Lúkà 4

Ètsù ɖã́ Yèésù wò

1-2 Mímí-Ɔ̀ɖáyé† wà ńǹtá-Yèésù si, tsí ó ǹɖe nétí-oɖò-Yòɖánì bàa, tsí Mímí-Ɔ̀ɖáyé gbɛ̃́ɛ̃ lɔ nɔ́ɔ̀ɖã̀, tsí ó wà bɛ̀ títí fú ɔdzɔ́ ogóòdzì. Tsí Ètsù† wà bɛ̀, tsí wà ɖã́ã wò. Náàsòkò nyɛ̀ŋɛ̀#ɛ́, Yèésù kò dzɛŋɛ́-kã̀ kpókpó, tsí kíbí ɔdzɔ́#ɛ́ kò#ɛ́, ebi wà kpaá ńǹkɛ̀ɛ́.

3 Tsí Ètsù ǹɖe, tsí wà fɔ̀ fúu ní: Bí ó dzɛ́ Ɔma bíbí-Ɔ̀ɖáyé bɛ́ɛ̀ ìɖéǹɖè, ni kó wíìnyɛ̀ fú òkúta yèé bɛ́, tsí kó ɖi dzídzɛ káyí.

4 Tsí Yèésù dzɔ́ŋù fúu ní: À kɔ si ńǸwé-Ɔ̀ɖáyé† ní: “Kò tsi dzídzɛ gé ní náa fúnɛ náàyɛ̀#ɛ́.”^*

5 Tsí Ètsù nyí, tsí gbɛ̃́ɛ̃ lɔ ńɖi-gíga-kã̀, tsí ó mú ìlú ŋa kpó ńǹtalɛ̀#ɛ́, tsí ń ɖíre fúu náàrìkã̀ntso. 6 Tsí ó wà fɔ̀ fúu ní: Òŋu nákó múu dzoyè si ńǹtá-ŋa kpó, tsí iŋɛ́-ɛ̀fɛ́-ŋà ŋa kpó nákó dzɛ́ tɛ̀ɛ̀. Iŋɛ́ yèé tse#ɛ́, à mú ikpá‐ɛ̀ bɔwɔ́-òŋu, tsí ó dzɛ́ tòŋu si. Tsí bí ó ɖé fú òŋu ná, òŋu nákó nyáa kɛ́ɛ fú ɔ̀nyà-kã̀. 7 Ńbɛ̀ɛ́#ɛ́, bí ó dzɛ́, tsí mú erí kãlɛ̀ fú òŋu, òŋu nákó kɛ́ iŋɛ́ ŋa#á kpó bɔwɔ́‐ɛ̀.

8 Tsí Yèésù tɔ́ wí fúu ró ní: À kɔ si ńǸwé-Ɔ̀ɖáyé ní: “Ɔlɔ́dzɔ́ Ɔ̀ɖáyé-ɛ̀ɛ gé ní náa mú erí kãlɛ̀ fú#ɛ́, tsí òŋu níìkã̀ntso gé ní nàa wà sɛ̃̀#ɛ́.”^*

9-11 Tsí Ètsù nyí ró, tsí gbɛ̃́ɛ̃ lɔ ńYèrúsàlɛ́mì, tsí kɛ́ɛ lɔ káà ń ɖóro néwo-ilé-Ɔ̀ɖáyé†#ɛ́ róŋróŋ. Tsí wà fɔ̀ fúu ní: À kɔ si ńǸwé-Ɔ̀ɖáyé ní: “Ɔ̀ɖáyé nákó fɔ̀ fú adzítsɛ́-ɔ̀rɔ̃†‐ɛ̀ ŋa ní ká máa yɛ̀ nára-ɛ̀ɛ, tsí à nákó tɔ́wɔ́ gbàɛ́, àtsùgbée ɛ̀ya kó máa yaɛ́.”^* Ó ɖi báàyí fee, bí ó dzɛ́ Ɔma bíbí-Ɔ̀ɖáyé bɛ́ɛ̀ ìɖéǹɖè, ni kó kɔ ara‐ɛ̀ dzɔ̀ɔ́ ti ńǹgbèrí bɛ̀ wá ńlɛ̀ káyí.

