Itsɛ́ 12

Ólú Èróɖì kpa Yàkúbù nóòkú, tsí mú Òkúta, tsí ń si nɛ́ɛ̀ŋà

Ńǹwèrè nyɛ̀ŋɛ̀#ɛ́, ólú Èróɖì† mú ɔma-ɛgbɛ́-Kírísítò kã̀ŋa, tsí wà tsoró bá ŋa. 2 Ó fɔ̀, tsí à mú tàsú, tsí ń ɖéwo-Yàkúbù ìfó-Yòhánà†. 3 Tsí kíbí ó rí ní ó dzɔdzú-ɔma-Ìyúɖà† ŋa bɛ́ɛ̀#ɛ́, ó fɔ̀, tsí à mú Òkúta gbo ró. Náàsòkò-ɔɖɔ̃́-Àɖádzɔ̀ɔ́†, ńǹwèrè yèé à náa dzɛ kpɔ̃́nɔ́-àrìkɛ́#ɛ́ ní ó múu#ɛ́. 4 Tsí à mú Òkúta si nɛ́ɛ̀ŋà. Tsí sɔ́dzà ɛgbɛ́ mɛ́ɛrɛ̃ wà ɖèé. Sɔ́dzà mɛ́ɛrɛ̃ mɛ́ɛrɛ̃ ní wà nɛ́gbɛ́ kã̀kã̀#á. Èróɖì wà wò ní bí à dzɛ ɔɖɔ̃́-Àɖádzɔ̀ɔ́#ɛ́ tã́ ná, ni òŋu kó fàá si náàwùdzɔ, tsí ká kpɛdzɔ́ fúu. 5 Kíbí, Òkúta wà nɛ́ɛ̀ŋà#á si#ɛ́, ɔma-ɛgbɛ́-Kírísítò ŋa, àŋa òŋu, à wà wúùre fú Ɔ̀ɖáyé fúu kũkũkũ.

6 Ńbɛ̀ɛ́, kíbí ó bɔ ilɛ̀ kó má, tsí ólú kó fàá si náàwùdzɔ#ɛ́, nóoru‐ɛ̀#ɛ́, Òkúta sɔ̃rũ lɔ náàŋírĩ-sɔ́dzà méèdzì si. À mú wɔ̀rɔ̀ méèdzì soó si, tsí sɔ́dzà kã̀ŋa gbo wà ɖe arũ-ɔ̀nà#á. 7 Gbòkã́ gé#ɛ́, adzítsɛ́-ɔ̀rɔ̃†-kã̀ bɔ́, tsí inɔlé#ɛ́ má kpó. Tsí adzítsɛ́-ɔ̀rɔ̃#ɛ́ mɔ́wɔ́ kpa èkìyà-Òkúta, tsí dzíi, tsí wí fúu ní: Kóyá, kó ǹɖe!

Ńǹɖì-bɛ̀ gbòkã́#á, wɔ̀rɔ̀ yèé à ń soó si ŋa#á dzá nɔ́wɔ́‐ɛ̀ sɔ ńlɛ̀. 8 Tsí adzítsɛ́-ɔ̀rɔ̃#ɛ́ wí fúu ní: Kó kɛ́ ɖíɖì‐ɛ̀ ɖì, tsí kó mú kpákò‐ɛ̀ gbo bɔ̀.

Tsí ó tse iŋɛ́ ŋa#á bɛ́ɛ̀. Tsí adzítsɛ́-ɔ̀rɔ̃#ɛ́ wí fúu ró ní: Kó kɛ́ àwù-otútù‐ɛ̀ wɔ̀ si ńǹtá‐ɛ̀, tsí kó wá ká lɔ.

