Itsɛ́ 13

À tsã Bànàbá òŋu Sɔ́lù, tsí bɛ̀ ŋá lɔ ńtsɛ́-Ɔ̀ɖáyé

Ńbɛ̀ɛ́, ɔ̀nyà kã̀ŋa wà náàŋírĩ-ɔma-ɛgbɛ́-Kírísítò-Àntìyɔ́tsì ŋa, tsí dzɛ́ agbáfɔ̀-Ɔ̀ɖáyé fɔ̀† ŋa, tsí ɔ̀nyà kã̀ŋa gbo wà, tsí dzɛ́ akɔ́nɛ náfɔ̀-Ɔ̀ɖáyé ŋa. À náa kpe ɔ̀nyà-kã̀ ní Sɔ́lù, tsí kpe ɔ̀nyà-kã̀ gbo ní Bànàbá, tsí kpe ɔ̀nyà-kã̀ gbo ró ní Sìmɛ̀yɔ́nì. Òŋu ní náa ɖákì ní Ɖúɖú#ɛ́. À náa kpe ɔ̀nyà-kã̀ gbo ró ní Lùkíyù. Ó ti ńǹlú-Sìrɛ́nì. À náa kpe ɔ̀nyà-kã̀ gbo ró ní Mànàyɛ́. Mànàyɛ́#ɛ́ ní à sɛ̃̀ má òŋu kɔ̀màɖã́ã̀ Èróɖì† náàtìlɛ̀nɖe ŋa#á. 2 Tsí ó ɖi nɔ́dzɔ́-kã̀, tsí à wà nárũ ɖíɖì si, tsí wà wúùre. Ńbɛ̀ɛ́, Mímí-Ɔ̀ɖáyé† wà wíìnyɛ̀ fú ŋa ní: Ǹ kpe Bànàbá òŋu Sɔ́lù méèdzì ní ká tsitsɛ́-kã̀ fú mi. È nyà ŋá si níìkã̀, tsí ká tsitsɛ́#ɛ́.

3 Kíbí à ɖi arũ, tsí wúùre tã́#á, à mú ɔwɔ́ lé ńǹtá-Bànàbá òŋu Sɔ́lù, tsí wúùre fú ŋa, tsí à bɛ̀ ŋá lɔ, tsí à dzì nɔ́ɔ̀nà.

Bànàbá òŋu Sɔ́lù méèdzì lɔ ńlɛ̀-Sìkpírò

4 Tsí kíbí Mímí-Ɔ̀ɖáyé† bɛ Bànàbá òŋu Sɔ́lù ńtsɛ́ bɛ́ɛ̀#ɛ́, à lɔ ńǹlú-Sèlúkì, tsí à káà wɔ̀ nɔ́kɔ̃̀-odzómi bɛ̀. Tsí à ǹɖe, tsí lɔ ńlɛ̀-òmírɛ̃̀-kã̀ gbo. Ilɛ̀#ɛ́, omi wérí‐ɛ̀ kòdzá, tsí à náa kpèé ní Sìkpírò. 5 Tsí à káà tó ńǹlú-kã̀ bɛ̀, à náa kpèé ní Sàlàmínì. Kíbí à tó ńbɛ̀#ɛ́, à náa wà lɔ ńlé-ìkpàɖé-ɔma-Ìyúɖà ŋa† yèé wà bɛ̀ ŋa#á, tsí wà dzíkɔ̀-Ɔ̀ɖáyé fú ŋa. À gbɛ̃́ Yòhánà† Mákò gbo tɛ̀ náànyì, tsí ó wà mɔ́wɔ́ gbè fú ŋa.

