Hhaoqsongl zail yi maoqlye gee gol mael
3
Ngael gaeq hael o, yaeqmeel ngael noteel'ae dil el feng xinl cuq biq. Xi liangq feng xinl taq'ae gee mael laoq, ngael noteel'ae geetae biq, kaol noteel e sholgaqlye neemae mael bi nyuqgeel lael, 2 Kaol noteel'ae senljyeq xianzhi laefuqmyel hael geedu e saeziq, kaol Hhaoqsongl jiulzuq e minllinl mael bi nyuqdeel maoqlye kaollil, minllinl xilmael laoq, shiqtuq lye noteel'ae hael geegaeq hhei biq mael ngeelvae. 3 Dilyiq loq maoq mael laoq, aeqnaol naolli naohaeq vae laoq ochoq'ae eelfu e cholyaeq zhol'ae, yoqhhaeteel laoq aeqyoyoq zhee mulgoq e nyuq maellye ochoq'ae eelfu biq, 4 Gee: "Yoqhhaeq gee gol e 'yi maoqlye' mael haeqvae za hhaemaeq? Aeqpyuq aeqdaehael sil myel ae'lye aeqnaol, halza haelzholhael laoq zhoq zonglbeibei du hhei fu nyedullye qiqsheel kaol'ae!" 5 Yoqhhaeteel baelyaelmyel silqinq xihael yelbael hhei vae. Zhoqmyel fu Momil laoq saeziq maellye mqmae kaol eelcuq ae'lye du'lal e milcaeq zongldu hhei vae; 6 Aeqnaol, Momil lye eelcuq ae'lye shilgail mael naqvuq biq kaol zonglmye vae. 7 Momil lye mqmae milcaeq mael aeqzaeq maellye pe mye maoqlye hhae, ngeelfeiq, yoqhhaeq aeqyoyo e saeziq maellye, xinlyangq maeq meeq e cholyaeqhael'ae shenqpanl biq kaol zonglmye biq fu keellye, yaeqmeel e mqmae milcaeq mael bi zadeel maoqlye hhae.8 Ngael gaeq hael o, xi qiq mal noteel maeq hhae yelbael hhei'ae, xilnye hhae: Hhaoqsongl'ae lye fu'li'laol qiq nao laoq qiqca (1000) hoq laoqmyel, qiqca (1000) hoq laoq qiq nao laoqmyel hhae. 9 Hhaoqsongl yoqhhaeq e biq laqngeel lye gee mael maeq dan'goq, qiqhhaeq laelhhaeq laoq yoqhhaeq dan'goq hhae lye kei biq hhae, qiqshiq laoq, yoqhhaeq noteel'ae yuanqliangl laeq hhae, yoqhhaeq qiq hhaeq yaol eiq maeq bi myeyil goq'ae, haetaeq eiq neemae paellael biq lye nyuq biq hhae. 10 Ngeelfeiq, Hhaoqsongl e naohaeq lolbiq laoqmyel keellael maoqlye hhae; tyuqfu qiq nao, mqmae mael yotyel tyelmae qiq tyel onglci'ae lye buyil hhei, mqmae taq'ae halzahael gilzuqmyel aeqzaeq zaeqmae lye pe mye byel hhei, milcaeq kaol milcaeq taq'ae halza haelzholhael gilzuqmyel pe mye byel hhei. 11 Xihael gilzuqmyel xilnye buyil maoqlye laol, noteel silqinq zongl mael taq'ae aeqdilmyel neemae senljyeq, kaol xinlyangq meeq, 12 Kaol Momil yi e naohaeq mael nae'nae yi lye geezaeq biq kaol doqdeelzaeq hhei maoqhhae. Tyuqfu qiq nao, mqmae mael aeqzaeq lye pe mye hhei, mqmae taq'ae halzahael gilzuqmyel aeqzaeq zaeqmae lye pe hual maoqlye kaol'ae. 13 Ngeelfeiq, yoqhhaeq biq laqngeel lye gee laoqmyel, aedeeteel yosheq e mqmae kaol yosheq e milcaeq doqdeelzaeq hhei, tyuqvae laoq gongyil mael duqlye zhol hhae.
14 Tyulkaol, ngael gaeq hael o, noteel silqinq xihael doqdeelzaeq hhei vae laol, aeqyoyoq'ae maeq bi zongl su mael hael zonglkeel ongl myel zongl maoqhhae, kaol qiqgiq geehhael maqza myel Hhaoqsongl nyegael maoqhoqli maoqhhae; 15 Kaol aedeeteel gaeq e aqsseq aeqnil Baoqloq laoq Momil yoqhhaeq'ae geel mael biq biq maellye noteel'ae xinl cu biq laoqmyel, aedeeteel e Hhaoqsongl noteel'ae baorongq biq kaol noteel caiq hha deqjiul hhae. 16 Yoqhhaeq halcu e xinl taq'ae silqinq xilmael geeyo'ae. Xinl onglci'ae aeqchee yilsi lye maeq loq myel za'ae, kaol suqhhaq maeq loq, puyil pu'lal myel e cholyaeq lye maq hoq myel yilsi geedu hhei, baeqjyelboq e suqhhaq mael'ae maq hoq myel yilsi geedu hhei laoqmyel hhae, kaol aeqyoyoq yaol zonglmye zaq hhei. 17 Tyulkaol, ngael gaeq hael o, noteel laoq laefuqmyel xilmael loq vae laol, fu'qye deelzaeq hhei maoqhhae, aeqgael duqlaq e cholyaeq e maq hoq maellye bi cheeqmu hhei, kaol aeqyoyoq xinlxin za myel ae'lye jyegae laeqngeel. 18 Noteel laoq aedeeteel e Hhaoqsongl kaol jiulzuq Yesu Jidu e endianq kaol zhishiq taq'ae heeqda lal maoqhhae. Rongqyaol mael yaeqnao ae'lye mael haeqfu naohaeq'ae keellye yoqhhaeq'ae biq biq lye nyuqlil. Amen!