Lúkà 9

Yèésù bɛ ɔmatsɛ́‐ɛ̀ máàméèdzì ŋa#á lɔ ńǹlú ŋa wérí

Ó ɖi nɔ́dzɔ́-kã̀, tsí Yèésù kpe ɔmatsɛ́‐ɛ̀ máàméèdzì ŋa#á kpìɖé, tsí ó fú ŋa ńkpá òŋu ɛ̀tsɛ ní ká wà ń lé edzò† ìrɔ́ ɔ̀kã̀lɔ́ɔ̀kã̀ kpó yèé ŋa wà ɖɔ́kpɔ fú ɔ̀nyà ŋa#á sɛ̃̀ náànyì-ŋa, tsí ká wà bɔ àrɔ̃̀ ŋa gbo. 2 Tsí ó bɛ̀ ŋá ní ká lɔ káà bɔ àkɔ̃̀rɔ̃̀ ŋa, tsí ká dzíkɔ̀ ní: Ìwèrè sɔ́má tã́, tsí Ɔ̀ɖáyé kó wáa dzoyè.

3 Tsí ó wí fú ŋa ní: Bí à làkóò, ká máa banɛ́ iŋɛ́-kã̀ kpókpó. Ká máa banɛ́ ɔ̀kpá, ká máa banɛ́ àkpò, ká máa banɛ́ dzídzɛ òŋu owó. Ɔ̀nyà-kã̀ kó máa banɛ́ àwù méèdzì. 4 Ó ɖi, ńkpàtá ɔ̀kã̀lɔ́ɔ̀kã̀ yèé nákó gbà ŋá náàledzò#ɛ́, ká máa ǹɖe ńkpàtá#á títí fú ɔdzɔ́-ɖíǹɖe-ŋa ńǹlú#ɛ́. 5 Tsí bí à tó ńǹlú-kã̀, tsí ɔ̀nyà-kã̀ kò gbà ŋá, ká ǹɖe bɛ̀, tsí ká gbákpá gbɛ́sɛ̀ náfɔ̀-ŋa, àtsùgbée ɛnɛ-ìlú ŋa#á ká mà ní ó tsɛdzɔ́-àŋa ká-ŋa ńnɛ̀ɛ́.

6 Tsí ɔmatsɛ́-Yèésù† ŋa#á ǹɖe, tsí wà rɛ̃̀ ńǹlú ŋa wérí, tsí wà dzíkɔ̀ ɖíɖɔ̃̀ làkóò, tsí wà bɔ àkɔ̃̀rɔ̃̀ ŋa gbo wérí.

Èróɖì wà gbɔ́ ìdzã̀mà-Yèésù, ó ɖi, kò ɖɔ̃̀ fúu

(Màtéwò 14:1-12, Mákò 6:14-29)

7 Náàsòkò nyɛ̀ŋɛ̀#ɛ́, Èróɖì† dzɛ́ ólú si nérè-Gàlìlé si. Tsí Yèésù òŋu ɔmatsɛ́‐ɛ̀ ŋa gbo wà ńtsɛ́ si. Tsí Èróɖì wà gbɔ́ ìdzã̀mà-iŋɛ́ yèé à wà tse ŋa#á kpó, tsí kò ma yèésí kó mú ńnɛ̀. Iŋɛ́ yèé tse#ɛ́, ɔ̀nyà kã̀ŋa wà fɔ̀ ní: Yèésù#ɛ́ ni Yòhánà† Awɛ̀fúnɛ ni, tsí ó sɛ̃̀ dzí ti náàŋírĩ-òkú ŋa wá náyé#ɛ́. 8 Tsí ɔ̀nyà kã̀ŋa òŋu wà wí ní: Èlíyà†, agbáfɔ̀-Ɔ̀ɖáyé fɔ̀† yèé gbé wáa lɔ dzɔ̀ɔ́ dzɔ̀ɔ́#ɛ́ ní sɛ̃̀ wá ró#ɛ́. Tsí olòmírɛ̃̀ kã̀ŋa òŋu wà fɔ̀ ní: Agbáfɔ̀-Ɔ̀ɖáyé fɔ̀ ti dzɔ̀ɔ́ dzɔ̀ɔ́ ŋa-kã̀ ní sɛ̃̀ dzí ti náàŋírĩ-òkú ŋa wá náyé#ɛ́.