6 Tsí à rɛ̃̀ wérí ilɛ̀-àŋírĩ-omi#ɛ́ kòdzá kpó títí à káà tó ńǹlú-Kpàfó. Tsí ɔma-Ìyúɖà†-kã̀ wà ńǹlú#ɛ́ bɛ̀. À náa kpèé ní Bàyèésù. Itsɛ́-ogù ní náa tse#ɛ́, tsí náa wà tsìké ní òŋu wà gba afɔ̀-Ɔ̀ɖáyé fɔ̀. 7 Ńbɛ̀ɛ́, ɔ̀nyà-òmírɛ̃̀-kã̀ gbo wà, tsí dzɛ́ kɔ̀màɖã́ã̀-ilɛ̀#ɛ́, tsí à náa kpèé ní Sɛ̀gíyù Kpɔ́lù. Ɔ̀nyà-olí-ìrã̀ã́mà-kã̀ ni. Ńkpáfɛ‐ɛ̀ ní atsogù#ɛ́ wà#á. Tsí kɔ̀màɖã́ã̀#á kpe Bànàbá òŋu Sɔ́lù wá ńɖɔ-ara‐ɛ̀. Iŋɛ́ yèé tse#ɛ́, ó wà wùú ní òŋu kó gbɔ́ afɔ̀-Ɔ̀ɖáyé. 8 Tsí atsogù#ɛ́ òŋu, ó wà kɔ afɔ̀-Bànàbá òŋu Sɔ́lù gé ni. Kò wà wò gìɖì ní kɔ̀màɖã́ã̀#á kó gba afɔ̀-Ɔ̀ɖáyé gbɔ́. Ńgɛ̀rɛ́kì#ɛ́, à náa kpe atsogù#ɛ́ ní Èlímà. 9 Ńbɛ̀ɛ́, Mímí-Ɔ̀ɖáyé tì wɔ̀ ńǹtá-Sɔ́lù. Sɔ́lù#ɛ́ ké ní à náa kpè ní Kpɔ́lù#ɛ́. Tsí odzú‐ɛ̀ ta Èlímà#á si, tsí ó wà wòó kokoko, 10 tsí ó wà wí fúu ní: Ɔma-Ètsù†, ɔ̀nyà-arúnɛ, aɖínɛsi, ɔ̀tɛ̀-iŋɛ́-ire ɔ̀kã̀lɔ́ɔ̀kã̀ kpó! Ɛkpa sísɛ̃́-Ɔlɔ́dzɔ́#ɛ́ ní ò bòkó tɔ̃#ɛ́ɛ̀? Ò kàkó mí iŋɛ́ yèé ò wà tse#ɛ́ɛ̀? 11 Rí gé! Ɔlɔ́dzɔ́ bòkó kpaɛ́, tsí odzú‐ɛ̀ɛ nákó fɔ́, tsí ò kàkó rírã fú ìwèrè-kã̀.

Gbòkã́ gé#ɛ́, odzú-Èlímà ɖi fìtìì, tsí òkùkù kù ɖíi. Tsí ó wà nyí wérí ara‐ɛ̀, tsí wà wo ɔ̀nyà-kã̀ ní kó wáa gbɛ̃́ òŋu. 12 Tsí kíbí kɔ̀màɖã́ã̀#á rí iŋɛ́ yèé tse bɛ́ɛ̀#ɛ́, ó gba afɔ̀#ɛ́ gbɔ́, tsí ɛ̀kɔ́ yèé ó gbɔ́ ti nára-Ɔlá-wa gbo#ɛ́, ó mùú tó bɛ́ɛ̀.

