Itsɛ́ 10

Adzítsɛ́-ɔ̀rɔ̃-kã̀ wá ńɖi-Kɔ̀nɛ́lì

Ńbɛ̀ɛ́, ɔ̀nyà-kã̀ wà ńǹlú-Kèsàré. À náa kpèé ní Kɔ̀nɛ́lì. Ɔ̀gá-kã̀ ní ó dzɛ́ fú ɛgbɛ́-sɔ́dzà kã̀ŋa#á. Ɛgbɛ́#ɛ́ wà náàŋírĩ-ɛgbɛ́-lákṹ-kã̀ yèé à náa kpè ní ɛgbɛ́-Ìtálì#ɛ́. 2 Ɛnɛ#ɛ́ náa nɛ́ àrísá fú Ɔ̀ɖáyé, tsí náa sɛ̃̀ɛ̃́ gbo òŋu ɔ̀nyà-kpàtá‐ɛ̀ ŋa kpó. Náa tse ore fú adzìyàkú-ɔma-Ìyúɖà† ŋa tó bɛ́ɛ̀, tsí náa wà wúùre fú Ɔ̀ɖáyé gbo nɔ́dzɔ́ kɔ́dzɔ́.

3 Ó ɖi nɔ́dzɔ́-kã̀, ńǹwèrè-odzúùrɔ̃̀-alɛ́ bɛ́, tsí Ɔ̀ɖáyé nya adzítsɛ́-ɔ̀rɔ̃†-kã̀ ɖíre fú Kɔ̀nɛ́lì, tsí ó ríi rere. Adzítsɛ́-ɔ̀rɔ̃#ɛ́ wɔ̀ ńǹtá‐ɛ̀, tsí kpèé ní: Kɔ̀nɛ́lì!

4 Gbòkã́#á, dzidzi múu, tsí ó tadzú máa si kũkũ, tsí wà bèrèé ní: Ɔ̀gá, kí tse?

Tsí adzítsɛ́-ɔ̀rɔ̃#ɛ́ wà wí fúu ní: Ìre wúwú‐ɛ̀ ŋa òŋu ore tsítse‐ɛ̀ ŋa tó ńɖi-Ɔ̀ɖáyé. Ɔ̀ɖáyé kò gbàgbé iŋɛ́ yèé ó wà tse ŋa#á. 5 Ó ɖi báàyí#ɛ́, kó bɛkɔ̀ lɔ ńYáfà, tsí ká káà kpe ɔ̀nyà-kã̀ bɛ̀ wá fúu. À náa kpe ɛnɛ nyɛ̀ŋɛ̀ ní Sìmɔ́nì. Òŋu ní à náa ɖákì ní Òkúta#á. 6 Ó wà ńlé-ìnyíkã̀‐ɛ̀ Sìmɔ́nì akĩ́rĩ-awɔ. Ilé‐ɛ̀ wà nétí-àhũ.

7 Kíbí adzítsɛ́-ɔ̀rɔ̃#ɛ́ lɔ tã́#á, Kɔ̀nɛ́lì kpe àtsìtsɛ́-ilé‐ɛ̀ méèdzì, tsí kpe sɔ́dzà-kã̀ gbo yèé wà ńɖɔ̀‐ɛ̀#ɛ́. Sɔ́dzà#á náa nɛ́ àrísá fú Ɔ̀ɖáyé. 8 Tsí ó fɔ bí iŋɛ́ ŋa#á lɔ gbà#á fú ŋa kpó, tsí bɛ̀ ŋá lɔ ńYáfà.

