Ìyúɖà† ŋa òŋu ɛnɛ yèé kò dzɛ́ ɔma-Ìyúɖà ŋa#á gbo gba Yèésù gbɔ́. 2 Ó ɖi, ɔma-Ìyúɖà kã̀ŋa kò gba afɔ̀#ɛ́ gbɔ́. Tsí à ǹɖe, tsí gbɛ̃́ ɛnɛ yèé kò dzɛ́ ɔma-Ìyúɖà kã̀ŋa#á gbo tɛ̀ náànyì, tsí à wà tsèsérè-íbàɖí nára-ìnàbí ŋa. 3 Ti nára-bɛ́ɛ̀#ɛ́, Kpɔ́lù òŋu Bànàbá gbé ńǹlú#ɛ́ bɛ̀ kpíkpɛ̃́. Tsí à mú àkaralé-ŋa kpó si ńǹtá-Ɔlá-wa, tsí à mú ɛ̀ɖɔ̃̀ kã ara-ŋa, tsí wà wíìnyɛ̀ fú ɔ̀nyà ŋa. À náa wà fɔ̀ ní Yèésù ní dzɛ́ olóore-ɔ̀fɛ́#ɛ́. Tsí Ɔlá-wa gbo wà gbà ńǹtá-ŋa, tsí wà tse iŋɛ́-àwùsì lákṹ lákṹ ŋa, tsí wà ń nyà ɖíre ní afɔ̀-òtítɔ́ ní à wà fɔ̀#ɛ́.

4 Ńbɛ̀ɛ́, ɔ̀nyà-ìlú ŋa#á kpɛ̃́ ìgbarà méèdzì. Ɔ̀nyà kã̀ŋa ní àŋa wà náànyì-ɔma-Ìyúɖà ŋa, tsí ɛnɛ-àtíbɔ̀ ŋa gbo ní náànyì-adzítsɛ́-Yèésù† ŋa#á ní àŋa wà#á. 5 Tsí ɔma-Ìyúɖà ŋa òŋu ɛnɛ yèé kò dzɛ́ ɔma-Ìyúɖà ŋa#á má nára-ɔ̀gã́-ŋà ŋa gbo, à ǹɖe kpó nyàgã̀ã̀ ní àŋa kó tsoró bá Kpɔ́lù òŋu Bànàbá, tsí ta ŋá nóòkúta kpa. 6 Ó ɖi, kíbí Kpɔ́lù òŋu Bànàbá gbɔ́ ní à bòkó tse bá àŋa bɛ́ɛ̀#ɛ́, à sá lɔ ńǹlú kã̀ŋa ńlɛ̀-Lìkàyónì. À lɔ ńǹlú-Lùsìtɛ́rà, tsí lɔ ńǹlú-Ɖèrèbé òŋu erè-ìyabɛ̀ ŋa kpó. 7 Kíbí à tó ńbɛ̀ ŋa gbo#ɛ́, à wà dzíkɔ̀ ɖíɖɔ̃̀#ɛ́ fú ɔ̀nyà ŋa làkóò ró gé ni.

Kpɔ́lù òŋu Bànàbá wà dzíkɔ̀-Ɔ̀ɖáyé ńǹlú-Lùsìtɛ́rà òŋu ńǹlú-Ɖèrèbé

8 Ńbɛ̀ɛ́, ɔ̀nyà-kã̀ wà ńǹlú-Lùsìtɛ́rà#á bɛ̀, tsí dzɛ́ arɔ. Ɛsɛ̀‐ɛ̀ ŋa kú kpó, tsí bɛ́ɛ̀ ní à bíi wá#á ńnɛ̀ɛ́. Kò rɛ̃̀ gìɖì wòrí. 9 Tsí ó ɖi nɔ́dzɔ́-kã̀, tsí Kpɔ́lù wà wíìnyɛ̀, tsí arɔ#ɛ́ gbo wà bɛ̀, tsí wà gbɔ́ afɔ̀#ɛ́. Tsí Kpɔ́lù tadzú máa si, tsí wà wòó kokoko. Ó mà ní arɔ#ɛ́ gba afɔ̀#ɛ́ gbɔ́, tsí àrɔ̃̀#ɛ́ nákó tùú. 10 Tsí ó ké fúu wáà ní: Ǹɖe kpáà, tsí o sɛ̃́ ɖóro!

Gbòkã́#á, arɔ#ɛ́ fò ǹɖe kéréŋú, tsí kpé rírɛ̃̀.