9 Tsí Èróɖì ní: Òŋu ti fɔ̀, tsí à ɖéwo-Yòhánà wá fú òŋu ná. Tsí nɛ̀ɛ́ dzɛ́ ɛnɛ yèé à wà wíìnyɛ̀ ti nára‐ɛ̀ bɛ́ɛ̀#ɛ́ ná?

Tsí ó wà wo odzú‐ɛ̀ kó kã Yèésù#ɛ́ òŋu ká‐ɛ̀.

Yèésù sɛ̃ ɔ̀nyà ɛ̀gbɛ̀lɛ́ɛ̀gbɛ̀-kã̀ ńdzídzɛ

(Màtéwò 14:13-21, Mákò 6:30-44, Yòhánà 6:1-14)

10 Adzítsɛ́-Yèésù† ŋa sɛ̃̀ bɔ̀ wá, tsí wáa fɔ iŋɛ́ yèé à tse ŋa#á kpó fú Yèésù. Tsí ó kpè ŋá lɔ nákpálà-kã̀, tsí òŋu-ŋa méèdzì sɔ̃́ŋú, à ǹɖe, tsí lɔ nérè-ìlú-Bètsàyìɖá. 11 Tsí ɔ̀nyà-ɛ̀gbɛ̀lɛ́ɛ̀gbɛ̀ yèé wà bɛ̀#ɛ́ mà, tsí à tsɛ́ kì, tsí ròó bá lɔ. Tsí kíbí à káà tó#ɛ́, Yèésù kò lé ŋa. Ó gbà ŋá, tsí wà tsɛ̀kɔ́ fú ŋa ti nára-kíbí Ɔ̀ɖáyé nákó wáa dzoyè gbà#á, tsí ó wà bɔ àkɔ̃̀rɔ̃̀ ŋa gbo.

12 Tsí ɔdzɔ́#ɛ́ ɖɛká, tsí ɔmatsɛ́-Yèésù† máàméèdzì ŋa#á ǹɖe, tsí sɔ́ tìmá‐ɛ̀, tsí wà fɔ̀ fúu ní: Kó wí fú èrò#ɛ́ ní ká bɔ́ lɔ, àtsùgbée ká nyáa lɔ ńǹlú-oko ŋa òŋu ńǹtá-oko yèé wà sɔ́má bɛ̀ ŋa#á, tsí lɔ káà wo dzídzɛ, tsí ká dzɛ, tsí wo ìɖìsũ̀ gbo. Iŋɛ́ yèé tse#ɛ́, ńbí yèé àŋa wà si#ɛ́ kí taánù.

13 Tsí ó fɔ̀ ní: Àŋa ká-ŋa ká fú ŋa ńdzídzɛ.

Tsí à fɔ̀ ní: Kpɔ̀ɔ́! Kpɔ̃́nɔ́ mɛ́ɛrú òŋu ɛdzã méèdzì gé ní wà fú àŋa#á. Ó wà wò ní àŋa kó lɔ káà ra dzídzɛ wá fú ɔ̀nyà ɛ̀gbɛ̀lɛ́ɛ̀gbɛ̀ yèé ŋa niì?

14 Ɔnɔkɛ̃̀ɛ̃ yèé ŋa wà bɛ̀#ɛ́, à lɔ kíbí ɔ̀nyà ɛgbɛ̀rú lé nɛ́gbàá ɛgbàá ɔ̀nà méèdzì (5000) bɛ́. Tsí ó wí fú ɔmatsɛ́‐ɛ̀ ŋa#á ní: Ká kpérí ɔ̀nyà ŋa dzokó tsùm tsùm lɔ kíbí ìmarũ-ɔ̀nyà maá lé nógóòdzì ńǹɖì kã̀kã̀.

15 Tsí ɔmatsɛ́‐ɛ̀ ŋa dzɛ́, tsí à tse tsí ɔ̀nyà ŋa dzokó kpó bɛ́ɛ̀ lɔ.

16 Tsí ó ǹɖe, tsí kɛ́ kpɔ̃́nɔ́ mɛ́ɛrú òŋu ɛdzã méèdzì#ɛ́, tsí kɛ́ odzú fú ìgbèrí, tsí wúùre fú Ɔ̀ɖáyé fú dzídzɛ#ɛ́, tsí wà tsɛ́ ŋa, tsí wà ń bɔwɔ́-ɔmatsɛ́‐ɛ̀ ŋa ní ká ń kpɛ̃́ fú èrò#ɛ́. 17 Tsí à dzɛ, tsí yó kpó títí ó bɔ̀. Tsí ɔmatsɛ́‐ɛ̀ ŋa se àbùbɔ̀ yèé bɔ̀ ńlɛ̀ ŋa#á, tsí ń ɖà nágbã̀ máàméèdzì, tsí à kɔ̃́ kpó.

