Mákò 6

Ɛnɛ-ìlú-Nàsàrɛ́tì ŋa kò gba Yèésù gbɔ́

Ńbɛ̀ɛ́, Yèésù ǹɖe bɛ̀, tsí lɔ ńǹlú‐ɛ̀^*. Tsí ɔmatsɛ́‐ɛ̀ ŋa gbo lɔ báa. 2 Tsí ó ɖi nɔ́dzɔ́-ìmíra†, tsí ó lɔ ńlé-ìkpàɖé-ɔma-Ìyúɖà ŋa†, tsí wà tsɛ̀kɔ́ fú ɔ̀nyà ŋa. Ɔ̀nyà kpíkpɔ̀ wà bɛ̀, tsí wà rɛ̃tígbè‐ɛ̀, tsí ó mù ŋá tó bɛ́ɛ̀, tsí à wà fɔ̀ ní: Ńbisí ó tare nyɛ̀ŋɛ̀ ti? Ifɛ̀ɛ́nɔ́ ìrɔ́ mɛ̀ɛ́ wà fúu tó bɛ́ɛ̀? Tsí bí ó tse fáà, tsí wà tse iŋɛ́-àwùsì ɔ̀tɔ yèé ŋa nyí? 3 Kò tsi agbɛ̃́gi ńnɛ̀ɛ́? Òŋu ní dzɛ́ ɔma-Màríyà†#á, tsí dzɛ́ ìnàbí-Yàkúbù òŋu Yòsé, Yúɖà gbo má nára-Sìmɔ́nì gbo#ɛ́ nɔ̀? Tsí ìnàbí‐ɛ̀ ɔnɔbɛ̃̀ɛ̃ ŋa gbo sì wà náàŋírĩ-àŋa bí si nɔ̀?

Tsí Yèésù ɖi òkúta-àkɔ̀sɛ̀ fú ŋa. 4 Tsí ó wà wí fú ŋa ní: Bí agbáfɔ̀-Ɔ̀ɖáyé fɔ̀†-kã̀ tó ńǹɖì ɔ̀kã̀lɔ́ɔ̀kã̀, náa nɛ́ àrísá. Ó ɖi, ńǹlú‐ɛ̀, ńɖi-tɛ̀ɛ̀ ŋa òŋu ńkpàtá‐ɛ̀ gé ní à kà nɛ́ àrísá fúu#ɛ́.

5 Ńbɛ̀ɛ́, kò nyáa tse iŋɛ́-àwùsì-kã̀ kpókpó ńbɛ̀. Ɔ̀nyà oɖé kã̀ gé ní ó mɔ́wɔ́ lé ńǹtá-ŋa, tsí bɔ ŋá#á. 6 Tsí ó láre arũ fúu ní à kò gbàá gbɔ́.

Yèésù bɛ ɔmatsɛ́‐ɛ̀ máàméèdzì ŋa#á lɔ ńǹlú ŋa wérí

(Màtéwò 10:5-15, Lúkà 9:1-6)

Tsí náànyì-bɛ́ɛ̀#ɛ́, ó ǹɖe, tsí gbà ńǹlú-oko yèé ŋa wà sɔ́má bɛ̀#ɛ́, tsí wà tsɛ̀kɔ́ fú ɔ̀nyà ŋa. 7 Tsí ó kpe ɔmatsɛ́‐ɛ̀ máàméèdzì ŋa#á, tsí kpé ŋa bíbɛ̀ méèdzì méèdzì lɔ wérí. Tsí ó fú ŋa ńkpá ní ká wà ń lé edzò† yèé ŋa wà ɖɔ́kpɔ fú ɔ̀nyà ŋa#á sɛ̃̀ náànyì-ŋa. 8 Tsí ó kɔ̀ fú ŋa ní: Bí à làkóò, ká máa banɛ́ iŋɛ́-kã̀ kpókpó náànyì-ɔ̀kpá. Ká máa banɛ́ dzídzɛ, ká máa banɛ́ àkpò, tsí ká máa banɛ́ owó si náàkpò-owó gbo. 9 Ó ɖi, ká bɔ kpákò, tsí ká kí náàwù ɔ̀kã̀ntso yèé à wɔ̀#ɛ́.