9 Tsí ó tɛ̀ náànyì‐ɛ̀, tsí fùɖá nɛ́ɛ̀ŋà#á. Ńǹwèrè nyɛ̀ŋɛ̀#ɛ́, kò tì mà ní iŋɛ́ yèé adzítsɛ́-ɔ̀rɔ̃#ɛ́ wà tse fú òŋu#ɛ́ ni òtítɔ́ ni. Ó ɖédzú òŋu wà láàlá ni. 10 À fùɖá làkóò, tsí kɔ ìɖì-aɖe-ɔ̀nà àtsɛ̃̀tsɛ̃̀ ŋa dzɔ̀ɔ́, tsí kɔ ìɖì-èkéèdzì gbo dzɔ̀ɔ́, tsí káà tó nárũ-èkũ̀-irɛ̃ lákṹ#ɛ́. Èkũ̀#ɛ́ ní à náa tsí, tsí bɔ́ si náàŋírĩ-ìlú#ɛ́. Kíbí à tó bɛ̀#ɛ́, èkũ̀-irɛ̃#ɛ́ òŋu ká‐ɛ̀ sì tsí gé, tsí à fùɖá. À fùɖá, tsí rɛ̃̀ sɔ́ si nɔ́ɔ̀nà-kã̀ bɛ́, tsí adzítsɛ́-ɔ̀rɔ̃#ɛ́ nɔ̀ ɖí Òkúta gbòkã́. 11 Ńbɛ̀ɛ́, odzú-Òkúta má wá ńǹkɛ̀ɛ́. Tsí ó ní: Báàyí#ɛ́, òŋu rí mà ní Ɔlɔ́dzɔ́ bɛ adzítsɛ́‐ɛ̀ wá fú òŋu ìɖéǹɖè. Ó ɖi, ó bɛ̀ɛ́ wá, tsí ó wáa gba òŋu nɔ́wɔ́-Èróɖì, tsí gba òŋu nárũ-íbàɖí yèé ɔma-Ìyúɖà ŋa wà wo ká tse bá òŋu#ɛ́.

12 Kíbí ó gbɔ́ òkpì-iŋɛ́ ŋa#á tã́#á, ó nyí, tsí dzì nɔ́ɔ̀nà-ilé-Màríyà†, ìnà-Yòhánà† yèé à náa kpè ní Mákò#ɛ́. Ńlé#ɛ́, ɔ̀nyà kpíkpɔ̀ kpérí si bɛ̀, tsí wà ńǹre wúwú si. 13 Tsí ó káà tó nárũ-ɔgbà-ilé#ɛ́, tsí wà kpa èkũ̀‐ɛ̀. Tsí èkíɖã-kã̀ wá. Àtsìtsɛ́-kpàtá#á ni, tsí à náa kpèé ní Ròɖé. Ó wá, tsí kó wáa ma ɛnɛ yèé wà kpa èkũ̀#ɛ́. 14 Tsí èkíɖã#á ma oŋù-Òkúta. Kíbí ó gbɔ́ oŋù‐ɛ̀ bɛ́ɛ̀#ɛ́, ayè tɛ́ɛ títí kò tì nyáa tsí èkũ̀#ɛ́ ró. Ó tédzú yáré sɛ̃̀ lɔ ńnɔlé, tsí káà fɔ̀ ní: Òkúta ní wà náànyì-èkũ̀#ɛ́ si#ɛ́.

15 Tsí à wà wí fúu ní: Éwo kò wà fɛ́ɛ!

Tsí ó ní: Òò, òtítɔ́ ní òŋu wà fɔ̀#ɛ́.

Tsí à ní: Bí ó dzɛ́ bɛ́ɛ̀ ná ni ɔlɔ́rɔ̃‐ɛ̀ ni.^*

16 Ńǹwèrè nyɛ̀ŋɛ̀#ɛ́, Òkúta wà néèkũ̀#ɛ́ kpíkpa si. Ńbɛ̀ɛ́, à wáa mú èkũ̀#ɛ́, tsí ń tsí. Kíbí à rí Òkúta#á, ó nódzo fú ŋa. 17 Tsí Òkúta tsɔwɔ́ fú ŋa ní ká tsikó. Tsí ó fɔ kíbí Ɔlɔ́dzɔ́ nyàá fùɖá nɛ́ɛ̀ŋà gbà#á fú ŋa kpó. Tsí ó ní: Ká lɔ káà fɔ̀ɔ́ fú Yàkúbù òŋu ìnàbí-àŋa yèé bɔ̀ ŋa#á.

Tsí ó fùɖá, tsí lɔ káà gbé ńbòmírɛ̃̀.