Mímí-Ɔ̀ɖáyé wáa dzíkɔ̀ fú Òkúta

9 Ńbɛ̀ɛ́, ó ɖi ńlɛ̀ má‐ɛ̀, tsí à wà nɔ́ɔ̀nà-Yáfà làkóò, tsí tó sɔ́má-ìlú#ɛ́. Tsí Òkúta gu ìtalé lɔ ńbí à náa kpa afɛ́fɛ́#ɛ́, tsí kó káà wúùre. Ńǹwèrè nyɛ̀ŋɛ̀#ɛ́, òsã́ ti kpã́. 10 Ńbɛ̀ɛ́, ebi kpée kpíkpa, tsí ó wà wo kó dzɛŋɛ́. Náàsòkò yèé à wà se dzídzɛ fúu#ɛ́, iŋɛ́-kã̀ tse fúu kíbí ó wà rí odzú bɛ́. 11 Tsí ó rí, tsí ɔ̀rɔ̃ tsí si. Tsí iŋɛ́-kã̀ ti nɔ́ɔ̀rɔ̃ bàa ńlɛ̀. Iŋɛ́#ɛ́ tsédzú kíbí atsɔ bɛ́, tsí à dzi égo‐ɛ̀ mɛ́ɛrɛ̃ mɛ́ɛrɛ̃ ŋa#á banɛ́ si kpó. 12 Tsí ɛrã ŋa ńǹrɔ́ǹrɔ́ wà ńnɔ́-atsɔ#ɛ́. Ɛrã-olɛ́sɛ̀ mɛ́ɛrɛ̃ ŋa, ɛrã-afàńlɛ̀ ŋa òŋu ɛyɛ-kóko ŋa wà ńnɛ̀. 13 Tsí ó gbɔ́ oŋù-kã̀, tsí ó wá wí fúu ní: Òkúta! Ǹɖe, tsí o kpa ńnɔ́-ɛrã ŋa#á, tsí o dzɛ.

14 Tsí Òkúta dzɔ́ŋù fúu ní: Láyé, Ɔ̀gá! Ó ɖi, òŋu kò dzɛ iŋɛ́-ɛ̀wɔ̀-kã̀ nàmí iŋɛ́ kò má-kã̀ wòrí nɛ́.

15 Tsí ó tɔ́ gbɔ́ oŋù#ɛ́ nóláànkéèdzì‐ɛ̀ ró, tsí ó wà wí fúu ní: Kó máa rí iŋɛ́ yèé Ɔ̀ɖáyé sɔ ɖi mímá#á ní kò má.

16 Iŋɛ́#ɛ́ tse fúu bɛ́ɛ̀ gbà mɛ́ɛta. Tsí atsɔ#ɛ́ sɛ̃̀ lɔ nɔ́ɔ̀rɔ̃ gbòkã́.

17 Ńbɛ̀ɛ́, Òkúta wà tsèsérè, tsí wà bere ara‐ɛ̀ ní òkpì-iŋɛ́ yèé òŋu rí#ɛ́ fáà báàyí? Ńǹwèrè nyɛ̀ŋɛ̀#ɛ́, ɛnɛ yèé Kɔ̀nɛ́lì rã́ wá ŋa#á ti bèrènyɛ̀-ilé-Sìmɔ́nì, tsí à ma ńbí ó wà#á. Tsí à wáa tó, tsí ɖóro si nárũ-ɔgbà-ilé#ɛ́. 18 Tsí à wà bèrènyɛ̀ lɔ nɔ́gbà#á ní: Kò tsi ńbí ní Sìmɔ́nì yèé à náa ɖákì ní Òkúta#á wà#áà?

19 Kíbí Òkúta wà ńǹsérè tsítse si ńǹtá-iŋɛ́ yèé ó rí#ɛ́, Mímí-Ɔ̀ɖáyé† wà wí fúu ní: Ɔ̀nyà-mɛ́ɛta kã̀ŋa wà bèrènyɛ̀‐ɛ̀. 20 Ó ɖi, kó ǹɖe, tsí kó tì wá ńɖi-ŋa gbòkã́. Bí ó wá ná ni kó mú, tsí kó tɛ̀ náànyì-ŋa lɔ náàrìmáa dzìnyà. Iŋɛ́ yèé tse#ɛ́, òŋu ká-òŋu ní nɛ̀ ŋá wá#á.

21 Ńbɛ̀ɛ́, ó tì wá ńɖi-ŋa, tsí wà wí fú ŋa ní: Òŋu ní dzɛ́ ɛnɛ yèé à wà wò#ɛ́. Ó ɖi, kí tse tsí à wá ńɖɔ̀-òŋu?