12 Tsí Yèésù gbo wà wí fúu ró ní: À kɔ si ńǸwé-Ɔ̀ɖáyé ní: “Máa ɖã́ Ɔlɔ́dzɔ́ Ɔ̀ɖáyé-ɛ̀ɛ wò.”^*

13 Kíbí Ètsù ɖã́ã wò gbà nɔ́ɔ̀nà ŋa ńǹrɔ́ǹrɔ́ lɔ bɛ́ɛ̀ kpó tã́#á, ó ǹɖe lɔ, tsí wà ɖóro ɖe ɔdzɔ́ òmírɛ̃̀ ró.

Ɛnɛ-ìlú-Nàsàrɛ́tì ŋa kò gba Yèésù gbɔ́

(Màtéwò 13:53-58, Mákò 6:1-6)

14 Náànyì-bɛ́ɛ̀#ɛ́, Yèésù wáa ǹɖe nɔ́ɔ̀ɖã̀#á, tsí sɛ̃̀ wá nérè-Gàlìlé, tsí ikpá-Mímí-Ɔ̀ɖáyé† wà ńǹtá‐ɛ̀ si, tsí à náa wà gbɔ́ ìdzã̀mà‐ɛ̀ wérí nérè-ìyabɛ̀ kpó. 15 Kíbí ó wà nérè-Gàlìlé si#ɛ́, náa wà lɔ ńlé-ìkpàɖé-ɔma-Ìyúɖà ŋa†, tsí náa wà tsɛ̀kɔ́ fú ɔ̀nyà ŋa bɛ̀. Tsí ɔ̀nyà ŋa kpó náa wà nyɛ̀ɛ́.

16 Tsí ó ɖi nɔ́dzɔ́-kã̀, tsí ó lɔ káà tó ńNàsàrɛ́tì. Ńǹlú yèé à sɛ̃̀ɛ̃́ títí ó ɖonùgbó#ɛ́ ńnɛ̀ɛ́. Tsí ó ɖi nɔ́dzɔ́-ìmíra†, tsí ó lɔ ńlé-ìkpàɖé-ɔma-Ìyúɖà ŋa kíbí náa ti lɔ#ɛ́. Tsí ó ǹɖe, tsí kó kã afɔ̀-Ɔ̀ɖáyé fú ɔ̀nyà ŋa. 17 Tsí à kɛ́ ìwé-kã̀ fúu. Ìwé-Yèsáyà†, agbáfɔ̀-Ɔ̀ɖáyé fɔ̀†-kã̀ ní à kɛ́ fúu#ɛ́. Tsí ó gbàá, tsí tsíi, tsí rí ńbí Yèsáyà kɔ si ní:

18 “Mímí-Ɔlɔ́dzɔ́ wà ńǹtá-mi si. Iŋɛ́ yèé tse#ɛ́,

Ɔ̀ɖáyé tsã̀ mí ní èmi kó wáa dzíkɔ̀ ɖíɖɔ̃̀ fú adzìyàkú ŋa.

Ó bɛ̀ mí wá ńɖi-arú ŋa ní n wáa dzíkɔ̀ fú ŋa

ní à nákó gbà ŋá dzɔ̀ɔ́.

Ó bɛ̀ mí wá ńɖi-afɔ́dzú ŋa gbo

ní n wáa dzíkɔ̀ fú ŋa ní à nákó wáa rírã.

Ó bɛ̀ mí wá ńɖi-olí-ìréré ŋa gbo

ní à kàkó dzára fú ŋa ró.