11 Kíbí èrò#ɛ́ kpó rí iŋɛ́ yèé Kpɔ́lù tse bɛ́ɛ̀#ɛ́, à wà ɖúgbe kũkũ ńǹlú yèé à náa wí ńlɛ̀-Lìkàyónì#ɛ́ bɛ̀#ɛ́, tsí wà fɔ̀ ní: Kpɔ́ dza! Iŋɛ ŋa ní sɔ ara-ŋa ɖi ɔ̀nyà, tsí ti ńǹgbèrí wá ńɖi-àŋa#á.

12 Ńlɛ̀-bɛ̀#ɛ́, iŋɛ kã̀ŋa wà bɛ̀, tsí à náa kpe ɔ̀kã̀ ní Ɖíyò, tsí kpe ɔ̀kã̀ gbo ní Hɛ̀rìmɛ́sì. Ńbɛ̀ɛ́, à mú Bànàbá kpe Ɖíyò, tsí mú Kpɔ́lù òŋu kpe Hɛ̀rìmɛ́sì. À kpe Kpɔ́lù bɛ́ɛ̀, iŋɛ́ yèé tse#ɛ́, òŋu ní wà wíìnyɛ̀#ɛ́.^* 13 Ilé-iŋɛ Ɖíyò#ɛ́ wà nárũ-ìlú#ɛ́ gbòkã́ ni. Tsí balíŋɛ#ɛ́ káà fa lalá-akɔ kã̀ŋa fùɖá ńwádzú-èkũ̀-ilé#ɛ́. Lalá ŋa#á, à mú ɔ̀dzá-kã̀, tsí mú ìbóbó ŋa so nára‐ɛ̀, tsí ń so fú ŋa, tsí ká nyáa ń tsɛbɔ. Tsí balíŋɛ#ɛ́ òŋu ɔ̀nyà yèé ŋa wà bɛ̀#ɛ́ wà wò ní àŋa kó kpa ɛrã ŋa#á tsɛbɔ fú adzítsɛ́-Yèésù† ŋa#á. 14 Tsí kíbí Kpɔ́lù òŋu Bànàbá gbɔ́ ní bɛ́ɛ̀ ní à bòkó tse#ɛ́, à fa àwù-ara-ŋà ŋa ya gbòkã́, tsí ń nyà ɖíre ní àŋa kò gbà si ńǹtá‐ɛ̀. Tsí kóyá kóyá gé#ɛ́, à wɔ̀ náàŋírĩ-èrò#ɛ́, tsí wà ɖúgbe kũkũ fú ŋa ní: 15 Òò! Kí à bòkó tse ńnɛ̀ɛ́? Ɔ̀nyà-ìtalɛ̀ bí ŋa kíbí àŋa gbo ké ní àŋa dzɛ́#ɛ́ nɔ̀. Tsí àŋa wá, tsí wà dzíkɔ̀ ɖíɖɔ̃̀ ti nára-Ɔ̀ɖáyé fú ŋa ní ká kɔ iŋɛ-akpotu nyɛ̀ŋɛ̀ ŋa dzɔ̀ɔ́, tsí ká nyí wá ńɖi-Ɔ̀ɖáyé Oláàyɛ̀ ńǹkɛ̀ɛ́. Òŋu ní tse ìgbèrí, tsí tse ilɛ̀, tsí tse àhũ òŋu iŋɛ́ ɔ̀kã̀lɔ́ɔ̀kã̀ kpó yèé wà#á. 16 Dzɔ̀ɔ́ dzɔ̀ɔ́#ɛ́, Ɔ̀ɖáyé kɔ ìlú ŋa kpó dzɔ̀ɔ́, tsí kṹnukṹ wà tse yèé wùú#ɛ́. 17 Ó ɖi, ó mú ara‐ɛ̀ ɖíre fú ɔ̀nyà ŋa. Ó ń ɖíre fú ŋa ní olóore ní òŋu dzɛ́#ɛ́. Tsí náa tse tsí òdzò náa rɔ̀ si ńǹwèrè, tsí dzídzɛ ŋa náa sã̀. Ìɖéǹɖè ni! Náa fú ŋa ńdzídzɛ kpíkpɔ̀ kpíkpɔ̀ gbo, tsí náa tse tsí à náa wà náyè títɛ́ si.

18 Bɛ́ɛ̀ ní Kpɔ́lù òŋu Bànàbá le oŋù si náfɔ̀#ɛ́ kũkũkũ#ɛ́. Ó ɖi, ó le fú ŋa héŋú ní ká ɖá ŋa ɖóro fú ɛbɔ yèé à bòkó tse#ɛ́.

