Itsɛ́ 11

Òkúta wà kpɛ̀rɔ́-kíbí iŋɛ́ ŋa#á lɔ gbà ńKèsàré#ɛ́ fú ɔma-ɛgbɛ́-Kírísítò-Yèrúsàlɛ́mì ŋa

Ńbɛ̀ɛ́, adzítsɛ́-Yèésù† ŋa òŋu ìnàbí kã̀ŋa yèé wà nérè-Yùɖéyà#á, à gbɔ́ ní ɛnɛ yèé ŋa kò dzɛ́ ɔma-Ìyúɖà ŋa gbo#ɛ́ gba afɔ̀-Ɔ̀ɖáyé gbɔ́. 2 Kíbí Òkúta sɛ̃̀ bɔ̀ wáa lɔ ńYèrúsàlɛ́mì#ɛ́, atɛ̀náànyì-Yèésù ŋa yèé ŋa dzɛ́ ɔma-Ìyúɖà† ŋa#á báa fɔ̀, tsí tse àrã́dzìnyà báa, 3 tsí wà fɔ̀ fúu ní: Kí tse tsí ó káà wɔlé-kòɖákó ŋa, títí dzɛŋɛ́ bá ŋa?

4 Ńbɛ̀ɛ́, Òkúta kpé kíbí iŋɛ́ ŋa#á lɔ gbà#á fífɔ̀ fú ŋa nɛ́kpa nɛ́kpa kpó. 5 Ó ní: Òŋu ní wà ńǹlú-Yáfà si yí, tsí ó ɖi nɔ́dzɔ́-kã̀, tsí òŋu wà wúùre. Tsí iŋɛ́-kã̀ tse fú òŋu kíbí à náa rí odzú bɛ́#ɛ́. Tsí òŋu rí iŋɛ́-kã̀, tsí ó ti nɔ́ɔ̀rɔ̃ bàa ńɖɔ̀-òŋu. Iŋɛ́#ɛ́ tsédzú kíbí atsɔ bɛ́, tsí à dzi égo‐ɛ̀ mɛ́ɛrɛ̃ mɛ́ɛrɛ̃ ŋa#á banɛ́ si kpó. 6 Tsí òŋu wo òtítɔ́-inɔ́-atsɔ#ɛ́, tsí òŋu rí ɛrã ŋa ńǹrɔ́ǹrɔ́. Ɛrã-olí-ɛsɛ̀ mɛ́ɛrɛ̃ ŋa gbo, ɛrã-ìgbɛ́ ŋa gbo, ɛrã-afàńlɛ̀ ŋa gbo, òŋu ɛyɛ ŋa gbo, òŋu rí ŋa ńnɛ̀. 7 Tsí òŋu gbɔ́ oŋù-kã̀, tsí ó wà fɔ̀ fú òŋu ní: Òkúta! Ǹɖe, tsí o kpa ńnɔ́-ɛrã ŋa#á, tsí o dzɛ. 8 Tsí òŋu dzɔ́ŋù fúu ní: Láyé! Ɔ̀gá! Ó ɖi, iŋɛ́-ɛ̀wɔ̀-kã̀ nàmí iŋɛ́ kò má-kã̀ kò wɔ̀ nárũ-òŋu wòrí nɛ́. 9 Tsí òŋu tɔ́ gbɔ́ oŋù#ɛ́ ti nɔ́ɔ̀rɔ̃ nóláànkéèdzì‐ɛ̀ ró ní: Òŋu kó máa rí iŋɛ́ yèé Ɔ̀ɖáyé sɔ ɖi mímá#á ní kò má.