10 Tsí ó wí fú ŋa ró ní: Bí à lɔ, tsí à tó ńǹlú-kã̀, ńkpàtá yèé à nákó tsɛ̃̀tsɛ̃̀ gbé#ɛ́, ká gbé bɛ̀ títí fú ɔdzɔ́-ɖíǹɖe-ŋa. 11 Tsí bí ɛnɛ-ìlú kã̀ŋa kɔ̀, tsí à kò gbà ŋá, tsí ɔ̀nyà-kã̀ gbo kò rɛ̃tígbè-ŋa ná, ni ká ǹɖe ńǹlú#ɛ́, tsí ká gbákpá gbɛ́sɛ̀ náfɔ̀-ŋa, àtsùgbée ɛnɛ-ìlú ŋa#á ká mà ní ó tsɛdzɔ́-àŋa ká-ŋa ńnɛ̀ɛ́.^*

12 Ńbɛ̀ɛ́, ɔmatsɛ́ ŋa#á lɔ, tsí à káà dzíkɔ̀ fú ɔ̀nyà ŋa ní: Ó wà ní ká nyíìlò kpaɖà. 13 Tsí à náa lé edzò yèé ŋa wà ɖɔ́kpɔ fú ɔ̀nyà ŋa#á sɛ̃̀ náànyì-ŋa, tsí à náa dzo àɖɛ̃́ si ńǹtá-àkɔ̃̀rɔ̃̀ ŋa, tsí bɔ ŋá.

Bí Yòhánà Awɛ̀fúnɛ kú gbà fáà?

(Màtéwò 14:1-12, Lúkà 9:7-9)

14 Èróɖì† ní dzɛ́ ólú si nérè-ìyabɛ̀ ńǹwèrè nyɛ̀ŋɛ̀#ɛ́. Tsí òŋu gbo gbɔ́ ìdzã̀mà-Yèésù, kíbí ɛ́kɔ‐ɛ̀ wà fì wérí kpó#ɛ́. Ɔ̀nyà ŋa wà fɔ̀ ní: Yèésù ni Yòhánà† Awɛ̀fúnɛ ni. Ó sɛ̃̀ dzí ti náàŋírĩ-òkú ŋa wá náyé. Ńnɛ̀ ní ó nɛ́kpá, tsí wà ń tse iŋɛ́-àwùsì ŋa#á.

15 Tsí ɔ̀nyà kã̀ŋa gbo wà fɔ̀ ní: Èlíyà†, agbáfɔ̀-Ɔ̀ɖáyé fɔ̀† yèé gbé wáa lɔ dzɔ̀ɔ́ dzɔ̀ɔ́#ɛ́, òŋu ní sɛ̃̀ wá bɛ́ɛ̀ ró#ɛ́. Tsí ɔ̀nyà kùbɔ̀ ŋa gìɖì wà fɔ̀ ró ní: Òò, agbáfɔ̀-Ɔ̀ɖáyé fɔ̀ titɔ̃ òmírɛ̃̀-kã̀ ní wá#á, tsí ó dzɔ agbáfɔ̀-Ɔ̀ɖáyé fɔ̀ ti dzɔ̀ɔ́ dzɔ̀ɔ́ ŋa.

16 Kíbí Èróɖì gbɔ́ afɔ̀ yèé ɔ̀nyà ŋa wà fɔ̀#ɛ́, ó ní: Yòhánà yèé òŋu ti fɔ̀, tsí à ɖéwo‐ɛ̀#ɛ́, òŋu ní sɛ̃̀ dzí ti náàŋírĩ-òkú ŋa wá náyé#ɛ́.

17 Ìɖéǹɖè#ɛ́, Èróɖì ti fɔ̀, tsí à mú Yòhánà, tsí ɖèé, tsí kɛ́ɛ si nɛ́ɛ̀ŋà. Àtsùgbée kíbí Èróɖì gba aya-ìfó tòŋu ká‐ɛ̀, tsí ń nɛ́#ɛ́ ni. Ìfó‐ɛ̀#ɛ́, à náa kpèé ní Fìlíkpò, tsí aya#á dzɛ́ Èròɖíyà. 18 Kíbí ó tse bɛ́ɛ̀#ɛ́, Yòhánà wí fúu ní: Ɔ̀nà kò wà fúu ní kó gba Èròɖíyà nɛ́.