18 Kíbí ilɛ̀ wáa má#á, ó ɖi ɛ̀ɖɔ̃̀ ɖíɖá fú sɔ́dzà aɖe-ɛ̀ŋà ŋa#á. Tsí à ní: Ètsúwɛ́ɛ́ɛ̀! Ńbisí Òkúta gbà nɔ́wɔ́-àŋa báàyí?

19 Ńbɛ̀ɛ́, Èróɖì ní ká wòó wérí, tsí à wòó títí à kò ríi. Tsí kíbí à kò ríi#ɛ́, ó kpe aɖe-ɛ̀ŋà ŋa#á, tsí bèrè ŋá ńnɛ̀. Tsí ó ní ká kpa ŋá nóòkú.

Náànyì-bɛ́ɛ̀#ɛ́, Èróɖì ǹɖe nérè-Yùɖéyà, tsí lɔ káà gbé ńǹlú-Kèsàré.

Ólú Èróɖì kú

20 Báàyí#ɛ́, Èróɖì† nɛ́ àfàdzà bá ɛnɛ-Tíre òŋu ɛnɛ-Sìɖɔ̃́nì ŋa. Tsí ɛnɛ-ìlú ŋa#á mú arũ ɖé, tsí tsã ɔ̀nyà kã̀ŋa ní ká lɔ káà rí odzú‐ɛ̀ fú afɔ̀#ɛ́. Tsí à káà rí aríìtá-kpàtá‐ɛ̀. À náa kpèé ní Bàlàsítì. Kíbí Bàlàsítì ɖáàmí le ŋá ńǹkɛ̀ɛ́#ɛ́, à lɔ ńɖi-ólú#ɛ́ ní àŋa kó tse ɔ̀kã̀ntso báa. Iŋɛ́ yèé tse#ɛ́, ńlɛ̀-Èróɖì#ɛ́ ní à náa wáa ra dzídzɛ#ɛ́. 21 Tsí ɔdzɔ́ yèé à ɖá si ní ká kpàɖé#ɛ́, ɔdzɔ́#ɛ́ tó. Tsí Èróɖì mú àwù-ólú‐ɛ̀ ŋa wɔ̀, tsí káà dzokó náàntã̀-oyè‐ɛ̀ si. Tsí ó tsí arũ, tsí wíìnyɛ̀ kpíkpɔ̀ fú ɛnɛ ŋa#á nódzú-ɔ̀nyà ŋa. 22 Kíbí ɔ̀nyà ŋa ríi, tsí gbɔ́ kíbí ó wà wíìnyɛ̀ gbo gbà#á, à wà ɖúgbe, tsí wà fɔ̀ ní: Kò tsi ɔ̀nyà ní wà wíìnyɛ̀#ɛ́ nɛ́! Ó wà kíbí Ɔ̀ɖáyé òŋu ká‐ɛ̀ ni!

23 Tsí ńǹɖì-bɛ̀ gbòkã́#á, adzítsɛ́-ɔ̀rɔ̃†-kã̀ sɔ Èróɖì ɖi àkɔ̃̀rɔ̃̀. Iŋɛ́ yèé tse#ɛ́, kò bu ìɖì si fú Ɔ̀ɖáyé. Tsí ekpìkpã̀ kã̀ŋa dzɛɛ́ kpa nóòkú.

24 Ńbɛ̀ɛ́, èsì-afɔ̀-Ɔ̀ɖáyé òŋu wà bà máa làkóò ró gé ni, tsí atɛ̀náànyì-Yèésù ŋa wà ɖi kpíkpɔ̀ máa ró. 25 Ńbɛ̀ɛ́, Sɔ́lù òŋu Bànàbá, àŋa òŋu, à tsitsɛ́-ŋa tã́ ńYèrúsàlɛ́mì, itsɛ́ yèé à bɛ̀ ŋá wá ní ká wáa tse#ɛ́, tsí sɛ̃̀ bɔ̀ lɔ. Kíbí à làkóò#ɛ́, à gbɛ̃́ Yòhánà† yèé à náa kpè ní Mákò#ɛ́ tɛ̀ náànyì.