10 Iŋɛ́#ɛ́ tse fú òŋu bɛ́ɛ̀ gbà mɛ́ɛta. Tsí iŋɛ́ ŋa#á kpó sɛ̃̀ lɔ nɔ́ɔ̀rɔ̃. 11 Náàsòkò nyɛ̀ŋɛ̀ gbo ké ní ɔ̀nyà mɛ́ɛta kã̀ŋa wáa tó nárũ-ilé ńbí àŋa wà#á. ŃKèsàré ní à bɛ̀ ŋá ti wá fú òŋu#ɛ́. 12 Tsí Mímí-Ɔ̀ɖáyé† wí fú òŋu ní òŋu kó lɔ bá ɛnɛ nyɛ̀ŋɛ̀ ŋa náàrì dzìnyà. Ó ɖi, ìnàbí-àŋa mɛ́ɛfà yèé òŋu gbɛ̃́ wá bí ŋa#á gbo tɛ̀ náànyì-òŋu lɔ ńKèsàré#ɛ́, tsí àŋa kpó, àŋa dzɔ́ wɔlé-idza#á lɔ. 13 Tsí idza#á kpɛ̀rɔ́-iŋɛ́ ŋa#á lɔ fú àŋa kpó ní bɛ́ɛ̀ ní òŋu rí adzítsɛ́-ɔ̀rɔ̃†-kã̀ ńnɔlé-òŋu, tsí ó fɔ̀ fú òŋu ní: Òŋu kó rã́ ɔ̀nyà-kã̀ lɔ ńYáfà, tsí kó káà gbɛ̃́ Sìmɔ́nì yèé à náa ɖákì ní Òkúta#á wá fú òŋu#ɛ́. 14 Bí ɛnɛ nyɛ̀ŋɛ̀ wá ná, nákó fɔ afɔ̀ kã̀ŋa fú òŋu. Ó ɖi, afɔ̀ ŋa#á ní nákó tse tsí òŋu gbo, ɔ̀nyà-kpàtá-òŋu ŋa gbo, àŋa nákó rí ɔlà#á.

15 Ńbɛ̀ɛ́, kíbí ó kpɛ̀rɔ́ nyɛ̀ŋɛ̀ ŋa tã́#á, òŋu kpé afɔ̀ fífɔ̀ làkóò gé, tsí Mímí-Ɔ̀ɖáyé tì wɔ̀ ńǹtá-ŋa gbòkã́. Ó tì wɔ̀ ńǹtá-ŋa kíbí ó wɔ̀ ńǹtá-àŋa gbo náàtsɛ̃̀tsɛ̃̀ ké#ɛ́ ni. 16 Ńbɛ̀ ní òŋu tédzú-afɔ̀ yèé Ɔlá-àŋa Yèésù fɔ̀ ní: Yòhánà† wɛ̀† fú ɔ̀nyà ŋa òŋu omi. Ó ɖi, àŋa òŋu, Mímí-Ɔ̀ɖáyé nákó tì wɔ̀ ńǹtá-àŋa, tsí nákó gbé bá àŋa#á. 17 Ó ɖi, ńǹrɔ́-kíbí Ɔ̀ɖáyé tse fú àŋa náàtsɛ̃̀tsɛ̃̀ yèé àŋa gba Yèésù Kírísítò Ɔlá-àŋa gbɔ́#ɛ́, bɛ́ɛ̀ ké ní ó tse fú ɛnɛ nyɛ̀ŋɛ̀ ŋa gbo#ɛ́. Hàá! Kí òŋu dzɛ́, tsí òŋu kó ɖí ɔ̀nà fú Ɔ̀ɖáyé?

18 Kíbí à gbɔ́ afɔ̀ nyɛ̀ŋɛ̀ ŋa#á, à kɔ àrã́dzìnyà dzɔ̀ɔ́, tsí wà nyɛ Ɔ̀ɖáyé ní: Ìɖéǹɖè ni! Ó ɖi, Ɔ̀ɖáyé fú ɛnɛ yèé kò dzɛ́ ɔma-Ìyúɖà ŋa#á gbo nɔ́ɔ̀nà ní ká nyíìlò kpaɖà, tsí ká rí àyɛ̀-àrìtã́ ìɖéǹɖè.

Ɛnɛ-Àntìyɔ́tsì ŋa gbɔ́ ikɔ̀-Yèésù, tsí à nyíìlò kpaɖà

19 Kíbí à kpa Sètèfánì nóòkú wáa lɔ tã́#á, tsí tsoró bá atɛ̀náànyì-Yèésù ŋa gbo#ɛ́, ó tse tsí atɛ̀náànyì-Yèésù ŋa kpàkpa túùnkã́ lɔ wérí wérí. Ɔ̀nyà kã̀ŋa lɔ títí nérè-Fènísì. Ɔ̀nyà kã̀ŋa gbo lɔ ńlɛ̀-Sìkpírò, tsí ɔ̀nyà kã̀ŋa gbo lɔ ńǹlú-Àntìyɔ́tsì, tsí wà dzíkɔ̀-Ɔ̀ɖáyé làkóò. Ɔma-Ìyúɖà† ŋa sɔ̃́ŋú gé ní à náa wà dzíkɔ̀#ɛ́ fú#ɛ́. 20 Ńbɛ̀ɛ́, atɛ̀náànyì-Yèésù kã̀ŋa wà náàŋírĩ-ŋa, tsí dzɛ́ ɛnɛ-Sìkpírò òŋu ɛnɛ-ìlú-Sìrɛ́nì ŋa. Tsí à ǹɖe, tsí lɔ náÀntìyɔ́tsì. Àŋa òŋu, à nyí, tsí lɔ ńɖi-ɛnɛ yèé ŋa kò dzɛ́ ɔma-Ìyúɖà ŋa#á, tsí wà dzíkɔ̀ ɖíɖɔ̃̀-Yèésù Ɔlá-wa fú ŋa. 21 Ɔlɔ́dzɔ́ mɔ́wɔ́ gbè fú ŋa, tsí ɔ̀nyà kpíkpɔ̀ nyíìlò kpaɖà, tsí gba Yèésù gbɔ́.