Òkúta fɔ ɛnɛ yèé Yèésù dzɛ́#ɛ́ nódzú-ɔ̀nyà kpó

(Màtéwò 16:13-20, Mákò 8:27-30)

18 Ó ɖi nɔ́dzɔ́-kã̀ ró, tsí Yèésù lɔ nákpálà-kã̀, tsí wà wúùre, tsí ɔmatsɛ́‐ɛ̀ ŋa gbo wà bɛ̀ si. Tsí ó nyí, tsí wà bèrè ŋá ní: Afɔ̀ mɛ̀ɛ́ èrò#ɛ́ wà wí ti nára-òŋu ná?

19 Tsí à wà dzɔ́ŋù fúu ní: Ɔ̀nyà kã̀ŋa ní ó dzɛ́ Yòhánà† Awɛ̀fúnɛ. Ɔ̀nyà kã̀ŋa gbo ní ó dzɛ́ Èlíyà†, agbáfɔ̀-Ɔ̀ɖáyé fɔ̀† yèé gbé wáa lɔ dzɔ̀ɔ́ dzɔ̀ɔ́#ɛ́. Tsí ɔ̀nyà kùbɔ̀ ŋa gbo wà fɔ̀ ró ní agbáfɔ̀-Ɔ̀ɖáyé fɔ̀ ti dzɔ̀ɔ́ dzɔ̀ɔ́ òmírɛ̃̀-kã̀ ní ó dzɛ́, tsí sɛ̃̀ dzí ti náàŋírĩ-òkú ŋa wá náyé#ɛ́.

20 Tsí Yèésù ní: Tsí nódzú tàŋa òŋu fe, nɛ̀ɛ́ òŋu dzɛ́?

Tsí Òkúta tsí arũ, tsí dzɔ́ŋù fúu ní: Òŋu ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á.

21 Tsí Yèésù kɔ̀ fú ŋa ní: Tsɛ́m! Ɔ̀kã̀-ŋa-kã̀ kpókpó kó máa fɔ̀ɔ́ fú ɔ̀nyà-kã̀ oo. 22 Ó ɖi, ó wà ní òŋu, Ɛnɛ yèé ɔ̀nyà bí#ɛ́†, òŋu kó réré kpíkpɔ̀, tsí onùgbó-ìlú ŋa òŋu onùgbó-atsɛbɔ-Ɔ̀ɖáyé† ŋa má nára-akɔ́nɛ nɛ́kpa-Ɔ̀ɖáyé† ŋa ká kɔ afɔ̀-òŋu, tsí sɔ́ òŋu fú ikú, tsí ká kpa òŋu, tsí nɔ́dzɔ́-ɛ̀kɛ́ɛta‐ɛ̀ òŋu nákó sɛ̃̀ dzí ti náàŋírĩ-òkú ŋa wá náyé.

23 Tsí ó wà wí fú ɔ̀nyà kpó ní: Bí ɔ̀nyà-kã̀ wà wo kó tɛ̀ náànyì-òŋu, ɛnɛ nyɛ̀ŋɛ̀ kó máa nyíwo ara‐ɛ̀. Kó kɛ́ egi-ìɖáàgàlàdzà†‐ɛ̀ rù nɔ́dzɔ́ kɔ́dzɔ́, tsí kó tɛ̀ náànyì-òŋu. 24 Ó ɖi fee, ɛnɛ yèé wà wò ní òŋu kó gba ara-òŋu là, ɛnɛ nyɛ̀ŋɛ̀ nákó tsɛ̀rá. Tsí ɛnɛ yèé mú ikú‐ɛ̀ tà náàtsùgbé-òŋu#ɛ́, ɛnɛ nyɛ̀ŋɛ̀ nákó rí ɔlà. 25 Bí ɔ̀nyà-kã̀ ɖìgírí títí iŋɛ́-ayé gbaŋgba ŋa#á kpó dzɛ́ tɛ̀ɛ̀, tsí òŋu ká‐ɛ̀ tsɛ̀rá nàmí ó nɔ̀ fe, èrè mɛ̀ɛ́ wà ńnɛ̀ fúu?