Kpɔ́lù òŋu Bànàbá lɔ ńǹlú-Àntìyɔ́tsì yèé wà nérè-Kpìsìɖí#ɛ́

13 Náànyì-bɛ́ɛ̀#ɛ́, Kpɔ́lù òŋu enìkéèdzì‐ɛ̀ ŋa wɔ̀ nɔ́kɔ̃̀-odzómi ńǹlú-Kpàfó, tsí dzì nɔ́ɔ̀nà-ìlú-Kpɛ̀gé ńlɛ̀-Kpã̀fílì. Ńbɛ̀ ní Yòhánà† Mákò òŋu kɔ̀ ŋá dzɔ̀ɔ́, tsí sɛ̃̀ bɔ̀ wáa lɔ ńYèrúsàlɛ́mì#ɛ́. 14 Ó ɖi, Kpɔ́lù òŋu Bànàbá tɔ́ ǹɖe ńǹlú-Kpɛ̀gé#ɛ́ bɛ̀ ró, tsí lɔ náÀntìyɔ́tsì yèé wà nérè-Kpìsìɖí#ɛ́. Kíbí à tó ńbɛ̀#ɛ́, ó ɖi nɔ́dzɔ́-ìmíra†, tsí à lɔ ńlé-ìkpàɖé-ɔma-Ìyúɖà ŋa†, tsí à káà dzokó. 15 Ńbɛ̀ɛ́, ɔ̀nyà-kã̀ kã ìwé-ɛkpa-Ɔ̀ɖáyé† ŋa òŋu ìwé-agbáfɔ̀-Ɔ̀ɖáyé fɔ̀† ŋa. Kíbí ɛnɛ nyɛ̀ŋɛ̀ kã̀ ŋá tã́#á, onùgbó-ilé-ìkpàɖé-ɔma-Ìyúɖà ŋa#á wà wí fú Kpɔ́lù òŋu Bànàbá ní: Ìnàbí-wa ɔma-Ìyúɖà ŋa, bí afɔ̀-kã̀ wà fú ŋɛ́, tsí e ń ɖáàmí le ìɖì-ìdzokó#ɛ́ báàyí, ɔ̀nà wà fú ŋɛ́.

16 Ńbɛ̀ɛ́, Kpɔ́lù ǹɖe ɖóro, tsí tsɔwɔ́ fú ŋa ní òŋu bòkó wíìnyɛ̀. Tsí ó wà wí fú ŋa ní: Ɔma-Ìsàràyɛ́lì† ŋa òŋu ɛ̀ŋɛ kpó yèé náa nɛ́ àrísá fú Ɔ̀ɖáyé#ɛ́, è rɛ̃tígbè, tsí e gbɔ́ oŋù-mi. 17 Ɔ̀ɖáyé yèé ɔma-Ìsàràyɛ́lì ŋa kpó wà sɛ̃̀#ɛ́, òŋu ní tsã gbágbóǹgbàgbò-wa ŋa, tsí ó tse tsí à ɖi kpíkpɔ̀ ńǹwèrè yèé à dzɛ́ àledzò si ńlɛ̀-Èdzíkpítì†#ɛ́. Náànyì-bɛ́ɛ̀#ɛ́, ó wáa tsí ŋa ǹɖe ńǹlú#ɛ́ gbà ńǹtá-ikpá-ɔwɔ́‐ɛ̀. 18 Tsí ó sɛ̃̀ ŋá nɔ́ɔ̀ɖã̀ títí fú ɔɖɔ̃́ ogóòdzì. 19 Ó kpa ɔ̀nyà-ìlú-ìrɔ́ǹrɔ́ méedze ǹɖe ńlɛ̀-Kànàŋá, tsí kpɛ̃́ ilɛ̀#ɛ́, tsí ń bɔwɔ́-gbágbóǹgbàgbò-wa ŋa ní kó dzɛ́ ilɛ̀-ŋa. 20 Ńnɔ́-iŋɛ́ yèé ŋa kpó#ɛ́, ìwèrè‐ɛ̀ lɔ kíbí ɔɖɔ̃́ maá lé nógóòdzì lé ńrɛ̃́wó (450) bɛ́ɛ̀. Tsí ó wáa tsã ɔ̀nyà kã̀ŋa nɛ́kpa nɛ́kpa ní ká wà gbɛ̃́ gbágbóǹgbàgbò-wa ŋa. À náa kpè ɛnɛ nyɛ̀ŋɛ̀ ŋa ní àkpɛ̀dzɔ́ ŋa. Tsí à wà gbɛ̃́ ŋa bɛ́ɛ̀ títí wáa fú ìwèrè-Sàmùwɛ́lì agbáfɔ̀-Ɔ̀ɖáyé fɔ̀. 21 Náànyì-bɛ̀ɛ́ ró#ɛ́, gbágbóǹgbàgbò-wa ŋa bèrè ní ɔ̀nyà-kã̀ kó dzɛ ólú fú àŋa, tsí Ɔ̀ɖáyé tsã Sɔ́lù ɔma-Kísì fú ŋa. Sɔ́lù#ɛ́, náro-Bɛ̃̀dzàmɛ́nì† ní ó ti#ɛ́. Tsí ó dzoyè si ńǹtá-ŋa títí fú ɔɖɔ̃́ ogóòdzì. 22 Ó ɖi, Ɔ̀ɖáyé wáa kɔ̀ ní Sɔ́lù kó máa dzɛ́ ólú fú ŋa ró. Tsí ó tsã ólú-òmírɛ̃̀-kã̀ fú ŋa, tsí à náa kpèé ní Ɖàfíɖì†. Tsí Ɔ̀ɖáyé nya àyídzá ti nára‐ɛ̀ ní:

