Yoqhanl Yiqsu
Aeqyil e saeziq
1
Mqmae milcaeq zonglbeibei du hhei laefuq ae'lye za e aeqyil e saeziq mael laoq, ngaeteel haelgaeq yo, ma'ne maellye haelmol yo, haelmeeqlye fu gol, mol gol kaol aqlaq maellye so gol mael ngeelvae. 2 Aeqyil xilmael laoq mol du'lal wae, kaol ngaeteel mol gol wae, yaeqmeel zoqzenlkei, kaol noteel'ae haeqfu eiq zadeel e aeqyil mael geegaeq hhei biq, haeqfu eiq zadeel e aeqyil xilmael laoq, laefuq laoq aeqdae nyegael qiqgael zhol hhae, kaol ngaeteel'ae yol bi mol hhei gol laq wae. 3 Ngaeteel haelgaeq haelmol yo mael noteel'ae geegaeq hhei biq, xilnye laol, noteel eiq ngaeteel nyegael qiqgael zhol'eeq mael za'ae. Ngaeteel laoq aeqdae kaol yoqhhaeq e yaqyo Yesu Jidu nyegael qiqgael zhol'eeq mael za'ae. 4 Ngaeteel noteel'ae silqinq xihael cu biq mael laoq, aedeeteel'ae hhaol mael bong'lye bi zaq maoqlye lil.Aeqcael onglci'ae deel maoqhhae
5 Momil laoq aeqcael ngeelvae, yoqhhaeq e onglci'ae nahongqlye teel eiq maqza; ngaeteel yoqhhaeq e tyuqvae lye gaeq hhei mael'ae, yaeqmeel noteel'ae geegaeq hhei biq mael'ae. 6 Aedeeteel aeqyoyoq laoq yoqhhaeq nyegael qiqgael zhol'eeq mael za lil lye gee, ngeelfeiq, nahongqlye vae deel siq kaollaoq, zaqgiqgiq hhae, kaol zhen'liq mael maeq zongl yil ngeelvae. 7 Aedeeteel aeqcael onglci'ae deel mael, yoqhhaeq aeqcael onglci'ae deel laoqmyel kaollaoq, hhaellaelmyel qiqgael zhol'eeq mael za wae, kaol yoqhhaeq e yaqyo Yesu e siq maellye aedeeteel e gilzuqmyel golsiq mael zonglshol laeq vae.
8 Aedeeteel aeqyoyoq golsiq maqza yil lye gee kaollaoq, aeqyoyoq'ae zaqgiqgiqzaq hoq ngeelvae, kaol zhen'liq mael aedeeteel onglci'ae maqza vae. 9 Aedeeteel aeqyoyoq'ae golsiq za yae lye cenqrenl kaollaoq, Momil laoq zaqgiq maqgiq'ae, gongyil hhae, kaol aeqdilmyel aedeeteel e golsiq mael shelmianq laeq vae, kaol aedeeteel e maeq gongyil hael ciqshol laeq vae. 10 Aedeeteel aeqyoyoq golsiq maeq zonglpizaeq gol yil lye gee kaollaoq, Momil yaol zaqgiqgiq e qiq hhaeq'ae lye gee biq wae, kaol yoqhhaeq e saeziq mael aedeeteel e neemae onglci vae maqza wae.