26 Ó ɖi, bí ɔ̀nyà-kã̀ wà, tsí iŋɛ́-òŋu òŋu afɔ̀-òŋu ŋa gbo wà tsanɔ́ fúu, òŋu, Ɛnɛ yèé ɔ̀nyà bí#ɛ́, nɔ́dzɔ́ yèé òŋu nákó ti nɔ́ɔ̀rɔ̃ wá#á, iŋɛ́-ɛnɛ nyɛ̀ŋɛ̀ nákó tsanɔ́ fú òŋu gbo. Nɔ́dzɔ́ nyɛ̀ŋɛ̀#ɛ́, òŋu nákó wá òŋu iyì-adzítsɛ́-ɔ̀rɔ̃† ŋa, tsí ɔ̀nyà kpó nákó rí iyì-Boba-òŋu òŋu iyì tòŋu ká-òŋu gbo. 27 Òŋu wà wí fú ŋa ní fee, ɔ̀nyà kã̀ŋa wà náàŋírĩ-ŋa bí#ɛ́, à kàkó kú tã́ná à nákó rí kíbí Ɔ̀ɖáyé wà dzoyè gbà#á.

Ìwànwà-Yèésù kparɔ nódzú-ɔmatsɛ́‐ɛ̀ ŋa

(Màtéwò 17:1-13, Mákò 9:2-13)

28 Kíbí Yèésù wí bɛ́ɛ̀ tã́#á, ó ɖi nɔ́dzɔ́-ɛ̀kɛ́ɛdzɔ‐ɛ̀, tsí ó gbɛ̃́ Òkúta òŋu Yòhánà† má nára-Yàkúbù gbo, tsí à lɔ ńǹtá-òkè-kã̀, tsí ká lɔ káà wúùre. 29 Ńǹwèrè yèé ó wà wúùre#ɛ́, ìwànwà-odzú‐ɛ̀ kpàrɔ̀ gbòkã́, tsí èbò-ara‐ɛ̀ gbo wà fṹ pémpém, tsí wà kɔ nyɛ̀nyɛ̀nyɛ̀. 30 Gbòkã́#á, ɔ̀nyà méèdzì kã̀ŋa ɖóro gbèé si, tsí wà wíìnyɛ̀ báa. Mɔ̀ɔ́sè† òŋu Èlíyà† ni. 31 Kíbí à mú ara-ŋa ŋa Yèésù#ɛ́, iyì-Ɔ̀ɖáyé wà ńǹtá-ŋa si, tsí à wà wíìnyɛ̀ báa ti nára-kíbí ó bòkó lɔ ńYèrúsàlɛ́mì, tsí kó káà tse tsí ètò-Ɔ̀ɖáyé kó tsɛ, tsí kó kú#ɛ́. 32 Ńǹwèrè nyɛ̀ŋɛ̀#ɛ́, orũ rá Òkúta òŋu enìkéèdzì‐ɛ̀ ŋa lɔ si. Tsí à dzí, tsí odzú-ŋa má, tsí à rí ní iyì-Ɔ̀ɖáyé wà ńǹtá-Yèésù si, tsí à rí ɛnɛ méèdzì yèé ɖóro gbèé si ŋa#á gbo. 33 Kíbí ɛnɛ nyɛ̀ŋɛ̀ ŋa#á bòkó ǹɖe ńɖɔ̀‐ɛ̀#ɛ́, Òkúta wà wí fúu ní: Akɔ́nɛ, ó sã̀ héŋú ní àwa gbo, àa wà ńbíbɛ́ si. Báàyí#ɛ́, àa kó kɔ́ awúrɛ́ mɛ́ɛta fú ŋɛ́. Ɔ̀kã̀ nákó dzɛ́ tɛ̀ɛ, tsí ɔ̀kã̀ gbo nákó dzɛ́ ti Mɔ̀ɔ́sè, tsí ɛ̀kɛ́ɛta nákó dzɛ́ ti Èlíyà.

Òkúta kò ma iŋɛ́ yèé ó wà wí#ɛ́, ó bɔ́ ti nárũ‐ɛ̀ fáyì gé ni.