“Ǹ rí ɔ̀nyà-kã̀, tsí ó dzɔdzú-mi. Ɖàfíɖì ɔma-Yèsé ni,

tsí iŋɛ́ kpó yèé dzɛ́ awù-mi#ɛ́, nákó tseé.”^*

23 Tsí kíbí Ɔ̀ɖáyé ti tàlé‐ɛ̀ si#ɛ́, ó mɔ́wɔ́ tɛ ɔ̀nyà-kã̀ náàŋírĩ-ɔmalɔ́ma-Ɖàfíɖì ŋa ní kó dzɛ́ Agbanɛlà fú ɔma-Ìsàràyɛ́lì ŋa kpó. Ɔmalɔ́ma-Ɖàfíɖì#ɛ́, Yèésù ni. 24 Tã́ná Yèésù#ɛ́ kó wá#á, Yòhánà† ti wí afɔ̀-Ɔ̀ɖáyé fú ɔma-Ìsàràyɛ́lì ŋa kpó ní ká nyíìlò kpaɖà, tsí òŋu kó wɛ̀† fú ŋa. 25 Ńbɛ̀ɛ́, ìwèrè yèé Yòhánà kó tsitsɛ́‐ɛ̀#ɛ́ tã́#á tó, tsí ó wà bèrè ŋá ní: Nɛ̀ɛ́ à ɖédzú òŋu dzɛ́ ni ná? Ɛnɛ yèé Ɔ̀ɖáyé tàlé ní òŋu nákó bɛ̀ wá#áà? Òò! Kò tsi òŋu ni. Ó ɖi, ɛnɛ nyɛ̀ŋɛ̀ nákó wáa wá náànyì-òŋu, tsí òŋu kò dzɔ òŋu kó tú okù-kpákò‐ɛ̀ gìɖì.