19 Kíbí Yòhánà wí bɛ́ɛ̀#ɛ́, inɔ́‐ɛ̀ bí Èròɖíyà kadzá, tsí ó wà wò ní òŋu má kpa Yòhánà nóòkú. Ó ɖi, kò nyáa rí ɔ̀nà, tsí kò kpaá, 20 iŋɛ́ yèé tse#ɛ́, Èróɖì òŋu wà sá fú Yòhánà. Ó mà ní ó dzɛ́ ɔ̀nyà-atsòtítɔ́, tsí ó mà gbo ní Ɔ̀ɖáyé ní bɛ̀ɛ́ wá#á. Tsí náa wà tsɛ́wé bòó, tsí Èròɖíyà kó máa kpaá. Bí ó wà rɛ̃tígbè-Yòhánà, kà ma bí kó tse fáà, tsí afɔ̀‐ɛ̀ náa sì dzɔdzú‐ɛ̀ si.

21 Tsí nɔ́dzɔ́-kã̀, ɔ̀nà-kã̀ wáa tsí fú Èròɖíyà ní kó kpa Yòhánà. Ɔ̀nà#á ní dzɛ́ ní nɔ́dzɔ́ nyɛ̀ŋɛ̀#ɛ́, ólú wà dzɛ ɔɖɔ̃́-ɔdzɔ́-bíbí‐ɛ̀, tsí ó kpe ɔ̀nyà ŋa ńǹrɔ́ǹrɔ́ ní ká wáa dzɛŋɛ́ ńɖɔ̀-òŋu. Ó kpe ègbènáànyì‐ɛ̀ ŋa òŋu ɔ̀gã́-sɔ́dzà ŋa má nára-onùgbó-ìlú ŋa nérè-Gàlìlé. 22 Kíbí à wà ńnɔlé si, tsí wà dzɛŋɛ́#ɛ́, ɔma-Èròɖíyà ɔnɔbɛ̃̀ɛ̃ wɔ̀ ńnɔlé#ɛ́ lɔ, tsí wà dzó fú ŋa. Ńbɛ̀ɛ́, ó dzɔdzú-Èróɖì òŋu àledzò ŋa#á. Tsí ó wà wí fúu ní: Iŋɛ́ yèé ó wà wò gé#ɛ́, kó bere òŋu, tsí òŋu kó kɛ́ɛ fúu.

23 Ó tàlé fúu títí ta iŋɛ́ si ńǹtá‐ɛ̀ ní: Iŋɛ́ ɔ̀kã̀lɔ́ɔ̀kã̀ yèé nákó bere òŋu gé#ɛ́, òŋu nákó kɛ́ɛ fúu ni. Bí ó dzɛ́ gìɖì ní akpálà-kã̀-ìlú#ɛ́ kpó ní ó wà wò#ɛ́, òŋu nákó kɛ́ɛ fúu.

24 Tsí maɖé#ɛ́ fùɖá lɔ káà rí ìná‐ɛ̀, tsí ó bèrèé ní: Kí òŋu kó bèrè?

Tsí ìná‐ɛ̀ wí fúu ní: Kó fɔ̀ ní ká ɖéwo-Yòhánà Awɛ̀fúnɛ fú òŋu.

25 Tsí ɔma èkíɖã#á ǹɖe nɛ́sɛ̀ nɛ́sɛ̀, tsí yáré lɔ ńɖi-ólú, tsí káà wí fúu ní: Òŋu wà wò ní ká ɖéwo-Yòhánà Awɛ̀fúnɛ, tsí ká kɛ́ɛ si náàwò tɛ́rɛ́-kã̀ wá fú òŋu ńǹsɛ̃̀ɛ̃́.