34 Ńǹwèrè yèé ó wà wíìnyɛ̀ bɛ́ɛ̀#ɛ́, irì-kã̀ ɖí, tsí bò ŋá málɛ̀ kpó gbòkã́. Kíbí irì#ɛ́ wà ɖí bò ŋá làkóò bɛ́ɛ̀#ɛ́, odzo tse ɔmatsɛ́ ŋa#á. 35 Tsí oŋù-kã̀ ɖɔ̃́ ti ńnɔ́-irì#ɛ́, tsí wà fɔ̀ fú ŋa ní: Ɛnɛ yèé bɛ́#ɛ́, Ɔma bíbí-mi ni, òŋu ní ǹ tsã̀#á. È rɛ̃tígbè‐ɛ̀.

36 Kíbí oŋù#ɛ́ ɖɔ̃́ tã́#á, Yèésù òŋu níìkã̀ gé ní ɔmatsɛ́‐ɛ̀ ŋa wà rí#ɛ́. Tsí iŋɛ́ yèé à rí#ɛ́, à tsikó kpíríkpírí, à kò wíi fú ɔ̀nyà-kã̀ kpókpó ti nɔ́dzɔ́ nyɛ̀ŋɛ̀ títí wáa fú àsòkò yèé Yèésù kò wà ńǹtalɛ̀#ɛ́ bá ŋa ró#ɛ́.

Yèésù lé edzò-kã̀ sɛ̃̀ náànyì-maɖé-kã̀

(Màtéwò 17:14-21, Mákò 9:14-29)

37 Tsí ó ɖi ńlɛ̀ má‐ɛ̀, tsí Yèésù òŋu ɔmatsɛ́‐ɛ̀ mɛ́ɛta ŋa#á tì nóòkè#ɛ́ wá, tsí ɔ̀nyà ŋa tsɛ́ kì, tsí wáa lɔ káà kpàɖé‐ɛ̀. 38 Náàŋírĩ-ŋa#á, ɔ̀nyà-kã̀ wà ɖúgbe ní: Akɔ́nɛ, ǹ tsìkálɛ̀ fɛ́ɛ, rí ɔma-mi ɔnɔkɛ̃̀ɛ̃ yèé fú mi ɖé! Ɔma ɔ̀kã̀ntso gé ní ó dzɛ́ fú mi#ɛ́. 39 Tsí edzò†-kã̀ wà ɖɔ́kpɔ fúu. Bí iŋɛ́#ɛ́ wá fúu gé, náa gírí. Tsí bí ó gírí, náa múu ɖúgbe kũkũ gbòkã́, tsí náa wà mìí kpó kpàkpàkpà, tsí arũ‐ɛ̀ gbo náa wà wó fùtùfútù. Tsí kà kɔ̀ɔ́ dzɔ̀ɔ́ bɛ́ɛ̀ gé. Náa múu réré gìɖì héŋú tã́ná kó kɔ̀ɔ́ dzɔ̀ɔ́. 40 Tsí òŋu wáa tsìkálɛ̀ fú ɔmatsɛ́‐ɛ̀ ŋa ní ká lé edzò#ɛ́ sɛ̃̀ náànyì‐ɛ̀, tsí à kò nyáa tóòsũ̀‐ɛ̀.

41 Tsí Yèésù tsí arũ, tsí ní: Ɛ̀ŋɛ, ɔma-ìsɛ̃̀ɛ̃́ ŋa, ɔ̀nyà-íbàɖí ŋa yèé è dzɛ́ si#ɛ́, è kè nɛ́ àkaralé nɛ́! Ìwèrè mɛ́ɛló màa tse bá ŋɛ́? Gbà mɛ́ɛló màa módzúgbó, tsí wà gba iŋɛ́ yèé è wà tse ŋa#á ná?

Tsí ó nyí, tsí wà wí fú boba-maɖé#ɛ́ ní: Kó gbɛ̃́ ɔma‐ɛ̀ wá fú òŋu.

42 Kíbí maɖé#ɛ́ sɔ́ bàa ńɖɔ̀‐ɛ̀ gé#ɛ́, edzò yèé wà ɖɔ́kpɔ fúu#ɛ́ sɛ̃̀ múu tsɔlɛ̀ ró, tsí múu nyílɛ̀ kũkũ, tsí wà mìí kpó kpàkpàkpà. Ńbɛ̀ɛ́, Yèésù gbãdzú fefe bá edzò#ɛ́ ní: Kóyá! Kó sɛ̃̀ náànyì-maɖé#ɛ́!