26 Tsí Kpɔ́lù wà wí fú ŋa ró ní: Ìnàbí-mi ɔmalɔ́ma-Àbàràhámì† ŋa òŋu ɛ̀ŋɛ yèé ŋa wà nɛ́ àrísá fú Ɔ̀ɖáyé#ɛ́, ikɔ̀-ɔlà yèé Ɔ̀ɖáyé bɛ̀ wá#á, àwa kpó ní ó bɛ̀ɛ́ wá fú#ɛ́. 27 Ɔ̀nyà-ìlú-Yèrúsàlɛ́mì ŋa òŋu ɔ̀gã́-ŋa kò rí Yèésù mà ní òŋu ní dzɛ́ Agbanɛlà#á. Ó ɖi, agbáfɔ̀-Ɔ̀ɖáyé fɔ̀ ŋa ti fɔ̀ɔ́ si, tsí à sì wà kã ìwé-afɔ̀#ɛ́ nɔ́dzɔ́-ìmíra kã̀kã̀ náàrìmáa gbɔ́ òkpì‐ɛ̀. Tsí kíbí à ɖáàbi fú Yèésù#ɛ́, afɔ̀ yèé agbáfɔ̀-Ɔ̀ɖáyé fɔ̀ ŋa fɔ̀ si#ɛ́ tsɛ. 28 Yèésù kò tse iŋɛ́-íbàɖí-kã̀ kpókpó, tsí ká rí, tsí ká ń ɖáàbi fúu, tsí kpaá nóòkú. Tã́ná, à sì bèrè ní Kpìlátò† kó tsóŋù, tsí ká kpaá nóòkú. 29 À tse iŋɛ́ ŋa#á kpó tútútú kíbí à ti kɔɔ́ si kpó ńǸwé-Ɔ̀ɖáyé† ti nára-Yèésù ní nákó lɔ gbà#á. Tsí à nyàá ńǹtá-egi-ìɖáàgàlàdzà†, tsí kɛ́ɛ lɔ káà rì. 30 Ó ɖi, Ɔ̀ɖáyé òŋu, ó dzíi ti náàŋírĩ-òkú ŋa wá náyé. 31 Kíbí ó dzí wá náyé#ɛ́, ó mú ara‐ɛ̀ ŋa ɔ̀nyà ŋa ńǹtse-ɔdzɔ́ kpíkpɔ̀. Ɛnɛ yèé ŋa tɛ̀ náànyì‐ɛ̀ ti nérè-Gàlìlé títí wáa lɔ ńYèrúsàlɛ́mì#ɛ́ ní ó mú ara‐ɛ̀ ŋà bɛ́ɛ̀#ɛ́. Àŋa ní wà nya àyídzá‐ɛ̀ fú ɔma-Ìsàràyɛ́lì ŋa báàyí#ɛ́. 32 Tsí ikɔ̀ ɖíɖɔ̃̀#ɛ́ ní àwa gbo, àa wà dzɛ́ fú ŋɛ́#ɛ́. Ikɔ̀ ɖíɖɔ̃̀#ɛ́ ní dzɛ́ ní Ɔ̀ɖáyé ti tàlé-kã̀ si fú gbágbóǹgbàgbò-wa ŋa dzɔ̀ɔ́ dzɔ̀ɔ́, 33 tsí àlé yèé ó ta fú ŋa#á, ó sãã́ fú àwa ɔmalɔ́ma-ŋà ŋa kíbí ó dzí Yèésù ti náàŋírĩ-òkú ŋa wá náyé#ɛ́. Bɛ́ɛ̀ ní à kɔɔ́ si ńǸwé-Orĩ ŋa, nórĩ-èkéèdzì‐ɛ̀#ɛ́. À ní:

“Ɔma-mi ní ò dzɛ́#ɛ́,

nɔ́mbɛ́#ɛ́, ǹ wà fɔ̀ ní: Ǹ dzɛ́ boba-ɛ̀ɛ.”^*

34 Ti nára-kíbí Ɔ̀ɖáyé dzí Yèésù ti náàŋírĩ-òkú ŋa wá náyé, tsí kàkó dzirà si ńfò láyé#ɛ́, ó fɔ̀ ńǹwé‐ɛ̀ si ní:

“Àlé-kùsɛ̀ɛ̀ yèé ǹ ta si fú Ɖàfíɖì#ɛ́, màa sãã́ fú ŋɛ́,

Kùsɛ̀ɛ̀-òtítɔ́ ni, kùsɛ̀ɛ̀-tèmi ká-mi ni.”^*

35 Tsí à kɔ si nórĩ-òmírɛ̃̀-kã̀ gbo ró ní:

“Ò kàkó kɔ̀ mí dzɔ̀ɔ́, èmi yèé dzɛ́ tɛ̀ɛ akpá akpá, ɛsɛ̀ ɛsɛ̀#ɛ́,

tsí n dzirà si ńfò.”^*

36 Ɖàfíɖì#ɛ́ tsitsɛ́-awù-Ɔ̀ɖáyé ńǹwèrè yèé ó gbé#ɛ́, tsí ó wáa tsàrìsí, tsí à rìí gbe érì-gbágbóǹgbàgbò‐ɛ̀ ŋa, tsí ó dzirà si ńfò‐ɛ̀. 37 Ó ɖi, ɛnɛ yèé Ɔ̀ɖáyé dzí ti náàŋírĩ-òkú ŋa wá náyé#ɛ́, òŋu kò dzirà si ńfò‐ɛ̀.