19 Ó bɛ̀ mí gìɖì wá ní èmi kó wáa dzíkɔ̀ fú ɔ̀nyà ŋa

ní ɔɖɔ̃́-ire wáa tó,

ɔɖɔ̃́ yèé Ɔ̀ɖáyé nákó wáa tse ore fú ŋa#á, ɔɖɔ̃́#ɛ́ wáa tó.”^*

20 Kíbí ó kã ìwé#ɛ́ tã́#á, ó kákòó, tsí kɛ́ɛ fú àtsìtsɛ́ yèé wà bɛ̀#ɛ́, tsí káà dzokó, tsí kó tsɛ̀kɔ́ fú ŋa ńǹkɛ̀ɛ́. Tsí ɔ̀nyà ŋa kpó tadzú máa si, tsí wà wòó kokoko. 21 Tsí ó tsí arũ, tsí wà fɔ̀ fú ŋa ní: Iŋɛ́ yèé òŋu kã̀ ńǹsɛ̃̀ɛ̃́#ɛ́, náàsòkò yèé ó wà dzì nétí-ŋa#á ní ó wà tsɛ#ɛ́.

22 Tsí àŋa kpó, à fɔ̀ ní: Ó sã̀, àŋa gbɔ́.

Ó ɖi, afɔ̀-ire yèé ŋa wà bɔ́ ti nárũ‐ɛ̀#ɛ́, afɔ̀ ŋa#á wà mù ŋá. Tsí à wà fɔ̀ ní: Idza#á fee, kò tsi ɔma-Yòsɛ́fù† niì? Tsí òŋu ní wà wíìnyɛ̀ bɛ́ɛ̀#ɛ́ɛ̀?

23 Tsí ó wà wí fú ŋa ní: Òŋu mà ní à nákó kpòwe fú òŋu ní: Abɔnɛ, bɔ ara-ɛ̀ɛ káyí. Tsí à nákó wí fú òŋu ní àŋa gbɔ́ iŋɛ́ yèé ŋa òŋu tse ńǹlú-Kàfànàwú#ɛ́. Báàyí#ɛ́, òŋu kó tseé ńǹlú-òŋu gbo bí káyí. 24 Ó ɖi, òŋu wà wí òtítɔ́ fú ŋa ní fee, à kà gba agbáfɔ̀-Ɔ̀ɖáyé fɔ̀-kã̀ kpókpó ńǹlú‐ɛ̀ rere láyé.

25 Ó ɖi, à kò wà tédzú Èlíyà† niì? Agbáfɔ̀-Ɔ̀ɖáyé fɔ̀-kã̀ ńlɛ̀-Ìsàràyɛ́lì† ni. Ńǹwèrè yèé ó gbé#ɛ́, ɔ̀ɖã́ mú títí fú ɔɖɔ̃́ mɛ́ɛta òŋu àbɔ̀, tsí ebi wà dzà kũkũ ńlɛ̀-Ìsàràyɛ́lì#ɛ́ bí kpó. Ńǹwèrè nyɛ̀ŋɛ̀#ɛ́, okpó kpíkpɔ̀ wà ńlɛ̀#ɛ́ bɛ̀. 26 Kíbí ó dzɛ́ bɛ́ɛ̀ gìɖì#ɛ́, Ɔ̀ɖáyé kò bɛ Èlíyà lɔ ńɖi-ɔ̀kã̀-ŋa-kã̀ kpókpó, tsí kó lɔ káà mɔ́wɔ́ gbè fúu. Ó ɖi, ńɖi-okpó-kã̀ ńǹlú-Sàrɛ̀kpátà gé ní ó bɛ̀ɛ́ lɔ#ɛ́. Ìlú-Sàrɛ̀kpátà#á kò wà ńlɛ̀-Ìsàràyɛ́lì. Nérè-Sìɖɔ̃́nì ní ó wà#á.

27 Èkéèdzì#ɛ́, Èlìsáyà gbo, agbáfɔ̀-Ɔ̀ɖáyé fɔ̀ ké ní òŋu gbo dzɛ́ ńlɛ̀-Ìsàràyɛ́lì#ɛ́. Ńǹwèrè-tɛ̀ɛ̀ gbo#ɛ́, aɖɔ́ɔ̀tɛ̀† kpíkpɔ̀ wà ńlɛ̀-bɛ̀, tsí Ɔ̀ɖáyé kò bɔ ɔ̀kã̀ kpókpó náàŋírĩ-ŋa. Ó ɖi, Nàmánì ti ilɛ̀-Sìrí gé ní ó bɔ#ɛ́.