26 Kíbí ólú gbɔ́ bɛ́ɛ̀#ɛ́, ara kúu kpó. Ó ɖi, ó tse àtsùgbée kíbí ó wíìnyɛ̀, tsí ta iŋɛ́ si ńǹtá‐ɛ̀ nódzú-àledzò‐ɛ̀ ŋa#á, tsí kò wà wò ní òŋu kó kɔ̀ɔ́ fúu. 27 Tsí gbòkã́ gé#ɛ́, ó bɛ sɔ́dzà-kã̀ ní kó lɔ káà ɖéwo-Yòhánà wá. Tsí sɔ́dzà#á lɔ, tsí káà ɖéwo‐ɛ̀ nɛ́ɛ̀ŋà bɛ̀. 28 Tsí ó kɛ́ɛ si náàwò tɛ́rɛ́-kã̀ wáa tó. Tsí ó kɛ́ɛ, tsí ń bɔwɔ́-èkíɖã#á, tsí ɔma èkíɖã#á gbo kɛ́ɛ, tsí ń bɔwɔ́-ìná‐ɛ̀.

29 Kíbí ɔmatsɛ́-Yòhánà ŋa gbɔ́ bɛ́ɛ̀#ɛ́, à wáa lɔ káà kɛ́ àrágùɖé‐ɛ̀, tsí káà ń rì.

Yèésù sɛ̃ ɔ̀nyà ɛ̀gbɛ̀lɛ́ɛ̀gbɛ̀-kã̀ ńdzídzɛ

(Màtéwò 14:13-21, Lúkà 9:10-17, Yòhánà 6:1-14)

30 Náànyì-bɛ́ɛ̀, adzítsɛ́-Yèésù† ŋa bɔ̀ wá ńɖi-Yèésù, tsí wáa kpɛ̀rɔ́-iŋɛ́ yèé à tse ŋa#á òŋu ɛ̀kɔ́ yèé à tse fú ɔ̀nyà ŋa#á kpó fúu. 31 Náàsòkò nyɛ̀ŋɛ̀#ɛ́, ɔ̀nyà ŋa kpɔ̀, tsí wà lɔ, tsí wà bɔ̀, títí à kò nyáa rí ayè, tsí ká dzɛŋɛ́ gìɖì. Tsí ó wí fú ŋa ní: Àŋa kó sɔ́ lɔ ńǹɖì dzídzɛ̃̀ oɖé ńbí ɔ̀nyà kò wà#á, tsí àŋa kó lɔ káà míra oɖé.

32 Tsí òŋu-ŋa méèdzì káà wɔ̀ nɔ́kɔ̃̀-odzómi-kã̀, tsí dzì nɔ́ɔ̀nà làkóò ńbí ɔ̀nyà-kã̀ kò wà#á. 33 Tsí ɔ̀nyà kpíkpɔ̀ ti rí ŋa nóòtèrè, kíbí à làkóò#ɛ́, tsí à rí ŋa mà. Tsí ɔ̀nyà ŋa ǹɖe ńǹlú yèé ŋa wà bɛ̀ kpó#ɛ́, tsí yáré nɛ́sɛ̀, tsí tsúwádzú ŋa káà tó ńbí à làkóò#ɛ́. 34 Kíbí Yèésù tì nɔ́kɔ̃̀-odzómi#ɛ́, ó rí ní ɔ̀nyà ŋa tsɛ́ kì, tsí wáa ɖà si, tsí inɔ́-ŋa nyɔ́ɔ kpíkpɔ̀, iŋɛ́ yèé tse#ɛ́, à wà si kíbí àgùɖã̀ yèé ŋa kò nɛ́ ɛnɛ yèé kó ró ŋa#á bɛ́. Ńbɛ̀ɛ́, ó kpé ɛ̀kɔ́ si ńnɛ̀, tsí wà tsɛ̀kɔ́ fú ŋa kpíkpɔ̀ kpíkpɔ̀. 35 Kíbí alɛ́lɛ́ wà lɛ́ bàa#á, ɔmatsɛ́‐ɛ̀ ŋa sɔ́ tìmá‐ɛ̀, tsí wà wí fúu ní: Ńbí àŋa wà#á kí taánù, tsí alɛ́lɛ́ gbo ti wà lɛ́ ná. 36 Ó ɖi, kó wí fú ɔ̀nyà ŋa ní ká lɔ, àtóoríi ká nyáa tó ńǹtá-oko ŋa òŋu ńǹlú-oko yèé sɔ́má bɛ̀ ŋa#á, tsí ká lɔ káà ra dzídzɛ dzɛ.