38-39 Tsí Kpɔ́lù tɔ́ wà wí fú ŋa ró ní: Ìnàbí-mi ŋa, kó yé ŋɛ́ ní gbà ńǹtá-Yèésù#ɛ́ ní àa wà dzíkɔ̀ fú ŋɛ́, tsí wà fɔ̀ fú ŋɛ́ ní Ɔ̀ɖáyé nákó mú íbàɖí-ŋɛ́ tɔrɛ fú ŋɛ́#ɛ́. Ɔ̀nyà kpó, bí à nɛ́ àkaralé si ńǹtá-Yèésù#ɛ́, Ɔ̀ɖáyé nákó mú àbi-ŋa kpó tɔrɛ fú ŋa. Ɛkpa-Mɔ̀ɔ́sè† òŋu kò nɛ́kpá, tsí kó nyáa gbà ŋɛ́ dzɔ̀ɔ́ nɔ́wɔ́-àbi-kã̀ kpókpó. 40 Ó ɖi, è tsɔ́ éwo-ara-ŋɛ́ ŋa rere, àtsùgbée afɔ̀ yèé agbáfɔ̀-Ɔ̀ɖáyé fɔ̀ ŋa fɔ̀ si#ɛ́ kó ma wáa tsɛ si ńǹtá-ŋɛ́. À kɔ si ńǹwé-kã̀ ní:

41 “Ɛ̀ŋɛ ɔ̀nyà-amúnɛtse ŋa, è rí gé!

È kí dzã̀maa, tsí e nɔ̀ ǹɖe ńǹtalɛ̀#ɛ́.

Iŋɛ́ yèé tse#ɛ́, ǹ bòkó tse iŋɛ́-àwùsì-kã̀ náàsòkò-ŋɛ́.

Tsí bí à kpɛ̀rɔ́‐ɛ̀ fú ŋɛ́ gìɖì#ɛ́, è kàkó gbàá gbɔ́.”^*

42 Ńbɛ̀ɛ́, oŋù-Kpɔ́lù dzilɛ̀ bɛ̀. Tsí òŋu Bànàbá méèdzì fùɖá ńnɔlé#ɛ́. Kíbí à wà fùɖá#á, ɛnɛ yèé ŋa gbɔ́ afɔ̀#ɛ́ wà fɔ̀ fú ŋa ní ká sɛ̃̀ wáa fɔ afɔ̀#ɛ́ fú àŋa ró nɔ́dzɔ́-ìmíra-èkéèdzì‐ɛ̀.

43 Náànyì-kíbí à tse ìkpàɖé#ɛ́ tã́#á, ɔma-Ìyúɖà kpíkpɔ̀ má nára-ɛnɛ yèé wà tsorò-ɔma-Ìyúɖà ŋa gbo, tsí wà sɛ̃ Ɔ̀ɖáyé bɛ̀#ɛ́, à tɛ̀ náànyì-Kpɔ́lù òŋu Bànàbá làkóò. Tsí Kpɔ́lù òŋu Bànàbá wà wíìnyɛ̀ bá ŋa, tsí wà ɖáàmí le ŋá, tsí wà fɔ̀ fú ŋa ní ká wà náànyì-Ɔ̀ɖáyé si làkóò gé, tsí ká nɛ́ àkaralé si ńǹtá-ore-ɔ̀fɛ́‐ɛ̀.