19 Ńbɛ̀ɛ́, ɔma-Ìyúɖà† kã̀ŋa ti náÀntìyɔ́tsì-erè-Kpìsìɖí, tsí ti ńǹlú-Ìkɔ́nì gbo, tsí wá ńǹlú#ɛ́. Tsí à wáa nyí ìsérè fú èrò#ɛ́, tsí àŋa kpó, à ǹɖe, tsí wà ta Kpɔ́lù nóòkúta. Kíbí à taá nóòkúta bɛ́ɛ̀#ɛ́, à ɖédzú ó kú ni, tsí à wɔ́ɔ fùɖá náàŋírĩ-ìlú#ɛ́ káà sɔ ńǹɖì-kã̀. 20 Ó ɖi, atɛ̀náànyì-Yèésù kã̀ŋa wáa sú wérí‐ɛ̀, tsí ó ǹɖe, tsí sɛ̃̀ wɔ ìlú#ɛ́ lɔ. Ńlɛ̀ má‐ɛ̀ gé#ɛ́, òŋu Bànàbá méèdzì dzì nɔ́ɔ̀nà-ìlú-Ɖèrèbé.

21 Kíbí à tó ńǹlú#ɛ́, à dzíkɔ̀ ɖíɖɔ̃̀ ti nára-Yèésù fú ɔ̀nyà ŋa, tsí à tse títí ɔ̀nyà kpíkpɔ̀ wà tɛ̀ náànyì-Yèésù. Náànyì-bɛ́ɛ̀#ɛ́, à ǹɖe bɛ̀, tsí sɛ̃̀ gbà ńǹlú-Lùsìtɛ́rà, tsí gbà ńǹlú-Ìkɔ́nì, tsí gbà ńǹlú-Àntìyɔ́tsì gbo. 22 Tsí à náa wà ɖáàmí le atɛ̀náànyì-Yèésù ŋa, tsí wà fɔ̀ fú ŋa ní: Ká gbódzú, tsí wà náànyì-Yèésù si làkóò gé, ká máa sɛ̃̀. Ó ɖi, àŋa nákó bá òfò kpíkpɔ̀ kpàɖé nɔ́ɔ̀nà tã́ná Ɔ̀ɖáyé kó wáa dzoyè si ńǹtá-àŋa.

23 Tsí à náa tsã onùgbó ŋa si nárũ-ɔma-ɛgbɛ́-Kírísítò ŋa ńǹlú kã̀kã̀. Tsí à náa ɖi arũ, tsí wúùre fú onùgbó ŋa#á, tsí mú ŋa bɔwɔ́-Yèésù Ɔlá-wa, ɛnɛ yèé à mú àkaralé-ŋa kpó si ńǹtá‐ɛ̀#ɛ́.

24 Ńbɛ̀ɛ́, Kpɔ́lù òŋu Bànàbá tɔ́ ǹɖe ró, tsí gbà nérè-Kpìsìɖí, tsí káà bɔ́ ńlɛ̀-Kpã̀fílì. 25 Tsí à lɔ ńǹlú-Kpɛ̀gé. Kíbí à tó ńbɛ̀ gbo#ɛ́, à dzíkɔ̀-Ɔ̀ɖáyé fú ɔ̀nyà ŋa. Náànyì-bɛ́ɛ̀ ró#ɛ́, à ǹɖe bɛ̀ gbo, tsí lɔ ńǹlú-Àtálì. 26 Tsí à sɛ̃̀ ǹɖe bɛ̀ gbo ró, tsí wɔ̀ nɔ́kɔ̃̀-odzómi, tsí sɛ̃̀ lɔ káà bɔ́ náÀntìyɔ́tsì-ilɛ̀-Sìrí. NáÀntìyɔ́tsì nyɛ̀ŋɛ̀#ɛ́ bɛ̀ ní à ti mú ŋa bɔwɔ́-Ɔ̀ɖáyé ní kó tse ore-ɔ̀fɛ́ fú ŋa#á. À tse bɛ́ɛ̀, àtsùgbée ká tsitsɛ́ yèé ŋa kpó à tse tã́ báàyí#ɛ́ ni.

27 Tsí kíbí à tó bɛ̀#ɛ́, à kpe ɔma-ɛgbɛ́-Kírísítò ŋa kpó kpérí, tsí à kpɛ̀rɔ́-iŋɛ́ kpó yèé Ɔ̀ɖáyé tse gbà ńǹtá-ŋa#á fú ŋa. À fɔ kíbí Ɔ̀ɖáyé tsí èkũ̀ fú ɛnɛ yèé kò dzɛ́ ɔma-Ìyúɖà ŋa#á gbo ní àŋa gbo ká gba Yèésù gbɔ́#ɛ́. 28 Tsí à gbé bɛ̀ náàŋírĩ-atɛ̀náànyì-Yèésù ŋa#á kpíkpɛ̃́ fú ìwèrè mɛ́ɛlóle kã̀ŋa.