28 Kíbí à gbɔ́ afɔ̀ nyɛ̀ŋɛ̀ ŋa#á, inɔ́ bí ŋa kpó ńnɔ́-ilé#ɛ́, 29 tsí à ǹɖe kpó, tsí lée fùɖá ńǹlú#ɛ́. Ìlú#ɛ́ wà ńǹtá-òkè-kã̀ ni, tsí à lée lɔ néwo-òkè#ɛ́, tsí ká lɔ káà télèé sɔ nɔ́ɔ̀gbɔ̃. 30 Ńbɛ̀ɛ́, kíbí à tó néwo-òkè#ɛ́, ó nyí, tsí sì gbà náàŋírĩ-ŋa wáa lɔ fú ara‐ɛ̀.

Yèésù lé edzò-kã̀ sɛ̃̀ náànyì-ɔ̀nyà-kã̀

(Mákò 1:21-28)

31 Tsí Yèésù ǹɖe, tsí lɔ ńǹlú-òmírɛ̃̀-kã̀ nérè-Gàlìlé. À náa kpe ìlú#ɛ́ ní Kàfànàwú. Tsí nɔ́dzɔ́-ìmíra† kã̀kã̀#á, náa wà lɔ ńlé-ìkpàɖé-ɔma-Ìyúɖà ŋa†, tsí wà tsɛ̀kɔ́ fú ɔ̀nyà ŋa. 32 Tsí ɛnɛ yèé wà bɛ̀ ŋa, tsí wà rɛ̃tígbè‐ɛ̀#ɛ́, ɛ̀kɔ́‐ɛ̀ mù ŋá. Iŋɛ́ yèé tse#ɛ́, afɔ̀‐ɛ̀ ŋa nɛ́kpá tó bɛ́ɛ̀.

33 Tsí ó ɖi nɔ́dzɔ́-kã̀, tsí ó wà tsɛ̀kɔ́ fú ŋa, tsí ɔ̀nyà-kã̀ gbo wà bɛ̀, tsí edzò†-kã̀ wà ɖɔ́kpɔ fúu. Tsí ɛnɛ#ɛ́ gírí, tsí ɖúgbe kũkũ ní: 34 Hàá! Ètsúwɛ́ɛ́ɛ̀! Yèésù ti Nàsàrɛ́tì, kí ò wà wò fú wa ni? Ò wá, tsí o wáa ra wá ní nɔ̀? Èmi, ǹ mɛ̀ɛ́, ìwɔ ní dzɛ́ ɛnɛ yèé Ɔ̀ɖáyé tsã̀, tsí bɛ̀ ti nɔ́ɔ̀rɔ̃ wá#á.

35 Tsí Yèésù kɔ̀ fúu ní: Kóyá! Kó tsikó, tsí kó sɛ̃̀ náànyì-idza#á ńǹsɛ̃̀ɛ̃́!

Gbòkã́#á, edzò#ɛ́ mú idza#á, tsí ń tsɔlɛ̀ nódzú-ɔ̀nyà ŋa, tsí sɛ̃̀ náànyì‐ɛ̀, tsí lɔ náàrìmáa tse íbàɖí-kã̀ kpókpó báa.

36 Tsí ɛnɛ yèé wà bɛ̀ ŋa#á, dzidzi mú ŋa kpó, tsí à wà ɖìkpá fú ara-ŋa, tsí wà fɔ̀ ní: Oŋù-ìrɔ́ mɛ̀ɛ́ ní? Kpɔ́ dza! È rí gé! Ó nɛ́kpá títí kã́rũ-edzò ŋa gìɖì gbo, tsí à sɛ̃̀ náànyì-idza#á náa!

37 Ńbɛ̀ɛ́, à wà gbɔ́ ìdzã̀mà‐ɛ̀ ńǹlú ŋa wérí kpó nérè-ìyabɛ̀.