22 Tsí ɛnɛ ŋa#á dzɔ́ŋù fúu ní: Kɔ̀nɛ́lì, ɛnɛ yèé dzɛ́ ɔ̀gá-kã̀ fú ɛgbɛ́-sɔ́dzà ŋa#á ní bɛ àŋa wá#á. Ó ɖi, ɔ̀nyà-atsòtítɔ́ ní ó dzɛ́#ɛ́, tsí náa nɛ́ àrísá fú Ɔ̀ɖáyé gbo. Ɔma-Ìyúɖà ŋa kpó náa nya àyídzá-ìlò-ire ti nára‐ɛ̀. Báàyí#ɛ́, adzítsɛ́-ɔ̀rɔ̃†-kã̀ wá ńɖɔ̀‐ɛ̀, tsí wí fúu ní kó rã́ ɔ̀nyà wá fú Òkúta, tsí kó wá ńɖɔ̀‐ɛ̀, tsí àŋa kó gbɔ́ afɔ̀-arũ‐ɛ̀.

23 Ńbɛ̀ɛ́, Òkúta gbɛ̃́ ŋa wɔlé, tsí gbà ŋá náàledzò nóoru nyɛ̀ŋɛ̀.

Òkúta lɔ ńɖi-Kɔ̀nɛ́lì, tsí dzíkɔ̀-Yèésù fú òŋu tɛ̀ɛ̀ ŋa

Ńbɛ̀ɛ́, kíbí ilɛ̀ má#á, Òkúta dzì nɔ́ɔ̀nà bá ŋa. Tsí ìnàbí kã̀ŋa gbo nɛ́gbɛ́-Kírísítò-Yáfà gbɛ̃́ ŋa lɔ. 24 Ɔdzɔ́-èkéèdzì‐ɛ̀#ɛ́, à káà tó ńKèsàré. Ńǹwèrè nyɛ̀ŋɛ̀#ɛ́, Kɔ̀nɛ́lì kpe ɔ̀nyà‐ɛ̀ ŋa òŋu ídza‐ɛ̀ gìɖì gìɖì ŋa kpó kpérí si, tsí wà ɖóro wò ŋá. 25 Kíbí Òkúta tó#ɛ́, Kɔ̀nɛ́lì yáré káà kpàɖé‐ɛ̀, tsí kálɛ̀, tsí mú erí kãlɛ̀ fúu. 26 Tsí Òkúta mɔ́wɔ́ bɔ̀ fúu, tsí wà kɛ́ɛ ǹɖe, tsí ní: Kó ǹɖe! Ó ɖi, òŋu gbo, ɔ̀nyà ké ní òŋu dzɛ́#ɛ́.

27 Tsí Òkúta kpé ìnyɛ̀ wíwí báa títí à dzɔ́ káà wɔlé‐ɛ̀. Kíbí ó tó ńnɔlé#ɛ́, ó káà bá ɔ̀nyà kpíkpɔ̀ bɛ̀, tsí à kpérí si. 28 Tsí ó ní: À mà rere ní orò-ɔma-Ìyúɖà† ŋa kò dzɛ́ ní ɔma-Ìyúɖà-kã̀ kó sɔ́má-àledzò-kã̀ nàmí kó wɔlé‐ɛ̀ gìɖì gbo nɔ̀. Ó ɖi, òŋu, Ɔ̀ɖáyé yaá fú òŋu gãgã ní òŋu kó máa rí ɔ̀nyà-kã̀ kpókpó ní kò má nàmí kò dzɔ ní ká gbé báa. 29 Iŋɛ́ yèé tse tsí à kpe òŋu, tsí òŋu kò dzaŋù tã́ná òŋu wá#á ńnɛ̀ɛ́. Ó ɖi báàyí#ɛ́, ká fɔ iŋɛ́ yèé tse tsí à bɛ ikɔ̀ wá fú òŋu#ɛ́, tsí òŋu kó gbɔ́.