Gbòkã́#á, edzò#ɛ́ sɛ̃̀ náànyì‐ɛ̀, tsí ara‐ɛ̀ tù dzùù. Tsí ó gbɛ̃́ɛ̃ bɔwɔ́-boba‐ɛ̀. 43 Tsí ó mù ŋá kpó, iŋɛ́ yèé tse#ɛ́, à rí ní ikpá-Ɔ̀ɖáyé lákṹ ìɖéǹɖè.

Yèésù wà fɔ̀ ró ní òŋu nákó kú, tsí sɛ̃̀ dzí ti náàŋírĩ-òkú ŋa wá náyé

(Màtéwò 17:22-23, Mákò 9:30-32)

Ńbɛ̀ɛ́, iŋɛ́ yèé ŋa kpó Yèésù wà tse#ɛ́ wà mu ɔ̀nyà ŋa. Ńǹwèrè nyɛ̀ŋɛ̀#ɛ́, ó nyí, tsí wà wí fú ɔmatsɛ́‐ɛ̀ ŋa ní: 44 Òŋu bòkó wí afɔ̀-kã̀ fú ŋa, ká múu si néwo si rere. À nákó mú òŋu, Ɛnɛ yèé ɔ̀nyà bí#ɛ́†, tsí à nákó mú òŋu bɔwɔ́-ɔ̀nyà ŋa, tsí à nákó kpa òŋu nóòkú.

45 Ó ɖi, à kò wà gbɔ́ òkpì-afɔ̀#ɛ́. Ó wà kíbí iŋɛ́-kã̀ kpa ìsérè si fú ŋa ní ká máa rírã rí afɔ̀#ɛ́ ni. Tsí à wà sá gbo, tsí à kò nyáa bèrèé nóòkpì‐ɛ̀.

Nɛ̀ɛ́ dzɛ́ ɔ̀gá náàŋírĩ-ɔmatsɛ́-Yèésù ŋa?

(Màtéwò 18:1-5, Mákò 9:33-37)

46 Ɔmatsɛ́-Yèésù† ŋa wà dzinya ara-ŋa, tsí ká ma ɛnɛ yèé nákó dzɛ́ ɔ̀gá náàŋírĩ-ŋa#á.

47 Kíbí Yèésù ti ma ìsérè yèé wà néwo-ŋa#á, ó kɛ́ maɖé tsígíɖí-kã̀, tsí ń ɖóro nábɛ́‐ɛ̀. 48 Tsí ó ní: Bí ìwɔ-kã̀, ò gba ɔma tsígíɖí yèé bɛ́ náàtsùgbé-èmi, èmi ká-mi ní ò gbà#á. Tsí ìwɔ-kã̀ yèé gbà mí#ɛ́, ò gba ɛnɛ yèé bɛ̀ mí wá#á gbo. Ó ɖi, ɛnɛ yèé sɔ ara‐ɛ̀ ɖi tsígíɖí náàŋírĩ-ŋɛ́#ɛ́, ɛnɛ nyɛ̀ŋɛ̀ ní dzɛ́ ɔ̀gá fú ɛ̀ŋɛ kpó#ɛ́.

Bí ɔ̀nyà-kã̀ kò wà kɔ̀ ŋá, ɛnɛ nyɛ̀ŋɛ̀ dzɛ́ tiŋa si ni

(Mákò 9:38-41)

49 Tsí Yòhánà† tsí arũ, tsí wà wí fúu ní: Akɔ́nɛ, àŋa rí ɔ̀nyà-kã̀, tsí ó wà lo ɛ̀tsɛ‐ɛ̀, tsí wà ń lé edzò† ŋa sɛ̃̀ náànyì-ɔ̀nyà ŋa. Tsí àŋa kɔ̀ fúu ní kó máa tse bɛ́ɛ̀ ró, iŋɛ́ yèé tse#ɛ́, kò wà tɛ̀ náànyì‐ɛ̀ bá àŋa.