Yèésù bɔ àkɔ̃̀rɔ̃̀ kpíkpɔ̀ ńǹlú-Kàfànàwú

(Màtéwò 8:14-17, Mákò 1:29-34)

38 Yèésù ǹɖe ńlé-ìkpàɖé-ɔma-Ìyúɖà ŋa†, tsí lɔ ńlé-Sìmɔ́nì. Kíbí ó káà tó#ɛ́, otútù lákṹ-kã̀ ki ìnà-aya-Sìmɔ́nì si, tsí à tsìkálɛ̀ fú Yèésù ní kó ríi fú àŋa ɖé.

39 Tsí Yèésù sɔ́má‐ɛ̀, tsí balɛ̀ si ńǹtá‐ɛ̀, tsí gbãdzú fefe bá otútù#ɛ́ ní: Kó máa ɖɔ́kpɔ fúu ró!

Tsí otútù#ɛ́ gbã̀ã́, tsí ó ǹɖe gbòkã́, tsí gbà ŋá náàledzò.

40 Tsí ó ɖi ńmúmù-odzúùrɔ̃̀, kíbí ɔdzɔ́-ìmíra† tã́#á, tsí ɛnɛ-ìlú-ŋa#á wà kɛ́ àkɔ̃̀rɔ̃̀-ŋa wá ńɖɔ̀‐ɛ̀ ní kó bɔ ŋá. À kɛ́ àkɔ̃̀rɔ̃̀ ŋa ńǹrɔ́ǹrɔ́ kpó wá fúu ní kó bɔ ŋá. Tsí náa wà mɔ́wɔ́ lé ńǹtá-ŋa kã̀kã̀, tsí wà bɔ ŋá.

41 Kíbí ó wà mɔ́wɔ́ lé ńǹtá-ɔ̀nyà ŋa bɛ́ɛ̀#ɛ́, edzò† yèé ŋa wà ɖɔ́kpɔ fú ɔ̀nyà ŋa#á gbo wà sɛ̃̀ náànyì-ɔ̀nyà kpíkpɔ̀, tsí wà ɖúgbe fúu ní: Òŋu ní dzɛ́ Ɔma bíbí-Ɔ̀ɖáyé#ɛ́.

Tsí náa wà kɔ̀ fú ŋa ní: Ká máa ɖúgbe bɛ́ɛ̀! Ká tsikó!

Náa wí fú ŋa bɛ́ɛ̀, iŋɛ́ yèé tse#ɛ́, à ti mà ní Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á ní ó dzɛ́#ɛ́.

Yèésù wà dzíkɔ̀ ɖíɖɔ̃̀ nérè-Yùɖéyà

(Mákò 1:35-39)

42 Kíbí ilɛ̀ má#á, ó ǹɖe, tsí fùɖá ńnɔ́-ìlú#ɛ́, tsí lɔ ńǹɖì dzídzɛ̃̀-kã̀ oɖé, ńbí ɔ̀nyà ŋa kò wà#á. Ńǹwèrè nyɛ̀ŋɛ̀#ɛ́, ɔ̀nyà-ìlú ŋa#á wà wòó wérí títí à káà ríi. Tsí kíbí à tó ńɖɔ̀‐ɛ̀#ɛ́, à wà wí fúu ní: Kó gbé ńɖɔ̀-àŋa. Ó ɖi, kó máa bɔ̀ lɔ ró.

43 Tsí ó wí fú ŋa ní: Ó wà ní òŋu kó lɔ ńǹlú-àtíbɔ̀ ŋa gbo, tsí òŋu kó lɔ káà dzíkɔ̀ ɖíɖɔ̃̀ fú ŋa ní ìwèrè tó, tsí Ɔ̀ɖáyé kó wáa dzoyè. Náàtsùgbée bɛ́ɛ̀ ní Ɔ̀ɖáyé bɛ òŋu wá#á.

44 Tsí ó lɔ nérè-Yùɖéyà wérí kpó, tsí káà dzíkɔ̀-Ɔ̀ɖáyé ńlé-ìkpàɖé-ɔma-Ìyúɖà ŋa†.