30 Tsí Kɔ̀nɛ́lì ní: Ó ɖi ńǹdzɛ́ɛrɛ̃ ní, ńǹwèrè-odzúùrɔ̃̀-alɛ́ bɛ́ ké, tsí òŋu wà ńnɔlé-òŋu si, tsí wà wúùre. Gbòkã́ gé#ɛ́, ɔ̀nyà-kã̀ wáa ɖóro ńwádzú-òŋu. Àwù‐ɛ̀ wà kɔ nyɛ̀nyɛ̀nyɛ̀. 31 Tsí ó kpe òŋu ní: Kɔ̀nɛ́lì! Tsí ó ní: Ɔ̀ɖáyé gbɔ́ ìre wúwú-òŋu, tsí kò gbàgbé ore ɔ̀kã̀lɔ́ɔ̀kã̀ yèé òŋu wà tse fú adzìyàkú ŋa#á. 32 Ó ɖi, òŋu kó bɛ ɔ̀nyà ŋa lɔ ńYáfà, tsí ká káà kpe Sìmɔ́nì yèé à náa ɖákì ní Òkúta#á wá. Ó ɖi, ó wà ńlé-ìnyíkã̀‐ɛ̀ Sìmɔ́nì akĩ́rĩ-awɔ, tsí ilé‐ɛ̀ wà nétí-àhũ. 33 Ńǹɖì-bɛ̀ ní òŋu bɛ ikɔ̀ wá fúu nɛ́sɛ̀ nɛ́sɛ̀#ɛ́. Ó tseé rere, tsí ó wá ìɖéǹɖè. Ó ɖi báàyí#ɛ́, àŋa kpó, àŋa wà nódzú-Ɔ̀ɖáyé, tsí àŋa kó rɛ̃tígbè-afɔ̀ yèé Ɔlɔ́dzɔ́ ní kó wáa fɔ̀ fú àŋa#á.

34 Ńbɛ̀ɛ́, Òkúta tsí arũ, tsí ní: Nóòtítɔ́#ɛ́, òŋu mà ńǹkɛ̀ɛ́ ní Ɔ̀ɖáyé kà ɖá ɔ̀nyà-kã̀ kpókpó dzɔ̀ɔ́. 35 Kà kàa bɛ́ɛ̀, bí ɔ̀nyà-ìlú ɔ̀kã̀lɔ́ɔ̀kã̀ kpó wà nɛ́ àrísá fúu, tsí wà tse òtítɔ́‐ɛ̀ gbo#ɛ́, iŋɛ́‐ɛ̀ náa dzɔdzú‐ɛ̀. 36 Ó ɖi, àŋa ká-ŋa, à mà kpó ní Ɔ̀ɖáyé bɛ ikɔ̀ tòŋu ká‐ɛ̀ wá fú ɔma-Ìsàràyɛ́lì† ŋa nɔ̀. Ó bɛ ikɔ̀ ɖíɖɔ̃̀, ikɔ̀-tútùúrɔ̀ gbà ńǹtá-Yèésù Kírísítò. Òŋu ní dzɛ́ Ɔlá-ɔ̀nyà kpó#ɛ́. 37 Ó ɖi, à mà gbo kpó kíbí iŋɛ́ ŋa#á wáa lɔ gbà ńǹwèrè yèé Yòhánà† dzíkɔ̀-Ɔ̀ɖáyé, tsí wɛ̀† fú ɔ̀nyà ŋa#á nɔ̀. Iŋɛ́ ŋa#á tsɛ̃̀tsɛ̃̀ kpée ti nérè-Gàlìlé, tsí nà wérí nérè-Yùɖéyà gbo kpó. 38 Tsí à mà gbo kíbí Ɔ̀ɖáyé bɛ Mímí‐ɛ̀ òŋu ikpá‐ɛ̀ wáa wɔ̀ ńǹtá-Yèésù ti Nàsàrɛ́tì gbà#á nɔ̀. Tsí kíbí Ɔ̀ɖáyé wà náànyì‐ɛ̀ tó#ɛ́ ní náa wà rɛ̃̀ ńǹlú ŋa wérí, tsí wà tse ore, tsí wà bɔ ɔ̀nyà kpó yèé kí nɔ́wɔ́-Ètsù† si#ɛ́.