50 Tsí Yèésù wà wí fúu ní: Ká máa kɔ̀ɔ́ fúu. Ó ɖi, bí ɔ̀nyà-kã̀ kò wà kɔ̀ ŋá, ɛnɛ nyɛ̀ŋɛ̀ dzɛ́ tiŋa si ni.

Ìlú-oko-kã̀ ńSàmàríyà kò gba Yèésù náàledzò

51 Ìwèrè wà sɔ́má, tsí Ɔ̀ɖáyé kó kɛ́ Yèésù lɔ nɔ́ɔ̀rɔ̃. Tsí ó ɖi nɔ́dzɔ́-kã̀, tsí ó tã́ ńnɔ́-Yèésù kpó ní òŋu kó lɔ ńYèrúsàlɛ́mì gé ni. 52 Tsí ó bɛ ikɔ̀ tsúwádzú lɔ. Ɛnɛ yèé ó bɛ̀ ŋa#á, à ǹɖe, tsí lɔ ńǹlú-oko-kã̀ ńSàmàríyà, tsí à lɔ káà bere ìɖìsɔ̀-ŋa si. 53 Tsí ɛnɛ-ìlú ŋa#á kɔ̀. À kò wà wo ká gbà ŋá náàledzò, iŋɛ́ yèé tse#ɛ́, à wáa làkóò ńYèrúsàlɛ́mì ni.

54 Kíbí Yòhánà† òŋu Yàkúbù méèdzì gbɔ́ bɛ́ɛ̀#ɛ́, à ní: Ɔ̀gá, ó dzɔdzú‐ɛ̀ɛ ní ká bèrè, tsí iná kó ti nɔ́ɔ̀rɔ̃, tsí kó wáa ra ŋá kpóò?

55 Ńbɛ̀ɛ́, ó nyí wò ŋá, tsí ó lé ŋa nóòkpì-afɔ̀#ɛ́ ní kó kũ nárũ-ŋa.^*

56 Tsí à ǹɖe, tsí lɔ ńǹlú-òmírɛ̃̀.

Nɛ̀ɛ́ dzɔ kó tɛ̀ náànyì-Yèésù?

(Màtéwò 8:18-22)

57 Yèésù òŋu ɔmatsɛ́‐ɛ̀ ŋa, à wà nɔ́ɔ̀nà si làkóò, tsí ɔ̀nyà-kã̀ wà wí fú Yèésù ní: Ńǹɖì ɔ̀kã̀lɔ́ɔ̀kã̀ kpó yèé nákó lɔ#ɛ́, òŋu nákó wà tɛ̀ náànyì‐ɛ̀.

58 Tsí Yèésù dzɔ́ŋù fúu ní: Kɔ̀lɔ̀kɔ̀lɔ̀ ŋa nɛ́ ìɖìsũ̀, tsí ɛyɛ ŋa gbo nɛ́ ilé. Ó ɖi òŋu, Ɛnɛ yèé ɔ̀nyà bí#ɛ́†, òŋu kò nɛ́ ìɖì-ńbí òŋu kó mú éwo gbè#ɛ́.

59 Tsí ó nyí, tsí wà wí fú olòmírɛ̃̀ ní: Kó tɛ̀ náànyì-òŋu.

Tsí ɛnɛ nyɛ̀ŋɛ̀ dzɔ́ŋù ní: Òŋu tsìkálɛ̀, kó fú òŋu nɔ́ɔ̀nà, tsí òŋu kó lɔ káà ri boba-òŋu tã́ná.

60 Tsí Yèésù wà fɔ̀ fúu ní: Kó kɔ òkú ŋa dzɔ̀ɔ́ fú òkú ŋa, tsí ká ri ara-ŋa. Ó ɖi, òŋu, kó lɔ káà dzíkɔ̀ fú ɔ̀nyà ŋa ní ìwèrè sɔ́má tã́, tsí Ɔ̀ɖáyé kó dzoyè.

61 Tsí ɔ̀nyà-kã̀ gbo ní: Ɔ̀gá! Òŋu gbo, òŋu kó tɛ̀ náànyì‐ɛ̀. Ó ɖi, kó fú òŋu nɔ́ɔ̀nà, tsí òŋu kó lɔ káà kã́rã́ tòŋu ŋa tã́ná.

62 Tsí Yèésù wà wí fúu ní: À kà wà tsáko làkóò, tsí wà nyí wo ànyì. Ó ɖi, ìwɔ yèé wà tsáko, tsí wà nyí wo ànyì#ɛ́, Ɔ̀ɖáyé kàkó nyáa rí ìɖì fɛ́ɛ, tsí o tsitsɛ́-oyè‐ɛ̀.