22 Afɔ̀ yèé à wà fɔ̀ yí#ɛ́, èsì‐ɛ̀ ti bá, tsí ɔma-ɛgbɛ́-Kírísítò-Yèrúsàlɛ́mì ŋa gbo gbɔ́, tsí à rã́ Bànàbá wáa lɔ fú ɛnɛ-Àntìyɔ́tsì ŋa#á. 23 Kíbí ó káà tó bɛ̀, tsí rí ní Ɔ̀ɖáyé tu kùsɛ̀ɛ̀ fú ŋa#á, ó ɖɔ̃̀ fúu tó bɛ́ɛ̀. Tsí ó ɖáàmí le àŋa kpó ní ká mú ara-ŋa kpó bɔwɔ́-Ɔlá-wa, tsí ká máa sɛ̃̀ náànyì‐ɛ̀ ró. 24 Bànàbá#á náa tsɔ̀nyà tó bɛ́ɛ̀, tsí Mímí-Ɔ̀ɖáyé† gbo wà ńǹtá‐ɛ̀, tsí ó nɛ́ àkaralé gbo. Ńbɛ̀ɛ́, ɔ̀nyà kpíkpɔ̀ wáa gba Ɔlá-wa gbɔ́.

25 Náànyì-bɛ́ɛ̀#ɛ́, Bànàbá ǹɖe, tsí lɔ ńǹlú-Tàrísì, tsí kó káà wo Sɔ́lù. 26 Kíbí ó ríi#ɛ́, òŋu‐ɛ̀ méèdzì dzɔ́ wáa lɔ náÀntìyɔ́tsì. À gbé ńǹlú#ɛ́ bɛ̀, tsí dzɔ́ tsitsɛ́ nɛ́gbɛ́-Kírísítò#ɛ́ fú ɔɖɔ̃́-kã̀. À tsɛ̀kɔ́ fú ɔ̀nyà kpíkpɔ̀. Ńǹlú-Àntìyɔ́tsì#ɛ́ ní à tsɛ̃̀tsɛ̃̀ kpe atɛ̀náànyì-Yèésù ŋa ní olí-Kírísítò ŋa#á.

27 Ńǹwèrè nyɛ̀ŋɛ̀#ɛ́, agbáfɔ̀-Ɔ̀ɖáyé fɔ̀† kã̀ŋa ǹɖe ńYèrúsàlɛ́mì, tsí lɔ náÀntìyɔ́tsì. 28 Ɔ̀nyà-kã̀ wà náàŋírĩ-ŋa, à náa kpèé ní Àgábù. Tsí Mímí-Ɔ̀ɖáyé wíìnyɛ̀ fúu, tsí ó gbàá fɔ̀ ní ebi lákṹ-kã̀ nákó wáa dzà náyé gbaŋgba#á kpó. Ìɖéǹɖè#ɛ́, ebi#ɛ́ wáa dzà bɛ́ɛ̀ náàsòkò yèé Kòlòɖíyù dzɛ́ ɔ̀gã́-ìdzɔba ńlɛ̀-Rómà† si#ɛ́. 29 Ńbɛ̀ɛ́, atɛ̀náànyì-Yèésù ŋa tse ètò ní ɛnɛ-kṹnukṹ kó fú iŋɛ́-kã̀ wá, ìmarũ yèé nákó nyáa rí#ɛ́, tsí ká ń mɔ́wɔ́ gbè fú ɔma-ɛgbɛ́-Kírísítò yèé ŋa wà nérè-Yùɖéyà#á. 30 Tsí à kpaɖí iŋɛ́ ŋa#á bɛ́ɛ̀, tsí kɛ́ɛ fú Bànàbá òŋu Sɔ́lù méèdzì, tsí à gbàá lɔ fú onùgbó-ɛgbɛ́-Kírísítò-ìlú#ɛ́ ŋa.