39 Ó ɖi, àŋa, àŋa dzɛ́ olí-àyídzá-iŋɛ́ ɔ̀kã̀lɔ́ɔ̀kã̀ yèé ó tse ńYèrúsàlɛ́mì òŋu ńlɛ̀-ɔma-Ìyúɖà ŋa#á. Yèésù#ɛ́, òŋu ní à mú, tsí kã̀ã́ si ńǹtá-egi-ìɖáàgàlàdzà†, tsí ó kú#ɛ́. 40 Kíbí ó kú tã́#á, nɔ́dzɔ́-ɛ̀kɛ́ɛta‐ɛ̀, Ɔ̀ɖáyé sɛ̃̀ dzíi wá náyé. Ó fúu ńkpá ní kó mú ara‐ɛ̀ ŋa ɔ̀nyà ŋa. 41 Kò tsi ìlú kpó ní ríi#ɛ́. Àŋa yèé Ɔ̀ɖáyé ti tsã̀ si ní àŋa kó dzɛ́ olí-àyídzá‐ɛ̀ ŋa#á gé ní ríi#ɛ́. Kíbí ó dzí ǹɖe náàŋírĩ-òkú ŋa tã́#á, àŋa dzɛ, tsí mɔ báa. 42 Tsí náànyì-bɛ́ɛ̀#ɛ́, ó bɛ àŋa ní àŋa kó dzíkɔ̀ fú ɔma-Ìyúɖà ŋa kpó. Tsí àŋa kó nya àyídzá fú ŋa ní òŋu ní dzɛ́ ɛnɛ yèé Ɔ̀ɖáyé tsã̀ si, tsí kó wáa kpɛdzɔ́ fú ɔ̀nyà kpó, ɛnɛ yèé wà náàyɛ̀ si ŋa#á òŋu ɛnɛ yèé ti kú lɔ ŋa gbo kpó#ɛ́. 43 Tsí òŋu ní agbáfɔ̀-Ɔ̀ɖáyé fɔ̀† ŋa kpó ti wíìnyɛ̀ ti nára‐ɛ̀ wáa lɔ#ɛ́. À fɔ̀ ní bí ɔ̀nyà ɔ̀kã̀lɔ́ɔ̀kã̀ kpó nɛ́ àkaralé si ńǹtá‐ɛ̀, Ɔ̀ɖáyé nákó mú íbàɖí‐ɛ̀ ŋa tɔrɛ fúu gbà ńǹtá-ikpá yèé wà nɛ́kɔ-Yèésù#ɛ́.

Mímí-Ɔ̀ɖáyé tì wɔ̀ ńǹtá-Kɔ̀nɛ́lì òŋu tɛ̀ɛ̀ ŋa

44 Kíbí Òkúta wà ńǹnyɛ̀ wíwí làkóò gé#ɛ́, Mímí-Ɔ̀ɖáyé† tì wɔ̀ ńǹtá-àŋa kpó yèé wà rɛ̃tígbè-afɔ̀‐ɛ̀ ŋa#á. 45 Ńbɛ̀ɛ́, olí-Yèésù yèé dzɛ́ ɔma-Ìyúɖà† ŋa, tsí tɛ̀ náànyì-Òkúta wá#á, kíbí à rí ní Mímí-Ɔ̀ɖáyé tì wɔ̀ ńǹtá-ɛnɛ yèé kò dzɛ́ ɔma-Ìyúɖà ŋa yèé gba Yèésù gbɔ́#ɛ́, ó mù ŋa. 46 Ìɖéǹɖè#ɛ́, à wà gbɔ́ kíbí ɛnɛ nyɛ̀ŋɛ̀ ŋa wà wí ìlú-òmírɛ̃̀ kã̀ŋa, tsí wà nyɛ lílákṹ-Ɔ̀ɖáyé#ɛ́. Tsí Òkúta ní: 47 Kíbí Mímí-Ɔ̀ɖáyé tì wɔ̀ ńǹtá-ɛnɛ yèé ŋa gbo bɛ́ kíbí ó tì wɔ̀ ńǹtá-àŋa gbo gbà#á fee, àŋa nákó nyáa kɔ̀ ní ká máa wìwɛ̀-Yèésù† fú ŋaà?

48 Tsí ó fú ɔ̀nà ní ká fɔ̀ ní ó ɖɔkpɛ́-Yèésù Kírísítò, tsí wɛ̀ fú ŋa. Náànyì-bɛ́ɛ̀#ɛ́, à tsìkálɛ̀ fúu ní kó gbe ńɖɔ̀-àŋa fú ɔdzɔ́ mɛ́ɛlóle kã̀ŋa.