37 Tsí ó wà wí fú ŋa ní: Àŋa ká-ŋa ká fú ŋa ńdzídzɛ!

Tsí à wà wí fúu ní: Ó ɖi, àŋa kàkó nyáa lɔ káà ra dzídzɛ òŋu owó-itsɛ́-ɔdzɔ́ igboó (200) wá fú ŋa ní ká dzɛ nɛ́.

38 Tsí ó wà bèrè ŋá ní: Kpɔ̃́nɔ́ mɛ́ɛló wà fú ŋa? Ó ɖi, ká lɔ káà ríi káyí.

Tsí à lɔ káà ríi, tsí à wáa wí fúu ní: Àŋa nɛ́ kpɔ̃́nɔ́ mɛ́ɛrú, tsí ɛdzã méèdzì gbo wà.

39 Ńbí à wà#á, kóko wà bɛ̀, tsí ǹɖe bàa fɛ̀ɖɛ̀ɖɛ̀ɛ̀. Tsí ó wí fú ŋa ní ká kpérí ɔ̀nyà ŋa dzokó lɔ tsùm tsùm ńǹtá-kóko#ɛ́.

40 Tsí à kpérí ŋa dzokó lɔ bɛ́ɛ̀ tsùm tsùm, ɔ̀nyà kã̀ŋa dzɛ́ ɔ̀nyà ɔgɔ́ɔrú, tsí ɔ̀nyà kã̀ŋa gbo dzɛ́ ɔ̀nyà maá lé nógóòdzì. 41 Ńbɛ̀ɛ́, ó ǹɖe, tsí kɛ́ kpɔ̃́nɔ́ mɛ́ɛrú#ɛ́ òŋu ɛdzã méèdzì#ɛ́, tsí kɛ́ odzú fú ìgbèrí, tsí wúùre fú Ɔ̀ɖáyé. Tsí ó wà tsɛ́ kpɔ̃́nɔ́ ŋa#á, tsí wà ń bɔwɔ́-ɔmatsɛ́‐ɛ̀ ŋa ní ká múu kpɛ̃́ fú ɔ̀nyà ŋa. Tsí ó kpɛ̃́ ɛdzã méèdzì#ɛ́ gbo fú ŋa kpó. 42 Tsí àŋa kpó, à dzɛ, tsí yó títí ó bɔ̀.

Yèésù bɔ àkɔ̃̀rɔ̃̀ ŋa nérè-Gɛ̀nɛ̀sàrɛ́tì

(Màtéwò 14:34-36, Mákò 6:53-56)

43 Tsí ɔmatsɛ́‐ɛ̀ ŋa se àbùbɔ̀-kpɔ̃́nɔ́ òŋu ɛdzã yèé bɔ̀ ŋa#á, tsí ń ɖà nágbã̀, títí ó kɔ̃́ agbã̀ máàméèdzì. 44 Ɔnɔkɛ̃̀ɛ̃ yèé ŋa dzɛŋɛ́#ɛ́, à lɔ kíbí ɔ̀nyà ɛgbɛ̀rú lé nɛ́gbàá ɛgbàá ɔ̀nà méèdzì (5000) bɛ́ɛ̀.

Yèésù rɛ̃̀ ńǹtá-oɖò

(Màtéwò 14:22-33, Yòhánà 6:16-21)

45 Ńbɛ̀ɛ́, ó mú ɔmatsɛ́‐ɛ̀ ŋa ńkpá ní ká sɛ̃̀ dzì nɔ́kɔ̃̀-odzómi#ɛ́, tsí ká tsúwádzú-òŋu làkóò náàtàkè-ɔ̀nɔ̀ɔ́ nɔ́wɔ́-ìlú-Bètsàyìɖá. Ńǹwèrè nyɛ̀ŋɛ̀#ɛ́, òŋu nákó wí fú èrò#ɛ́ ní kó bɔ̀ lɔ. 46 Kíbí ó wí fú èrò#ɛ́ ní kó lɔ, tsí ɔ̀nyà ŋa lɔ tã́#á, ó ǹɖe, tsí gu òkè-kã̀ lɔ, tsí káà wúùre.