44 Ńbɛ̀ɛ́, ó ɖi nɔ́dzɔ́-ìmíra-èkéèdzì‐ɛ̀, tsí ɔ̀nyà kpó ńǹlú-Àntìyɔ́tsì#ɛ́, à wáa kpérí, tsí wà wo ká gbɔ́ afɔ̀-Ɔlɔ́dzɔ́. 45 Tsí kíbí ɔma-Ìyúɖà ŋa rí ní ɔ̀nyà ŋa kpɔ̀ tó gbà#á, à kpé owú dzídzɛ kò tì sã̀, tsí à wà nyí odzú-afɔ̀ yèé Kpɔ́lù wà fɔ̀#ɛ́ ɖélɛ̀, tsí wà búu. 46 Tsí Kpɔ́lù òŋu Bànàbá mú ɛ̀ɖɔ̃̀ kã ara-ŋa, tsí wí fú ŋa ní: Àŋa ɔma-Ìyúɖà ŋa ní ó wà ní ká dzíkɔ̀-Ɔ̀ɖáyé fú náàtsɛ̃̀tsɛ̃̀#ɛ́. Ó ɖi, kíbí à kɔ̀ ní àŋa kàkó gbàá gbɔ́, tsí wà ń nyà ɖíre ní àyɛ̀-àrìtã́ kò kpã́dzú fú àŋa#á, àŋa nákó ǹɖe ńɖi-ŋa, tsí nyí lɔ ńɖi-ɛnɛ yèé kò dzɛ́ ɔma-Ìyúɖà ŋa#á. 47 Ó ɖi, Ɔlɔ́dzɔ́ wíìnyɛ̀ fú àŋa, tsí fɔ̀ fú àŋa ní àŋa kó tsitsɛ́-kã̀ fú òŋu. Ó ní:

“Ǹ kpèɛ́, tsí o wà kíbí kãnɖé bɛ́,

tsí o nya mímá‐ɛ̀ ɖíre fú ìlú ŋa kpó,

tsí ɔ̀nyà ŋa kpó náàdzàkáyé#ɛ́ ká rí ɔlà.”^*

48 Ńbɛ̀ɛ́, kíbí ɛnɛ yèé kò dzɛ́ ɔma-Ìyúɖà ŋa#á gbɔ́ afɔ̀#ɛ́, ó tɛ́ ŋa náyè tó bɛ́ɛ̀, tsí à wà nyɛ Ɔlɔ́dzɔ́ fú afɔ̀ yèé à gbɔ́#ɛ́. Tsí ɛnɛ yèé ŋa Ɔlɔ́dzɔ́ ti mɔ́wɔ́ tɛ̀ si ní à kó rí àyɛ̀-àrìtã́#á, àŋa kpó, à gba afɔ̀#ɛ́ gbɔ́.

49 Ńbɛ̀ɛ́, èsì-afɔ̀-Ɔ̀ɖáyé òŋu wà bà nérè#ɛ́ kpó làkóò gé ni. 50 Ó ɖi, ńǹlú#ɛ́ bɛ̀#ɛ́, ɔnɔbɛ̃̀ɛ̃ kã̀ŋa wà bɛ̀, tsí dzɛ́ ɔnɔbɛ̃̀ɛ̃-gbadzúmà ŋa, tsí àŋa gbo, à wà sɛ̃ Ɔ̀ɖáyé. Tsí ɔma-Ìyúɖà ŋa ǹɖe, tsí gbɛ̃́ ɔnɔbɛ̃̀ɛ̃ nyɛ̀ŋɛ̀ ŋa, má nára-onùgbó-ìlú#ɛ́ ŋa gbo tɛ̀ náànyì. Tsí à gírí, tsí tsoró bá Kpɔ́lù òŋu Bànàbá, tsí lé ŋa ǹɖe ńǹtá-ilɛ̀-ŋa. 51 Ńbɛ̀ɛ́, Kpɔ́lù òŋu Bànàbá méèdzì gbákpá gbɛ́sɛ̀ ní: Kpáwoo, àŋa kò si náfɔ̀-ŋa ró. Tsí à ǹɖe ńǹlú#ɛ́ bɛ̀, tsí wáa lɔ ńǹlú-Ìkɔ́nì. 52 Ó ɖi, náÀntìyɔ́tsì#ɛ́ bɛ̀#ɛ́, atɛ̀náànyì-Yèésù ŋa#á wà náyè títɛ́ si, tsí Mímí-Ɔ̀ɖáyé† gbo wà ńǹtá-ŋa si gé ni.