47 Ńǹwèrè yèé ɔdzɔ́ kpa fúráfúrá#á, ɔkɔ̃̀#ɛ́ wà náàŋírĩ-oɖò#ɛ́ làkóò, tsí Yèésù òŋu níìkã̀ kí ńlɛ̀ si. 48 Tsí ó rí ní awu wà ɖɔ́kpɔ fú ŋa, tsí wà rĩ ŋá, tsí ɔkɔ̃̀#ɛ́ le tútù fú ŋa. Tsí ó ɖi náàkìkɔ-àtsɛ̃̀tsɛ̃̀, tsí ó wà rɛ̃̀ ńǹtá-oɖò#ɛ́ bàa ńɖi-ɔmatsɛ́‐ɛ̀ ŋa, tsí ó wà wo kó yà ŋá. 49 Kíbí à ríi, tsí ó rɛ̃̀ ńǹtá-oɖò#ɛ́ bàa#á, à ɖédzú odzú-àŋa rí ɔ̀rɔ̀ ni, tsí à wà ɖúgbe. 50 Àŋa kpó, à wà ríi, tsí dzidzi mú ŋa. Tsí ó tsí arũ gbòkã́, tsí wà fɔ̀ fú ŋa ní: È gbódzú dza! Èmi ni, ɛ̀ɖɔ̃̀ kó máa ɖá ŋɛ́!

51 Tsí ó wɔ̀ nɔ́kɔ̃̀-odzómi#ɛ́ bá ŋa, tsí awu#ɛ́ ɖóro. Tsí ó mù ŋá, títí ó láre arũ fú ŋa, 52 iŋɛ́ yèé tse#ɛ́, à kò gbɔ́ òkpì-iŋɛ́-àwùsì yèé ó tse òŋu kpɔ̃́nɔ́#ɛ́. Ɛ̀ɖɔ̃̀ kã̀ ŋá gbegbé.

53 Ńbɛ̀ɛ́, Yèésù òŋu ɔmatsɛ́‐ɛ̀ ŋa tu ɔkɔ̃̀#ɛ́ káà dzá náàtàkè-kã̀. À náa kpe ibɛ̀ ní Gɛ̀nɛ̀sàrɛ́tì. Tsí à mú ɔkɔ̃̀-ŋa so nétíɖò#ɛ́. 54 Kíbí à tì ńnɔ́-ɔkɔ̃̀#ɛ́, ɔ̀nyà ŋa rí Yèésù mà gbòkã́. 55 Tsí à wà yáré lɔ ńǹɖìkíìɖì nérè bɛ̀ kpó, tsí lɔ káà kɛ́ àkɔ̃̀rɔ̃̀ ŋa si ńbànkàrá wá fúu. Ńǹɖì kíìɖì yèé à náa gbɔ́ ní ó lɔ gé#ɛ́, à náa kɛ́ àkɔ̃̀rɔ̃̀ ŋa lɔ fúu bɛ̀. 56 Ńbí náa lɔ ŋa kpó#ɛ́, ńǹlú lákṹ gbo, ńǹlú tsígíɖí gbo, ɔ̀nyà ŋa náa kɛ́ àkɔ̃̀rɔ̃̀ ŋa wáa si náàbɔ̀ɔ́mɛ̀, tsí à náa wà tsìkálɛ̀ fúu ní kó dzɛ́, tsí àkɔ̃̀rɔ̃̀ ŋa#á kó mɔ́wɔ́ kã etí-àwù‐ɛ̀ gé.

Tsí ɛnɛ yèé ŋa wà mɔ́wɔ́ kã etí-àwù‐ɛ̀#ɛ́, àrɔ̃̀#ɛ́ wà tu àŋa kpó.